Lucas 21

Xanu casunamëcënëan Nucën Papa Dios curíqui nanxúan

(Mr 12.41-44)

1Usaquin anuxun Nucën Papa Dios rabiti xubunuxun unicama catancëxun anu curíqui nanti ñu ami bësuquin isquin ca Jesusan ñuñu unicaman aín curíqui nania isacëxa. 2Isanan ca xanu casunamëcë ñuñuma anribia manë curíqui rabë́ nania isacëxa. 3-4Isquin ca Jesusan anu ꞌicë unicama cacëxa:

—ꞌItsaira curíquiñu unicaman ca anun ñu maruquian tëxëocë curíqui anu curíqui nanti ñunu ꞌaruaxa. Usa ꞌaínbi ca xanu casunamëcë ënën asérabi cuëënquin ꞌaisa tanquin anúan ñu marutibi ꞌaíma ꞌitánun, aín curíquicamaishi ꞌaruaxa. Usa ꞌain cana mitsu asérabi cain, curíquiñu unicaman ꞌacësamaira oquin ca a xanun aín curíqui ꞌinánxa.

Anuxun Nucën Papa Dios rabiti xubu rurucubutía Jesusan ñuia

(Mt 24.1-2; Mr 13.1-2)

5Anuax cuania ca uni raírinën anuxun Nucën Papa Dios rabiti xubu ñuiquin ësaquin cacëxa:

—Ax ca aín maxax upíira upí ꞌicën. ꞌImainun ca bëtsi bëtsi unían upí ñu ꞌináncë cupíribi ax upíira upí ꞌicën.

Cacëxun ca Jesusan cacëxa: 6—Ënë xubu mitsun iscëx upí ꞌaísh maxax cha ꞌacë ꞌaíshbi ca axa Nucën Papa Diosmi sináncëma unicaman ënë xubu camabi rurupacëbë aín maxáxcamaribi rurucubúti ꞌicën. Usaía anun ꞌiti nëtë ca uti ꞌicën.

Ënë nëtëcama cëñútisama pain ꞌain cara uisai ñu ꞌiti ꞌicë quicë bana

(Mt 24.3-28; Mr 13.3-23)

7Usaquian Jesusan cacëxun ca a unicaman ñucáquin cacëxa:

—¿Uínsaran cara mixmi quicësabi oi anuxun Nucën Papa Dios rabiti xubu ënëx aín maxáxcama rurupacë ꞌiti ꞌic? ¿Anúan usai ꞌiti nëtë ca ꞌuramacuatsinia quixun ꞌunánuxun caranuna uisa ñu ꞌia isti ꞌain?

8Usaquin ñucácëxun ca Jesusan anun ax utëcënti nëtë ñuixunquin ësaquin cacëxa:

—ꞌItsa unix ca: ꞌËx cana Cristo ꞌai, quianan: Jesús utëcë́nti nëtë ca uaxa quiax quiti ꞌicën. Usai quiquian mitsu paránti rabanan camina bërúancati ꞌain. Aín banax ca asérabi ꞌicë quixun camina sinántima ꞌain. 9Mitsun camina uni itsían, bëtsi menu ꞌicë unicamax ca bëtsibë ꞌacánania quixun ñuia cuanuxun ꞌain. Cuanan, raíri unicamaxribi ca aín ꞌapumi tsuáquiruia quixun ñuia cuatíbi camina racuë́tima ꞌain. Asérabi ca usai ꞌiti ꞌicën. Usaía ꞌicëbëbi ca ënë mecama cëñúcëma pain ꞌiti ꞌicën.

10Caxun ca ësaquinribi cacëxa:

—Bëtsi menu ꞌicë unicamax ca bëtsi menu ꞌicë unicamabë nishánani ꞌacánanti ꞌicën. ꞌImainunribi ca bëtsi menu ꞌicë ꞌapun suntárucama bëtsi menu ꞌicë suntárucamabë ꞌacánanti ꞌicën. 11Bëtsi bëtsi mecama ca shaíquinuxun ꞌaia. Bëtsi bëtsi nëtënu ꞌicë unicamax ca a piti ñuñuma ꞌinuxun ꞌaia. ꞌImainun ca ꞌitsa unix ꞌinsinan cëñúnuxun ꞌaia. ꞌImainun ca naínua atun iscëma ñu unicaman isti ꞌicën, isi ca racuë́ira racuë́ti ꞌicën.

