Ioane 14
14
1Nole okasosok uaba nerkep: uaba Adim oituli, karim oituli ko.
2Dordor uteb kara Aba ra meta ge; ese nolea; kaka emetu uabi detagereda; abelelam kai nabakeamulu uteb derser uabim.
3Ese ka nabakeamulu uteb derser uabim, kaka iako tarabue, uabi taisare karbabim: ueakai uaba kari kemem emri.
4Uaba umele abele uteb kaka nabakeamulu, uaba gab umele ko.
5Toma abi detager, kega, Opole, keriba umer kak ma na gedim bakeam; a nalugem keriba gab umele?
6Iesu abi detaut, kega, Kaka gab, a ageakar, a eded; nole le Abem bakeam, ese nole gab kari dog.
7Ese uaba kari umele, uaba kara Ab umele ko: peirdi uaba abi umele, a abi dasmer.
8Filipo abi detaut, kega, Opole, keribi Abet detomereta, a sina.
9Iesu abi detaut, kega, Nako, kaka emeret uabi dog, mama Filipo nole kari nasmeli? abele le kari nasmer, E kara Aba nasmeli; nako mama detaut, kega, Abet keribi detomereta?
10Nako, ma nole dikiapor kak, kaka muige Abaim, pako Aba karim muige? Abele gaire lu kaka uabi detager, kaka nole karbabu detager; epe Baba kari muige, E ikeli abele gaire dorge.
11Kari nagaret, kaka muige Abaim a Aba kari muige: ese nolea, debele egaret dorgelam.
12Ageakar, ageakar, kaka uabi detager, kega, Abele le karim oituli, gaire dorge kaka ikeli, E ko ikeli: epe E ko au ikeli tumem abele, abelelam kaka nabakeamulu karba Abem.
13Gaire lu uridili ua damsare kara nei ge, kaka ikeli abele, ueakai Aba despili Uermet.
14Ese uaba lu damos kara nei ge, kaka ko ikeli.
15Ese uaba kari lag, uaba ko kara gelar irmili.
16Kaka ko Babim bali, ueakai E ko uabi ikuar nerute Upiatidar, ko uaba kemem emri niai karem,
17Abele ageakar Lamar: gesep umer kak abi egaret; abelelam uiaba abi asmer kak, a nole abi akmer kak: epe uaba abi umele; abelelam E uabi dog emri, a E mena dali uabi nerkep ge.
18Kaka nole uabi dikaer mokakalam ab kak a apu kak uerem giz; kaka ko uabim tabarki.
19Menaba gesep nole kari asmer kak; epe uaba kari nasmerare: abelelam kaka eded, ua ko eded.
20Abele gerger uaba ko umele, kega, Kaka muige kara Aba, a uaba muige kari dog, a kaka muige uabi dog.
21Abele le kara gelar nagri, a abele irmili, E kari lag: abele le kari lag Baba abi lag, a ka ko abi lag a kari natomelu abim.
22Ege Iuda (nole Isakariota) abi detaut, kega, Opole, nako mabu ko keribi detomertare, a nole gesepem ko?
23Iesu abi detaut, kega, Ese le kari lag, E mena kara mer erpei: kara Baba ko abi lag, epe ki tabarki abim, a abi kemem emri.
24Abele le nole kari lag, E nole kara mer erpei: abele mer uaba asoli nole kara mer, epe Baba de kari namarida.
25Kaka emetu detaut abele gaire mer uabim, kaka mena uabi dog.
26Abele Upiatidar, Lamar Zogo, Baba de ko namarida kari nei ge, E ko uabi dereuered gaire lu uridili, a ko uabim dikiaporare gaire lu uridili kaka uabi detager.
27Mapodan kaka uabi dog ikeli; kaka uabi ikuar kara mapodan: kaka nole uabi ikuar mokakalam gesep ikuar. Nole okasosok uaba nerkep, a nole geum.
28Uaba emetu asoli kaka uabi detager, kega, Kai nabakeamulu, kaka iako tabakeam uabim. Ese uaba kari lag, uaba ko sererge kara mer, kega, Kaka Abem nabakeamulu: abelelam kara Aba aule kari tumge.
29Peirdi kaka uabi detager, a nole bakedida, iaueakai ese bakedida, uaba ko egaret.
30Kaka nole iako perepere mer atager uabim, abelelam geseb tarim ko tabarki: a nole nerute abara lu kari dog;
31Ueakai geseb umele kaka Babe lag, a kaka ikeli mokakalam Baba de kari mer tigri. Tekue, nabakeuare.
Currently Selected:
Ioane 14: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
