Yohanna 3

Nikodemus ji kihpee Jesu

1M'ee Farisiiy w'u shumm nyi a Nikodemus gyet nhighin. Nyi gyet a kihmeh dhighin T'ong-Mhi'nan khi Zhepp Yahuda mwopp. 2Gwoh ni ji kihpee Jesu diy khipar bhi satt nyi le, “Daah gukamm, mu man mu le gha a gukamm w'u ghi tong a kihpee Naan ghi sam diy. P'ee baah m'ee gurum kihh mak sh'in bii'aapwoo w'u gha phi sh'in mwopp se kad baah a Naan kihshag kihh nyi mou.”

3Jesu pring nyi satt le, “A satt a zeenn gha, baah m'ee gurum p'ee mak naah dhenglong khi Naan kad baah mwopp waa l'aa nyi dyi dhangg mou.”

4Nikodemus nang phi nyi le, “Diy lukk a rangg bhi mwopp waa laa'gurum dyi bwoonrooh baa kus ayeh? Kihh mak sh'in tihh waa dhel dyi bwut nhikhin tihh waa l'aa nyi dyi mihngg?”

5Jesu lapp nyi satt le, “A satt a zeenn gha, baah m'ee gurum p'ee mak dhel dhenglong khi Naan kad baah mwopp waa l'aa nyi dyi sh'i a'm kihh sh'i Riin khi Naan mou. 6Bii w'u laa'gurum kihh l'aa a laa'gurum; bii w'u Riin kihh l'aa bhi nyi a riin. 7Tapp diy dheeh gha a bii'aapwoo pee'rooh ih satt gha ih le, ‘Ching tihh mwopp waa la wunn dyi dhangg’ mou. 8Ghi naah, piip kihh bwappee dhel dum pee w'u naah rett diy rah; ghi kihh klihng dhekheh nyi dhangg baah ghi mak man pee w'u tong put diy, kooh pee w'u kihh dum diy mou. Nyi a kihhsheh zag p'ee koohweeh w'u Riin khi Naan l'aa.” 9Nikodemus waa nang dyi phi nyi le, “Diy shitt a rangg bhi bii mihhse mwopp sh'in ayeh?” 10Jesu lapp nyi satt le, “Hah, gha a Gukamm khi Zhepp Isra'ila, weett kihhsheh bhi ghi mak manshiiy bii mihhse mou aa'h? 11Ih satt a zeenn gha, mu kihh kadpwoo a kaah bii w'u mu man, yakhal mu kihh tupp'pwoo a kaah bii w'u mu naah, weett kihhsheh bhi baah wu dh'om lapp tupp'pwoo keemu ni mou. 12A'n phi kadpwoo gha a kaah bii w'u dhighin yill mhize dhangg ghi pihhzeenn mou, diy shitt a rangg bhi ghi pihhzeenn kaddhangg a kadpwoo gha kaah bii w'u kih dhengNaan ayeh? 13Baah m'ee gurum cham k'aa dum kih dhengNaan mou, seeh a gwooh tong kih dhengNaan sam diy, w'u a L'aa khi Gurum. 14Mwoorr kaarooh gyet Musa eep w'oo-shagahal lhi'lang kih raz dhighin dh'em seh, bhi dhen a ching tihh p'ar mwopp eep L'aa khi Gurum a kihhsheh zag, 15tihh koohweeh w'u pihhzeenn diy nyi bhi tapp ky'em mou, diy kad a seen w'u harr ngaa-ngaa.

16“Naan wall yill ni pwetd bhi pihh L'aa keeniy w'u a nyi kyekk a shik wu'khimhi#3:16 Jesu L'aa khi Naan a shik wu'khimhi kihh Pukhun Naan, a kihhsheh bhi wu'nyi zag a Naan, mwoorr kaa l'aa khi gurum a shik wu'khimhi kihh pukhun se, a kihhsheh bhi l'aa ni wu'nyi a gurum zag kaa puup khinyi a gurum se. T'ang Filp 2:5-6l Yoh 10:30-33. kihh shin, tihh koohweeh w'u pihhzeenn diy L'aa ni bhi tapp ky'em mou; diy kad a seen w'u harr ngaa-ngaa. 17Baah Naan lop L'aa keeniy lhisam dhighin yill ni a tihh tepdyeell diy yill ni mou; lop nyi a tihh yill ni kad bh'am diy lhiwaa a nyi. 18Koohweeh w'u mihh pihhzeenn nyi bhi baah Naan p'ee tepdyeell gwoh ni mou. Dhangg gwooh mihh shiih pihhzeenn L'aa ni, bhi Naan baa tih-tepdyeell gwoh ni, p'ee baah pihhzeenn dhighin shumm L'aa kihh Naan ni w'u a nyi kyekk a shik wu'khimhi kihh nyi seh mou. 19Tepdyeell nyi a kihhshe: peebhangg dhoghol ji dhighin yill ni weett dhangg zhepp gurum mwopp waa dh'om ruh a pee'kwoo mett peebhangg, p'ee dhakk'shin khimwopp a wu'bis. 20Gu sh'in dhakk'shin wu'bis kihh shiih kihh peebhangg, baah kihh dh'om ji dhighin peebhangg mou kwaah'baa dhakk'shin khinyi wu'bis put kihgaak. 21Dhangg koohweeh w'u kihh sh'in a t'ong mhi zeenn bhi kihh ji dhighin peebhangg, tihh put diy kihgaak le bii w'u kihh sh'in weett bhi kihh sh'in a sh'i Naan.”

