Ioane 3
3
1Abele nerute le Faresaio, nei Nikodemo, Iudaia tarim le:
2E ki ge Iesuim tabakeam, a abi detager, kega, Rabi, keriba umele ma ereuer le tarabu Adelam: abelelam nole nerute le umele ikeli abele gaire atamelam mama ikeli, ese Ade nole abi dog.
3Iesu etkalu, a abi detager, kega, Ageakar, ageakar, kaka mari natagere, Ese nerute le nole iako esmeda, E umer kak Ade ra baselaia dasmer.
4Nikodemo abi detaut, kega, Nalugem aule umele ko eosmeda? nako E umele ko neisem badari taba apu kem ge, a iako esmeda?
5Iesu etkalu, kega, Ageakar, ageakar, kaka mari natager, Ese nerute le nole esmeda ni de a Lamar de, E nole umer kak Ade ra baselaia badari.
6Abele gemlam esmeda, gem pedali; abele Lamarlam esmeda, lamar pedali.
7Nole amer kak abele mer kaka mari natagere, kega, Ido lu uaba iako esmerare.
8Uag uami abele uteb E laglag, ma bumer asoli, a nole ardar kak E nagelam, a E nagedim bakeam: mokakalam gaire le Lamar de esmerare.
9Nikodemo etkalu, a abi detager, kega, Nako umele gaire lu pedali?
10Iesu etkalu, a abi detager, kega, Nako, ma Isaraela ereuer le, a nole erdali abele gaire lu?
11Ageakar, ageakar, kaka mari natager, kega, Keriba detagereda abele gaire lu keriba erdarda, a ageakarem abele gaire lu keriba dasmereda; epe uaba nole arpeir kak abele keriba ageakarem.
12Ese kaka uabi detagereda gaire lu geseb ge, a uaba nole oatur kak, nako uaba onatareda ese kaka uabi detagereda gaire lu kotor ge?
13Nole nerute le ogi kotorem, epe mamoro E kotorlam uatabu, abele Le la Uerem kotor ge emri.
14Mokakalam Mose taba armem agisilu abele soge purge, pako mokakalam Le la Uerem ko arem agisilu:
15Epe gaire le abim onatareda, ko nagri eded akaida.
16Abele absaimarsaimar Ade ra omare gesepem, gako E ikuar abara Uerem netate, epe nole eud kak, abele le abi oituli, mamoro E nagri eded aseamur kak.
17Ade nole emarida abara Uerem gesepem ko gesep mer barditug; epe mamoro gesep eded abielam.
18Abele le abi oituli nole mer barditug abim: abele le nole oatur kak emetu mer barditug abim, abelelam E nole oatur kak abele nei Ade ra Uerem netate.
19Abele mer barditug, datki gesepem tabarki, gaire le kupkup laglag tumem datki, abelelam uiaba dorge adud.
20Gaire le adud ikereda, uiaba datki derarteda, a nole datkim tabakeuare, uiaba dorge akmelam.
21Gaire le ageakar ikereda, uiaba datkim tabakeuare, ko uiaba dorge paret kak, abele emetu ikereda Adim.
22Abele gaire lu iobaru, Iesu a abara kaimeg giz bakeuare Iudaia gedim, E uiabi kemem bamer, a bapataiso.
23Ege Ioane ko Ainonem bapataiso, abele maike Salim, abelelam au ni pedali: uiaba tabakeuare, a bapataisoem.
24Abelelam Ioane nole aziri kak au dubar meta.
25Ioane ra kaimeg giz a nerute uiaba Iudaia le giz basardare abele tonar ogarup.
26Uiaba Ioaneim tabakeuare, a abi detagereda, kega, Rabi, abele le mari dog, Ioridano apek, mama emetu abi ageakarem, dasmer, E ko bapataiso, a gaire le uridili abim tabakeuare.
27Ioane etkalu, a detager, kega, Nerute le umer kak ko nerute lu erpeilu, ese nole abi ikuar kotorlam.
28Uaba kari ageakarem, karielam detaut, kega, Kaka nole Keriso, epe kaka taramarida abi opem.
29Abele le kosker nagri emetu abim babeida, E dali ko ispida: abele le aspidar le la boai ekue, a abi asoli, au sererge abele le ispida ra kodo mer: abele kara sererge kemerkemer.
30E ko bataili, kaka ko ekekeli.
31Le kotorlam uatabu, E tumem gaire lu uridili: le geseplam, E geseplam, a ko gesep mer atager: le kotorlam uatabu, E tumem gaire lu uridili.
32Abele lu E emetu dasmer a asoli, E ageakarem peik; a nole le abara ageakarem erpei.
33Abele le abara ageakarem erpei, E dedkomet, kega, Ade ageakar.
34E dali Ade de temarida mer atagerem gaire Ade ra mer: abelelam E nole Lamar Zogo ikuar au tale lu ge de.
35Abet abele Uerem omare, a gaire lu uridili abi tagem aisuer.
36Abele le Ueremem oituli, E nagri eded aseamur kak: abele le nole Ueremem asor kak, E nole eded asmer kak, epe Ade ra urker abi tumge dikmerik.
Currently Selected:
Ioane 3: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
