Luka 24
24
1Ege ditimedelu abele gerger sabath ge, uiaba bakeuare abele ao ge, bane ge, uiaba ais abele lu debe laglag emetu derser, uader kosker uiabi kemem.
2Ege uiaba erdali abele baker aolam emetu diski.
3Ege uiaba barot muige, uiaba nole erdali Iesu ra gem.
4Ege uiaba operem abele lu: dasmer, neis le ekuei uiaba opem, am zoromzorom uali:
5Ege uiaba au geum, a uiaba op esorgiru sepem, ege uiaba detager, kega, Nalu uaba deraimer? E emetu eded akaid, nole uiabi kemem eud le giz,
6E nole abele uteb, E ko ekuei: uaba dikiapor abara mer abele kerker ge uaba okakis emeri Galilaia ge,
7E detager, kega, Abkoreb Le la Uerem ikuar uit le la tag, a satauro, a neisi netate gerger ko eded akaid.
8A uiaba dikiapor abara mer.
9Ege uiaba ko akomed abele aolam, a uiaba etomeret gaire lu uiabim eleuen le, a pako le uridili.
10Maria Magadalena, a Ioana, a Maria Iakobo ra apu, pako uiaba uridili, uiaba etomeret abele lu uiabim aposetelo giz.
11A ui ge abele mer dikiaporare, kega, No mer pe deke; abelelam nole oatur kak.
12Ege Peteru ge ekueilu, E au koreder aoem; E esorgiru, E erdar no uali gaire eskeder; A E akomelu tabara metaem, a damer abele lu.
13Dasmer, neisi le uiaba bakeamulei abele gerger ge nerute utebem, nei Emau, ditimed Emau bakedida Ierusalema sikiste setatio.
14Ege uiaba mer atager abele gaire lu uridili ikeli.
15Ege uiaba mer atager, a deraimer, epe Iesu maike uiabi dog, a uiaba okakis bakeamu.
16A uiaba pone darasam, abelelam uiaba nole abi erdali.
17Ege E uiabi daratager, kega, Nalu mer pe ua batagreiei, pe ua dekase, a uaba pone mokakalam okasosok?
18Nerute le uiaba, nei Kaleopa, E abi detager, kega, Nako mama emeri Ierusalema, mama nole umer kak peirdi gaire lu osemeda?
19E uiabi daratager, kega, Nalu lu? A uiaba detaut, kega, Abele lu Iesu Nazareta le, E perofeta, E au saserim gaire lu ikeli, pako abara mer Ade ra opem, pako abele ged uridili:
20Zogozogo le giz, pako meriba tarim le, uiaba ikuar bodomalam eumilu, a uiaba abi satauroem.
21Keriba dikiapor E uerkab Isaraela. A gaire lu uridili, abele gerger thri gerger, abele lu ikeli.
22Keriba au damreda, uader kosker keribielam, uiaba bakeam banege a aoem;
23Uiaba nole erdali abara gem, a uiaba bakeamu abele merkem, kega, Keriba erdali angela giz ui keribim detomereta, E emetu ko eded akaida.
24Uader keribielam, uiaba bakeamu aoem, uiaba erdali mokakalam kosker detaut: a uiaba nole abi erdali.
25Ege E uiabi daratagerare, kega, Le paim, a peper nerkep, nole oituli gaire lu uridili gaire perofeta giz etomereti!
26Abkoreb Keriso kekiam au asias gaire lu mokakalam, a keubu abara zorom tabarki.
27Epe E uiabi etomereti gaire lu, emetu detali abielam jauali uridili, E ditimeda Mose bakedida perofeta uridili.
28Ege maike abele uteb ge uiaba bakeamu: epe E mokakalam no bakeamu.
29Ege uiaba saserim detaut, kega, Debele ma keribim emeri peike: abelelam gerger ise maike kikem. Epe E barot, a uiaba emeri.
30Ege E eidi eroli okakis uiabim, epe areto erpei, a esoao, a itur, a uiabi naisuerare.
31Epe uiaba pone bakaelei, a abi dasmerei; E uiabielam badimiriklu.
32Epe uiaba mer atager, kega, Nako meriba nerkep mokakalam ur muige, abuar ge meribi detager gab ge, E meribi detomelu abele jauali?
33Ui ge ekueilei abele haua ge, akomelei Ierusalemaem, a nardarare eleuen le, uiaba etamiare okakis uader uiabi kemem,
34Ui ge uiabi daratagerare, kega, Ageakar, Opole ko eded akaida, E etomereti Simonaem.
35A ui ge detautei abele gaire lu ikeli gab ge, a uiabi erdali a areto itur.
36A uiaba mer batager abele lugelam, a Iesu ekueilu uiabi opem, a uiabi daratagerare, kega, Uerkab uabim.
37Ege uiaba au geum, a ui dikiaporare uiaba lamar pemi erdarda.
38Ege E uiabi daratagerare, kega, Nalu uaba okasosok? nalugelam uaba nerkep basareda?
39Debele uaba mamoro dasmer, kara tag peike, pako kara teter, abelelam kaka: uaba kari erpei, a kari dasmer; lamar nole med kak, a nole lid kak, mokakalam uaba kari dasmer.
40Ege E emetu uiabi daratagerare abele mer, E uiabi natomertare tabara tag, a teter.
41A uiaba nole oatur kak, abelelam uiaba au sererege, a damared, E uiabi daratagerare, kega, Nako uaba nagri leuer?
42Ege uiaba abi ikuar nerute lar mog emetu urim, a nerute mog melikerio.
43Ege E narpeilu, a nareg uiabi opem.
44A E uiabi daratagerare, kega, Abele mer kaka uabi detagereda, abele kerker kaka uabi kemem, abkoreb iako ageakarem gaire lu uridili emetu detali karielam Mose ra gelar, pako perofeta giz, a Salamo.
45Epe E depegeli uiaba nerkep, iaueakai uiaba mamoro asoli jauali;
46E uiabi daratagerare, kega, Emetu detali, Abkoreb Keriso asiasi, a thri gerger ko eded akaida eudlam;
47Iaueakai natomertare obazgeda, a adigiri uit ged uridili, abara nei ge, ditimeda Ierusalema.
48Uaba upinati abele lu.
49Dasmer, kaka uabim namarida nerute le, kara Aba uabi uadetomertare: debele uaba emeri abele uteb, nei Ierusalema, iaueakai uaba nagri adigir kotor ge.
50Ege E uiabi ais sor ge, bakedida Bethania: ege tabara tag nagaisilu, E uerkab uiabim.
51Ege E uiabim uerkab, E uiabi dikaer, E bakeamu kotorem.
52Ui ge abim esorgiru; a bakomeret Ierusalemaem, a uiaba au sererege:
53Uiaba ner kak bakeamu zogo meta, uiaba Ade despered. Amen.
Currently Selected:
Luka 24: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
