Jaratılıs 30
30
1Rahila Yaqıpqa bala tuwıp bere almaǵanlıqtan, ájapasın qızǵana basladı. Ol Yaqıpqa:
– Maǵan perzent ber, bolmasa ólemen! – dedi.
2Yaqıptıń Rahilaǵa ǵázebi qaynap:
– Men Qudayman ba, seniń qursaǵıńa perzent bermegen? – dedi.
3Rahila:
– Mınaw meniń shorım Bilha. Sen onıń menen jat. Sonda ol bala tuwıp, etegime saladı hám men de ol arqalı balalı bolaman, – dedi.
4Solay etip, Rahila óz shorısı Bilhanı kúyewine hayallıqqa alıp berdi hám Yaqıp onıń menen jattı. 5Bilha hámiledar bolıp, Yaqıpqa bir ul tuwıp berdi. 6Sonda Rahila: «Quday meni aqladı. Ol dadımdı esitip, maǵan bir ul berdi», – dedi hám ulına Dan#30:6 Dan – «húkim shıǵardı» yaǵnıy «aqladı» degendi bildiredi. dep at qoydı.
7Rahilanıń shorısı Bilha jáne hámiledar bolıp, Yaqıpqa ekinshi ulın tuwıp berdi. 8Sonda Rahila: «Men ájapama qarsı ullı gúreste onı jeńdim», – dedi hám ulına Naftaliy#30:8 Naftaliy – «gúres» degendi bildiriwi múmkin. dep at qoydı.
9Lea óziniń tuwmay qalǵanın kórgende, shorısı Zilpanı Yaqıpqa hayallıqqa berdi. 10Leanıń shorısı Zilpa da Yaqıpqa bir ul tuwıp berdi. 11Sonda Lea: «Bul qanday baxıt!» – dedi hám ulına Gad#30:11 Gad – «baxıt» degendi bildiredi. dep at qoydı.
12Leanıń shorısı Zilpa Yaqıpqa ekinshi ulın tuwıp berdi. 13Sonda Lea: «Men qanday quwanıshlıman, endi hayallar meni quwanıshlı dep ataydı», – dedi hám ulına Asher#30:13 Asher – «quwanısh» degendi bildiredi. dep at qoydı.
14Ruben biyday oraǵı waqtında dalaǵa bardı. Ol dalada márgiya shóplerdi tawıp, anası Leaǵa ákelip berdi. Sonda Rahila Leaǵa:
– Ulıńnıń márgiya shóplerinen maǵan da ber, – dedi.
15Biraq Lea oǵan:
– Kúyewimdi alǵanıń az bolǵanday, endi ulımnıń márgiya shóplerin de almaqshımısań? – dedi.
Rahila oǵan:
– Meyli, ulıńnıń márgiya shópleri esabınan kúyewim bul aqsham seniń menen jatsın, – dedi.
16Keshqurın Yaqıp daladan kelgende, Lea onı qarsı alıwǵa shıqtı hám oǵan: «Búgin meniń menen jatıwıń kerek, sebebi men seni ulım tawǵan márgiya shóplerge almastırdım», – dedi.
Solay etip, Yaqıp sol túni Lea menen jattı.
17Quday Leanıń duwasın esitip, ol hámiledar boldı hám Yaqıpqa besinshi ulın tuwıp berdi. 18Sonda Lea: «Shorımdı kúyewime bergenim ushın, Quday maǵan sıy berdi», – dedi hám ulına Issaxar#30:18 Issaxar – «sıy» degen mánini beretuǵın sózge uqsaydı. dep at qoydı. 19Lea jáne hámiledar bolıp, Yaqıpqa altınshı ulın tuwıp berdi. 20Sonda Lea: «Quday maǵan jaqsı sıy berdi. Endigiden bılay, kúyewim meni qádirleytuǵın boladı, óytkeni men oǵan altı ul tuwıp berdim», – dedi hám ulına Zebulon#30:20 Zebulon – «qádirlew» degendi ańlatıwı múmkin. dep at qoydı. 21Bir qansha waqıttan soń, ol qız tuwıp, atın Dina dep qoydı.
22Aqırı Quday Rahilanı eske alıp, onıń duwasın esitti hám onı tuwatuǵın qıldı. 23Rahila hámiledar bolıp, bir ul tuwdı. Ol: «Quday meni shermendeligimnen qutqardı», – dedi. 24Sońınan ol taǵı: «Jaratqan Iye maǵan jáne bir ul bersin», – dep, ulına Yusup#30:24 Yusup – «qosıp beredi» degendi bildiredi. dep at qoydı.
