Lucas 19

Zaqueo ñui quicë bana

1Anu bëbaquiani ca Jesús Jericó ëma ꞌuramaquiani cuancëxa. 2Usaía Jesús cuancëbëbi ca a ëmanu ꞌicë uni achúshi Zaqueo caquin anëcë anu ꞌiacëxa. Ax ca an ꞌapu buánmiti curíqui bicë unicaman cushi ꞌianan ꞌitsaira curíquiñu ꞌiacëxa. 3Usa ꞌixun ca uisa cara Jesús ꞌicë quixun istisa tanquinbi mëtúra ꞌixun ꞌaisamaira unían tsitsíruxun bëpáncëbëtan iscasmacëxa. 4Usaquin iscasmati, abáquiani cuanx ca achúshi i, sicómoro cacë, bai anúan Jesús uti amoa ꞌicë anu ronruacëxa. 5Usaía anu ꞌicë ca Jesusan anun cuanquin manámi bësuquinbi mëraquin ësaquin cacëxa:

—Zaqueo, bënëtishi ca ꞌibúcuatsini ut. Bërí cana min xubunu ꞌi mibë cuainsa tanin.

6Usaquian cacëxëshi chuámarua tani bënëtishi ꞌibúquin ca Zaqueonën aín xubunu buánuxun Jesús biacëxa. 7Usaria isquin ca uni raíricaman —ꞌuchañu unin xubunu ca Jesús ꞌicuania —quixun ñuiacëxa. 8Usa ꞌain ca manámi chairuquin Zaqueonën Jesús cacëxa:

—ꞌËn cana mi cain, bërí cana ꞌën curíquicama mësú usaribi ꞌënan ꞌinun bianan usaribi ñuñuma unicama ꞌinani cuanin. ꞌInánan cana ꞌën aín curíqui mëcama uni, ꞌën ainan mëcama inumiquin rabë́ ꞌimainun rabë́ oquin ꞌinánti ꞌain.

9Cacëxun ca Jesusan cacëxa:

—Bërí ca ënë xubunu ꞌicë unicama ꞌëmi catamëcë ꞌaish Nucën Papa Diosnan ꞌinux ië́ti ꞌicën, ënë uníxribia Abrahamnën rëbúnqui ꞌain. 10ꞌUchañu unicama ainanma ꞌicëbi aín ꞌucha tërë́ncë ꞌianan ainan ꞌinun ië́minux, cana Nucën Papa Diosnuax uni ꞌinux uacën.

Bana itsi ñuicësaria Jesús curíqui ñui quiá bana

11Usa ꞌain ca Jesusan Zaqueo caia cuaquin, Jerusalén ꞌurama ꞌain, abë ꞌicë unicaman sináncëxa, —Jerusalénu bëbatancëx ca Nucën Papa Diosan ꞌimicëx Jesúsëshi judíos unibunën ꞌapu ꞌiti ꞌicë —quixun. 12Atúan usoquin sinania ꞌunánquin ca acaman cuamainun, bana itsi ñuicësoquin Jesusan ësaquin cacëxa:

—Ësa ca. Achúshi uni, ꞌapun rëbúnqui, an ca aín menu ꞌicë unicaman cushi ꞌiisa tanquin bëtsi menu ꞌicë ꞌapu cha anu cuanxun, a ꞌapu ꞌiminun quixun catancëx utëcënti sinánxa. 13Sinántancëxun aín uni mëcën rabë́ camicëx ucë ca achúshi achúshi curíqui achúshi ꞌaíshbi ꞌitsa cupícë, camabi sënë́n ꞌinánxa. ꞌInánquin, —ꞌëx utëcëntamainun camina ënë curíquinën ñu bitancëxun maruquin curíqui bitëcënti ꞌai —quixun caxa. 14Usaquin catancëxa cuanbi ca a menu ꞌicë unicama ami nishcë ꞌixun, —a uni cananuna nun ꞌapu ꞌiti cuëënima —quixuan ꞌapu catánun quixun uni xuquin camiaxa. 15Usa ꞌaínbi ca ꞌapun, ax paían cuancë uni abi aín menu ꞌicë unicaman ꞌapu ꞌimiaxa. ꞌImicëx ca aín menu utëcëanxa. Ai bëbaquin ca uiti curíqui cara biaxa quixun ꞌunántisa tanquin a curíqui ꞌinánbiancë unicama camiaxa. 16Camicëxa anpan ucë an ca aín ꞌapu caxa:

—Min curíqui anun ñu bixun maruquin cana mëcë́n rabë́ sënën ꞌinun curíqui bian. 17Cacëxun ca ꞌapun caxa: Upí oquin camina ꞌën curíquinën ñu ꞌan. ꞌItsairamashi ꞌaínbimi a curíquinën upí oquin ꞌacë cupí camina mëcën rabë́ ëmanu ꞌicë unicaman cushi ꞌiti ꞌain. 18Bëtsíxribi uquin ca caxa: Min curíqui anun ñu bixun maruquin cana mëcën achúshi sënën ꞌinun curíqui bian. 19Cacëxun ca ꞌapun caxa: Mix camina mëcën achúshi ëmanu ꞌicë unicaman cushi ꞌiti ꞌain. 20-21Cacëbë uquin ca bëtsínribi caxa: Mixmi unimi nishcësa ꞌicë cana mi ꞌunan. Uni itsin ñu ꞌapámitancëxun camina a bimi mináinshi ꞌinun min unicama bimin. Usa ꞌain cana mimi racuë́quin, pañunan rabúnxun, min curíqui ami ꞌë ꞌináncë, a nan. A cënë ꞌicën. 22Cacëxun ca aín ꞌapun caxa: Mix camina ꞌaisama ꞌain. Min bana cuaquin cana uisa uni caramina mix ꞌai quixun ꞌunanin. ꞌËx unimi nishcësa ꞌixun uni itsin ñu ꞌapámitancëxun a bimi ꞌënáinshi ꞌinun ꞌën unicama bimicë isna ꞌai quixun camina ꞌë ꞌunan. 23¿Usaquin ꞌunánquin caramina uisacasquin a curíqui banconu nancëma ꞌain? Anumi nancë ꞌain cana ꞌën curíqui ꞌimainun curíqui itsiribi bitsían. 24Caxun ca ꞌapun anu ꞌicë unicama caxa: A curíqui ꞌën a ꞌinan, a camina a uninua bixun, an mëcën rabë́ sënën ꞌinun curíqui bicë uni a ꞌinánti ꞌain. 25Cacëxun ca caxa: Nun a curíqui ꞌinánti ꞌaínbi ca ax mëcën rabë́ sënën ꞌinúan bicë curíquiñu ꞌicën. 26Usaquin cacëxun ca aín ꞌapun caxa: Uisa ñu cara a ꞌináncë ꞌicë anúan an cacësabi oquin ñu ꞌacë uni a ca aín ꞌibun ꞌinántabaquin ꞌináncësamaira oquin ꞌinántëcënti ꞌicën. Usonan ca anúan ñu ꞌaxuncëxunma a ꞌináncë ñu a aín ꞌibun bicuanti ꞌicën. 27Axa ꞌëmi nishi ꞌëx ꞌapu ꞌiti cuëëncëma unicama a camina ënu bëxun ꞌën ismainunbi ꞌati ꞌain.

IV. JESUSAN JERUSALENUXUN BANA ÑUIXUANAN ÑU ꞌA (19.29-21.38)

Jesús Jerusalénu cuan

(Mt 21.1-11; Mr 11.1-11; Jn 12.12-19)

28Usaquin bana itsi ñuicësoquin ꞌapu ñuiquin unicama cabiani ca Jesús Jerusalénu cuanti sinánbiani cuancëxa. 29Jerusalénu cuani Betfagé ëma ꞌimainun Betania ëma ꞌurama ꞌixun ca Olivos cacë matá anuxun aín ꞌunánmicë uni rabë́ xuquin, 30Jesusan cacëxa:

—Aúnu bësucë ëma, anu ca cuantan. Cuanx anu bëbaquin camina burro, anua uni tsócëma pain, a anua tëcërëcacë mërati ꞌain. Mëraquin camina tububëtsinquin bëti ꞌain. 31Mitsúnmi tubuia isquian bëtsi unin —¿uisati caramina ënë burro tëcërëcacë tubuin? —quixun mitsu ñucácëxun camina cati ꞌain: Nucën ꞌIbu ca ënë burro buánxunun quixun nu caxa.

