Lóka 9
9
Teka á ɓateki nkama na ɓaɓɛ (12)
(Ɔna phɔtɔ Mat 10.5-15; Mkɔ 6.7-13)
1Mbusa, Yéso áǒdondanisa ɓateki nkama na ɓaɓɛ (12), áǒɓopha kɔkɔta na ɓukpɛkpɛ á ɓeaga á ɓansombo ɓɔbu na amisa á ɓasambi. 2Mpɔ áǒteka ka tɔ̌miaga á nyɔngɔ á koɓoamɛ ndea Mokonga na amisa á ɓasambi. 3Áǒngoɗea ɓe: «Ɓókobɛɗɛmbɛ ka kema ka tamba. Kaɓɛ motumbɔ, maiɓɔta, mokati na imɔna. Nkpa na nkpa kaɓɛmbɛ na ngɔ́mbɛ á k'égogo iɓɛ. 4Endu nde ɓáonósesea kau, ikani suɓi í na ka ɓî ɓɔmɛande. 5Cɔ, aoɓá ɓato á ka ntanga-nji na ɓáyé sesea anu, tókani ka ntanga-nji ndɔ, ɓóciciɛ mpusu á oɗo bui nde a k'écinji anu#9.5 Ɔna Mkɔ 6.11. Cicia á mpusu á oɗo á k'écinji ande úbisa á ɓato á ka ntanga-nji ndɔ gea te, ɓagoigi ɓáká ye tanda na nyɔngɔ ka phɔaɓɔ. ka úbisa aɓɔ gea te, nyɔngɔ ěguiaeka.» 6Mpɔ, ɓateki ɓáoga na ɓáɔtɔmiaga Mbino-Ánjá ndea Mokonga nji ka nji, ɓâ phɔtɔ ǒamisa ɓato á esambɔ k'ɔ́ma bui.
Ianaga ndea Ɛlɔ́dɛ ka phɔa Yéso
(Ɔna phɔtɔ Mat 14.1-12; Mkɔ 6.14-29)
7Ɓî Ɛlɔ́dɛ moamɛ á ka Galiláya ɗáɔ́ki nyɔngɔ nde ɗágeani, áoianaga, nga ɓakpa ɓuangbo ɗáɓáogea te: «Yoáni-Mɓatisi ɗájujúki ka kukuwa.» 8Ɓuangbo ɓáogea: «Elía, aámbɔ asɛnɛki.» Ɓuangbo ɓâ goto ogea: «Ka ɓaɔtu-nyɔngɔ á kala ndea Mokonga aámbɔ ajujúki ka kukuwa.» 9Mpɔ, Ɛlɔ́dɛ áoianaga gea: «Eme aámbé ɗétenisi mɔ̌ á Yoáni. Cɔ, ani mmbɔ nɛɔɔ́ka nyɔngɔ ásii ka phɔakɛ ɓo?» Kaɓondɔ, áokaɓa ɔna akɛ.
Ísa á usɛsɛ á ɓakpa
(Ɔna phɔtɔ Mat 14.13-21; Mkɔ 6.30-44; Yoá 6.1-14)
10Ka ja aɓɔ, ɓateki ɓáɔntɔmiaga Yéso kema bui nde ɗáɓági. Mpɔ Yéso áɔ̌bɛɗa, áoga na ɓɔ sasaɓɔ bǎ á ntanga-nji nde ɓáɔphana Bɛtɛsaída. 11Ɓî ɓakpa ɗáɓáúbi gǎkɛ ɓó, ɓâ tɔ omɓea kó. Yéso áǒsesea, áɔ̌tɔ̌miaga nyɔngɔ á koɓoamɛ ndea Mokonga, â phɔtɔ ǒamisa ɓundɔ ɗáɓá na siki á ɓoamia.
12Ɓî esa akpangi gɔgɔmana, ɓagoigi nkama na ɓaɓɛ (12) ɓáɔsɛkɛɗa bíbí á Yéso, ɓáongoɗea: «Cɔ, ójisa ɓakpa, ɓágɛ ka nji na ka motumbe nde a bîbíbí, ka kaɓaga eea n'éndu, nga wani ɓe ka nkanda.» 13Yéso â ndiu ǒgea: «Ɓenu sasanu ɓáunge óɓophani kema á koea.» Ɓáonsikisia te: «Ɓe tɔndɔ na mokati ɓɔku na ɓasú ɓaɓɛ. Cɔ, okondi ɓégesombɛ eea ka ɓakpa nde ɓɔbu?» 14Ɗáɓátú wa, ɓǒko ɓea ɛlɛphu ɓɔku (5.000). Wa, Yéso áǒgea ɓagoigi nɛkɛ: «Óikisani ɓakpa etúnda moci-moci á ɓakpa nkama ɓɔku (50).»