Yohanna Gu-Baptisma tupp'pwoo kaah Jesu

22Bwoon mihhse bhi Jesu kihshag kihh zheppkamm keeniy mwopp dhel dum m'ee kwangpee w'u gaar'yill Yahudiya, mwopp pann oz nhighin, mwopp kihh sh'in baptisma gurum mwopp. 23Yohanna wu'nyi zag gyet kihh sh'in baptisma dhighin yill Ayenon, kuss kihh Salim, p'ee a'm gyet nhighin dhess, yakhal gyet gurum mwopp kihh ja nhighin p'ee lapp baptisma. 24(Gyet mwopp sh'in bii mihhse dhangg mwopp kihh shakhat Yohanna Gu-Baptisma luh'shakhat.) 25M'ee kakhann yakhal naar zheppkamm khi Yohanna kihh m'ee Gu-Yahuda kaah vwang-angg p'ee soyill Naan. 26Zheppkamm khi Yohanna ni mwopp ji kihpee nyi diy bhi mwopp satt nyi le, “Gukamm, gwooh deh nyi kihshag kihh gha takhann yit'am Urdu wu'zeh shi, w'u a gwooh deh ghi kihh tupp'pwoo kaah nyi seh; nyi kaah sh'in baptisma gurum mwopp, mwasseh kihhshe dheeh gurum weett mwopp kihh duam a kihpee nyi diy.”

27Yohanna pring mwopp satt le “Baah gurum kihh mak lapp mee'bii w'u dheng'pee a Naan ryeeh pihh nyi gwoh ni mou. 28Ai wunn sh'i kaah wuh wu mak tupp'pwoo kaah nah kaarooh deh ih satt ih le, ‘Baah a a'n a Kristi mou, mwopp lih-lop a'n kyekk ky'een nyi.’ 29Gu-mat'mwar a nyi a mis'mwar ni. Shaar mis'mwar w'u kihh l'e kom niy p'ee klihng dhekheh mis'mwar ni kihh klihngshangg pwetd kad mihh klihng dhekheh mis'mwar ni. Rettyit mhize ni a maan'nah mwasseh. Rettyit keena gam! 30Nyi a ching tihh wu'nyi kihh sihkhitt kad y'on; wu'an p'ee kihh sihkhitt dheeh a wu'shomm.

31“Gwooh tong kih dhengg sam mett gurum mwopp weett. Gwooh put a dhighin yill mhize a mhi yill mhize, yakhal kihh kadpwoo a kaah bii w'u dhighin yill mhize. Gwooh tong kihh dhengNaan sam mett gurum mwopp weett. 32Wu'nyi kihh kadpwoo a kaah bii w'u naah kihh yit niy, yakhal klihng kihh kom niy. Weett kihhsheh bhi baah menguh dh'om lapp tupp'pwoo khinyi mou. 33Koohweeh w'u mihh lapp pwoo khinyi bhi gwoh ni baa pihhzeenn le Naan a zeenn. 34P'ee gwooh Naan lop kihh satt a pwoo khi Naan, p'ee Naan pihh Riin keeniy nyi kihh p'in kyess mou. 35Puup ni kihh wall L'aa nyi pwetd, pee'mhinyi bhi l'e bii weett a sarr nyi. 36Koohweeh w'u pihhzeenn L'aa nyi bhi nyi kihh seen w'u harr ngaa-ngaa. Dhangg koohweeh w'u shiih kihh L'aa ni, bhi baah nyi p'ee cham naah seen mou, p'ee tukhupdyeell khi Naan kihh tong kaah gwoh ni twass.”

Currently Selected:

Yohanna 3: Chakfem

Highlight

Copy