Mataio 27
27
1Gerger osakeida, gaire zogozogo le giz uridili, pako aule giz abgedlam uiaba mer atager Iesu ko abi ipit eumilu:
2Uiaba abi didbari, ege uiaba datkimoardare a abi ikuar Pontio Pilato abele opole.
3Iuda umele, abele le abi mirem, E ko obazgeda, a ko ikuar thirti gaire mani gaire zogozogo le, pako aule giz,
4Kega, Kaka au uit le, abelelam kaka mirem abele le nole uit kak. A uiaba abi kega, Nako keribim abele lu? epe ma mabu abele lu.
5E batauered abele gaire mani abele zogo meta ge, E adem bakeam; E bakeam a tababu baudubari.
6Gaire zogozogo le giz uiaba ekao abele gaire mani, a kega, Abele lu gelar, umer kak ikedilu abele mani uteb ge gaire zogo lu ikedi, abelelam mam bodomalam.
7Uiaba mer atager, epe abi bodomalam le ikeli kakekak tanelu ra ged, a ko etkobeilu gaire sup le.
8Abelelam nei atker abele ged, Mam ra ged, bakedida peirdi abele gerger.
9Iaueakai bakedelu Ieremia perofeta ra mer, kega, Uiaba ekao abele thirti mani, abele le bodomalam, uader Isaraela ra omasker uiaba abi bodomalam;
10A uiaba abi bodomalam le ikeli kakekak tanelu ra ged, mokakalam abele Opole uiabi detager.
11Iesu ekueilu opole ra opem; abele opole abi itmer, kega, Nako mama Iudaia le giz ra Opole? Iesu abi etkalu, Eko, mama detager.
12Gaire zogozogo le giz pako aule giz uiaba abi etomertare gaire abara mer, epe E nole mer kak.
13Pilato abi detager, Nako ma asoli gaire lu uiaba mari etomertare?
14Epe E nole abi etkalu netate mer; abelelam abele opole au damred.
15Opole ra tonar namarid nerute uetpur abele gaire le lakubem nerute le didbari, uiaba lagelag.
16Abele kerker uiaba nagri nerute le didbari, au adud le, abara nei Barabasa.
17A uiaba netate uteb ge, Pilato uiabi detager, Nete le uaba lagelag kaka uabi namarid? Nako Barabasa? Nako Iesu, le nei atker Keriso?
18Abelelam E umele uiaba kurablam abim ikuar.
19E egemeru abele mer atager bao ge, abele merkem tabakeam tabara koskerlam, kega, Ma nole abi dedkoli abele le barkak tonar; abelelam kaka au asiasi kara peim abim abele gerger.
20Gaire zogozogo le giz pako aule giz uiaba namarkare gaire le lakub uiaba abi daratagerare, Barabasa namarid, a Iesu ipit eumilu.
21Abele opole uiabi detager, kega, Nete le neis le peike uaba lagelag kaka uabi namarid? Ege uiaba daratagerare, Barabasa.
22Pilato uiabi etkalu, kega, Nalu lu kaka ikeli Iesuim, abele le nei atker Keriso? Ege uiaba uridili abi daratagerare, Abi satauroem.
23Opole uiabi etkalu, Nalu adud E ikeli? A uiaba aukase ereretikri, kega, Abi satauroem.
24Pilato umele uiaba nole asoli abara mer, a uiaba au sasemi, E ekao abele ni abara tag dirup gaire le lakub ra opem, a uiabi kega, Kaka ogog kak abele barkak tonar le ra mam: uabu abele.
25Abele ged uridili abi daratagerare, kega, Keribi tumge, pako keriba omasker giz, abara mam.
26E Barabasa namarid uiabielam, E abi damarik Iesu, a ko ikuar abi satauroem.
27Gaire ares le uiaba datkimoardare Iesu abele opole ra meta, a uiaba netate gedim abim gaire ares le uridili.
28Uiaba iki adem abara am uali, a uiaba abi ame abele mamam am uali.
29Uiaba euerare abele aper abele lu zegerzeger, a uiaba dikmerik abi kerem ge, a uiaba ikedirare abele kokeda abi tuter tag ge, a uiaba kokmamu abim, kega, Uaiai abele Iudaia le giz ra Opole!
30Uiaba abi mosu iduare, a uiaba edarkare abele kokeda a ko ipitare abi kerem ge.
31Uiaba emetu abi neg degarare, a uiaba detueare adem abele am uali, a ko abi ame tabara am uali, ege uiaba abi datkimoardare ko satauroem.
32Uiaba bakeuare, a uiaba erdarare nerute Kurene le, abara nei Simona; a uiaba damsare abim ko ais abara satauro.
