Shıǵıw 5

Muwsa hám Xaron faraonnıń aldında

1Sońınan Muwsa menen Xaron faraonǵa barıp, oǵan:

– Izraildıń Qudayı Jaratqan Iye bılay deydi: «Shólge barıp, Maǵan arnap bayram qılıwı ushın, xalqımdı jiber», – dedi.

2Biraq faraon olarǵa:

– Men aytqanın tıńlap, Izrail xalqın jiberetuǵınday, Jaratqan Iye kim bolıptı? Men Jaratqan Iyeni tanımayman, izraillılardıń ketiwine de ruxsat bermeymen, – dedi.

3Sonda Muwsa menen Xaron:

– Evreylerdiń Qudayı bizler menen ushırastı. Úsh kúnlik jol júrip, shólde Qudayımız Jaratqan Iyege qurbanlıq berip qaytıwǵa ruxsat etseńiz. Bolmasa, Ol bizlerdi illet penen yamasa qılısh penen jazalaydı, – dedi.

4Al Mısır patshası olarǵa:

– Háy, Muwsa hám Xaron! Nege xalıqtı jumısınan alaǵada qılıp atırsız? Barıń, jumısıńızǵa qaytıń. 5Sonshelli kóp puqaralardı ne ushın jumısınan qaldırajaqsız? – dedi.

6Sol kúni faraon qul jumsawshılarına hám izraillı baqlawshılarǵa buyrıq berip bılay dedi:

7– Bunnan bılay, gerbish islew ushın xalıqqa burınǵıday saban bermeń. Barıp, sabandı ózleri jıynap alsın. 8Biraq burın qansha gerbish quyǵan bolsa, endigiden bılay da, sonsha gerbish quyıwdı talap etiń. Gerbish sanın azaytpań. Óytkeni olar erinshek adamlar bolǵanlıqtan: «Barıp, Qudayımızǵa qurbanlıq beremiz», – dep baqırmaqta. 9Jumısların sonshelli dárejede awırlastırıń, olar is penen bánt bolıp, jalǵan sózlerge qulaq aspasın.

10Solay etip, qul jumsawshılar hám izraillı baqlawshılar barıp, izraillılarǵa bılay dedi:

– Faraon bılay demekte: «Endi sizlerge saban bermeymen. 11Sabandı qay jerden tapsańız, sol jerden tabıńlar. Biraq quyatuǵın gerbishińizdiń muǵdarı azaytılmaydı».

12Solay etip, xalıq atızlardan saban jıynaw ushın pútkil Mısır boylap tarap ketti. 13Qul jumsawshılar olardı qısqıǵa alıp: «Kúndelik jumısıńızdı saban berilgen kúnlerdegidey tolıq orınlań», – dedi. 14Sońınan olar: «Nege sizler keshe hám búgin burınǵıday muǵdarda gerbish quydırmadıńız?» – dep ózleri qoyǵan izraillı baqlawshılardı urdı.

15Sonlıqtan izraillı baqlawshılar faraonǵa barıp, oǵan bılay dep nala shekti:

– Nege qullarıńızǵa bunday qatnas jasap atırsız? 16Bizlerge saban bermese de, gerbish quyıwdı talap etedi. Minekey, qullarıńız bolǵan bizler tayaq jep atırmız. Al buǵan ayıplı – siziń adamlarıńız.

17Biraq faraon olarǵa:

– Sizler erinsheksizler, erinshek! Sol sebepten: «Barıp, Jaratqan Iyege qurbanlıq beremiz», – dep atırsızlar. 18Qánekey, barıńlar jumıslarıńızǵa! Sizlerge saban berilmeydi. Al gerbishti belgilengen muǵdarda jetkizesizler, – dedi.

19«Kúndelikli jetkiziletuǵın gerbishtiń muǵdarın azaytpaysızlar», – degen sózlerdi esitkende, izraillı baqlawshılar ózleriniń qıyın awhalda ekenin túsindi. 20Olar faraonnıń aldınan shıqqannan keyin, ózlerin kútip turǵan Muwsa menen Xaronǵa duslasıp, 21olarǵa:

– Sizler bizlerdi faraonǵa hám onıń xızmetshilerine jaman atlı qıldıńız. Bizlerdi óltiriw ushın, olardıń qollarına qılısh uslattıńız. Bul isińizdi kórip, Jaratqan Iye sizlerdi jazalasın, – dedi.

Jaratqan Iyeniń qutqarıwdı wáde etiwi

22Sonda Muwsa ol jerden ketti hám Jaratqan Iyeniń aldına barıp, bılay dedi:

– Iyem! Ne ushın bul xalıqtı bálege duwshar qıldıń? Meni ne ushın jiberdiń? 23Faraonǵa barıp, Seniń atıń menen sóylegen kúnimnen beri, faraon bul xalıqtı bálege duwshar qılmaqta. Al Sen Óz xalqıńdı qutqarıw ushın hesh nárse islemediń.

Currently Selected:

Shıǵıw 5: QrqMK22

Highlight

Copy