Yohanna 8

Mat w'u mwopp y'aa gaa

1Kaarooh mwopp reen, bhi Jesu wu'nyi k'aa dum kih Bwumm Paatt. 2Tarrbyitt bhi Jesu b'aa ji dyi kihfur LuhNaan, bhi gurum mwopp weett ja okhor nyi, bhi tong yill y'aa sh'in kamm mwopp. 3Mhikamm-w'aar kihh Farisiiy mwopp ji kihh m'ee mat w'u mwopp y'aa nyi gaa. Bhi mwopp l'e tihh mat ni dharr kihnaar ru, 4bhi mwopp satt Jesu le, “Gukamm, mu y'aa mat mhize gaa sarr-kihh-sarr. 5Dhighin W'aar bhi Musa kamm munn le nyi a ching tihh mu vat mwooh kihhshe se kihh pangg mu twa. T'o, wu'gha ee, a mihyeh a bii w'u wu'gha p'ee satt nyi munn?” 6Mwopp satt mihhse a phishumm lang'tengg Jesu, tihh mwopp kad arr dum diy kihh waamatt nyi luhdyeell.

Jesu kurum shin yill, y'aa sh'in r'an kih loonyill sh'i laa'sarr niy. 7Kaarooh mwopp so kihkyeen kihh t'al phi nyi pwetd, bhi eep shin bhi satt mwopp le, “Gwooh noott shigbis dhighin wunn bhi shee m'ang pangg vet mat ni diy.”#WSW 17:7 8Bhi waa kurum shin dyi yill, y'aa sh'in r'an kih loonyill sh'i laa'sarr niy.

9Kaarooh gurum ni mwopp klihng kihhsheh, bhi mwopp y'aa reen kihmeh-kihmeh, shee gwoohyon dhighin mwopp; dheeh a Jesu kyekk taah dheeh, kihh mat ni kihh dharr nhighin. 10Kaarooh Jesu eep shin, bhi nang phi mat ni le, “Mwooh mwopp ji kihh waamatt yi shi a nihyeh? Kan m'ee mwopp tepdyeell yi maah?”

11Bhi mat ni lapp nyi le, “Daah, kooh kihmeh.”

Bhi Jesu satt nyi le, “Wu'an maah ih tepdyeell yi mou, yi mwan, dhangg tapp yi b'aa dyi dhighin shigbis mou.”#8:11 Pakk r'an w'u gyetshak kihh 7:53-8:11 mou.

Jesu a peebhangg khi yill.

12Bwoon kihhsheh, bhi kaarooh Jesu waa y'aa kadpwoo dyi kihh gurum ni mwopp, bhi satt mwopp le, “A a'n a peebhangg khi yill ni; koohweeh w'u mihh lang'dang na, bhi baah nyi p'ee mw'aan dhighin pee'kwoo mou, nyi p'ee kad peebhangg mhi seen.”

13Bhi Farisiiy mwopp satt nyi le, “A gha phi tupp'pwoo kaah sak, a kihhsheh bhi baah tupp'pwoo keegha nyi kihh koghob mou.”

14Jesu pring mwopp satt le, “Kooh dyinn ih kihh tupp'pwoo kaah san maah, bhi tupp'pwoo keena ni a zeenn; p'ee ih man pee w'u ih put diy, yakhal ih man pee w'u a'n p'ee baa'dum diy. Dhangg baah wu'wunn wu man p'ee w'u ih put diy, kooh pee w'u a'n p'ee baa'dum diy mou. 15Wu'wunn wu kihh shwandyeell a sh'i mihhseh mhi shoopshik; dhangg baah wu'an a kihh shwandyeell m'ee gurum mou. 16Weett kihhsheh, kooh dyinn ih kihh shwandyeell gurum maah, bhi ih kihh shwan a shi'zeenn, p'ee baah a a'n mhisan kyekk mou, a'n kihshag kihh Daa w'u lop a'n. 17Ai dhighin w'aar keewu bhi ni a rih-ran le, ‘Mihh gurum vel mwopp tupp'pwoo kaah mee'bii bhi ni a zeenn.’ 18T'o, a a'n a wu'shee w'u ih kihh tupp'pwoo kaah san; gu-tupp'pwoo keena wu'vel a Daa, w'u a gwooh lop a'n.”

19Bhi gurum ni mwopp nang phi nyi le, “Pag ni a nihyeh?”

Jesu lapp mwopp le, “Baah wu man a'n dhangg dheeh diy a Daa mou. P'ee kaddyinn wu man a'n, bhi dyinn wunn p'ee man Daa zag.” 20Jesu gyet kadpwoo mihhse a kihfur LuhNaan, kuss kihh pee w'u kwati bii'zhukhum mwopp diy, dhangg baah m'ee gurum y'aa nyi mou, p'ee baah pee khinyi gyet khi ji wull mou.

