Luka 1
1
1Abele mer gaire le giz elele detarare abkesem, abele mer keriba emetu erdarda,
2Mokakalam uiaba nakuarare keribim, ui ge emetu erdarare, pako memeg le giz ditimeda abele mer,
3Abelelam kaka dikiapor, abele kai deraimer gaire lu uridili peirdi ika ditimedilu, kaka daotare abkesem marim, opole Teofilo;
4Ueakai ma umele ageakar abele gaire lu, emetu mari ereuerem.
5Abele kerker ge Heroda, Iudaia opole, nerute zogo kemle, abara nei Zakaria, Abia ra nosik: abara kosker, Arona ra boai, abara nei Elisabeta.
6Ui barkak tonar Ade ra op ge, uiaba irmilei Iehoua ra mer gelar giz, nole asauersili kak.
7Ui ge daralei nole uerem kak, abelelam Elisabeta E soaso, ui ge akailei aule bailei.
8E ikerer tabara dorge, E zogo le Ade ra op ge, E tabara nosik erag,
9Mokakalam zogo le la tonar, abara dorge E badarer Iehoua ra zogo meta ge, E urim iger debe laglag lu.
10Uiaba gaire le lakub giz esorerapare adige, abele kerker iger debe laglag lu.
11Ege Iehoua ra angela de abi etomelu, tuter pek debe laglag lu bao ge.
12A Zakaria de abi emetu erdar, abele ge ezigmalu, au geum baruk.
13Ege angela de abi detager, kega, Zakaria ae, ma nolea geum kak: abelelam mara esorarapare Ade de emetu asoli, mara kosker Elisabeta de ia mara uerem, keubu uaesemur abi nei atker Ioane.
14A marim sererserer bai, iako gaire le sererege abielam:
15Abelelam E aule Iehoua ra opem, nole uaina are kak, pako gorog, a mitkar Lamar Zogo abele ge, ditimedelu abele kerker ge E osmelu.
16A darabgerare tababim Isaraela le ra omasker Iehouaim uiaba Ade.
17E kekiam Elia ra op ge, a adigir gako saserim, a nerkep depeger abem a apuem a omaskerem, darapegerare uiabim asorkaklam debe pardalem a debe tonarem; a ege derser abged abkoreb Iehouaim.
18A Zakaria etkalu abim angelaim, kega, Nalu atamelam iaka nakaielu umele nabailu? Na gabe, emetu kaka aule baida, pako kara kosker aule baida.
19A angela eutumer abim detager, kega, Kakanali Gaberiela, kaka nakuei Ade ra op ge; kari pe taramarida iaka natomelu abele debe mer iaka marim.
20A dasmer, mabe te dabimdabim, baida nole mer agar kak, iski abele gerger abelegelam mabe kara mer ma desardili abele lu pem keubu erdare ageakar.
21A ab gedge dekailare Zakaria mer aridarid, a uapum bakeam a Ade ra zogo meta.
22A ege teosmelu adem, mer atager kak uiabim; uiaba abi damrare, ege kerker nerute atamelam zogo meta ge, ege E opu darakiriare uiabim, ege E dabimdabim.
23A ege abara gerger desmulu, ege ko takomelu tabara boaiem.
24A ege keubu gerger basemerare abara kosker Elisabeta kem eskemer; ege E gumik dauer, a faife abara meb, a daraketarare,
25Ege Ade ikeli gerger karim, a kari uanasmerare, E adem depegi kara sirip.
26A ege abara meb sikes, Ade de angela temariklu, nei Gaberiela, Galilaiaem a Nazaretaem,
27Abi gobar detager, Dauida ra boai kimiarem, a E Iosefai akemelu tababim kimiarem, abara nei Maria.
28Abele angela tababu abi detager, kega, Kaka au omare marim, Iehoua uadoa mari dog; ma uerkab kosker gaire kosker ge.
29Ege abi dasmer, ege abara okasosok baruk abele merlam, E dikiapore nalu lu pe omare dali.
30A angela de abi detager, kega, Maria ae, ma nole geum kak; abelelam Ade mari au omare.
31Dasmer, ma keubu ia kem eskemer, ese ma esmeloa kimiare uerem, a nei etkeroa Iesu.
32E au kale, a nei etkeroa, Ageakar Opole ra Uerem: a Ade de abi nakuar ko emeri Dauida ra sik, abara aba:
33E opole obaina Iakobo ra boai ge; abara baselaia ge nole mop kak.
34Ege Maria de angela itimer, kega, Ua nade, ka nole kimiar ardar kak?
35A ge angela etkalu abim, kega, Lamar Zogo natabu, a Ageakar Opole ra adigir mari tumge; abelelam mabara uerem zogo, tabara nei, Ada ra Uerem.
36Dasmer, mara boai Elisabeta, E aule, emetu kem eskemer abara kimiar uerem: sikes meb abele kerker, E soaso.