Yaqıptıń hiyle menen bayıwı
25Rahila Yusupti tuwǵannan keyin, Yaqıp Labanǵa bılay dedi:
– Maǵan juwap beriń, men óz úyime, óz jerime qaytayın. 26Men hayallarım menen balalarımdı da birge alıp keteyin, sebebi men sizge olar ushın xızmet etken edim-ǵo. Meniń sizge qanshelli xızmet etkenimdi ózińiz bilesiz.
27Al Laban oǵan:
– Ah, eger seniń kewlińdi taba alǵanımda ma edi?! Jaratqan Iyeniń meni sen sebepli jarılqaǵanın pal ashıw arqalı bildim. 28Maǵan xızmet haqıńdı ayt, saǵan tóleymen, – dedi.
29Yaqıp oǵan:
– Sizge qalay xızmet etkenimdi hám meniń arqamda mallarıńızdıń qanday bolǵanın bilesiz. 30Men kelmesten burın bar bolǵan az ǵana malıńız júdá kóbeyip ketti. Men keliwden Jaratqan Iye sizdi jarılqap basladı. Biraq endi men óz úyim ushın qashan miynet etemen? – dedi.
31Laban onnan:
– Saǵan ne bereyin? – dep soradı.
Yaqıp oǵan:
– Maǵan hesh nárse bermeń. Eger siz mına shártime kónseńiz, men jáne siziń súriwlerińizge qarap, olardı baǵa beremen: 32búgin men barlıq súriwlerińizdi aralap shıǵıp, qoy-eshkilerdiń ala hám jaǵalların, yaǵnıy qoylardıń qaraların, eshkilerdiń jaǵal hám alaların ajıratıp qoyayın. Olar meniń xızmet haqım bolsın. 33Keyin ala siz meniń xızmet haqımdı tekseriw ushın kelgenińizde, ádil ekenimdi bilip alasız. Eshkilerimnen qaysı biri jaǵal hám ala bolmasa, qoylarımnan qaysı biri qara bolmasa, urlıq dep esaplansın.
34Laban oǵan:
– Meyli, sen aytqanday bolsın, – dedi.
35Degen menen, Laban sol kúni-aq ala-shubar hám jaǵal tekelerdi, ústinde aǵı bar jaǵal eshkilerdi hám qara qoylardıń hámmesin súriwden ayırıp, óz ullarınıń qarawına tapsırdı. 36Ol ózi menen Yaqıp arasındaǵı aralıqtı úsh kúnlik jol etip belgiledi. Al Yaqıp Labannıń qalǵan malların baǵa berdi.
37Yaqıp ózine aq terek, badam hám shınar tereklerinen jas shıbıqlardı kesip aldı. Olardıń ishindegi aǵı kóringenshe, qabıqların ala-ala etip qırshıdı. 38Sońınan ol qırshılǵan shıbıqlardı qoy-eshkilerdiń aldına, olar suw ishetuǵın nawalardıń ishine salıp qoydı. Qoy-eshkiler suw ishiwge kelgende, sol jerde shaǵılısatuǵın edi. 39Olar shıbıqlardıń aldında shaǵılısqannan keyin, olardan ala-shubar hám jaǵal qozı-ılaqlar tuwılatuǵın edi. 40Yaqıp qozılardı ayırıp, qoylardı Labannıń barlıq ala-shubar hám qara mallarına qaratıp qoydı. Solay etip, ol ózi ushın súriw payda etip, olardı Labannıń mallarına aralastırmadı. 41Urǵashılardıń kúshlileri kúyge kelgen waqıtta, olar shıbıqlardıń aldında shaǵılıssın dep, Yaqıp shıbıqlardı olardıń kóz aldına, nawalardıń ishine qoyatuǵın edi. 42Biraq ázzi urǵashılar kúyge kelgen waqıtta, ol shıbıqlardı qoymaytuǵın edi. Solay etip, ázzi mallardan tuwılǵanları Labanǵa, kúshlilerinen tuwılǵanları Yaqıpqa tiyisli boldı. 43Usı jol menen Yaqıp hádden zıyat bayıp ketti. Onıń súriw-súriw qoy-eshkileri, shorıları hám qulları, túye hám eshekleri boldı.
Currently Selected:
Jaratılıs 30: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