21Jesu waa sh'in satt dyi mwopp le, “An p'ee dhel nah bhi wunn p'ee p'ar dyoo a'n wu kad ih wonn. A kihhsheh bhi wunn p'ee mwarrap dhighin shigbis keewu, p'ee baah wunn p'ee mak wull kihpee w'u a'n p'ee dum diy mou.”

22Pwoo w'u Jesu satt seh le tihh mwoohnan khi Zhepp Yahuda mwopp kihh nang phi shag le, “Nyi a p'ee m'ee l'ang shin dhok s'ang? Diy tong a nyi a bii w'u l'e tihh kihh satt munn le munn p'ee mak wull kihpee wu riy kihh dum diy mou.”

23Jesu waa satt dyi mwopp le, “Wu'wunn a mhi yill mhize, wu'an a put a kihh dheng ih sam diy. Wu'wunn a mhi yill mhize, wu'an a mhi yill mhize mou. 24Pee'mhinyi, bhi dyinn ih satt wunn ih le wunn p'ee mwarrap dhighin shigbis keewu. T'o, mihh wu pihhzeenn wu le a'n a gwooh ih kihh satt wunn seh mou, bhi wunn p'ee mwarrap dhighin shigbis keewu a ching.”

25Mwopp nang phi nyi mwopp le, “Gha a wuyeh?”

Jesu lapp mwopp le, “An a gwooh phideh ih kihh satt diy wunn seh. 26An kihh bii dhess w'u dyinn ih kihh mak tepdyeell wunn kaah; weett kihhsheh, Gwooh lop a'n a guzeenn, bii w'u ih klihng pwoo nyi bhi ih kihh yak a nyi yill ni.”

27Baah mwopp man rooh nyi phi shin'pwoo kihh runn a kaah Pukhun Naan mou. 28A nyi seh bhi Jesu satt mwopp le, “P'ar puus w'u wunn p'ee eep L'aa khi Gurum diy, bhi wunn p'ee man w'u le a'n ih gwooh ih kihh satt wunn seh; yakhal wunn p'ee man w'u le baah ih kihh sh'in mee'bii sh'i kaah mhisan mou, ih kihh satt a bii w'u Daa kamm a'n kyekk. 29Gwooh lop a'n yet a'n mhisan mou, nyi kihshag kihh a'n, p'ee ih kihh sh'in a bii w'u kihh rettyit nyi chitt.” 30Pwoo w'u Jesu satt seh le tihh gurum dhess mwopp pihhzeenn nyi.

Zheenn kihh shang gurum dhakk-kromm

31Jesu satt Zhepp Yahuda w'u mwopp pihhzeenn riy seh le, “Mihh w'u y'aa kamm keena rih-rett bhi wunn p'ee dheeh a mhi-dumdang na. 32Wunn p'ee man zeenn, bhi zeenn p'ee shang wunn dhighin dhakk-kromm.”

33Bhi mwopp pring Jesu le, “Munn a seghen khi Ibrahim, baah mu khi cham tong kromm khi m'ee gurum mou. Shitt a rangg bhi ghi satt ghi le mwopp p'ee shang munn dhighin dhakk-kromm ayeh?”

34Jesu lapp mwopp le, “Ih kihh satt a zeenn wunn, koohweeh w'u kihh sh'in shigbis bhi nyi a kromm khi shigbis. 35Baah kromm kihh tong veng tuluh khi guluh keeniy mou; a l'aa khi guluh ni kihh tong veng tuluh khi pukhun. 36Pee'mhinyi bhi mihh a'n L'aa khi Naan ih shang wunn pwoo dhakk-kromm, bhi wunn p'ee yetshuk kihh dhakk-kromm a zeenn-zeenn. 37Ih man rooh wunn a yid der khi Ibrahim o'h, weett kihhsheh bhi w'u kihh t'ang t'u a'n, p'ee baah pwoo keena kad tong dhighin phitukhup wu mou. 38An ih kihh satt a bii w'u ih naah kihpee Daa diy wunn; wu'wunn wu kihh sh'in a bii w'u wu klihng kihpee puup wu diy.”

39Bhi mwopp pring nyi mwopp le, “Puup mu a Ibrahim sh'i kaah niy.”

Jesu satt mwopp le, “Ai kaddyinn wunn a zhepp khi Ibrahim, bhi dyinn wunn p'ee kihh sh'in a bii w'u Ibrahim gyet kihh sh'in. 40Dhangg mwasseh bhi baa wu dhen-en w'u a p'ee t'u a'n fyaatd, a'n w'u ih satt a zeenn w'u ih klihng kihpee Naan diy wunn! Ai baah Ibrahim gyet sh'in a sherem dhakk wu'kihhsheh mou. 41Wunn phi sh'in wuh a bii w'u puup wu kihh sh'in.”

