Shıǵıw 7
7
1Biraq Jaratqan Iye Muwsaǵa bılay dedi:
– Minekey, Men seni faraon ushın Quday sıyaqlı qıldım, al ájaǵań Xaron seniń payǵambarıń boladı. 2Saǵan buyırǵanlarımnıń hámmesin ájaǵańa ayt. Ol faraon menen sóylesip: «Izraillılardıń Mısır jerinen ketiwine ruxsat ber», – dep aytsın. 3Degen menen, Men faraonnıń júregin qatal qılaman. Mısırda kóp belgilerimdi hám káramatlarımdı kórsetsem de, 4faraon sizlerdi tıńlamaydı. Men qolımdı Mısırǵa sozıp, olardı qatań jazalayman hám xalqım Izraildı top-tobı menen Mısır jerinen alıp shıǵaman. 5Mısırǵa qarsı qolımdı kóterip, izraillılardı olardıń arasınan alıp shıqqanımda, mısırlılar Meniń Jaratqan Iye ekenimdi bilip aladı.
6Muwsa menen Xaron Jaratqan Iyeniń buyırǵanınday isledi. 7Faraon menen sóyleskende, Muwsa seksen, al Xaron seksen úsh jasta edi.
Xaronnıń tayaǵınıń jılanǵa aylanıwı
8Jaratqan Iye Muwsa menen Xaronǵa bılay dedi:
9– Faraon sizlerge: «Meni isendiriw ushın bir káramat kórsetińler», – degende, sen Xaronǵa: «Tayaǵıńdı faraonnıń aldına tasla», – dep ayt. Sonda tayaq jılanǵa aylanadı.
10Solay etip, Muwsa menen Xaron faraonǵa barıp, Jaratqan Iyeniń buyırǵanınday isledi. Xaron tayaǵın faraonnıń hám onıń xızmetkerleriniń aldına tasladı. Tayaq jılanǵa aylandı. 11Sonda faraon óz danıshpanların hám sıyqırshıların shaqırdı. Olar da óz sıyqırshılıǵı menen anıq solay isledi. 12Olardıń hár biri tayaǵın taslap jibergende, tayaqlar jılanǵa aylandı. Biraq Xaronnıń tayaǵı olardıń tayaqların jutıp jiberdi. 13Jaratqan Iyeniń aytqanınday, faraonnıń júregi qatal bolıp, Muwsa menen Xarondı tıńlamadı.
Birinshi jaza: suwdıń qanǵa aylanıwı
14Sońınan Jaratqan Iye Muwsaǵa bılay dedi:
– Faraonnıń júregi qatal bolıp tur. Ol xalıqtı jiberiwden bas tartıp atır. 15Erteńine azanda bar da, faraon Nil dáryasına qaray shıqqanda, jılanǵa aylanǵan tayaǵıńdı alıp, dárya jaǵasında onıń jolın tosıp tur. 16Keyin faraonǵa bılay de: «Evreylerdiń Qudayı Jaratqan Iyeniń: „Shólde Maǵan sıyınıwı ushın, xalqımdı jiber“, – dep aytqan sózin jetkeriwim ushın, meni saǵan jiberdi. Biraq sen usı waqıtqa shekem qulaq aspadıń. 17Sonlıqtan Jaratqan Iye: „Meniń Jaratqan Iye ekenimdi endi bilip alasań“, – deydi. Minekey, men qolımdaǵı tayaq penen dáryanıń suwına ursam, suw qanǵa aylanadı. 18Dáryadaǵı balıqlar ólip, dárya sasıp ketedi hám mısırlılar dáryanıń suwın ishe almay qaladı».
19Keyin Jaratqan Iye Muwsaǵa bılay dedi:
– Xaronǵa ayt, ol tayaǵın alıp, onı Mısırdıń suwları ústine – dáryaları, ózekleri, kólleri hám barlıq háwizleri ústine sozsın. Olardaǵı, hátte, pútkil Mısırdaǵı aǵash hám tas ıdıslardaǵı suwlar da qanǵa aylanadı.
20Muwsa menen Xaron Jaratqan Iyeniń buyırǵanınday isledi. Xaron faraon hám onıń xızmetshileriniń kóz aldında tayaqtı kóterip, Nil dáryasınıń suwına urıp jibergende, ondaǵı barlıq suwlar qanǵa aylandı. 21Dáryadaǵı balıqlar ólip, dárya sasıy basladı. Mısırlılar dáryanıń suwın ishe almay qaldı. Mısırdıń hámme jerin qan jaylap ketti. 22Biraq mısırlı sıyqırshılar da óz sıyqırshılıǵı menen anıq usılay isledi. Jaratqan Iyeniń aytqanınday, faraonnıń júregi qatal bolıp, Muwsa menen Xarondı tıńlamadı. 23Faraon artına burılıp, sarayına qaytıp ketti. Bul waqıya da oǵan tásir etpedi. 24Pútkil mısırlılar ishetuǵın suw tabıw ushın, dárya boyın qazıwǵa kiristi. Óytkeni olar dáryanıń suwın ishe almaytuǵın edi.
25Jaratqan Iye Nil dáryasınıń suwın qanǵa aylandırǵannan keyin, aradan jeti kún ótti.
Currently Selected:
Shıǵıw 7: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