15Ɓagoigi ɓáoɓeekea, ɓáǒikisa ɓakpa ka oɗo. 16Ɓî Yéso abɛɗi mokati ɓɔku na ɓasú ɓaɓɛ ndɔ, áɔɛnjia na koba, áonsega Mokonga ka nyɔngɔ á eea ndɔɔ. Áoɓúnaga ú, áǒɓopha ɓagoigi ka gabea usɛsɛ á ɓakpa. 17Ɓɔbu ɓáoeaga, ɓáokuta. Mbusa í, ɓagoigi ɓáɔkɔngɔa phúnju-phúnju á due í, ɓáotúmisa jɔ nkama na iɓɛ (12)#Ɔna 2 Ɓam 4.42-44 .
Pɛ́tɛɛ aɓeeki gea Yéso ande Kiísito
(Ɔna phɔtɔ Mat 16.13-19; Mkɔ 8.27-29)
18Esa moci, Yéso ɗáɔmɛma Mokonga k'ɔ́ma á ɓɔsɔmɛa, yɛ na ɓagoigi nɛkɛ. Wa, áǒɓúsia te: «Usɛsɛ á ɓakpa nde ɓáogea te, nende ani?» 19Ɓagoigi ɓáonsikisia te: «Ɓakpa ɓuangbo ɓáogea, onde Yoáni-Mɓatisi. Ɓuangbo ɓáogea Elía. Ɓuangbo ɓâ goto ogea, ka ɓaɔtu-nyɔngɔ á kala ndea Mokonga aámbé ajujúki ka kukuwa.» 20Yéso â goto ǒɓúsia: «Cɔ, ɓenu gǎkɛ ɓogi nende ani?»
Mpɔ Pɛ́tɛɛ áonsikia te: «Onde Kiísito mmbé ɓa Mokonga.»
Yéso atɔ̌mi kukuwa na jujúka akɛ
(Ɔna phɔtɔ Mat 16.20-28; Mkɔ 8.30—9.1)
21Mpɔ, Yéso áǒimisia akpɛ gea, ɓákangoɗeɛ mɔnɔ ka nkpa nyɔngɔ ndɔɔ. 22Â phɔtɔ ǒɓúbisa: «Akeni eme Muna-Nkpa nétambɛgɛ phɛɛ, ɓagbɛga, ɓagbɛga á ɓatobeigi-phɛ́a na ɓaɗundu-ɛɔphi ɓámoyɛgɛ na kusisa ani. Mpɔ k'ésa á ko isaɔ, nejujukande ka kukuwa.»
23Â phɔtɔ ǒngoɗea ɓɔbu ɓe: «Aoɓá nkpa n'akondi ɓeá ani, akeni ěyɛ sisakɛ, ákumbɛ moyangɔ nɛkɛ esa bui, ámoɓeɛ. 24Nga, nkpa nde akondi amisa á enda akɛ, aɓúngisande ú. Mmbé a gǎkɛ oɓúngisa ú ka nyɔngɔ ani, aamisande enda akɛ. 25Cɔ, ana kantíti sina aoɓá nkpa n'atɔi nkumba bui á ka mokonda n'aɓúngisi ndiu enda akɛ, kaɓɛ n'ětúkatúki sisakɛ? 26Aoɓá nkpa n'aku na soni ka phɔani na ka phɔa ɓɔphɛi nɛmɔ, eme Muna-Nkpa, nenkuiande phɔtɔ soni esa nde nebikaeka ka ɓoombia nɛmɔ na nnde á Abɛ, na nnde á ɓamalaéka á kanga ɓojeɗe. 27Ɗoni! Nenóúbisi gea, ka ɓakpa nde ɓá wani, ɓákákuwɛku na ɓákáɔni koɓoamɛ ndea Mokonga.»
