Juan 21

Aín ꞌunánmicë unicama mëcën achúshi ꞌimainun rabë́mia Jesús chiquiracëtëcëan

1Usai ꞌitancëxa aín ꞌunánmicë unicama Tiberias cacë parúnpapa cuëbí ꞌain ca Jesús atumi pëasquitëcëni ësai ꞌiacëxa: 2Anu ca Simón Pedro, Tomás ꞌicëbi rabë́ bacë́an ꞌicë Gemelo caquinribi anëcë, a ꞌimainun Natanael, Galileanu ꞌicë Caná cacë ëmanu ꞌicë, a ꞌimainun Zebedeonën bëchicë rabë́ acamabë Jesusan ꞌunánmicë uni rabë́ribishi timë́cë ꞌiacëxa. 3Anuxun ca Simón Pedronën —cana tsatsa ricani cuani —quixun raíri cacëxa. Cacëxun ca —nuxribi cananuna mibë cuani —quixun cacancëxa. Cabiani nuntinu cëñúruquiani coónxun ricánquinbi ca tsatsa achúshirabi biáma ꞌicën. 4Bitsíma ꞌinëti ñancáishi pëcaraxun ca Jesús masinua nicë iscancëxa, isquinbi ca, ax ca Jesús ꞌicë quixun ꞌunáncanma ꞌicën. 5ꞌUnáncëxunmabi ca Jesusan atu cacëxa:

—¿Tsatsa caramina bicancëma ꞌain?

Cacëxun ca —cananuna bicëma ꞌai —quixun cacancëxa. 6Usaquian cacëxun ca Jesusan —nunti rapasu mëqueu ca mitsun rica nanpat, anua camina tsatsa biti ꞌai —quixun cacëxa. Cacëxun ax quicësabi oquin nanpátancëxun ca rica niancëxa. Ninquínbi ca ꞌaisamaira ꞌixúan tsatsan ꞌiëoia bërucasmacëxa. 7Usocëbëtan ca aín ꞌunánmicë uni achúshi, aira nuibacë, an —ax ca Nucën ꞌIbu ꞌicë —quixun Pedro cacëxa. Cacëxuinshi pëxúan nancë aín chupa bixun pañutancëx ca Pedro nuntinuax bacanu ꞌibúquiani Jesúsnu cuancëxa. 8Cuanmainun ca raírinëinshi Jesúsnu bëbati cien metrosa ꞌixun aín rica tsatsa buáquicë munuishi buani cuancëxa. 9Usa ꞌain ca masinu atun nunti ꞌarutancëx cëñúbucuatsini uquinbi tsi bëpubucënua tsatsa xuia isanan pánribi isacëxa. 10Isia ca Jesusan atu cacëxa:

—Bërími bicancë tsatsa ꞌitsamashi ca ꞌë bëxun.

11Cacëxun ca Simón Pedronën nuntinu ꞌiruxun, ciento cincuenta y tres tsatsa chabu buáquicë ꞌicë, atun rica nëriobëtsinquin masinu bëacëxa. Bëcëxbi ca tsatsa chabu ꞌitsaira ꞌaínbi atun rica narásquiama ꞌicën. 12Usoia ca Jesusan —ca pi ucan —atu cacëxa. Cacëxunbi ca aín ꞌunánmicë unicama achúshinënbi, ënëx ca Nucën ꞌIbu ꞌicë quixun camaxunbi ꞌunánquin, —¿ui caramina ꞌain? —quixun ñucáma ꞌicën. 13Usa ꞌain ca Jesusan atu rapasu niracëquin pán bixun atu ꞌinántancëxun tsatsaribishi ꞌináncëxa. 14Usai ca Jesús bamaxbi baísquitancëx rabëti pain ꞌitancëx aín ꞌunánmicë unicamami amiribishi chiquiracëtëcëancëxa.

Simon Pedronëan —ꞌëx cana asérabi mimi sinanin —quixun Jesús ca

15Pia sënë́ncë ca Jesusan Simón Pedro cacëxa:

—¿Jonásnën bëchicë, Simón, min ñucama sináncësamaira oi caramina ꞌëmi sinánquin ꞌë nuibatin? Cacëxun ca cacëxa:

—ꞌËn ꞌIbu, min camina ꞌunanin, ꞌën cana mi nuibatin.