12Usai ꞌicëma pan ꞌain ca mitsúxmi ꞌëmi catamëti ꞌën uni ꞌicë cupí, unin mitsu bixun bëtsi bëtsi onan anu judíos unibunëx timë́ti xubunu ꞌicë unin mitsu ꞌuchonun buánan, mitsu sipuanan, ꞌapu cha ꞌimainun ꞌapu chucúmaribi mitsu ñui ami manánquin mitsu ꞌinánti ꞌicën. 13Usaquian ꞌacëxunbi camina ꞌë ñuiquin rabínquinma an mitsu bicë unicama cati ꞌain. 14-15A unicama bëmánanumi ꞌain cana ꞌënbi uisoquin caramina cati ꞌai quixun ꞌunánmianan anúnmi cati bana mitsu sinánmiti ꞌain. Sinánmicëxunmi cacëx ca axa mimi nishi mimi manáncë unicamax, asérabi ca a bana ꞌicë quixun ꞌunani minmi cacë banax ca cëmë ꞌicë quiax quitima ꞌicën. Usa ꞌain camina a unicama bëmánanu cuancëma pan ꞌixun ësaquin sinánti ꞌain: Jesusan ca uisoquin carana cati ꞌai quixun ꞌë sinánmiti ꞌicën. Usa ꞌain cana ꞌënbi pain sinántima ꞌain. 16Mitsúxmi ꞌënan ꞌicë cupí ca min papa ꞌimainun min tita ꞌimainun min xucë́antu ꞌimainun min aintsi ꞌibu ꞌimainun axa mibë nuibanancë unínribi uni itsían mitsu ꞌatimonun ꞌinánuxun ꞌaia. ꞌInáncëxun ꞌatimoquin ca mitsu raíri ꞌati ꞌicën. 17Mitsúxmi ꞌëmi catamëcë cupí ca unicamax ꞌëmi sináncëma ꞌaish mitsumi ꞌi nishnuxun ꞌaia. 18Usa ꞌaínbi camina ꞌën bërúancë ꞌaish asábi ꞌiti ꞌain, ꞌëx cuëëncëbëma ca mitsun bu achúshirabi nëtë́tima ꞌicën. 19Tëmëraquinbi ꞌëmi catamëti ëncëma ꞌaish camina ꞌën Papa Diosan nëtënu ꞌëbë ꞌiti ꞌain.

20Anu ꞌicë unicamabë ꞌacananuxuan suntárucaman Jerusalén nëbë́tsioratia isquin camina ꞌunánti ꞌain, anun a ëma cëñúti nëtë ca uaxa quixun. 21-22A ëmanu ꞌicë unicamaxa ami ꞌuchacë cupí ca castícancë ꞌiti ꞌicë quixun ca Nucën Papa Diosan aín uni cuënëomiacëxa. Usai ca bërí ꞌiti ꞌicë quixun camina a suntárucama isquin ꞌunánti ꞌain. Usai ꞌicëbë ca unicamax racuëti Judea menu ꞌicë ëmacamanuax abáquiani matánu cuanti ꞌicën. ꞌImainun ca axa Jerusalénu ꞌicë unicamaxribi anuax cuanti ꞌicën. Axa Jerusalénuax ꞌura nitsi cuancë unicamax ca racuëti Jerusalénu cuantëcëntima ꞌicën. 23Usai ꞌicëbë ca xanu tuñucama ꞌimainun aín tuá ꞌicúcë xanucamaxribi abáquiani cuani nuibacanuxun ꞌaia. A nëtënu ꞌicë unicamax ca ꞌaisamaira paë tani tëmërati ꞌicën. Aín ꞌucha cupí atumi nishquin Nucën Papa Diosan castícancë ꞌaish ca usai ꞌiti ꞌicën. 24Uni raíri ca unin abë ꞌacananquin ꞌanuxun ꞌaia, raírinëx ca bëtsi bëtsi menu buáncë ꞌiti ꞌicën. Usaquin ꞌaquin ca judíosma unicaman Jerusalén ꞌatimonan anu ꞌixun aín cuëëncësa oquin ꞌati ꞌicën, atúan usoquin ꞌati nëtëa sënë́ncëbëtan.