Úbikana á ɓoombia á Yéso
(Ɔna phɔtɔ Mat 17.1-8; Mkɔ 9.2-8)
28Mbusa á ɓ'esa ngianjaga isaɔ (8), Yéso áɔ̌bɛɗa Pɛ́tɛɛ, Yoáni na Yakɔ́ɓɔ, áoɓamba na ɓɔ mamba k'aphe á mɛma á Mokonga. 29Ɓî ɗáɔmɛma, keongi akɛ áǒketia mosá aɓɔ, ngɔ́mbɛ nɛkɛ áoɓá ábu, áophenuaga biɛ! biɛ! 30Kɛ̌kɛndɔ tɔ, ɓáɔ̌ɓɔna ɓǒko ɓaɓɛ na ɓáɔyɔngaga na Yéso. Ɓǒko ndɔ ɗáɓátú Mósa na Elía. 31Ɗáɓásɛnɛki suɓi á ɓoombia á na koba. Ɗáɓáɔyɔngaga na Yéso ka nyɔngɔ á ɓî Yéso atɔtɔkisande moangɔ nɛkɛ á kukuwa na Yɛusalɛ́ma. 32Cɔ, Pɛ́tɛɛ na ɓadakɛ tɔ̌ ɗɛ́bɛɗi phɛɛ. Ɓî ɗáɓájujúki, ɓáɔɔna ɓoombia á Yéso na ɓǒko ɓaɓɛ ndɔ ɓî ɗáɓámamege na yɛ#Ɔna 2 Pɛ́t 1.16-18. 33Ɓî ɓǒko ɓaɓɛ ndɔ ɓákpangi ye ɗeketana na Yéso, Pɛ́tɛɛ áongoɗea: «Ngoisigi, aánjá ɓéikɛ wani. Cɔ, ɓɛ́phɛ̌kɛ ɛma isaɔ: Moci k'óɓɛ, moci ka Mósa, moci ka Elía.» Ande gea te, Pɛ́tɛɛ ɗákáengekisi nyɔngɔ nde ɗáɔyɔnga.
34Cɔ, ɓî ɗá phɔ́tɔ ɔyɔnga, egugu áobika, áǒgbukumia. Ɓagoigi ɓáoɓá na kɔɓɔɓɔkɔ ɓî ɓáɔni iimbiɔ á egugu n'ěgbukumi. 35Mpɔ, ɛsɔ áɔɔ́kɛkana k'égugu ndɔ te: «Mmbé ande miki nɛmɔ mmbé ɗénsɔmbu. Mɔ́kani yɛ#Ɔna Isa 42.1; Lók 3.22.» 36Mbusa á ɔ́ka ɛsɔ ndɔ, ɓâ ye tɔ ɔmɔna Yéso sasakɛ. Mbusa índɔ ɓagoigi ɓáɔkɔ́ɓa phio! Kángá á tɔ̌mia á nkpa ka kema ndɔ ɗáɓáɔni.
Amisa á nto á kukuwa á ɓansombo
(Ɔna phɔtɔ Mat 17.14-18; Mkɔ 9.14-27)
37Mama í, ɓî Yéso na ɓagoigi nɛkɛ ɗáɓádidi mamba, ɓáodondana na usɛsɛ á ɓakpa ɓásii. 38Sɔsɔɓɛ á usɛsɛ ndɔ, mǒko moci áɔyɔnga akpɛ áogea: «Ngoisigi neoɗengemisigi, mɔna ka miki nɛmɔ, nga a tɔ ngɔmu. 39Ɓansombo ɓáontenaga phɛɛ, na ɓá phɔtɔ onkogisaga, ɓáonsugaga akpɛ na ka ɓî phû aophúphutaga k'aphenɔkɔ akɛ. Ɓáontambisaga, ɓáonɗeketa k'akpɛ. 40Něɗengemisigima ɓagoigi nɛkɔ gea, ɓétokisɛ ɓansombo ndɔ. Ɓákáɛtɔkɛ.»
41Mpɔ Yéso áogea: «Hoo! Ɓenu ɛɓɔkɔti á kanga ɓeekea nde ca! Ka mbenɔ kǔngaáni nde neikande na ɓenu? Ka mbenɔ kǔngaáni nde nenóphiphiande? Cɔ, mbika na miki nɛkɔ wani.»
42Ɓî miki ɗáɔsɛkɛɗa bíbí á Yéso, ɓansombo ɓáommaka ka oɗo, ɓáonsuga akpɛ phɛɛ. Yéso áǒkeea, áonamisa miki, áonsikisia abakɛ. 43Kaɓondɔ, ɓakpa ɓɔbu ɓáotangaaga ɓukpɛkpɛ á Mokonga.
