Mataio 17
17
1Eseamud sikes gerger, ege Iesu tegardare Peteru, a Iakobo, a Ioane abara keimer, a uiaba bakeuare abele pereper paserem, uiaba tepteb.
2E depegili uiaba opem, abara op au zoromzorom mokakalam lem ise, abara am uali au kakekake mokakalam datki ise.
3Ko dasmer, Mose a Elia natomelu uiabim, a uiaba mer atager abim.
4Peteru abi detager Iesuim, kega, Opole ae, debele meriba emeri ike; ese ma lag, keriba ikeli ike nole niai meta thri; mara nerute, a Mose ra nerute, a Elia ra nerute ko.
5Dasmer, abele zoromzorom baz uiaba natkamda: ko dasmer, abele kodo mer bazelam, kega, Kara Uerem nase ge pedali, kaka abim sererege; uaba mamor abi asoli.
6Abara kaimeg giz aserare, ege uiaba etkobei, a uiaba au geum.
7Ege Iesu uiabi bakeamulu, E uiabi itut, a uiabi kega, Uaba tekue, uaba nole geum kak.
8Uiaba pate uiaba pone, a nole nerute le erdali, epe Iesu tepteb.
9Uiaba tabatueli abele paserlam, ege Iesu daraisumdarare uiabim, kega, Uaba nole atomeret kak nerute le abele lu uaba dasmerare, mena Le la Uerem ko eded akaida eudlam.
10Abara kaimeg giz abi itimerare, kega, Nalu aotale giz uiaba mer, kekiam Elia tabarki?
11Ege Iesu etkalu uiabim, kega, Elia kekiam tabarki, a ko ditimed gaire lu uridili:
12A kaka uabi detager, Emetu Elia tabarki, a uiaba nole abi asmer kak, epe uiaba ikeli abim gaire lu uridili uiaba lagelag. Mokakalam Le la Uerem, a ko uiaba abi dedkoli.
13Ege abara kaimeg giz uiaba opasereret E uiabi detager abele tonar Ioane Bapatiso.
14Uiaba baosi abele lekub ge, ege nerute le kei tabakeam abim, E kokomamu abim, kega,
15Opole ae, ma abi omare kara uerem, E paim gim nagri au asiasi, abelelam gaire gerger ekesmiri abele ur ge, mokakalam gaire gerger abele ni ge.
16Kaka ais abim mara kaimeg giz, a uiaba umer kak abi idigir.
17Ege Iesu etkalu, kega, Abele nosik le nole oatur kak a barbar tonar, kaka uabi dog naket gerger? kaka uabi mena omare naket gerger? E karim tegaret.
18Iesu abi daisumdalu, ege adem esomelu adige abele demona abielam; epe abele uerem ko eded akaida, ditimedlu abele haua ge.
19Iesu ra kaimeg giz abim tabakeuare, uiaba tepteb, kega, Nalugem keriba umer kak abi imuare?
20Ege Iesu uiabi detager, Abelelam uaba nole oatur kak: ageakar kaka uabi detager, Ese uaba oituli abkoreb abele sinapi ra turum, a uaba detagerare abele paser, Ma bakeam abele uteb ge; E umele bakeam; nole nerute lu ko obogai uabim.
21Epe tepteb abele esorerapare pako abele leuer baili umele adem bakeuare gaire lu mokakalam.
22Uiaba nakasir Galilaia ge, ege Iesu uiabi daratagerare, Abele Le la Uerem namarid gaire le la tag:
23Uiaba ko abi ipit eumilu, a ko eded thri gerger. Ege uiaba au okasosok.
24Uiaba baosi Kaperanaumaem, gaire le tabakeuare Peteruim, uiaba tameleb giz erpei abele zeku lu, a abim, kega, Nako uaba ereuer le nole ikeli zeku lu?
25E uiabi detager, E ikeli. E balu abele meta ge, epe kekiam Iesu abi detager, kega, Simona ae, nako ma dikiapor? Netede tameleb erpei telo pako zeku lu gesep opole? Nako uiaba omasker nako nogle?
26Ege Peteru abim detager, Gaire nogle. Epe Iesu abi detager, Peike omasker no emeri.
27A nerute uiaba mena mudi mer meribim, ma bakea mabele gur ge, a ma batauered nerute uk, abele kekiam lar ma nagri ma tetaruka; a ko diske abara te, epe ma erdali abele setatara; ma ais uiabim ikuar mara a kara ko.
Currently Selected:
Mataio 17: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
