MAREKO 8

1Abele gaire gerger, dordor le lakub, a uiaba nole leuer kak, E tabara kaimeg giz darabgerare, a uiabi detagereda, kega,

2Kaka le lakub nasenase, abelelam uiaba thri gerger kari dog emri, a nole leuer aro kak;

3Ese kaka uiabi meta namarida, a nole leuer aro kak, uiaba gab ge durdur; abelelam uader muriz gedelam.

4Abara kaimeg giz abi detagerare, kega, Nagelam areto, abele soge purge, uiabi darasisieda?

5E uiabim nautumereda, kega, Nako, naket areto uabi dog? Uiaba detagerare, kega, Sefen.

6E le lakub mer tigri ko seb ge emereda; E gaire areto sefen tekadarare, a esoao, a itiri, a abara kaimeg giz nakuarare, uiaba opem ikedi; a uiaba le lakub opem ikedi.

7Uader kebi lar uiabi dog: Iesu esoao, a uiabi detagereda ko ikedi.

8Uiaba eroare, a kem osmeda: a uiaba leuer mogmog etaker, a gaire epei sefen arot.

9Maike foa thausan, ui uridili leuer eroare; E uiabi namarida.

10Sobkak E, pako abara kaimeg giz, nar ge ekauererti, a ged Dalmanutha atiem.

11Faresaio giz abim tabakeuare, a ditimeda abi basaret, ko abi mirem, abi itmer atamelam kotorlam.

12E au nerezi muige abara mar, kega, Nako abele nosik le atamelam deraimer? Ageakar, kak uabi detagereda, kega, Nole akuar kak atamelam abele nosik le.

13E uiabi dekaer, iako nar ge ekauererti, a nerut apek atiem.

14Uiaba okataprik ko leuer ais; no netat areto uiabi dog nar ge.

15E uiabi mer tigri, kega, Beber dasmer, abele Faresaio ra leuen, a Heroda ra leuen mamoro dasmer.

16Uiaba mer atagere, kega, Abelelam meriba nole areto kak.

17Epe Iesu opasereret, E uiabi detager, kega, Nako uaba mer atager abele nole leuer kak? Nako uaba nole umer kak, uaba nole akiapor kak? nako uaba tumtum nerkep?

18Nako uaba pone nagri, a nole asmer kak? a grip nagri, a nole asor kak? a nole akiapor kak?

19Ababurge kaka faif areto itiri uiabim faif thausan, naket epei osmeda uaba etaker abele leuer mog? Uiaba abi detager, kega, Tuelf.

20A gaire areto sefen uiabi foa thausan, naket epei osmeda uaba etaker abele leuer mog? Uiaba abi detager, kega, Sefen.

21E uiabi daratagereda, kega, Nako uaba nole akiapor kak?

22Uiaba Bethesaida tabakeuare. Uiaba nerute le asamasam abim tegaret, a abi damos ko abi itut.

23E tage asamasam le erpei, a abi dadkimortare abgedelam; E emetu abara neis pone mos ermeda, a tage abi tumge ikedi, E abi itmer, kega, Nako ma nole nerute lu dasmer?

24E kotor dasmer, a detager, kega, Kaka gaire le dasmer, mokakalam dordor lu nakasir.

25E iako tabara tage ikedi tumem abara neis pone; a E lidem dasmer, E ueakai debele, a gaire lu mamoro dasmer.

26E abi namarida abara metaem, a detager, kega, Nole bakeamu utebem abele.

27Iesu pako, abara kaimeg giz, gaire utebem Kaisaria Filipo bakeuare; eipu gab ge, Iesu abara kaimeg giz eutumer, kega, Nako gaire le natagere, kaka nete?

28Uiaba detaut, kega, Ioane Bapataiso; epe uader detager, Elia; a uader detager, Nerute perofeta giz.

29E uiabi daratagereda, kega, Nako uaba detager, kaka nete? Peteru abi detaut, kega, Mama Keriso.

30E uiabi mer tigri, nole nerut le abi atager kak abele.

31E ditimeda uiabi ereuerem, Le la Uerem ko asiasi, a aule giz abi derar, a gaire tarim le, a zogozogo le giz, a aotale giz, ko abi ipit eumilu, a keubu thri gerger E iako eded akaida.

32E paret kak detager abele mer. Ege Peteru abi datkimalu, a ditimeda abi daisumda.

33Ege E egremalu, a abara kaimeg giz dasmerauem, E Peteru daisumda, kega, Mama Satana, bakeam kara sorge; ma nole akiapor kak Ade ra lu, mamoro le la lu.

34E emetu le lakub, kemem abara kaimeg giz, darabgereda, E uiabi detagereda, kega, Nerute le laglag kari narmili, mamoro E tababu obogai, a abara satauro bakuar, a kari narmili.

35Abelelam ese nerute le laglag abara eded asisiem abele ko abi; epe ese nerute le abara eded abi, karielam pako Euangelia, abele ko ededem.

36Abelelam ese nerute le geseb ge uridili terapei, a abara eded abi, nalu bodomalam abim?

37Nade lu le ikuar abara eded bodomalam?

38Abelelam ese nerute le kari sirip ge, pako kara mer, eipu abele nosik adud le pako eruam le, abkoreb Le la Uerem ko abi sirip ge, E tabarki kemem gaire angela zogo, abara Aba zorom ge.

Currently Selected:

MAREKO 8: ulk1902

Highlight

Copy