Yéso atɔ̌mi goto kukuwa akɛ
(Ɔna phɔtɔ Mat 17.22-23; Mkɔ 9.30-32)
Ɓâ phɔtɔ otangaaga kema bui nde Yéso ɗági. Mpɔ, Yéso áǒngoɗea ɓagoigi nɛkɛ: 44«Koɗani kecue anu ánjá ka nyɔngɔ nde nɛɔnɔtɔmia kɛ̌kɛnde. Eme Muna-Nkpa, ɓámobisande ka njaga á ɓakpa.» 45Ɗáɓákáengekisi gǎkɛ nyɔngɔ ndɔ, nga kantíti í ɗákátú ka ɓɔ base. Ɓáoɓánga úsia á Yéso ka nyɔngɔ ndɔɔ.
Ani mmbé ande mɔkɔta?
(Ɔna phɔtɔ Mat 18.1-5; Mkɔ 9.33-37)
46Mbusa, ɓagoigi nɛkɛ ɓáopúa ka úba gea, ani mmbé ande mɔkɔta sɔsɔɓɛ aɓɔ. 47Ɓî Yéso ɗáúbi ye gǎkɛ nyɔngɔ nde ɗáɓáopúa kau, áɔmbɛɗa miki, áommesa bíbí akɛ. 48Aǒgea te: «Nkpa nde ansesi miki nde k'ína ani, amosesi phɔtɔ. Nkpa nde amosesi, ansesi phɔtɔ mmbé amoteki. Nga, nkpa nde aǒdidisa sɔsɔɓɛ anu aámbé ande mɔkɔta.»
Mmbé káokangi aogami
(Ɔna phɔtɔ Mkɔ 9.38-40)
49Yoáni áongea: «Ngoisigi, ɓɛmɔni nkpa n'aǒɓeaga ɓansombo k'ína akɔ. Ɓeogea ɓénimisiɛ nga, nna ka ɓesu.»
50Yéso áonsikisia: «Ɓókonimisiɛmbɛ. Nga, aoɓá nkpa na nna mɓiɓia nɛnu, ámbé a ndiu nkpa nɛnu.»
Yága á Yéso ka Samalía
51Ɓî esa á ja á Yéso na koba ɗá ye tɔ bíbí, Yéso áosuia mesa á tamba ka gǎ na Yɛusalɛ́ma. 52Wa, áokpanga teka á ɓatɔmi-mbino mosá akɛ. Ɓáge ye, ɓáojúa ka nji moci á ɓato á ka Samalía, ka gea te, ɓáɓɔngisiɛgɛ k'akɛ ɔma. 53Ɓato á ka nji ndɔ, ɓákakondɛ sesea akɛ wa nga, ɗáoga na Yɛusalɛ́ma. 54Ɓî ɓagoigi, Yakɔ́ɓɔ na Yoáni ɓáubi ye ɓó, ɓáomúsia Yéso: «Mɔkɔta, okondi ɓɛ́mɛmɛ nsa, átókɛ na koba, ábikɛ ɛ̌kɛkisɛgɛ ɓɔ#Ɔna 2 Ɓam 1.10-12?» 55Mpɔ, Yéso áǒpháia kuɓî ɓáɔ, áǒpheneaga.
56Mpɔ, ɓâ ye tɔ oga ka nji nɛngbo.
Ɓeá á Yéso
(Ɔna phɔtɔ Mat 8.19-22)
57Na ɓá phɔ́tɔ k'aphe, nkpa moci áongea Yéso: «Nekoɓeande k'ɔ́ma bui nde ooga.» 58Yéso áongoɗea: «Ɓakɛnsɛngɛ ɓá na kubu. Ɓambǔ, ɓá na iɓɔ. Eme Muna-Nkpa ké gǎkɛ n'ɔma á maka kamonga.» 59Â phɔtɔ ongoɗea nkpa moci: «Ómoɓea!» Nkpa ndɔ áongoɗea: «Mɔkɔta, ómososea phɔ́ négɛ némúmbɛ abɛ.» 60Yéso áongoɗea: «Óɗeketa ɓakpa nde ɓáku ɓéúmbɛ ɓakpa nɛɓɔ íɓundɔ ɓáku. Oɓɛ gǎkɛ, gǎ ɔ́tɔ̌miɛgɛ nyɔngɔ á koɓoamɛ ndea Mokonga.» 61Nkpa ɓaangbo áongoɗea: «Mɔkɔta, neoɓeande. Ómososea phɔ́, négɛ ɔkɔanɛ n'ékombo nɛmɔ.» 62Yéso áongoɗea: «Nkpa nde aokpanga guba n'aɔɛnjia mbusa, kákeni áɓɛ mbɛɗanigi ka koɓoamɛ ndea Mokonga.»
