YouVersion Logo
Search Icon

MAREKO 5

5
1Uiaba nerute apek tauer ge tabarki, abele Gadara le la ged.
2E narlam eupamada, epe sobkak nerute le uit lamar bada abim obapit: abele le gaire aolam tabakeam,
3E gaire ao ge emri; nole le umele abi didbari, a malil par nolea:
4Dordor abi didbari, teter ge a tage malil paru, abele tage a teter didbari, E dergeiri; nole le umer kak abi maiem ekepli.
5Ki ge, a gerger ge, E mena emerilu abele gaire paser, a gaire ao ge, E ereretikri, a abara gem baker de esakeilu.
6E muriz ge Iesui dasmer, E koreder abim a esorgiru.
7E au kodo ereretikri, kega, Kaka nako marim, Iesu Ade ra Uerem, au kale? Kaka marim bali Ade ra op, nole kari asiasi nakeli.
8Abelelam, E abi detager, kega, Ma lamar uit teosmeda lelam.
9E abi itmer, kega, Mara nei nako? E detaut, kega, Kara nei legeona; abelelam keriba gaire.
10E elele abim bali, kega, Nole keriba amu kak ab gedelam.
11Abele borom au isir gorgor paser ge erueda.
12Gaire demoni giz abi damseda, kega, Keribi demarida gaire boromem, ko keriba uiabim badari.
13Iesu sobkak uiabi emarida. Abele uit lamar giz teosmeda, a gaire borom ge barti; epe borom isir uamen uamen koreder au gorgorlam keperem, (uiaba maike tu thausan;) iako gune obaiter.
14Le giz borom naseserdare koreder ge, a gedim, pako gaire ged daratagerare. Uiaba tabakeuare, a dasmer abele tonar ikeli.
15Uiaba Iesuim tabakeuare, uiaba abele le dasmer demoni legeona dedkoli emeri, a ameare, a tonar tonar; epe uiaba geum.
16Uiaba le erdali mer poipi detaut gaire tonar le demoni dedkoli, a tonar borom giz.
17Uiaba ditimeda abi damosare, ko uiaba ged dekaer.
18E nar atiem, le demoni dedkoli abi damos ko abi dog emeri.
19E nole laglag, E abi detager, kega, Bakeam mabara ged, a mabara boai, a uiabi natomertauem abele gaire au lu Opole de marim ikeli, a mari omare.
20E bakeamud, a ditimeda marau Dekapolem gaire au lu Iesu de abim ikeli; epe uiaba uridili damreda.
21Iesu emetu iako atiem nerut apek, gaire le netate gedim abim; E meg tauer ge emeri.
22Dasmer, nerute sunago kole tabarki, abara nei Iairo; E abi dasmer, E ekesmiri tabara teter ge,
23A abim elele bali, kega, Kara kebi neur maike eumida; debele ma tabakeam a mabara tag abi tum ge dikmerik, ueakai abi idigiri, E ko eded akaida.
24E abi kemem bakeam; a gaire le lakub abi irmili, uiaba abi ditkabda.
25Abele nerut kosker mam gim tuelf gaire urut babusedari.
26E au asias dimegeroa gaire lukup kemlelam, abara lu eseemuda, uiabi nakuarare lukup bodomalam, nole adigir kak, epe mena au gim.
27E Iesu ra tonar asoli, E eipu gaire le ekasereder Iesu isorge, abara am uali ekepeli.
28Abelelam E detager, kega, Ese kaka abara am uali tepteb ekepeli, kara gim akaida.
29Sobkak abara mam diruruarti; E umele abara gem akaida abele gimlam.
30Sobkak Iesu abara nerkep ge opasereret nerute adigir osmeda abielam, E gaire le ge eipu egreemalu, a detager, kega, Nete kara am uali ge ekepeli?
31Abara kaimeg giz detagereda, kega, Mama dasmer gaire le mari natkabda, nako tonar mama detager, kega, Nete kari dog ekepeli?
32E op etarer ko kosker deraimerer abele lu ikeli.
33Kosker geum a durdur barki, abelelam E umele abele lu abi dog ikeli, E abara op ge ekesmer, a ageakar abi detager ueeseamur.
34E abi detager, kega, Kara neur, mabi oaturlam ma eded akaida; mapodan kem bakeamulu, ma eded akaida mabara gimlam.
35E mena detaut abele mer, sunago kole merkem tabarki, a abi detager, kega, Mara neur eumida; nako iako kole bamesili?
36Iesu asoli abele mer, E sunago kole detager, kega, Ma nole geum kak epe oituli.
37E uiabi daraisumdarda, nole le kak abi irmili, mamor Peteru, a Iakobo, a Ioane Iakobo ra keimer.
38Uiaba sunago kole ra meta tabakeuare; a uiabi saserimem nardarare, a ebazoli, ueu baudaredelare.
39E badari, a uiabi daratagereda, kega, Nako uaba saserim, a ebazoli? abele neur nole eud kak, E uteidi.
40Uiaba abi neg degarare. E emetu uiaba uridili adige namuare, E neur ra aba a apu tegared, a uiaba neis a neis le abi dog, a barot neur ra uteb.
41E neur ra tag erpeilu, a abi detager, kega, Talitha kumi; tonar abele mer, Neur, kaka mari natager, Ekue.
42Sobkak neur tekuelu, a bakeamulu; tuelf abara urut. Uiaba au kase damreda.
43E elele uiabi mer tigri, nole nerute le atomeret kak abele mer; epe E uiabi detager, kega, Debele leuer abi ikuar.

Currently Selected:

MAREKO 5: ulk1902

Highlight

Share

Copy

None

Want to have your highlights saved across all your devices? Sign up or sign in