Matiw 19
19
Jesu sh'in kamm kaah dyik kihh tu'dyik
(Mar 10:1-12; Luk 16:18)
1Kaarooh Jesu kyes satt bii mihhse mwopp, bhi yet yill Galili, dum yill Yahudiya w'u koghob yit'am Urdu w'u takhann. 2Dw'uu gurum mwopp tuud langdang nyi, bhi bar mwopp nhighin.
3Pakk Farisiiy mwopp ja kihpee nyi tihh mwopp kamm nyi diy. Bhi mwopp nang phi nyi le, “Dhighin W'aar khi Musa bhi mee'bii nihghin w'u nyi dihhreh tihh gurum mak tu'dyik mat niy kaah aa'h, h'aa kihh mak tu'dyik ni kaah koohmeeh w'u naah rett riy ayeh'?”
4Bhi Jesu nang phi mwopp le, “Kan wu khi cham t'ang pwoo khi Naan w'u satt le, sh'ee bhi Gu-le'bii ‘l'e mwopp a wu'mis kihh wu'mat’ maah?#Shb 1:27 5Yakhal satt le, ‘A nyi a bii w'u l'e bhi gurum p'ee yet pukhun mwopp kihh nhikhin bhi bhal'kaah niy a kihh mat niy, bhi mwopp weett vel p'ee dheeh a shoopshik wu'khimhi,’ seh maah?#Shb 2:24 6T'o,, baah mwopp a vel dyi mou; mwopp dheeh a shoopshik wu'khimhi. Pee'mhinyi, bhi bii w'u Naan bh'al, bhi tapp laa'gurum diy bh'ak mou.”
7Bhi Farisiiy ni mwopp nang phi nyi le, “Kad kan nyi a kihhsheh dheeh a mihyeh l'e bhi Musa gyet gab'waar le mis kihh mak pihh ran'tudyik mat niy bhi shen nyi ayeh?”
8Jesu lapp mwopp satt le, “Musa gyet pihh pee mhi tu'dyik wunn lhiwaa a rooh phitukhup wu mun lapprau yon. Dhangg gyet sh'ee bhi baah nyi a kihhsheh mou. 9Pee'mhinyi bhi ih kihh satt wunn, koohweeh mihh tu'dyik mat niy, kad baah a kaah dhakk-gaa mou, harr waa lapp m'ee mat wu'zeh dyi, bhi gwoh ni phi sh'in a gaa.”
10Bhi zheppkamm khinyi mwopp pring nyi le, “Ahah, mihh orr tu'dyik naar mis kihh mat kan shwal a kihhsheh, ai bhi gyall gurum tong niy gwoorr kyekk e'h!”
11Jesu pring mwopp le, “Baah a koohweeh p'ee mak lapp orr tong gwoorr mou, seeh a mwooh Naan pihh bhall mhi tong gwoorr mwopp. 12P'ee pakk gurum a meerr'muut phi'wu nhikhin khimwopp la mwopp diy; pakk bhi a gurum mwopp kihh t'u meerr mwopp; dhangg pakk bhi a mwopp sh'i kaah ruh ryeeh sh'in t'ong w'u kaa meerr'muut se p'ee dhakk dhenglong khi Naan. Gwooh p'ee mak lapp kamm mhize, bhi lapp.”
Jesu le'wurett zhepp wu'dyeen
(Mar 10:13-16; Luk 18:15-17)
13Bhi gurum mwopp kihh ja kihh zhepp wu'dyeen Jesu tihh l'e sarr niy diy kaah mwopp yakhal dhangNaan p'ee mwopp; dhangg zheppkamm khinyi mwopp tepbhellepp mwooh phi ja kihh zhepp wu'dyeen ni. 14Dhangg Jesu satt zheppkamm keeniy ni mwopp le, “Wu yet tihh zhepp wu'dyeen mwopp ja kihpee na diy. Tapp wu d'aam mwopp mou, p'ee dhenglong khi Naan a p'ee mwooh kaa zhepp wu'dyeen se.” 15Bwoonrooh Jesu l'e sarr niy kaah mwopp, bhi yakhal yet pee mhizeh ni.