32Usaquin caquian xucëx cuanxun ca Jesusan atu cacësabi oquin burro mëracëxa. 33Mëraquian tubuia ca burron ꞌibucaman cacëxa:

—¿Uisoti caramina burro tubuin? —quixun.

34Ñucácëxun ca cacëxa:

—Nucën ꞌIbun ca ënë burro buánxunun nu caxa.

35Usoquin cabianquin buántancëxun ca chupan camáputancëxun anu Jesús ꞌirumiacëxa. 36Usoquian ꞌirumicëxa burron cuancëbëtan ca unicaman anun Jesús cuanti bainu anúan mapúcë chupabi ꞌapácëxa. 37ꞌApácëbë anun cuani matá Olivos, anuax cuabútia ꞌurama ꞌain ca anu ꞌicë unicaman ꞌaisamaira ꞌaish, cuëënquin, —uni itsin ꞌacëma ñucama Jesusan ꞌaia cananuna isa —quixun an ꞌacëcama ñuiquin munuma banaquin Nucën Papa Dios rabiacëxa. 38Rabi ca quiacëxa:

—Nucën ꞌIbu Diosan xucëxa ucë, ënë ꞌApux ca bërí aia. A ca camabi unin rabiti ꞌicën. Naínu ꞌicë Nucën Papa Diosaxribi ca cuëënia. Aribi ca camabi unin rabiti ꞌicën.

39Usai quiquian axa ami sináncë unicaman Jesús rabia cuaquin ca fariseo unicama raírinën Jesús cacëxa:

—Axa mimi sináncë unicama sharáxma ꞌinun camina cati ꞌain.

40Cacëxun ca Jesusan cacëxa:

—ꞌËn cana mitsu cain, ënë unicaman ꞌë rabicëbëtanma ca ënë maxáxcama ënën cuëncëni sharáquin ꞌë rabiti ꞌicën.

41Usai quiquianquin rarobianquin, Jerusalén isi ca Jesús nitë́xëti bëunan mëscuti Jerusalénu ꞌicë unicama cai quicësai quiacëxa: 42—Nucën Papa Diosan ꞌimicëx camina asérabi chuámarua ꞌaish cuëënti ꞌai —quixun bërí nëtë́nbi mitsun ꞌunánti cana cuëënin. Usa ꞌaínbi camina mitsun nuitunënbi sinánquin cuaquinma ꞌunáncantima ꞌain. 43-44Nucën Papa Diosan mitsu sinánxunquin ꞌë mitsunu xucë ꞌicëbi ui carana ꞌëx ꞌai quixun ꞌë ꞌunántsinxunbi ꞌunáncëma ꞌain, ca anun mitsu ꞌatimoti nëtëcama uti ꞌicën. Axa mitsumi nishcë unicaman ca mitsu ëman chiquítisama oquin bëararanan mitsun a xubu ꞌacë maxáxcama rurupaquin rëúpanan unicamaribi cëñuti ꞌicën.

Anuxun Nucën Papa Dios rabiti xubunua Jesusan an ñu marucë unicama chiquían

(Mt 21.12-17; Mr 11.15-19; Jn 2.13-22)

45Jerusalénu bëbatancëx anuxun Nucën Papa Dios rabiti xubunu atsínquin ca Jesusan anuxuan ñu marucë unicama chiquíancëxa. 46Chiquínquin ca cacëxa:

—Nucën Papa Diosan bana cuënëo ca ësai quia: “Anuxun ꞌë rabiti xubu ax ca anuaxa camabi unix ꞌëbë banati xubu ꞌiti ꞌicën”. Usaía cuënëo bana quicë ꞌaínbi camina mitsun anuxun ñu maruquin uni paránquin mëcamati xubusa ꞌinun ënuxun ñu maruin.

47Camabi nëtën ca Jesusan anuxun Nucën Papa Dios rabiti xubunuxun bana ñuixunquin unicama ꞌunánmiacëxa. Usaía ꞌia ca judíos sacerdotenën cushicama ꞌimainun an Moisésnën cuënëo bana ꞌunáncë unicama ꞌimainun aín cushi unicama a ꞌacatsi quiax ami ꞌësë́nancëxa. 48Usai ꞌësë́nanquinbi ca ꞌapuma unicama aín bana cuati ami sináncë ꞌain uisoxun ꞌati cara quiax sináncasmacëxa.

Currently Selected:

Lucas 19: cbrPB

Highlight

Copy