Currently Selected:
Lóka 9: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
Lóka 9
9
Teka á ɓateki nkama na ɓaɓɛ (12)
(Ɔna phɔtɔ Mat 10.5-15; Mkɔ 6.7-13)
1Mbusa, Yéso áǒdondanisa ɓateki nkama na ɓaɓɛ (12), áǒɓopha kɔkɔta na ɓukpɛkpɛ á ɓeaga á ɓansombo ɓɔbu na amisa á ɓasambi. 2Mpɔ áǒteka ka tɔ̌miaga á nyɔngɔ á koɓoamɛ ndea Mokonga na amisa á ɓasambi. 3Áǒngoɗea ɓe: «Ɓókobɛɗɛmbɛ ka kema ka tamba. Kaɓɛ motumbɔ, maiɓɔta, mokati na imɔna. Nkpa na nkpa kaɓɛmbɛ na ngɔ́mbɛ á k'égogo iɓɛ. 4Endu nde ɓáonósesea kau, ikani suɓi í na ka ɓî ɓɔmɛande. 5Cɔ, aoɓá ɓato á ka ntanga-nji na ɓáyé sesea anu, tókani ka ntanga-nji ndɔ, ɓóciciɛ mpusu á oɗo bui nde a k'écinji anu#9.5 Ɔna Mkɔ 6.11. Cicia á mpusu á oɗo á k'écinji ande úbisa á ɓato á ka ntanga-nji ndɔ gea te, ɓagoigi ɓáká ye tanda na nyɔngɔ ka phɔaɓɔ. ka úbisa aɓɔ gea te, nyɔngɔ ěguiaeka.» 6Mpɔ, ɓateki ɓáoga na ɓáɔtɔmiaga Mbino-Ánjá ndea Mokonga nji ka nji, ɓâ phɔtɔ ǒamisa ɓato á esambɔ k'ɔ́ma bui.
Ianaga ndea Ɛlɔ́dɛ ka phɔa Yéso
(Ɔna phɔtɔ Mat 14.1-12; Mkɔ 6.14-29)
7Ɓî Ɛlɔ́dɛ moamɛ á ka Galiláya ɗáɔ́ki nyɔngɔ nde ɗágeani, áoianaga, nga ɓakpa ɓuangbo ɗáɓáogea te: «Yoáni-Mɓatisi ɗájujúki ka kukuwa.» 8Ɓuangbo ɓáogea: «Elía, aámbɔ asɛnɛki.» Ɓuangbo ɓâ goto ogea: «Ka ɓaɔtu-nyɔngɔ á kala ndea Mokonga aámbɔ ajujúki ka kukuwa.» 9Mpɔ, Ɛlɔ́dɛ áoianaga gea: «Eme aámbé ɗétenisi mɔ̌ á Yoáni. Cɔ, ani mmbɔ nɛɔɔ́ka nyɔngɔ ásii ka phɔakɛ ɓo?» Kaɓondɔ, áokaɓa ɔna akɛ.
Ísa á usɛsɛ á ɓakpa
(Ɔna phɔtɔ Mat 14.13-21; Mkɔ 6.30-44; Yoá 6.1-14)
10Ka ja aɓɔ, ɓateki ɓáɔntɔmiaga Yéso kema bui nde ɗáɓági. Mpɔ Yéso áɔ̌bɛɗa, áoga na ɓɔ sasaɓɔ bǎ á ntanga-nji nde ɓáɔphana Bɛtɛsaída. 11Ɓî ɓakpa ɗáɓáúbi gǎkɛ ɓó, ɓâ tɔ omɓea kó. Yéso áǒsesea, áɔ̌tɔ̌miaga nyɔngɔ á koɓoamɛ ndea Mokonga, â phɔtɔ ǒamisa ɓundɔ ɗáɓá na siki á ɓoamia.
12Ɓî esa akpangi gɔgɔmana, ɓagoigi nkama na ɓaɓɛ (12) ɓáɔsɛkɛɗa bíbí á Yéso, ɓáongoɗea: «Cɔ, ójisa ɓakpa, ɓágɛ ka nji na ka motumbe nde a bîbíbí, ka kaɓaga eea n'éndu, nga wani ɓe ka nkanda.» 13Yéso â ndiu ǒgea: «Ɓenu sasanu ɓáunge óɓophani kema á koea.» Ɓáonsikisia te: «Ɓe tɔndɔ na mokati ɓɔku na ɓasú ɓaɓɛ. Cɔ, okondi ɓégesombɛ eea ka ɓakpa nde ɓɔbu?» 14Ɗáɓátú wa, ɓǒko ɓea ɛlɛphu ɓɔku (5.000). Wa, Yéso áǒgea ɓagoigi nɛkɛ: «Óikisani ɓakpa etúnda moci-moci á ɓakpa nkama ɓɔku (50).»
