Jaratılıs 28
28
Yaqıptıń dayısı Labannıń úyine ketiwi
1Ísaq Yaqıptı shaqırıp alıp, oǵan pátiyasın berdi hám bılay dep buyırdı: «Qananlı qızlarǵa úylenbe. 2Dárhal bul jerden ketip, Paddan-Aramǵa, anańnıń ákesi Betueldiń úyine bar. Ol jerde dayıń Labannıń qızlarınıń birewine úylen. 3Qúdireti kúshli Quday seni jarılqasın, ósip-óndirip, kóbeytsin hám urpaǵıńnan kóplegen xalıqlar taratsın. 4Ol Ibrayımǵa bergen jarılqawın saǵan hám seniń urpaqlarıńa da bersin. Solay etip, sen házir kelgindi bolıp júrgen jerdi, Qudaydıń Ibrayımǵa bergen jerin menshik etip iyelegeyseń». 5Sońınan Ísaq Yaqıptı jolǵa atlandırdı. Yaqıp Paddan-Aramǵa, óziniń hám Esawdıń anası Rebekkanıń ájaǵası, aramlı Betueldiń ulı Labannıń úyine ketti.
Esawdıń Ismayıldıń qızına úyleniwi
6Ísaq Yaqıpqa pátiya berip, úyleniwi ushın onı Paddan-Aramǵa jibergenin, oǵan pátiya berip atırıp: «Qananlı qızlarǵa úylenbe», – dep buyırǵanın hám 7Yaqıp ata-anasınıń sózine qulaq salıp, Paddan-Aramǵa ketkenin Esaw bildi. 8Solay etip, Esaw qananlı qızlardıń ákesine unamaytuǵının túsindi. 9Sonlıqtan ol Ibrayımnıń ulı Ismayıldıń aldına bardı hám hayallarınıń ústine Ismayıldıń qızı, Nebayottıń qarındası Maxalattı hayallıqqa aldı.
Yaqıptıń túsi
10Yaqıp Beer-Shebadan shıǵıp, Xaranǵa qaray jol júrdi. 11Ol bir jerge jetip kelgende, túnew ushın toqtadı. Sebebi quyash batıp qalǵan edi. Ol sol jerden bir tastı alıp, onı basınıń astına qoydı da, uyıqlaw ushın jattı. 12Yaqıp túsinde jer ústinde tik turǵan teksheni kórdi. Teksheniń usha bası aspanǵa tiyip turǵan bolıp, Qudaydıń perishteleri onıń ústinde minip-túsip júrgen edi. 13Teksheniń basında Jaratqan Iye turǵan bolıp, Ol Yaqıpqa bılay dedi: «Men – Ibrayımnıń hám Ísaqtıń Qudayı Jaratqan Iyemen. Sen jatqan jerdi Men saǵan hám urpaqlarıńa beremen. 14Seniń urpaqlarıń jerdiń qumınday kóp bolıp, batısqa hám shıǵısqa, arqaǵa hám qublaǵa jayıladı. Jer júzindegi barlıq xalıqlar sen hám seniń urpaǵıń arqalı jarılqanadı. 15Men seniń menen birgemen. Qay jerge barsań da, Men seni qorǵayman hám seni jáne usı jerge qaytaraman. Saǵan bergen wádemdi orınlamaǵanımsha, seni taslap ketpeymen».
16Yaqıp oyanıp: «Haqıyqattan da, Jaratqan Iye usı jerde eken-ǵo, biraq men bilmeppen!» – dep oyladı. 17Ol qorqıp ketip: «Bul jer qanshelli qorqınıshlı! Bul Qudaydıń Úyinen basqa hesh nárse emes, bul aspan dárwazası!» – dedi.
18Yaqıp azanda erte turıp, basınıń astına qoyǵan tastı aldı da, onı estelik qılıp tiklep, ústine záytún mayın quydı. 19Ilgeri Luz dep atalǵan bul qalaǵa Beyt-El#28:19 Beyt-El – «Qudaydıń Úyi» degendi bildiredi. dep at qoydı.
20Yaqıp wáde berip, bılay dedi: «Eger Quday meniń menen birge bolıp, baratırǵan usı jolımda meni qorǵasa, maǵan jewge nan, kiyiwge kiyim berse, 21sóytip meni ákemniń úyine aman-esen qaytarsa, onda Jaratqan Iye meniń Qudayım boladı. 22Men estelik qılıp tiklegen mına tas Qudaydıń Úyi boladı. Seniń maǵan beretuǵınıńnıń hámmesinen Saǵan onnan birin beremen».
Currently Selected:
Jaratılıs 28: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