Quia ca cacëxa:

—ꞌËn carnero bacë ca piminuxun ꞌat.

16Catancëxun ca amiribishi cacëxa:

—Jonásnën bëchicë, Simón, ¿caramina ꞌë nuibatin?

Cacëxun ca catëcëancëxa:

—ꞌËn ꞌIbu, min camina ꞌunanin, ꞌën cana mi nuibatin.

Quia ca cacëxa:

—ꞌËn carnero ca piminuxun ꞌat.

17Rabë́ oquin catancëxun ca amiribishi catëcëancëxa:

—Jonásnën bëchicë, Simón, ¿caramina ꞌë nuibatin?

Rabë́ ꞌimainun achúshi oquian —caramina ꞌë nuibati —quixun cacëxun ca Simón Pedronën —¿uisoti cara ꞌë ꞌitsoquin ñucatia? —quixun sinani masá nuituquin cacëxa:

—ꞌËn ꞌIbu, min camina camabi ñu ꞌunanin. Usa ꞌixun camina ꞌën cana mi nuibati quixun ꞌunanin.

Quia ca Jesusan cacëxa:

—ꞌËn carnero ca piminuxun ꞌat. 18Asérabi cana ꞌën mi cain, bëná ꞌaish camina minbi chupa pañuanan uinu caramina cuainsa tani anu cuancën. Usa ꞌaínbi ca xëniira ꞌaíshmi mëshpatia uni itsin chupa pañumixun uinu caramina cuainsama tani anubi mi buánti ꞌicën.

19An, usai cana bamati ꞌai quixun ꞌunánan bamaibi ami sinánquin ënquinma cana Nucën Papa Dios cuëënmiti ꞌai quixun ꞌunánun ca Jesusan usoquin Pedro cacëxa. Catancëxun ca —ꞌëx cuëëncësabi oíshi ca ꞌit —quixun cacëxa.

Aín ꞌunánmicë uni achúshi, a Jesusan nuibacë, a ñui quicë bana

20Usoquian cacëx caxu bësui cuainacëquin ca Pedronën a nuibairacë aín ꞌunánmicë uni, Juan, an Jesús nuibiania isacëxa. Ax ca an abëtan pi a rapasu tsóxun —uin cara uni mi ꞌinánti ꞌicë —quixun Jesús ñucáëxancë, a ꞌiacëxa. 21A uni isquin ca Pedronën Jesús ñucácëxa:

—¿Uisaira cara ënë uni ꞌiti ꞌic?

22Cacëxun ca Jesusan cacëxa:

—ꞌImitisa tanquin ꞌën ꞌimicë́xa ꞌëx utëcëntamainun ënë unix ënë nëtënu tsócëbëbi camina uisa cupí cara usai ꞌia quixun sinani bënëtima ꞌëx cuëëncësabi oíshi ꞌiti ꞌain.

23Usaquian cacëxun cuaxun ca an Jesusan bana cuacë unicaman —a uni sapi ca bamatima ꞌicë —quixun sinánxun chaniocëxa. Usa ꞌaínbi ca Jesusan —Juan ca bamatima ꞌicë —quixun Pedro cáma ꞌicën. Caquinma ca ësoquinshi cacëxa: “ꞌImitisa tanquin ën ꞌimicë́xa ꞌëx utëcëntamainun ënë unix ënë nëtënu tsócëbëbi camina uisa cupí cara usai ꞌia quixun sinani bënë́tima ꞌai” quixun.

24ꞌËx Jesusan ꞌunánmicë uni achúshi ꞌixun cana ënë ñu camabi ñuiquin cuënëon. ꞌËn cuënëocë banacama ënëx ca asérabi ꞌicë quixun cananuna ꞌunanin.

25ꞌËn mitsu ñuixuncë bana ënë ꞌimainun ca bëtsi ñucamaribi Jesusan ꞌacëxa. A ñucama ñuiquin achúshi achúshi cuënëocëxbi ca a quirica camabi menu sënë́ntima ꞌicën. Ashi.

Currently Selected:

Juan 21: cbrPB

Highlight

Copy