15Ɓagoigi ɓáoɓeekea, ɓáǒikisa ɓakpa ka oɗo. 16Ɓî Yéso abɛɗi mokati ɓɔku na ɓasú ɓaɓɛ ndɔ, áɔɛnjia na koba, áonsega Mokonga ka nyɔngɔ á eea ndɔɔ. Áoɓúnaga ú, áǒɓopha ɓagoigi ka gabea usɛsɛ á ɓakpa. 17Ɓɔbu ɓáoeaga, ɓáokuta. Mbusa í, ɓagoigi ɓáɔkɔngɔa phúnju-phúnju á due í, ɓáotúmisa jɔ nkama na iɓɛ (12)#Ɔna 2 Ɓam 4.42-44 .
Pɛ́tɛɛ aɓeeki gea Yéso ande Kiísito
(Ɔna phɔtɔ Mat 16.13-19; Mkɔ 8.27-29)
18Esa moci, Yéso ɗáɔmɛma Mokonga k'ɔ́ma á ɓɔsɔmɛa, yɛ na ɓagoigi nɛkɛ. Wa, áǒɓúsia te: «Usɛsɛ á ɓakpa nde ɓáogea te, nende ani?» 19Ɓagoigi ɓáonsikisia te: «Ɓakpa ɓuangbo ɓáogea, onde Yoáni-Mɓatisi. Ɓuangbo ɓáogea Elía. Ɓuangbo ɓâ goto ogea, ka ɓaɔtu-nyɔngɔ á kala ndea Mokonga aámbé ajujúki ka kukuwa.» 20Yéso â goto ǒɓúsia: «Cɔ, ɓenu gǎkɛ ɓogi nende ani?»
Mpɔ Pɛ́tɛɛ áonsikia te: «Onde Kiísito mmbé ɓa Mokonga.»
Yéso atɔ̌mi kukuwa na jujúka akɛ
(Ɔna phɔtɔ Mat 16.20-28; Mkɔ 8.30—9.1)
21Mpɔ, Yéso áǒimisia akpɛ gea, ɓákangoɗeɛ mɔnɔ ka nkpa nyɔngɔ ndɔɔ. 22Â phɔtɔ ǒɓúbisa: «Akeni eme Muna-Nkpa nétambɛgɛ phɛɛ, ɓagbɛga, ɓagbɛga á ɓatobeigi-phɛ́a na ɓaɗundu-ɛɔphi ɓámoyɛgɛ na kusisa ani. Mpɔ k'ésa á ko isaɔ, nejujukande ka kukuwa.»
23Â phɔtɔ ǒngoɗea ɓɔbu ɓe: «Aoɓá nkpa n'akondi ɓeá ani, akeni ěyɛ sisakɛ, ákumbɛ moyangɔ nɛkɛ esa bui, ámoɓeɛ. 24Nga, nkpa nde akondi amisa á enda akɛ, aɓúngisande ú. Mmbé a gǎkɛ oɓúngisa ú ka nyɔngɔ ani, aamisande enda akɛ. 25Cɔ, ana kantíti sina aoɓá nkpa n'atɔi nkumba bui á ka mokonda n'aɓúngisi ndiu enda akɛ, kaɓɛ n'ětúkatúki sisakɛ? 26Aoɓá nkpa n'aku na soni ka phɔani na ka phɔa ɓɔphɛi nɛmɔ, eme Muna-Nkpa, nenkuiande phɔtɔ soni esa nde nebikaeka ka ɓoombia nɛmɔ na nnde á Abɛ, na nnde á ɓamalaéka á kanga ɓojeɗe. 27Ɗoni! Nenóúbisi gea, ka ɓakpa nde ɓá wani, ɓákákuwɛku na ɓákáɔni koɓoamɛ ndea Mokonga.»