33Uiaba abele utebe tabarki nei atker Gologotha, tonar abele, Kerem lid ra uteb,
34Uiaba abi ikuar abele uinega ataperet okakis abele kurab lu E ereri; E kebikebi ere, a umer kak ere.
35Uiaba abi satauroem, ege uiaba terapei abara am uali, a luglug ikeli netede ekardare: iaueakai bakedilu abele perofeta ra mer, Uiaba terapeirare gaire kara am uali, a uiaba luglug ikeli kara gem uali.
36Uiaba bamer abele utebe abi asesered;
37Uiaba dikmerik tumem abi kerem ge abele jauali, abele lu abi emerered, Abele Iesu Iudaia le giz ra Opole.
38Uiaba abi satauroem kemem abi dog neis eruam le, nerute le tuter tag, a nerute le ber tag.
39Gaire le nakasir, uiaba abi adud mer nakarare, a uiaba kerem abi dirilare,
40Kega, Mama le zogo meta ezageri, a neis netat gerger ko ikeli, ma mabu eded. Ese mama Ad ra Uerem, ma mabu tarabu abele sataurolam.
41Mokakalam zogozogo le giz, pako aotale giz, pako aule giz, uiaba abi neg degarare a kega,
42E umele uader le idigir, a nole umer kak tababu idigir: Ese E dali Isaraela Opole debele E uatabu peirdi abele sataurolam, iaueakai keriba abi oituli.
43E Adim oituli; debele peirdi E abi idigir, ese E abi omare: abelelam E detager, kaka Ade ra Uerem.
44Mokakalam abele neis eruam le kemem abi dog satauroem, uiaba abi adud mer egali taba opem.
45Ditimedlu abele sikes haua kupikupi ged ge uridili bakedilu abele nain haua ge.
46Maike nain haua Iesu au ereretikri, kega, Eli, Eli, lama sabakethani? tonar abele, Kara Ad, kara Ad, nalugem ma kari nakaerti?
47Uader le bako aserare, ege uiaba kega, E Elia dabgeri.
48Nerute le uiabielam E koreder ekao abele sap, a akameilu abele uinega, a agisilu pater ge, a abi ikuar ere.
49A uiaba uridili abi daratagerare, Dikaer; meriba dasmer, nako Elia umele tabarki ko abi idigir.
50Iesu ko au ereretikri, epe namarid tabara lamar.
51Dasmer, abele uali demed zogo meta muige tababu batoat kotorlam a giz ge; abele sep demali; a neide nakesmur;
52Gaire ao emetu te diski; gaire zogo le ko eded akaida eudlam;
53Emetu abara ko eded akaida, uiaba bakeuare abele zogo uteb, gaire le uiaba dasmerare.
54Abele kerem le netate handed nosik le, pako uader le kemem Iesu abi asesered, uiaba erdarare abele sep demali, pako gaire lu ikerare, a uiaba au geum, kega, Ageakar Ade ra Uerem idali.
55Gaire kosker giz uiaba muriz ge abi dasmerare, uiaba Iesu abi irmilare Galilaialam, uiaba abi memeg:
56Uiabi kemem Maria Magadalena, pako Maria Iakobo a Iose uiaba apu, a Zebedaiora uerem uiaba apu.
57Abele kikem tabarki, nerute le lu giz ra apu Arimathia le, abara nei Iosefa, E nerute Iesu ra kaimeg giz:
58E bakeamulu Pilatoim abi damos abele Iesu ra gem. Pilato uiabi detager ko abi ikuar abele gem.
59Iosefa ais abele gem, a sopem erebe abele uali lino og kak,
60A ikedilu tabara ao ge kerkar, E daiui abele neide: E erparik nerute au baker abele ao ra te, E bakeamulu.
61Maria Magadalena pako nerute Maria, uaiba emrilei obakuei abele ao ge.
62Abele nerute gerger, abele gerger maike abele derser gerger, gaire zogozogo le giz, pako Faresaio giz netate gedim Pilatoim,
63Kega, Opole ae, keriba ko dikiaporare abele bes le E emetu detager, Abele kerker eded, eseamud neis netate gerger kaka ko tekue.
64Dasmer, ma uiabi detager ko dimilu abele ao, mena bakedilu neis netate gerger, iaueakai nole abara kaimeg giz bakeuare ki ge ko abi eruam, a uiaba ko daratagerare abele ged, E ko tekueilu eudlam; iaueakai au bes keubu, abele kekiam bes.
65Pilato uiabi detager, Uaba nagri asesered le; ua bakeuare uabu dimrare.
66Uiaba bakeuare, a dimrare abele ao ge, a ikedi atamelam abele baker, a uader le ikedi uiabi asesered.
Currently Selected:
Mataio 27: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
