Yohanna 11

Muutt khi Li'azarus.

1Minguh shi w'u shumm nyi a Li'azarus gyet a gok. Nyi gyet a Gu-Betani, w'u a kwangyill khi Maryamu mwopp kihh em'nhikhenn Marta.#Luk 10:38,39 2(Maryamu w'u emnhikhin nyi Li'azarus a gok seh, gyet a nyi cham m'um Daah Jesu kihh mwoor'teghez yakhal pwaas shiiy nyi mwopp sh'i shoopkaah rah#Yoh 12:3.) 3A nyi seh bhi em'nhikhin Li'azarus wu'raapp mwopp shenn l'op Jesu tihh mwopp satt diy nyi le, “Gwoohyon, shaar gha w'u ghi kihh wall nyi dhepplekk shi seh a gok.” 4Kaarooh Daah Jesu klihng l'op ni bhi satt le, “Baah shw'al mhize ni p'ee kyes a kihh muutt mou, nyi a pee'tihh Naan lappdhess diy, yakhal tihh L'aa kihh Naan lappdhess dyi zag.” 5Jesu gyet kihh wall Marta mwopp kihh em'nekhenn Maryamu, kihh em'nhikhin mwopp Li'azarus zag. 6Dhangg kaarooh klihng rooh Li'azarus a gok, bhi waa shwat t'eer dyi vel nhighin pee wu gyet nyi diy seh. 7Bwoon mihhseh bhi satt zheppkamm keeniy mwopp le, “Wu ja munn mu b'aa mu dum dyi gaar'yill Yahudiya.”

8Zheppkamm khinyi mwopp satt nyi le, “Deh nhighinse kuss dhighin shiiy'teer w'u kudyi kihh dhi-dhel se bhi Zhepp Yahuda mwopp kihh t'ang vat gha t'u kihh pangg, dhangg mwasseh bhi ghi satt ghi le munn waa dum dyi nhighin a'ng?”

9Jesu lapp mwopp le, “Kooh a witt-puus wu'rangg a kihh gonggpee kaghapaad baa'vel mou aa'? Gwooh mihh kihh mw'aan a puus bhi baah nyi p'ee kihh sak shiiy niy mou, p'ee kihh naahpee sh'i peebhangg mhi yill mhize. 10Gwooh mihh kihh mw'aan a khipar bhi nyi p'ee kihh sak shiiy niy, p'ee baah nyi kihh peebhangg mou.”

11Bwoonrooh Jesu satt kihhsheh, bhi waa satt dyi zheppkamm keeniy ni mwopp le, “Shaar mu Li'azarus taah s'aam; a'n p'ee dum tihh ih m'ii nyi diy.” 12Bhi zheppkamm khinyi mwopp pring nyi le, “Ai mihh kihh mak saam, bhi nyi p'ee kih-kakhamm seh.” 13Dhangg Jesu phi satt a rooh Li'azarus baa mih-m'uut, dhangg zheppkamm ni mwopp kihh ryeeh le nyi phi satt a s'aam w'u phishumm lappshik se kyekk. 14Dhangg Jesu satt mwopp fyaatd le, “Li'azarus m'uut, 15dhangg a'n kihh rettyit p'ee wunn, p'ee baah deh a'n nhighin mou; bii mihhse p'ee l'e tihh wu pihhzeenn a'n. W'u ji munn mu dum kihpee nyi diy.”

16Bhi Tomas w'u mwopp kihh peet Daa'zhan satt kakhar mhinin zheppkamm ni mwopp le, “Wu ja munn mu dumdang nyi kyekk kihhsheh tihh mu mwarrap diy kihshag kihh nyi 'y.”

Jesu yakhal kihh Li'azarus kih peemuutt

17Kaarooh Jesu ji wull bhi kad baa kumm Li'azarus shwat t'eer feerr dhighin tukhun. 18Betani a kuss kihh Urshalima, kaa kilomita kunn se kyekk; 19a kihhsheh bhi Zhepp Yahuda dhess mwopp ja togpee kihh Marta mwopp kihh em'nekhenn Maryamu p'ee muutt khi em'nhikhin mwopp. 20Kaarooh Marta klihng rooh Daah Jesu ji wull kuss, bhi yakhal dum kang nyi kih arr, dhangg Maryamu wu'nyi dheeh tuluh.

