Luka 21
21
1Ege E egreemalu, E erdali lu giz ra apu, uiaba batauered uiaba mani, abele uteb mani ikedi.
2Ege E erdali nerute mai kosker, nole lu kak, E batauered neisi kebi mani.
3Ege E uiabi detager, kega, Ageakar, kaka uabi detager, kega, Abele mai kosker, abara mani batauered, E aule uiabi dog uridili:
4Abelelam uiaba uridili batauered uiaba mani, gaire uiaba lulam: ege abele mai kosker, nolea lu kak, E batauered abara kebi mani uridili, abkoreb abara eded.
5Ege uader mer batagerare abele lu muige zogo meta ge, ege mamoro derser debe baker, pako uader zeku lu muige zogo meta, E uiabim daratagerare, kega,
6Ege gaire lu uaba dasmerare, keubu gerger tabarki, nole baker ko igi tumem nerute baker, a nole abu kak.
7Ui ge abi itimerare, kega, Ereuer le, na kerker ge gaire lu tabarki? a nalu atamelam gaire lu tabarki?
8E uiabim detaut, kega, Uaba mamoro dikiaporare, nerute le uabi okardare: abelelam gaire le ko uatabarkare kara nei ge, kega, Kakanali. Ege abele kerker maike: uaba nole uiabim irimili.
9Ese uaba asoli ares, a mirem, a uaba nole geum: abkoreb kekiam abele lu uatabaruk, a mop uarem.
10E uiabi daratagereda, kega, Nerute ged tekuei obapit nerute ged, a nerute baselaia obapit nerute baselaia:
11Au demali ia uanagiri abele uteb ge, a nerute uteb ge, a uererege, a gimgim, a urker, a gaire atamelam kotor ge.
12Gaire lu nole tabarki, a uiaba uabi erpei, a dedkoli, a uiaba uabi uademarkar sunagoem, pako audbar metaem, a uiaba uabi uadeguatare opole giz opem, kara neilam.
13Abele gaire lu uabim atamelam.
14Abele lu, debele ikedi uabi nerkep ge, iaueakai uaba nole kekiam deraimer, a dikiapor na mer ko detager:
15Abelelam kaka uabi dekuarda abele mer, a pardar, umer kak nerute le uabi asared, uaba au saserim.
16A uaba ab giz emarik, a keimer giz, a boai giz; a uader uabi ipit eumilu.
17Gaire le uridili ko uabi derar, kara neilam.
18A uaba kerem mus, nole nerute mus abi.
19Ese uaba debe tonar, a uaba eded nagri.
20Ese uaba erdali Ierusalema ge, urker ares deraueli, a uaba dikiapor maike dedkoli.
21Abele gerger uader emeri Iudaia ge, debele uiaba bakeuare paserem; uader emeri muige abele uteb ge, debele ui adem obakeuare; uader emeri sumez ge, uiaba nole ko akomeda muige abele uteb ge.
22Abelelam abele kerker bodomalam, iaueakai gaire lu ageakarem emetu detarare.
23Uaiai uiaba kosker kem, pako uiaba nano emeli abele gerger giz! abelelam au asias tabarki abele ged ge, pako urker.
24A uiaba eumid teibur aosaos tulik gargerlam, a uiaba no bakeamu gaire ged uridili: a gaire nogle uiaba dedkoli Ierusalema, a keubu abele nogle giz uiaba erdali uiaba mop.
25Lem kotor ge nagri atamelam, pako meb, a uer giz; geseb ge gaire ged nagri geum, a gur ge maisu a zauber nagri.
26Gaire le no eumida abele geum ge, a naokaili gaire lu ko tabarki gesepem: abelelam urker kotorlam demali.
27Epe uiaba erdali Le la Uerem tabarki baz kotor ge, E au adigri au zoromzorom.
28Ese ditimeda gaire lu, debele uaba bager a kerem iteare; abelelam maike uaba eded nagri.
29E uiabim detager, nerute mer babisdarie, kega, Uaba dasmerare abele suke pako gaire lu uridili:
30Ese lulam eperekilu, a uaba dasmer, a uaba umele maike urueri urut.
31Abkoreb, ese uaba erdali abele lu emetu ikeli, a uaba dikiapor Ade ra baselaia maike.
32Ageakar, kaka uabi detager, kega, Abele nosik le nole abu kak, kekiam abele gaire lu uridili tabarki.
33Kotor a geseb ko abu, a kara mer giz nole abu kak,
34Ua mamoro dasmer, iaueakai uaba nerkep nole beber, a gebgeb, a paim, a nole badumu geseb lugem, abelelam abele gerger keserkeser tabarki:
35Abelelam mokakalam pom tabarki, gaire le uridili emeri geseb ge.
36Debele uaba mamoro dasmer, a derser, a ner kak esorerapare, iaueakai uaba au saserim, gaire lu maike tabarki, a mamoro ekuei opem Le la Uerem.
37Abara tonar E ereuerem gerger ge, muige zogo meta, ki ge osmed, E emeri nerute paser, nei atker Oliua.
38Idim ge, abele ged ge uridili tabakeuare abele zogo meta ge, lagelag asarare abara mer.
Currently Selected:
Luka 21: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