Bhi mwopp pring Jesu le, “Ai baah wu'munn a zhep-bhoog mou; Puup mu a kihmeh, nyi a Naan sh'i kaah niy.”

Zhepp khi Shetan

42Jesu pring mwopp le, “Ai kaddyinn Naan a Puup wu, bhi dyinn wunn p'ee wall a'n, p'ee a put a kihpee nyi diy ih sam se. Baah ih sam a sh'i kaah mhisan mou, a Naan ni lop a'n. 43A mihyeh l'e bhi baah wu manshiiy bii w'u a'n phi satt nyi mou ayeh? Nyi a pee'rooh baah wu dh'om klihng bii w'u a'n phi satt nyi wunn mou. 44Wunn a mhi puup wu Shetan, yakhal w'u kihh t'ang gam a chakharr khi Puup wu ni. Nyi gyet a gu-tu'kaah phigyet diy a sh'ee, baah dh'om dharr kaah zeenn mou kooh lee, p'ee baah zeenn dhighin nyi mou. Mihh kihh kossok dong, bhi nyi phi l'aa a dihng mihhseh keeniy a pwetd seh; p'ee nyi a gudong, yakhal nyi a puup khi dong kihhdihng'dihng. 45Weett kihhsheh w'u shiih pihhzeenn a'n pee'rooh ih satt zeenn wunn. 46A meeh wuh wu'rangg p'ee mak satt le riy cham kad a'n kihh m'ee shigbis kooh tiss? Kadmihh ih kihh satt a zeenn wunn bhi a mihyeh l'e baah wu pihhzeenn a'n mou? 47Gwooh a mhi Naan bhi nyi p'ee klihng satt khi Naan. Bii w'u le baah w'u klihng satt khi Naan ni mou a pee'rooh baah wunn a mhinyi mou.”

Bii w'u Jesu satt kaah shin

48Zhepp Yahuda ni mwopp pring Jesu le, “Ai kan deh mu satt a dihhreh mu le gha a Gu-Samariya, yakhal gha kihh riin wu'bis sak.”

49Jesu lapp mwopp le, “Baah a'n kihh m'ee riin wu'bis dhighin san mou. Wu'an ih kihh pihhdhess Daa, weett kihhsheh bhi wu'wunn wu kihh toglong a'n. 50Baah a a'n sh'i kaah nah phi lyap rooh tihh gurum mwopp tihghin a'n diy mou; g'u t'ang tihh gurum mwopp tihghin a'n diy nhighin, a nyi a Gu-togdyeell. 51A satt a zeenn wunn, koohweeh w'u kyeer pwoo keena bhi baah nyi p'ee m'uut mou.”

52Kaarooh Zhepp Yahuda ni mwopp klihng bii w'u Jesu satt seh bhi mwopp shwat waaw chapp-chapp mwopp le, “Ai mwasseh mu man dyingg-dyingg mu le gha kihh riin wu'bis dhighin sak! Hah! Ibrahim maah gyet m'uut, yakhal kakhar mhi-wanggshiiy mwopp weett mwarrap zag; bhi wu'gha ghi satt ghi le wai gwooh mihh kyeer kamm keegha bhi diy m'uut mou a'ng? 53Wu'gha gha mett puup mu Ibrahim w'u gyet wu'nyi m'uut seh, yakhal ghi mett kakhar mhi-wanggshiiy w'u gyet wu'mwopp mwarrap seh zag kan o'? Naah mag bhi gha a mee'wuyeh kihhsheh pwetd?”

54Jesu pring mwopp le, “Mihh a a'n ih kihh tihghin san, bhi tihghinshik keena ni kihh koghob mou. A Daa, w'u a gwooh wu kihh le gw'ar a Naan keewu seh, a nyi kihh tihghin a'n. 55Kooh baah wu'wunn wu man nyi mou, bhi wu'an a man nyi. Mihh ih satt ih le ih man nyi mou, bhi wu'an zag p'ee kwed a gudong kaa wu'wunn se. Dhangg a'n ih man nyi, yakhal ih kihh kyeer pwoo khinyi. 56Ai puup wu Ibrahim gyet tong sh'i mhirakhatt mhi le'pan p'ee naah yiiy ji keena; kaarooh naah bhi kad rettyit pwetd.”

57Bhi mwopp nang phi nyi le, “Ghi khi wull byitt laar paad mou bhi kan ghi cham naah Ibrahim a'ng?”

58Jesu lapp mwopp le, “A satt a zeenn wunn, dhanggbhi mwopp kihh l'aa Ibrahim, bhi An nhighin.” 59Pee'mhinyi bhi Zhepp Yahuda mwopp kok pangg p'ee vat nyi t'u, bhi Jesu la'kham put yet kihfur LuhNaan ni.

Currently Selected:

Yohanna 8: Chakfem

Highlight

Copy