Luka 17
17
1E ge tabara kaimeg giz daratagerare, kega, Umele uatabaruk lu uadatko: epe uaiai abele lu kemle!
2Debele abi perege dimiri au baker sekerseker, a batauered gurim, adud dedkoli nerute kebile.
3Ua uabim: ese mara le adud tonar marim, ma barditug; ese obazegeda ma abi idigiri.
4Ese sefen gaber netate gerger adud tonar marim, pako sefen gaber netate marim egali, kega, Kaka obazegeda; ma abi idigiri.
5Ege kaimeg giz, Opole detagerare, kega, Ma upinati keriba oituli, ueakai aule.
6Ege Opole lut uiabi daratagerare, kega, Ese uaba oituli mokakalam sinapi ra turum, a uaba detager abele sukamina, Ma darbumu, a emor gur ge; a nolea ner kak.
7Nete uaba memeg le dali sep dereb, pako mamoe asesered, ese tabakeamu sumezlam, E detager, Ma tabakeamu naidi a ero?
8Nalu nolea abi detager, Ma derser leuer, pako teupeiem erpei mara ame uali, a derser gaire lu, a kaka eroli a aree; a esemud a ma ero a ere?
9E detager abele memeg le, iaueakai ikeli lu emetu abi etomereti? Nako nolea.
10Mokakalam uaba, ese esemuda ikeli gaire lu uridili kaka uabi etomeret, a uaba detager, kega, Keriba memeg le nolea debele; abelelam lu nolea abkoreb keriba ikeli, abele lu keriba emetu ikeli.
11Ege E bakeamulu Ierusalema ge, pako Samaria a Galilaia.
12Nerute uteb ge osmelu, ge obapitare ten lepera kem, ege uiaba ekue muriz ge:
13Ege uiaba ereretikri, kega, Iesu, Opole, keribi omare.
14Ege E uiabi nardarare, ege E uiabi daratagerare, kega, Bakeuare, ua natomertare zogozogo le. Ui ge bakeuare, epe uiaba idigiri.
15Nerute le emetu opasereret emetu idigir, E ko akomelu, ege Ade desper, a au ereretikri:
16Ekesmer abi teter ge, a abi esoao: E Samaria le.
17Ege Iesu de abi detager, kega, Emetu kaka ten le nadigirda. Nade nain le?
18Ui ge nole opasereret kak, akomeret kak, Ade esoao kak, no abele Samaria le.
19Ege E abi detager, Ma ekue, bakeamu: ege ma nagri eded mabi oatulam.
20Ege Faresaio giz ui abi itmerare, Na uar ge Ade ra baselaia uatabaruk? ege E uiabi daratagerare, kega, Ade ra baselaia nole uatabaruk erkep ge:
21Nole le detager, kega, Dasmer, peike! a nerute, Ike! abelelam dasmer, Ade ra baselaia nagri uabi dog.
22Ege E uiabi daratagerare, tabara kaimeg giz, Keubu gerger tabarki uaba lagelag erdali netate gerger Le la Uerem, a nole ardar kak.
23A uader le giz, uiaba uabi detager, kega, Dasmer peiki! a nerute, Dasmer ike! uaba nole bakeamu, a nole armir kak:
24Abelelam mokakalam ner be erperida nerute paikai kotor ge, a datki nerute paikai kotor ge; mokakalam gerger Le la Uerem.
25Abkoreb kekiam gaire asiasi abim, a abele nosik uiaba abi dikaer.
26Mokakalam Noa de ikerer abuar ge, abkoreb abele gerger Le la Uerem.
27Uiaba erolare, a erelare, a kosker nasiplare, a bakedida abele kerker Noa nar ge barot, epe meg abger tabarki, ege uiaba uridili baum.
28Mokakalam Lota de ikerer abuar ge; ui erolare, a erelare, a lu teraplare, a lu iritlare, a meta ikelare;
29Abuar ge Lota dikaelu Sodoma, a ur a tei mokakalam irmer kotorlam ui ge baum:
30Mokakalam, abele gerger ge ia Le la Uerem uatabaruk.
31Ese le egimur meta tot ge abele gerger, abara lu muige meta ge, nolea uatabu uaeais: mokakalam le emeri sumez ge, nolea ko akomeret kak.
32Uaba dikiapore Lota ra kosker.
33Ese nerute le deraimer abara eded emeri mapodan, E dedkoli: ese nerute le dedkoli, E nagri debele.
34Kaka uabi detagereda, kega, Abele ki, neisi le emeri netate sik; nerute le ais, a nerute no ikedi.
35Neisi kosker edatimir; nerute kosker ais, a nerute no ikedi.
36Neisi le emeri sumez ge; nerute le ais, a nerute no ikedi.
37Ui ge abi detagerare, kega, Opole, nade ikeli? Ege E uiabi daratagerare, kega, Abele uteb nagri eud le la gem, gaire aeto etami.
Currently Selected:
Luka 17: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
