Jaratılıs 45
45
Yusuptiń tuwısqanlarına ózin tanıtıwı
1Sonda Yusup xızmetshilerdiń aldında ózin artıq tuta almay:
– Hámmeni bul jerden shıǵarıp jiberiń! – dep baqırdı. Solay etip, Yusup tuwısqanlarına ózin tanıtqanda, onıń janında hesh kim joq edi. 2Onıń dawıslap jılaǵanı sonshelli, mısırlılar da onıń jılaǵanın esitti. Bul haqqında xabar faraonnıń sarayına da jetip bardı.
3Yusup tuwısqanlarına:
– Men Yusuppen! Ákem ele tiri me? – dedi. Biraq tuwısqanları onıń aldında albırap, ne dep juwap bererin bilmedi.
4Yusup olarǵa:
– Maǵan jaqınıraq kelińler, – dedi. Olar jaqınıraq kelgende, Yusup sózin bılay dep dawam etti:
– Men sizler Mısırǵa satıp jibergen tuwısqanıńız Yusuppen! 5Meni bul jerge satıp jibergenińiz ushın qıynalmań hám ózlerińizdi ayıplamań. Quday adamlardıń ómirin saqlap qalıw ushın, meni sizlerden aldın bul jerge jiberdi. 6Elde eki jıldan beri ashlıq bolmaqta, jáne bes jıl dawamında jer de egilmeydi, zúráát te jıynalmaydı. 7Quday jer júzinde urpaqlarıńızdı saqlap qalıw ushın hám tań qalarlıq jol menen janlarıńızdı qutqarıw ushın, meni sizlerden aldın bul jerge jiberdi. 8Meni bul jerge sizler jibergenińiz joq, al Quday jiberdi. Ol meni faraonǵa keńesgóy, onıń sarayına xojayın hám pútkil Mısır eline basshı etip qoydı. 9Sizler dárhal ákemniń aldına barıń da, oǵan ulıńız Yusup: «Quday meni pútkil Mısır eline basshı etip qoydı. Irkilmey, janıma kel. 10Sen balalarıń, aqlıqlarıń, súriw hám padalarıń, pútkil mal-múlkiń menen birlikte Goshen jerine ornalasıp, meniń janımda bolasań. 11Sol jerde men seni baǵaman, óytkeni ashlıq jáne bes jıl dawam etedi. Bolmasa sen, xojalıǵıń hám saǵan tiyisli hámme nárse nabıt boladı», – dep aytıp atır deńler.
12Sońınan ol tuwısqanlarına jáne:
– Mine, sizler de, inim Benyamin, sen de óz kózlerińiz benen kórip turǵanıńızday, sizlerge bul sózlerdi aytıp turǵan men – haqıyqattan da, Yusup bolaman. 13Mısırda meniń qanshelli ataq-abırayǵa iye ekenimdi hám ózlerińiz kórgen nárselerdiń hámmesin ákeme aytıp beriń. Ákemdi dárhal bul jerge alıp keliń, – dedi.
14Sońınan Yusup inisi Benyaminniń moynınan qushaqlap jıladı. Benyamin de onı qushaqlap jıladı. 15Yusup barlıq aǵaların da súyip, olardı qushaqlap jıladı. Keyin tuwısqanları onıń menen sóylese basladı.
16Yusuptiń tuwısqanları kelgeni haqqında xabar faraonnıń sarayına jetip barǵanda, faraon hám onıń xızmetshileri buǵan quwandı. 17Faraon Yusupke bılay dedi:
– Tuwısqanlarıńa ayt, olar esheklerine júklerin artıp, Qananǵa qaytsın. 18Ákesin hám xojalıqların alıp, usı jerge qaytıp kelsin. Men olarǵa Mısırdıń eń jaqsı jerlerin beremen, iship-jeytuǵını mol boladı. 19Jáne de, olarǵa bılay dep aytıwıńdı da buyıraman: balaları hám hayalları ushın Mısırdan arbalar alıp ketsin hám ákeńizdi bul jerge alıp kelsin. 20Qalıp ketken zatlarına ashınbasın, pútkil Mısırdıń eń jaqsı zatları olardiki boladı.
21Izraildıń ulları aytılǵanlardı isledi. Yusup faraonnıń buyrıǵı boyınsha olarǵa arbalar hám jol ushın azıq berdi. 22Yusup olardıń hár birine bir shapannan, al Benyaminge úsh júz shekel gúmis penen bes shapan berdi. 23Ol ákesine arnap, on eshekke Mısırdıń eń jaqsı zatların júkledi hám ákesiniń jolı ushın, on mashaǵa dán, nan hám azıq-awqat artıp jiberdi. 24Yusup tuwısqanların jolǵa shıǵarıp salıp atırıp:
– Jolda jánjellesip júrmeńler, – dedi.
25Yusuptiń tuwısqanları Mısırdan shıǵıp, Qanan eline, ákesi Yaqıptıń janına qaytıp keldi. 26Olar ákesine:
– Yusup tiri eken, ol házir pútkil Mısır elin basqarıp tur, – dedi. Biraq Yaqıptıń júregi búlk etpedi hám olarǵa isenbedi. 27Olar ákesine Yusuptiń ózlerine aytqan barlıq sózlerin aytıp berdi. Yaqıp ózin kóshirip ákeliw ushın Yusuptiń jibergen arbaların kórgende, ruwxına jan kirdi. 28Sonda Izrail:
– Endi isenemen, ulım Yusup ele tiri eken! Ólmesimnen burın barıp, onı kóretuǵın boldım, – dedi.
Currently Selected:
Jaratılıs 45: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
