Yohanna 10
10
Jesu a Gutapp Wu'rett
1Jesu satt le, “Ih satt a zeenn wunn, gwooh baah dhel dhighin bongg-tihm a phi fokhol'pang mou, k'aa arr a m'ee pee wu'dyikk, bhi gwoh ni a watt, nyi a gu'bheer. 2Gwooh dhel dhighin bongg-tihm ni a phi fokhol'pang a nyi a gutapp tihm ni mwopp. 3Gunaah fokhol'pang p'ee wanggpee nyi. Tihm ni mwopp kihh klihng dhekheh nyi. Kihh perrep tihm keeniy mwopp shi'shumm-shi'shumm lang'arr kihh mwopp lhipwat. 4Bwoonrooh pwat kihh tihm keeniy mwopp weett, bhi nyi p'ee l'ang kihkyeen mwopp, wu'mwopp lang kihbwoon nyi, p'ee mwopp man dhekheh nyi.#10:4 Dhighin yill Isra'ila kihh pakk yill w'u koghob Isra'ila ni, bhi gutapp kihh dum a kihkyeen tihm, dheeh tihm mwopp l'ang kihbwoon nyi; baah gutapp kihh tih-tupp tihm lhidum kihkyeen niy mou. 5Baah tihm ni mwopp p'ee cham langdang mhizeb mou, mwopp p'ee shi-shu kihh nyi, p'ee baah mwopp man dhekheh mhizeb mou.” 6Jesu satt shumpwoo mhize Farisiiy mwopp, dhangg baah mwopp manshiiy bii w'u satt runn seh mou.
7Bhi Jesu waa satt dyi mwopp le, “Ih satt a zeenn wunn, a a'n a fokhol'pang khi tihm ni mwopp. 8Kapp mwooh gyet mwopp ja ky'een a'n mwopp a watt kihh mhi'bheer, dhangg baah tihm ni mwopp klihng mwopp mou.#10:8 Mee'meehseh bhi Jesu phi satt pwoo a kaah gurum w'u gyet mwopp shee ja mwopp kihh l'e wai a runn a Kristi seh, baah a mwooh gyet shee satt pwooNaan dhangg ji khi Jesu mou. DKZ 5:35-37 9A a'n a fokhol'pang, gwooh mihh dhel dhighin bongg-tihm ni a dhighin a'n bhi nyi p'ee kad bh'am. Nyi p'ee kihh dhel dhighin bongg ni kihh waa put dum kad peetapp wu'rett. 10Watt wu'nyi kihh ji a phishumm watt, kihh tu'kaah, kihh tu'koog bii. Wu'an ih ji a tihh mwopp kad seen diy; tihh mwopp kad diy yallaz.
11“A a'n a Gutapp Wu'rett. Gutapp Wu'rett kihh pihh seen niy p'ee tihm ni mwopp. 12Baah laa'tapp w'u wuh-wapp a dihng gutapp ni mou, yakhal baah tihm ni mwopp a mhinyi mou. Mihh naah asmhipangg kihh ji bhi nyi p'ee sh'u dhel niy yet tihm ni mwopp dheeh. A kihhsheh bhi asmhipangg ni p'ee ji taahpee kih tihm ni mwopp, pirryit mwopp chiit b'uu. 13Laa'tapp ni kihh sh'u niy, p'ee nyi a gwooh wuh-wapp kyekk, baah mee'bii daam'pee ni kihh tihm ni mwopp mou.
14“A a'n a Gutapp Wu'rett. Ih man tihm keena mwopp yakhal tihm keena mwopp man a'n, 15mwoorr kaa Daa man a'n, yakhal wu'an a man nyi se zag. Pee'mhinyi, bhi a'n p'ee pihh seen na p'ee tihm ni mwopp. 16An kihh pakk tihm ni mwopp dyi w'u baah mwopp khi kwed dhighin dw'uu tihm mhize ni mou. Nyi a ching tihh ih dum ih ji kihh wu'mwopp zag. Wu'mwopp zag p'ee klihng dhekheh nah, bhi dw'uu tihm ni mwopp p'ee kwed a wu'kihmeh, der Gutapp kihmeh. 17Bii w'u l'e tihh Daa kihh wall a'n a pee'rooh a'n p'ee pihh seen na dhangg a'n p'ee waa lapp nyi dyi. 18Baah m'ee gurum kihh mak m'ang seen na mou; a a'n sh'i kaah na ih dh'om pihh nyi. A'n kihh bhall mhi pihh seen na, yakhal a'n kihh bhall mhi waa lapp bii na dyi. A bii w'u Daa satt a'n le a'n sh'in seh.”