Pwookaah m'ee laa'zlang gulong
(Mar 10:17-31; Luk 18:18-30)
16Par'meeh shi bhi m'ee gurum ji kihpee Jesu diy bhi nang phi nyi le, “Gukamm, a m'ee dhakk'wurett w'u kaarangg w'u a'n p'ee sh'in nyi tihh ih kad seen w'u harr ngaa-ngaa diy?”
17Bhi Jesu nang phi nyi le, “A mihyeh l'e bhi gha phi nang orr bii wu'rett pwoo na. Ai Gwoohrett a kihmeh kyekk. Mihh ghi kihh t'ang dhel dhighin seen w'u harr ngaa-ngaa, bhi ghi kyeer W'aar mhi Musa.”
18Bhi gwoh ni nang phi Jesu le, “A meehranggyeh mwopp?”
Jesu lapp nyi satt le, “A w'aar w'u kihh satt le, ‘Tapp ghi tu'kaah mou, tapp ghi sh'in gaa mou, tapp ghi m'ang watt mou, tapp ghi tupp'pwoo dwungg kaah menguh mou, 19ghi pihhdhess pag mwopp kihh nhikhin keegha, ghi wall shaar'tong keegha kaa sak se zag.’ ”
20Bhi l'aa wuhyaah mhizeh ni satt Jesu le, “Ai baa ih kyeer w'aar mihhseh ni mwopp khibhid; a mihyeh dheeh dyi a'n?”
21Jesu lapp nyi satt le, “Mihh ghi kihh t'ang kwed a w'u khi-khibhid, bhi ghi dum ghi seett kihh long keegha, ghi sh'in zhukhum mhipyaah mwopp dyishig, bhi gha p'ee kwed kihh long kih dhengNaan, bhi ghi ji dhak ghi langdang na.”
22Kaarooh l'aa wuhyaah ni klihng bii w'u Jesu satt seh, bhi dhel sh'i tukhupwad pwetd, p'ee gyet nyi kihh long dhess.
23Bhi Jesu satt zheppkamm keeniy mwopp le, “Kai, ih satt a zeenn wunn, gulong p'ee sh'in a sh'in dhangg kihh mak dhel dhighin dhenglong khi Naan! 24Ih kihh satt dyi wunn, nyi p'ee fyeell mett tihh brihngg'tukhus dhel f'ung mulli, kad mihh'pee a gulong kihh dhel dhighin dhenglong khi Naan.”
25Kaarooh zheppkamm ni mwopp klihng bii w'u Jesu satt seh, bhi aa'phi mwopp pwetd, bhi mwopp satt le, “Ai mihh nyi rah a kihhsheh bhi a weeh p'ee mak kad bh'am?” 26Jesu naah mwopp bhi satt mwopp le, “Kihpee zhepp gurum diy bhi bii mihhse p'ee mak sh'in mou, dhangg kihpee Naan diy, bhi baah mee'bii a w'u maa'shin nyi mou.”
27Bitrus satt Daah Jesu le, “Ghi naah, wu'munn mu yet koohmeeh dheeh, tihh mu lang diy dang gha 'y. A mihyeh a lebhed w'u munn p'ee kad nyi?”
28Bhi Jesu pring Bitrus le, “Ih kihh satt a zeenn gha, dhighin Yillpwooh w'u kihh ji, p'ar w'u L'aa khi Gurum tong diy kih Taghamlong keeniy W'u Rettmett-weett, bhi wunn w'u wu langdang na se p'ee twakhat kih taghamlong kaghapaad baa'vel zag dhakk-sihhra kaah seghen khi Isra'ila w'u kaghapaad baa'vel se. 29Yakhal koohweeh w'u yet luh keeniy, kooh emnhikhin mwopp, kooh wu'raapp niy mwopp, kooh pukhun, kooh nhikhin, kooh zhepp niy, kooh bhokk niy mwopp p'ee a'n, bhi nyi p'ee lapp bii w'u mett kihhsheh yit dhaa kihmeh, yakhal nyi p'ee kad shapp mhi seen w'u harr ngaa-ngaa. 30Dhangg dhess khi pakk gurum w'u gurum mwopp kihh tihghin dhen kihkyeen mwasseh, bhi mwopp mhizeh ni p'ee kwed pwenn kihbwoon; dhangg pakk gurum w'u gurum mwopp kihh bheez le nw'aa a wu'baan, bhi a mwopp mhizeh ni p'ee p'ar dhen a mwooh kihkyeen.”
Currently Selected:
Matiw 19: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