21Bhi Marta satt Jesu le, “Ai, Daah, kaddyinn deh gha nhighinse, bhi baah dyinn deh em'naa diy m'uut mou. 22Dhangg ih man ih le kooh mwasseh kihhshe maah, bhi koohmeeh w'u mihh ghi dhang phi Naan bhi nyi p'ee pihh nyi gha.”

23Jesu satt nyi le, “Em'nyingg p'ee waa yakhal dyi.”

24Marta pring nyi le, “Ih man ih le nyi p'ee p'ar waa yakhal dyi p'ar yakhal kih peemuutt, puus kyess khi yill ni.”

25Jesu pring nyi le, “A a'n a g'u yakhal kihh mwooh mih-mwarrap kih peemuutt, a a'n a seen. Gwooh mihh pihhzeenn a'n bhi nyi p'ee waa yakhal dyi kihh seen kooh dyinn mih-m'uut. 26Yakhal koohweeh w'u kihhseen mwasseh yakhal kihh pihhzeenn a'n, bhi baah nyi p'ee m'uut mou. Yi pihhzeenn pwoo mihhse aa'?”

27Bhi Marta lapp nyi le, “Daah, ih pihhzeenn ih le a gha a Kristi, L'aa khi Naan, w'u gyet gha p'ee ji dhighin yill ni.”

28Kaarooh Marta satt kihhsheh bhi dum peet em'nekhenn Maryamu mwopp dum dyarrang, bhi satt nyi le, “Gukamm ji wull, kihh nang yi.” 29Kaarooh Maryamu klihng kihhsheh bhi kwerred yakhal laah-laah dum kihpee Jesu diy. 30Baah Jesu khi ji wull dhighin tughuzyill ni mou; kudyi a nhighin pee w'u dyinn Marta dum kang nyi diy seh. 31Kaarooh Zhepp Yahuda w'u dyinn phi dwakk Maryamu tuluh mwopp naah rooh Maryamu yakhal put laah-laah, bhi mwopp yakhal dang nyi, mwopp kihh ryeeh le dhok kihh dum a kih kihshirr tihh wall pakk dyi nhighin.

32Kaarooh Maryamu dum wull kihpee Jesu diy, yakhal naah nyi, bhi taah yill tekhem nyi kihh satt le, “Ai, Daah, kaddyinn deh gha nhighinse bhi baah dyinn deh em'naa diy m'uut mou.”

33Kaarooh Jesu naah kihpee Maryamu kihh sam wall diy, yakhal naah kihpee Zhepp Yahuda w'u mwopp dang nyi zag kaah wall, bhi bii mihhseh daam'pee nyi phitukhup nyi pwetd. 34Bhi nang phi mwopp le, “Wu wum nyi a nihyeh?”

Mwopp lapp nyi le, “Daah, ji tihh mu kattpee nyi diy gha.”

35Jesu wall.

36Bhi Zhepp Yahuda mwopp satt le, “Wu naah wall w'u nyi kihh nyi p'ee kumm Li'azarus ni!”

37Pakk mwopp kihh satt le, “Bhi dyinn deh gwoh mhize w'u deh wangg yit guvughum seh mak l'e tihh tapp Li'azarus ni m'uut mou aa'?”

Jesu yakhal kihh Li'azarus kih peemuutt.

38Bii ni waa daam'pee dyi Jesu phitukhup niy pwetd, bhi dum phi kihshirr ni. Kihshirr ni a m'ee f'ung goghod w'u mwopp paah pwoo kihh elleng. 39Bhi Jesu satt mwopp le, “Wu byit elleng ni lhi'baa.”

Bhi Marta, wu'reep kumm ni, satt Jesu le, “Daah, ai mwasseh baa kumm ni shee dwu bis-bis, p'ee baa shwat t'eer feerr tukhun.”

40Jesu pring nyi le, “Dyinn ih satt yi ih le mihh yi pihhzeenn, bhi yi p'ee naah tihghindhess khi Naan mou aa'?”

41A nyi seh bhi mwopp byit elleng ni lhi'baa. Bhi Jesu eep yit niy phikihtihngg bhi satt le, “Daa ih plang gha p'ee ghi kihh klihng a'n. 42Ih man ih le ghi kihh klihng a'n kooh phiranggyeh, weett kihhsheh a'n phi satt mihhse a p'ee mwooh kihh dyarrang se, tihh mwopp pihhzeenn diy le a gha ghi lop a'n.”