19Kaah Zhepp Yahuda ni mwopp waa shapp dyi kaarooh mwopp klihng bii w'u Jesu satt seh. 20Pakk mwopp kihh satt le, “Gwoh mhize ni a kihh riin wu'bis dhighin shin, harr baa yi-yirr. Kakkrooh w'u kihh tong klihng nyi a p'ee mihyeh?”
21Dhangg pakk mwopp satt le, “Ooh wunn'! Mihhse a orr mhi gwooh kihh riin wu'bis dhighin shin seh mou. Riin wu'bis diy mak wangg yit guvughum a'ng, dass'nwaa?”
Zhepp Yahuda mwopp shiih pihhzeenn Jesu
22Gyet tarr waapp, sh'i Kwughur Rettyit Tu'angg LuhNaan Urshalima, 23bhi Jesu kaah mwaan kihfur LuhNaan ni der bid w'u mwopp kihh peet Bid Suleman. 24Zhepp Yahuda mwopp w'u mwopp ja okhor nyi mwopp nang phi nyi le, “Gha p'ee yet tihh mu kihh yeehpee kih shun a veng aa'? Mihh a gha a Kristi bhi gha sih-satt munn fyaatd.”
25Jesu lapp mwopp le, “Ai ih cham satt nyi wunn dhangg baah wu pihhzeenn mou. V'ur dhakk w'u ih kihh sh'in dhighin shumm Daa se a mwopp kihh tupp'pwoo kaah nah. 26Weett kihhsheh baah wu pihhzeenn mou, p'ee baah wunn a tihm keena mou. 27Tihm keena mwopp kihh klihng dhekheh nah, mwopp kihh langdang na. 28Ih kihh pihh seen w'u harr ngaa-ngaa mwopp, baah mwopp p'ee cham ky'em mou; dyi zag, baah menguh p'ee mak vekher mwopp shwat sarr nah mou. 29Daa w'u pihh mwopp a'n, bhall mett koohweeh, pee'mhinyi bhi baah menguh p'ee mak vekher mwopp shwat sarr nyi mou. 30Wu'an kihh Daa a wu'khimhi.”
31A nyi seh bhi Zhepp Yahuda mwopp waa chakk pangg dyi p'ee vat nyi t'u. 32Bhi Jesu nang phi mwopp le, “A kamm v'ur dhakk'wurett dhess w'u put kihpee Daa diy wunn; wu kihh t'ang vat a'n t'u a p'ee meehranggyeh?”
33Zhepp Yahuda ni mwopp lapp nyi le, “Baah mu kihh t'ang vat gha t'u a p'ee m'ee dhakk'wurett mhize mwopp mou; a p'ee kas Naan w'u ghi sh'in seh. Gha w'u a Laa'gurum kyekk bhi ghi satt ghi le wai gha a Naan a'ng!” 34Jesu lapp mwopp le, “Ai nyi a rih-ran dhighin W'aar keewu le, ‘An ih satt ih le 'wunn a naan mwopp;’#KKN 82:6 35T'o, dheeh mihh gyet peet mwooh pwoo khi Naan ji mwopp a naan, dhangg wu man rooh baah pwoo khi Naan kihh cham taah yill mou, 36bhi wu satt wu le a'n kas Naan pee'rooh ih satt ih le a'n a L'aa khi Naan - a'n w'u Naan l'e sarr niy kaah nah lop lhisam dhighin yill ni 'ng? 37Mihh dheng'pee a'n phi sh'in a dhakk w'u Daa kihh sh'in mou, bhi tapp w'u pihhzeenn a'n mou. 38Dheeh mihh a'n phi sh'in a dhakk w'u Daa kihh sh'in, bhi kooh baah w'u pihhzeenn a'n mou, bhi wu pihhzeenn dhakk ni mwopp tihh wu man diy yakhal w'u manshiiy rooh Daa dhighin a'n yakhal wu'an dhighin nyi zag.” 39Pee'mhinyi bhi Zhepp Yahuda ni mwopp waa kihh t'ang y'aa nyi dyi, dhangg mett niy sarr mwopp dhel.
40A nyi seh bhi Jesu dhel dum niy takhann yit'am Urdu wu'zeh, pee w'u gyet Yohanna kihh sh'in baptisma diy, bhi oz pakk niy nhighin. 41Gurum dhess mwopp kihh ja kihpee nyi diy nhighin. Pakk mwopp kihh satt le, “Ai baah gyet Yohanna sh'in m'ee bii'aapwoo mou, dhangg koohmeeh w'u gyet satt kaah gwoh mhize ni a zeenn.” 42A nyi seh bhi gurum dhess mwopp pihhzeenn Jesu nhighin.
Currently Selected:
Yohanna 10: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