Usacuatsini ca Jesús utëcënti ꞌicë quicë bana

(Mt 24.29-35, 42-44; Mr 13.24-37)

25Ësaquinribi ca Jesusan cacëxa:

—ꞌËx utëcënti nëtë ca ꞌurama ꞌicë quixun unicaman ꞌunánun ca naínu ꞌicë bari, ꞌuxë, ꞌispa acamax bëtsiti ꞌicën. Usai ꞌimainuan parúnpapacama xuquirui bëchunia cuati ca camabi menu ꞌicë unicamax ratuti sináncasmai bënë́ti ꞌicën. 26Naicamëꞌëo shaíquicëbë ca anua ꞌicë ñucamaxribi shaíquinuxun ꞌaia. Acama isi ca unicamax, uisai cara ꞌiti ꞌicë quixun sinani racuëtan bamai sináncasmai bënë́ti ꞌicën. 27Usai ꞌicëbëtan ca uni ꞌinux Nucën Papa Diosnuax uá ꞌixun ꞌën, nëtë cuin mëúxun, ꞌën cushin pëcabëtsinia, camabi unicaman isnuxun ꞌaia. 28ꞌËn mi ñuixuncë ñucama ꞌicëbëtan camina, anúnmi mitsux paë tani tëmërati nëtë sënë́nti ca ꞌurama ꞌicë quixun ꞌunánti ꞌain. ꞌUnani camina chuámarua tani cuëëinra cuëënti ꞌain.

29Usoquin catancëxun ca Jesusan icamaribi ñuiquin ësaquin cacëxa:

—Mitsun iscëx ca higuera ꞌimainun uisa i cara, 30acamax baricuatsíncëbë aín pëchi rëucubutancëx amiribishi corutëcënia. Usaria ꞌia isquin camina uni ꞌitsían mitsu cacëxunmabi mitsúnbi ca baritiacuatsinia quixun ꞌunanin. 31Usaribitía ꞌën mitsu ñuixuncë ñucama ꞌia isquin camina ꞌunánti ꞌain, anúan Nucën Papa Dios ꞌApu ꞌiti nëtë ca ꞌurama ꞌicë quixun. 32Asérabi cana mitsu cain, bëría ënë nëtënu bucucë unicamaxa bamacëma pain ꞌain ca ꞌën mitsu ñuixuncë banacama quicësabi oi ꞌiti ꞌicën. 33Naí, me acamax ca cëñúti ꞌicën, ꞌaínbi ca ꞌën banaxa nëtë́timoi usabi ꞌain camabi ñu ꞌëx quicësabi oi asérabi ꞌiti ꞌicën.

34Usa ꞌain camina mitsux cuëëncë ñuishi ꞌanan paë́anan ënë nëtënu ꞌicë ñucamaishi sináncë ꞌitin rabanan bërúancacë ꞌiti ꞌain. Usai bërúancacëma ꞌaish camina mitsúnmi sináncëbëmabi ꞌëx ucëbë ꞌë isi rabínti ꞌain. 35Sinaniamabi rican mapuquin unin tsatsa bicësa usaribiti ca unin sináncëbëmabi anun ꞌëx uti nëtë uti ꞌicën. 36Usa ꞌain camina ꞌëx uti nëtë caini, ꞌën mitsu cacë ñucama ënë́xa ꞌicëbëbi ꞌëmi catamëti ëníma ꞌëmi cushicë ꞌinuxun, nëtë camabi Nucën Papa Dios ñucáti ꞌain. Usai ꞌi, ꞌëx utëcëncëbë ꞌën bëmánanuax añu ꞌuchañumabi ꞌinuxun camina Nucën Papa Dios ñucáti ꞌain.

37Usaquin anuxun Nucën Papa Dios rabiti xubunuxun unicama bana ñuixuanan ca Jesús xupíbu xupíbucëbë imë́ Olivos cacë matánu ꞌi cuancëxa. 38Usai anu ꞌinëti ca bari urucëbë bana ñuixuni Jesús anuxun Nucën Papa Dios rabiti xubunu cuantëcëancëxa. Cuantëcënxuan bana ñuixunia cuati ca unicama riquiani timë́acëxa.

Currently Selected:

Lucas 21: cbrPB

Highlight

Copy