43Kaarooh satt kihhsheh, bhi peet sh'i dhekheh niy bhall-bhall le, “Li'azarus oo, ghi put!” 44Bhi Li'azarus taah put, kihh sarr niy kihhsheh kihh kwag niy mwopp a w'u dyi-dyan shi zaall'wum mhi fwaat linen, kihh m'ee fwat w'u mwopp bwakhat yit nyi dyishig.

Jesu satt mwopp le, “Wu shwat fwaat'wum ni lhi'baa, tihh mwan niy diy.”

Zhepp Yahuda mwopp kukhul-bhellepp p'ee t'u Jesu

(Mat 26:1-5; Mar 14:1-2; Luk 22:1-2)

45Dhess dhighin Zhepp Yahuda w'u gyet mwopp ja togpee kihh Maryamu mwopp naah bii w'u Jesu sh'in, bhi mwopp pihhzeenn nyi. 46Dhangg pakk mwopp dhel dum yakshiiy bii w'u Jesu sh'in seh Farisiiy mwopp. 47Bhi prist wu'nan kihshag kihh pakk Farisiiy mwopp peet k'ang mhi To'ng-Mhi'nan khi Zhepp Yahuda bhi mwopp nang phi shag le, “Munn p'ee sh'in a ranggyeh kihh gwoh mhize, dass'nwaa? Wu naah kih'pee nyi kaah so-kihkyeen kihh sh'in v'ur bii'aapwoo shi'nyi-shi'nyi. 48Mihh mu yetpee nyi tihh so-kihkyeen diy kaa nyi shi'pwoo mwasseh seh, bhi gurum weett p'ee pihhzeenn nyi, a kihhsheh bhi Roma mwopp p'ee ji y'aa yill keemu kihh LuhNaan keemu zag lapp.”

49Kihmeh dhighin mwopp, w'u shumm nyi a Kayafas, w'u gyet a nyi a Prist Wu'yon yiiy mhizeh ni, satt mwopp le, “Baah wu man mee'bii mou kooh lee. 50Kan wu man rooh gyall a gurum kihmeh m'uut kihphi kakhar gurum weett kad mihh'pee a yill ni kihhdihng kihh ky'em maah?”

51Baah Kayafas satt bii mihhseh a sh'i kaah m'iin mou; sh'in a wanggshiiy pee'rooh gyet nyi a Prist Wu'yon yiiy mhizeh ni le Jesu p'ee m'uut p'ee Zhepp Yahuda mwopp. 52Dhangg baah nyi p'ee m'uut a p'ee Zhepp Yahuda mwopp kyekk mou; a p'ee zhepp khi Naan w'u mwopp kihh chiit koohneeh meett-meett shi'pee-shi'pee zag, tihh chakk mwopp diy lhija kihshag, tihh mwopp dheeh diy a gurum wu'khimhi. 53A nyi seh bhi yakhal p'ar mihhseh ni bhi mwoohnan khi Zhepp Yahuda mwopp y'aa t'ang arr w'u tihh mwopp t'u Jesu diy.

54A nyi seh bhi baah Jesu dh'om mw'aan dyi kih k'aam naar Zhepp Yahuda mwopp mou. Yakhal bhi dhel dum niy m'ee gaar'yill w'u pwoo dh'em; dum m'ee kwangyill w'u mwopp kihh peet Ifreim, bhi mwopp oz ruh nhighin kihshag kihh zheppkamm keeniy mwopp.

55Kaarooh Kwughur Mettkaah khi Zhepp Yahuda l'ang kuss, bhi dhess khi Zhepp Yahuda ni mwopp shep tong pwat kwangpee-kwangpee mwopp ka duam Urshalima. Mwopp sh'in kihhsheh tihh mwopp khibhid dyeer mhi vwang-angg diy shut dhangg puus Mettkaah ni kihh ji wull. 56Bhi mwopp y'aa lyap Jesu. Kaarooh mwopp kihh dyarrang kihfur LuhNaan, bhi mwopp kihh nang phi shag le, “Wu kihh naah gwoh mhizeh ni p'ee dhi-dheeh Kwughur ni aa'?” 57Prist wu'nan baa mwopp khi t'en satt gurum mwopp le koohweeh w'u mihh man pee w'u Jesu ni diy bhi gw'ar satt runn, tihh runn dum diy y'aa gw'ar.

Currently Selected:

Yohanna 11: Chakfem

Highlight

Copy