Mataio 23
23
1Ege Iesu detager gaire le lakub, pako abara kaimeg giz,
2Kega, Aotale giz pako Faresaio giz bakiri Mose ra bas.
3Peike uaba mamor asarare a uaba ikerare lu uridili uiaba daratagerare, mamor asarare: epe uaba nole ereuerem uiaba tonar giz; abelelam uiaba no mer detaut, a umer kak ikerare abkoreb.
4Abelelam uiaba didbare au lu beber uiaba dikemerik le giz uiaba tabo ge; ege uiaba umer kak uiaba kebi kei etadmir.
5Gaire uiaba dorge uridili ikerare, iaueakai le giz uiabi darasmerare: uiaba ikerare au filakteri, pako ko au sisero uiaba am uali,
6Uiaba au sererege eidi abele aule ra uteb leuer ero, pako aule ra bao sunago ge,
7Pako gaire le uiabi nasege segur uteb ge, a gaire le giz uiaba nei natkerauem, Rabi ae, Rabi ae.
8Ege uaba nole nei atker Rabi; abelelam netate uaba Ereuer le, abele Keriso idali, a uaba uridili keimer giz.
9Uaba nole nerute le geseb ge nei atker uaba aba; abelelam netate uaba Baba, penoka dali kotor ge.
10Uaba nole nei atker ereuer le, abelelam netate uaba Ereuer le, Keriso idali.
11Epe abele le aule uabim, E uabim memeg le.
12Ese nerute le tababu babei E aule, E ekekeli; Ese nerute le E tababu gebgeb, E bataili uiabim tumge uridili.
13Uaiai uaba aotale pako Faresaio, bes le giz! abelelam uaba dimi abele kotor baselaia lelam; abelelam uaba umer kak barot, a uaba ko daraisumdarare uader le barota.
14Uaiai uaba aotale pako Faresaio, bes le giz! abelelam uaba ais eseamulu mai kosker uiaba meta, a uaba esorerapare au pereper ikerare ispilu; abele lulam Ade ra urker aule uabi tumge.
15Uaiai uaba aotale pako Faresaio, bes le giz! abelelam uaba deraueili gur ge pako sep ge iaueakai uaba nagri nerute le uaba esorerapare; ese uaba erpei, a uaba ikerare Gena ra le E au adud uabielam.
16Uaiai uaba datkimuar sadamer le, a uaba mer, Ese le iskosi abele zogo meta nolea kar, epe le iskosi abele zogo meta ra golo, niaiem peike!
17Le giz paim ae, pako sadamer; abelelam nade aule, nako abele golo, pako abele zogo meta zogoem abele golo?
18A nerute, Ese le iskosi abele zegu lu bao, nolea kar; epe abele iskosi abele zegu lu abi tumge, niaiem peike.
19Le giz paim ae, pako sadamer; abelelam nade lu aule, nako zegu lu, nako bao ge zogoem abele zegu lu?
20Dasmer, abele le iskosi abele bao zegu lu, E iskosi gaire lu uridili abi tumge.
21Abele le iskosi abele zogo meta, E abi iskosi, pako le emeri muige abele zogo meta.
22Abele le iskosi abele kotor ge, E iskosi Ade ra bao, pako le abi dog egimulu.
23Uaiai uaba aotale pako Faresaio, bes le giz! uaba ikuar kebi lu abele mili pako abele aneto pako abele kumina, a gaire au lu uaba ispilu abele gelarlam, abele barkak tonar, pako abele omare, pako abele oituli: abkoreb ikelare lu ike, a nole dikaer lu peike.
24Uaba datkimuar sadamer le, uaba dirimid abele lag, a mamor irusere kemerkemer abele kamela.
25Uaiai uaba aotale pako Faresaio, bes le giz! uaba dirup abele tanelu ge ra sor pako abele kumeti, epe muige mitkar lu itike pako abele adud tonar giz.
26Mama le Faresaio sadamer, mama kekiam dirup muige abele tanelu ge pako abele kumeti, iaueakai ogo kak kemerkemer abele sor ge.
27Uaiai uaba aotale pako Faresaio, bes le giz! abelelam uaba mokakalam ao giz, adige au kakekake, debele le dasmer, epe muige mitkar eud le la lid, pako gaire adud lu uridili.
28Mokakalam uaba, adige mokakalam barkak tonar le ise gaire le ra opem, epe muige uaba au mitkar abele bes mer pako abele tonar barbar.
29Uaiai uaba aotale pako Faresaio, bes le giz! abelelam uaba emoare gaire perofeta uiaba ao, a ko deiriem uiaba ao le barkak tonar giz,
30A uaba mer kega, Ese keriba abi dog emri abele kerker keriba aba giz emeret, umer kak keriba okakis uiaba narsare perofeta giz.
31Peike abele mer uabu etomeret uabim, uaba omasker gaire le giz narsare gaire perofeta giz.
32A uaba ko mitkar abele tonar lu uaba aba giz lam.
33Ege uaba tabo, tabo areg ra omasker giz, nako uaba derar abele urker Genaim?
34Dasmer abele lu, kaka uabi namarida perofeta giz, pako pardali le giz, pako aotale le giz; uader le uaba narsare, pako satauroem; a uader le uaba damarika uaba sunago, pako deraimerare nerute uteb a nerute uteb;
35Iaueakai bakedida uabi dog gaire le giz barkak tonar uiaba mam uabielam emetu epaitered abele geseb ge, ditimedelu Abela ra mam, le barkak tonar, a bakedilu Zakaria ra mam, abele Barakaio ra uerem, uaba ipiti eumid abele kesi zogo meta pako zegu lu bao ge.
36Ageakar kaka uabi detager, Gaire lu uridili tabarki tumem abele nosik.
37Ierusalema ae, Ierusalema ae, le ipitare gaire perofeta giz, pako baker erboro le giz emetu namarid marim! kaka au lagelag etami mara omasker giz, mokakalam faul akuadare abara omasker muige abara peo, epe uaba nole la kak!
38Dasmer, uaba meta dikaertare a ko pisoger nagri.
39Abelelam kaka uabi detager, Uaba umer kak kari dasmer, mena keubu uaba kari daratagerare, Uerkab le tabarki Opole ra nei.
Currently Selected:
Mataio 23: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