Úbikana á ɓoombia á Yéso
(Ɔna phɔtɔ Mat 17.1-8; Mkɔ 9.2-8)
28Mbusa á ɓ'esa ngianjaga isaɔ (8), Yéso áɔ̌bɛɗa Pɛ́tɛɛ, Yoáni na Yakɔ́ɓɔ, áoɓamba na ɓɔ mamba k'aphe á mɛma á Mokonga. 29Ɓî ɗáɔmɛma, keongi akɛ áǒketia mosá aɓɔ, ngɔ́mbɛ nɛkɛ áoɓá ábu, áophenuaga biɛ! biɛ! 30Kɛ̌kɛndɔ tɔ, ɓáɔ̌ɓɔna ɓǒko ɓaɓɛ na ɓáɔyɔngaga na Yéso. Ɓǒko ndɔ ɗáɓátú Mósa na Elía. 31Ɗáɓásɛnɛki suɓi á ɓoombia á na koba. Ɗáɓáɔyɔngaga na Yéso ka nyɔngɔ á ɓî Yéso atɔtɔkisande moangɔ nɛkɛ á kukuwa na Yɛusalɛ́ma. 32Cɔ, Pɛ́tɛɛ na ɓadakɛ tɔ̌ ɗɛ́bɛɗi phɛɛ. Ɓî ɗáɓájujúki, ɓáɔɔna ɓoombia á Yéso na ɓǒko ɓaɓɛ ndɔ ɓî ɗáɓámamege na yɛ#Ɔna 2 Pɛ́t 1.16-18. 33Ɓî ɓǒko ɓaɓɛ ndɔ ɓákpangi ye ɗeketana na Yéso, Pɛ́tɛɛ áongoɗea: «Ngoisigi, aánjá ɓéikɛ wani. Cɔ, ɓɛ́phɛ̌kɛ ɛma isaɔ: Moci k'óɓɛ, moci ka Mósa, moci ka Elía.» Ande gea te, Pɛ́tɛɛ ɗákáengekisi nyɔngɔ nde ɗáɔyɔnga.
34Cɔ, ɓî ɗá phɔ́tɔ ɔyɔnga, egugu áobika, áǒgbukumia. Ɓagoigi ɓáoɓá na kɔɓɔɓɔkɔ ɓî ɓáɔni iimbiɔ á egugu n'ěgbukumi. 35Mpɔ, ɛsɔ áɔɔ́kɛkana k'égugu ndɔ te: «Mmbé ande miki nɛmɔ mmbé ɗénsɔmbu. Mɔ́kani yɛ#Ɔna Isa 42.1; Lók 3.22.» 36Mbusa á ɔ́ka ɛsɔ ndɔ, ɓâ ye tɔ ɔmɔna Yéso sasakɛ. Mbusa índɔ ɓagoigi ɓáɔkɔ́ɓa phio! Kángá á tɔ̌mia á nkpa ka kema ndɔ ɗáɓáɔni.
Amisa á nto á kukuwa á ɓansombo
(Ɔna phɔtɔ Mat 17.14-18; Mkɔ 9.14-27)
37Mama í, ɓî Yéso na ɓagoigi nɛkɛ ɗáɓádidi mamba, ɓáodondana na usɛsɛ á ɓakpa ɓásii. 38Sɔsɔɓɛ á usɛsɛ ndɔ, mǒko moci áɔyɔnga akpɛ áogea: «Ngoisigi neoɗengemisigi, mɔna ka miki nɛmɔ, nga a tɔ ngɔmu. 39Ɓansombo ɓáontenaga phɛɛ, na ɓá phɔtɔ onkogisaga, ɓáonsugaga akpɛ na ka ɓî phû aophúphutaga k'aphenɔkɔ akɛ. Ɓáontambisaga, ɓáonɗeketa k'akpɛ. 40Něɗengemisigima ɓagoigi nɛkɔ gea, ɓétokisɛ ɓansombo ndɔ. Ɓákáɛtɔkɛ.»
41Mpɔ Yéso áogea: «Hoo! Ɓenu ɛɓɔkɔti á kanga ɓeekea nde ca! Ka mbenɔ kǔngaáni nde neikande na ɓenu? Ka mbenɔ kǔngaáni nde nenóphiphiande? Cɔ, mbika na miki nɛkɔ wani.»
42Ɓî miki ɗáɔsɛkɛɗa bíbí á Yéso, ɓansombo ɓáommaka ka oɗo, ɓáonsuga akpɛ phɛɛ. Yéso áǒkeea, áonamisa miki, áonsikisia abakɛ. 43Kaɓondɔ, ɓakpa ɓɔbu ɓáotangaaga ɓukpɛkpɛ á Mokonga.
