Luka 4
4
1Ege Iesu takomeda Ioridanolam, ege abi Lamar Zogo mitkar, epe Lamar Zogo abi ais sumez ge.
2Ege diabolo de abi mirem. Abele foate gaire gerger E nolea leuer aro kak, gerger eseamulu: keubu abara uerer baruk.
3Epe diabolo abi detager, kega, Ese ma Ade ra Uerem, debele ma detager baker peike depegemelu leuer.
4Epe Iesu abi detaut, kega, Ege emetu detali, Nolea no leuer eroli ueakai le eded nagri, epe Ade ra merlam uridili.
5Epe diabolo abi ais nerute au perepere paserem abi etomeret gaire baselaia, ege daradgeredi.
6Epe diabolo abi detager, kega, Kaka mari ikuar abele sirdam uridili, pako uiaba zorom: abelelam emetu karim ikuar; ese nerute le kaka lagelage, kaka abim nakuar.
7Ese ma esorgiru karim, kaka marim ikuar gaire lu uridili.
8Epe Iesu abim detaut, kega, Satana, ma adem bakeam kara sorge; abelelam emetu detali, Ma esorgiru mara Ade, ege abi memeg le tepteb.
9Ege E abi ais Ierusalemaem, ege abi ekue tumge abele zogo meta ge, a abi detager, kega, Ese ma Ade ra Uerem, ma eupumar abele uteblam:
10Abelelam emetu detali, Iehoua mer tigri, Abara angela giz upinati marim:
11Uiaba marim tegareda uiaba tag, ueakai mara teter nolea baker itut.
12Epe Iesu abim detaut, kega, Abele mer, kega, Ma nolea mirem abele Opole mara Ade.
13Ege diabolo abara mirem uridili eseamuda, epe E adem bakeam.
14Epe Iesu ko akomeda Galilaiaem, Lamar abim au adigiri; ege gaire le asoli abara tonar deraueli apek uridili.
15Ege E ereuerem uiaba sunagoem, ege gaire le uridili abi despered.
16Ege E Nazareta tabarki, ege E bataili abele ged ge: epe E barot abele sunago sabath ge, mokakalam abara tonar, ege E tekue ko etag.
17Ege abim ikuar jauali Isaia perofeta. Epe E diski abele jauali, epe nagri abele mer emetu detali,
18Ege kari tumge Lamar Opole, abelelam E kari depegili etomeret abele mer uader nolea lu kak; ege E kari namarid idigiri uiaba nerkep okasosok, etomeret debe mer uader nolea uteb kak, pako diski pone sadmer, pako omare uader asiasi gaire gerger,
19Ko etomeret urut Opole sererege.
20Ege jauali ditarat, E ikuar memeg le, ege lokod ge emeri: epe gaire le dasmerare abim sunago ge.
21Epe E ditimeda detagerare uiabim, kega, Abele gerger ageakarem abele jauali, uaba aserare.
22Ege uiaba uridili abi despered, ege uiaba au damered gaire debe mer abara telam. A uiaba detaut, kega, Nako Iosefa ra uerem pedali?
23Epe E uiabim daratagerare, Abkoreb uaba karim detaut, Lukup kemle, mabu idigiri: gaire lu uridili ma ikeli Kapernauma, ki emetu asoli, debele ma ikeli mara ged kar peike.
24Ege E detager, kega, Ageakar, kaka uabim detaut, Nolea abkoreb perofeta emeri abara ged kar.
25E ko detager, kega, Ageakar, kaka uabim detaut, Abele kerker Elia emeri Isaraela, uader kosker uiaba kimiar eumid, epe kotor dimi thri urut pako sikes meb, abele ged uridili uererege;
26Epe Elia nolea bakeam uiabim, ege no Sarefta, Saidona ra uteb, a nerute koskerim abara kimiar emetu eumid.
27Ege emeri Isaraela uader lepera, abele kerker Elisaia perofeta emeri; a uiaba nolea le ogarup kak, ege no Naamana, Suria le.
28Ege uiaba asoli abele lu, uiaba sunago ge ueku nagri;
29Ege uiaba ekue, a abi emarid nerute apek, ege uiaba abi tag erpei egardare nerute muimui uteb paserem uiaba uteb, ueakai uiaba abi bataueret muige.
30Ege E ekasereder uiaba opem, a bakeamulu.
31Epe E bakeamulu Kaperanauma, Galilaia ra uteb. Ege E uiabim ereuerem sabath ge:
32Ege uiaba au damered abara merlam; abelelam abara mer nagri sirdam.
33Nerute le sunago ge emeri, E nagri lamar uit demoni giz; ege E ereretikri au kase,
34Kega, Uaiai! Iesu Nazareta le, ma nalugelam keribim? ege ma tabakeamulu ueakai keriba baum? ege kaka umele marim, Ade ra Zogo.
35Epe Iesu abi daisumda, kega, Bamer, ma adem osmeda abielam. Epe demoni abi ekesmeri uiabi opem, epe abim osmeda, nolea adud nagri.
36Epe uiaba uridili au damered, ege uiaba mer atager, kega, Nalu abele mer? E dali nagri adigiri pako sirdam, abelelam E uiabi daisumda uit lamar giz, epe uiaba adem osmed adige.
37Epe abele mer abielam gaire le asolare gaire apek uridili.
38Ege dekaelu abele sunago, E barot Simona ra meta: ege Simona ra kosker abara apu nagri gim, gem urueri, au kale; ege uiaba abim damosi.
39Epe E ekue maike abi dog, ege abi daisumda abele gim urueri; epe sobkak eseamud: epe E ekue, a uiabi memeg le.
40Uiaba uridili nagri gim, nerute gimlam a nerute gimlam, ege uiaba tais uiabim lem baraigida; ege abara tag itut nerute le a nerute le, pako idigiri uiabim.
41Ege gaire demoni giz uiaba osmed, ereretikri, kega, Mamanali Keriso Ade ra Uerem. Ege E uiabi daisumda, ege uiaba umer kak mer atager abim; abelelam uiaba umele E Keriso.
42Ege gerger ge, epe E osmed, E bakeamulu nerute le kak uteb: ege gaire le lakub giz uiaba abi deraimerare, epe abim tabakeauare, a uiaba abi erpeilare, ueakai E nolea bakeamulu abele gedlam.
43Ege E uiabim detager, kega, Abkoreb kaka marau Ade ra baselaia gaire ged: abelelam kaka emarid.
44Epe E marau abele sunago giz Galilaia ge.
Currently Selected:
Luka 4: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