37Abelelam Ade umele gaire lu uridili E ikeli.
38Ege Maria de abi detager, kega, Kaka Iehoua ra memeg le; uao debele pema nakaida kari abkoreb mara mer. Ege angela de abi dakaelu.
39Ege Maria ekueilu abele kerker ge, dudumge bakeamulu dordor paserem, Iuda ra utebem;
40Ege E bakeamulu Zakaria ra meta ge balu, a Elisabeta eskos.
41Ege Elisabeta de asor Maria ra nas, ege uerem dekumur a detatimir muige kem ge; pako Elisabeta ra mitkar Lamar Zogo;
42Ege E ereretikri au kase, a detager, kega, Uerkab kosker ma, pako abele uerem uerkab osmeda.
43Nako abele lu, tabakeamud karim kara Opole ra apu?
44Dasmer, iski a ikeli kodo mer de, mara omare karim ka asoli, ege ko uerem bagererdilu muige kara kem ge sererege.
45Ege uerkab kosker ra oditur; abelelam ageakar mer Iehoua de pe etomeret abim.
46Ege Maria detaut, kega, Kara nerkep baospili Iehouaim,
47Ege kara nerkep au sererege Ade, E kari nazemoada.
48A akai lu Iehoua de dasmer abele abara kosker memeg nole aule kak: abele kerker ge ditimedelu, ege gaire nosik uerkab karim.
49Abelegelam E dali au adigiri nagri, E gaire au lu karim ikeli; abara nei zogo le.
50E au omare gaire le la geum, bauder gaire nosik.
51Ege saserim tabara tag, E adem gaire le lagelage aule dikiapor uiaba nerkep.
52Ege naimartare uader opole baolam, ege uader ge nogoka emereder ga baker aule.
53Ege darasisilare uader le uiaba uererege debe leuer; uader luglug le no bakeuare.
54Ege abi upiditidare tabara memeg le Isaraela, E abi au omare:
55Aberahama pako abara omasker niaiem, mokakalam abim detaut meriba aba giz.
56Ege Maria de abi dog, nako neis netate meb, gako akomeda tabara boaiem.
57Ege bakedilu Elisabeta ra meb osemelu; ege kimiar uerem osemelu.
58Ui aserare ge, abara boai giz, Iehoua au omare abi; ui ge sererege abim.
59Ga eit gerger, uiaba egared abele uerem peritome; uiaba lagelage abi nei atker Zakaria, taba aba ra nei.
60Ege abara apu ge uiabi detaut, kega, Nole abele; epe tabara nei Ioane.
61Ui ge abi detagerare, kega, Mara ko boai obatkereda Ioane nei.
62Ui ge abara aba opu mer detagerare, Ma pe nako ma dikiapore abara nei?
63E ge uiabi daratagerare, kega, Seleti tekadarare karim; E detali, Abara nei Ioane. Ui ge au kasege damrare.
64Ege akailu merkar etkalu, tabara uerut detue, E mer detaut, a au esoao Adim.
65Ege uader maike abi dog ga erdarare uiabim ga geum barkare; abele mer dordor paser ge Iudaia ge ga esao.
66Ui ge emetu aserare ga dikiaporare, kega, Nalu uerem dali? Abelelam Iehoua ra tag abi dog pako abi upinati.
67Ege abara aba dauer Zakaria mitkar Lamar Zogo, E ekerer perofeta dorge, kega,
68Esoao Isaraela ra Ade, Iehoua pedali; E meribi dasmer E meribi dazimoareta abara ged ge,
69Iski sekerise meribim uerkab Dauida ra boai ge abara memeg le,
70Mokakalam ge emeret ge, Iehoua de daratagerare gaire zogo perofeta,
71Mamoro pemi uridili uader le gizlam pe meribi dirieda, tag abgered urkerem meribim;
72E au omare meriba aba giz, gako dikiapor tom akoar zogo;
73Beskak mer E nakuar Aberahama meriba aba,
74E meribi dikuarda meriba azimoaret, uader tag au kelarkelar, meriba nole geum kak meriba memeg le,
75E zogo pako oditireda abi op ge, gaire gerger uridili meriba eded.
76A mama kebile ae, uiaba gaire le mari nei atker Ageakar Opole ra perofeta: abelegelam ma kekiam Iehoua ra opem derser abara gab ge;
77Mamanali natomertare abele azigmoaret uiabim abara ged, pako adem dikri uiaba uit giz.
78Epe Ade pe meriba nasge dali, a kotor datki meribim.
79Datki ga baziarare gesepem kupikupiem, datki moar degrered meriba teter gab karem.
80Ege abele uerem ga batai, abara nerkep saserim, sumez ge emri, ga abi etomertare Isaraela le giz abi.
Currently Selected:
Luka 1: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
