Jaratılıs 12
12
Ibramnıń shaqırılıwı
1Jaratqan Iye Ibramǵa: «Óz elińdi, aǵayin-tuwǵanlarıńdı hám ákeńniń úyin qaldırıp, Men saǵan kórsetetuǵın elge bar. 2Men sennen ullı xalıq dóretemen. Seni jarılqayman hám atıńdı mártebeli qılaman. Sen basqalarǵa jarılqaw bolasań. 3Seni jarılqaǵanlardı Men jarılqayman. Seni náletlegenlerdi Men náletleymen. Jer júzindegi barlıq xalıqlar sen arqalı jarılqanadı», – dedi.
4Ibram Jaratqan Iyeniń buyrıǵı boyınsha jolǵa shıqtı. Lut ta onıń menen birge ketti. Ibram Xarannan shıqqan waqıtta jetpis bes jasta edi. 5Ol ózi menen birge hayalı Saraydı, inisi Luttı, Xaranda jıynaǵan mal-múlkin hám xızmetshilerin aldı da, Qanan jerine qaray jolǵa shıqtı. Olar Qanan jerine jetip barǵanda, 6Ibram el boylap júrip, Shexemdegi Moreniń terebinf tereginiń janına bardı. Sol waqıtları usı elde qanan xalqı jasaytuǵın edi. 7Sonda Jaratqan Iye Ibramǵa kórinip: «Men bul jerdi seniń urpaǵıńa beremen!» – dedi. Ibram ózine kóringen Jaratqan Iyege arnap, sol jerde qurbanlıq orın qurdı.
8Keyin ol Beyt-El qalasınıń shıǵıs jaǵındaǵı tawlı jerge qaray júrip, batıs jaqtaǵı Beyt-El qalası menen shıǵıs jaqtaǵı Ay qalasınıń ortasına shatırın tikti. Sol jerde Ibram Jaratqan Iyege arnap qurbanlıq orın qurıp, Onıń atın aytıp shaqırdı. 9Sońınan ol qubla tárepke, Negebke qaray jolın dawam etti.
Ibram Mısırda
10Sol waqıtta elde kúshli ashlıq bolǵanlıqtan, Ibram waqtınsha jasap turıw ushın Mısırǵa ketti. 11Olar Mısırǵa jaqınlaǵanda, Ibram hayalı Sarayǵa bılay dedi:
– Men seniń sulıw hayal ekenińdi bilemen. 12Mısırlılar seni kórgende: «Bul onıń hayalı», – dep, meni óltirip, al seni tiri qaldıradı. 13Olarǵa: «Onıń qarındasıman», – dep ayt. Sonda sen sebepli olar maǵan jaqsı qatnasta boladı hám men aman qalaman.
14Ibram Mısırǵa kelgende, mısırlılar onıń hayalınıń júdá gózzal ekenin kórdi. 15Faraonnıń xızmetkerleri hayaldı kórip, faraonǵa onıń sulıwlıǵın maqtap aytıp berdi. Hayal faraonnıń sarayına alındı. 16Faraon Saray sebepli Ibramǵa jaqsı qatnasta boldı. Ibram iri hám mayda mallarǵa, erkek hám urǵashı esheklerge, qul hám shorılarǵa, túyelerge iye boldı.
17Biraq Jaratqan Iye Ibramnıń hayalı Saray sebepli faraondı hám onıń úy-ishin awır apatlarǵa duwshar etti. 18Sonda faraon Ibramdı shaqırtıp oǵan bılay dedi: «Sen nege maǵan bulay islediń? Ne sebepten maǵan, onıń hayalıń ekenin aytpadıń? 19Ne ushın onı qarındasım dediń? Men onı hayallıqqa alayın dep qaldım-ǵo. Hayalıńdı al da, ket!» 20Solay etip, faraon óz adamlarına Ibramdı hayalı hám barlıq jıyǵan-tergenleri menen shıǵarıp salıwdı buyırdı.
Currently Selected:
Jaratılıs 12: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