Yéso atɔ̌mi goto kukuwa akɛ
(Ɔna phɔtɔ Mat 17.22-23; Mkɔ 9.30-32)
Ɓâ phɔtɔ otangaaga kema bui nde Yéso ɗági. Mpɔ, Yéso áǒngoɗea ɓagoigi nɛkɛ: 44«Koɗani kecue anu ánjá ka nyɔngɔ nde nɛɔnɔtɔmia kɛ̌kɛnde. Eme Muna-Nkpa, ɓámobisande ka njaga á ɓakpa.» 45Ɗáɓákáengekisi gǎkɛ nyɔngɔ ndɔ, nga kantíti í ɗákátú ka ɓɔ base. Ɓáoɓánga úsia á Yéso ka nyɔngɔ ndɔɔ.
Ani mmbé ande mɔkɔta?
(Ɔna phɔtɔ Mat 18.1-5; Mkɔ 9.33-37)
46Mbusa, ɓagoigi nɛkɛ ɓáopúa ka úba gea, ani mmbé ande mɔkɔta sɔsɔɓɛ aɓɔ. 47Ɓî Yéso ɗáúbi ye gǎkɛ nyɔngɔ nde ɗáɓáopúa kau, áɔmbɛɗa miki, áommesa bíbí akɛ. 48Aǒgea te: «Nkpa nde ansesi miki nde k'ína ani, amosesi phɔtɔ. Nkpa nde amosesi, ansesi phɔtɔ mmbé amoteki. Nga, nkpa nde aǒdidisa sɔsɔɓɛ anu aámbé ande mɔkɔta.»
Mmbé káokangi aogami
(Ɔna phɔtɔ Mkɔ 9.38-40)
49Yoáni áongea: «Ngoisigi, ɓɛmɔni nkpa n'aǒɓeaga ɓansombo k'ína akɔ. Ɓeogea ɓénimisiɛ nga, nna ka ɓesu.»
50Yéso áonsikisia: «Ɓókonimisiɛmbɛ. Nga, aoɓá nkpa na nna mɓiɓia nɛnu, ámbé a ndiu nkpa nɛnu.»
Yága á Yéso ka Samalía
51Ɓî esa á ja á Yéso na koba ɗá ye tɔ bíbí, Yéso áosuia mesa á tamba ka gǎ na Yɛusalɛ́ma. 52Wa, áokpanga teka á ɓatɔmi-mbino mosá akɛ. Ɓáge ye, ɓáojúa ka nji moci á ɓato á ka Samalía, ka gea te, ɓáɓɔngisiɛgɛ k'akɛ ɔma. 53Ɓato á ka nji ndɔ, ɓákakondɛ sesea akɛ wa nga, ɗáoga na Yɛusalɛ́ma. 54Ɓî ɓagoigi, Yakɔ́ɓɔ na Yoáni ɓáubi ye ɓó, ɓáomúsia Yéso: «Mɔkɔta, okondi ɓɛ́mɛmɛ nsa, átókɛ na koba, ábikɛ ɛ̌kɛkisɛgɛ ɓɔ#Ɔna 2 Ɓam 1.10-12?» 55Mpɔ, Yéso áǒpháia kuɓî ɓáɔ, áǒpheneaga.
56Mpɔ, ɓâ ye tɔ oga ka nji nɛngbo.
Ɓeá á Yéso
(Ɔna phɔtɔ Mat 8.19-22)
57Na ɓá phɔ́tɔ k'aphe, nkpa moci áongea Yéso: «Nekoɓeande k'ɔ́ma bui nde ooga.» 58Yéso áongoɗea: «Ɓakɛnsɛngɛ ɓá na kubu. Ɓambǔ, ɓá na iɓɔ. Eme Muna-Nkpa ké gǎkɛ n'ɔma á maka kamonga.» 59Â phɔtɔ ongoɗea nkpa moci: «Ómoɓea!» Nkpa ndɔ áongoɗea: «Mɔkɔta, ómososea phɔ́ négɛ némúmbɛ abɛ.» 60Yéso áongoɗea: «Óɗeketa ɓakpa nde ɓáku ɓéúmbɛ ɓakpa nɛɓɔ íɓundɔ ɓáku. Oɓɛ gǎkɛ, gǎ ɔ́tɔ̌miɛgɛ nyɔngɔ á koɓoamɛ ndea Mokonga.» 61Nkpa ɓaangbo áongoɗea: «Mɔkɔta, neoɓeande. Ómososea phɔ́, négɛ ɔkɔanɛ n'ékombo nɛmɔ.» 62Yéso áongoɗea: «Nkpa nde aokpanga guba n'aɔɛnjia mbusa, kákeni áɓɛ mbɛɗanigi ka koɓoamɛ ndea Mokonga.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.