लूका 8
8
येशूला रो़ह पेहकेन्गी पी़हमीया़
1ओहले येशू क्याहसा क्याहसा दाङ युहल युहलला स्य़ूहदी किन्ज्योगी क्याहल्सीगी तेहन्दाला मिहया़ला लेहङगु या़हबुया़ स्येती फेप नाङसीन। येशूगी स्याहप्च्यी च्यिङ्यी़ॱआङ येशू ङ्याम्बुराङ येहकें। 2ओहले ङ्येहम्बा नाम्स्यी स्य़ूहक्यो दाङ ना थाम्ज्यीराङ नाहजा ङो़ले टा़हक्यो राहङसा पी़हमीॱया़ङ येशूगी तिङदा तिङ काहल्सीन। खुङया़ मग्दलिनी माएँ मरियम येहकें, मोहगी ज़ुबुले येशूगी ल्हेन्डी तिहन थाल तेन नाङग्यो येहकें।#मत्ती २७:५५,५६; मर्क १५:४०,४१; लूक २३:४९ 3क्याहल्बु हेरोदसाला ल़ेह पेहकें खुजासकी पी़हमी योअन्ना दाङ सुसन्ना। दि पी़हमीया़ दाङ लेहमेनया़गीॱआङ राहङगी क्युह नोहरया़ तेर्ती येशूला स्याहप्तो स्युहउ येहकें।
सेन ताप्कें मिह च्यी़गी पे
(मत्ती १३:१-९; मर्क ४:१-९)
4ओहले युहल युहलया़ले मिह माहङबुराङ ओहङदी जोम्सीन, ओहले येशूगी खुङया़ला दि पे ज़्या़दी सुङ नाङसीन, 5“मिह च्यी़ राहङगी स्यिहङला सेन ताप काहल्सीन। ओहले खोगी सेन ताप-ताप्पा काहङला लाहला लाहमला लेप्सीन, ओहले मिहगी काङबागी नेम्सीन, ओहले च्यिहबीगीॱआङ ओहङदी साहसीन। 6ओहले लाहला सेन तोहरो येहकें ग्या़ला लेप्सीन। ओ़हला सेन क्येज्येनी क्येसीन, यिहॱनाङ, सा लोम्बा म़ेहबा सोङगोराङ क्येक्योया़ॱआङ स्यिसीन। 7ओहले लाहला सेनदी छेर्मा चेहरेप नाहङया़ला लेप्सीन। ओहले सेन क्येदी ओहङगेमु ङ्याम्बु-ङ्याम्बुराङ छेर्मा जे़रेपॱआङ छार्ती ओहङसीन। ओ़ह सोङबे सेन तोहङबोया़ थाम्ज्यीराङ स्यिसीन। 8ओहले लाहला सेनया़दी या़हबु सा खाला लेप्सीन ओहले क्येदी छार्ती ओहङसीन। ओहले ओ़ह ङ्येमा ऱेह-ऱेहला बुदी क्याह च्यिचे या़हसीन।” येशूगी दि पे स्ये छार सिहन फान्ज्यो सुङ-क़े छ्यिम्बुज्यी तेन्दी सुङ नाङसीन, “सुती नाम्ज्यो येहबा, खोगी ङ्यिहन्ज्यु।”
सेन ताप्क्यो पेगी तेहन्दा
(मत्ती १३:१०-२३; मर्क ४:१०-२०)
9ओहले येशूगी स्याहप्च्यीया़गी, “दि पेगी तेहन्दा च्यि यिहम्बा ला़ह?” म़ेदी येशूला स्युहसीन। 10ओहले येशूगी खुङया़ला सुङ नाङसीन, “ख्याया़ला किन्ज्योगी क्याहल्सीगी तिहङ-रिहङबुगी केच्याया़ ह्अ कोह च्य़ूदी येह, यिहॱनाङ लेहमेन मिहया़ ङ्याम्बुदी ङाह पे ज़्या़दी ताम माएँ,
खुङया़गी ताज्येनी ताएँ यिहॱनाङ मेहथोङगे,
ङ्यिहन्ज्येनी ङ्यिहन्गे यिहॱनाङ ह्अ मेहकोएँ।” #यशै ६:९
11 “दि पेगी तेहन्दा दि ल़ेहमु यिहम्बा, ताप्क्योगी सेनदी किन्ज्योगी सुङदेन यिहम्बा। 12ओहले लाहमला लेप्क्योगी सेनगी तेहन्दादी च्यि यिहम्बा मासीमाना, लाहलागी किन्ज्योगी सुङदेन ङ्यिहन्ज्येनी ङ्यिहन्गे, यिहॱनाङ सुङदेन ङ्यिहन्दी यिह मा़हछ्य़ेज्यु ओहले माहथार्च्यु म़ेदी दियाबलसगी ओहङदी खुङगी यिहलेगी सुङ ख्येर्कें। 13ओहले तोहरो खाया़ला लेप्क्योगी सेनगी तेहन्दादी च्यि यिहम्बा मासीमाना, लाहलागी सुङदेन ङ्यिहन्दी क़ेहनाङ पेहती यिह छ्य़ेगे। यिहॱनाङ खुङ चार्ङ्यी म़ेहबागी तोहङबो ल़ेहमुराङ यिहम्बा, खुङगी ङ्यिहमा तोबा च्यी़राङ किन्ज्योला यिह-छ्य़े पेहकें, ओहले च्यि रोहवा का़हबु ओहङसीमाना किन्ज्योलेगी तेहपा लो़हएँ। 14ओहले छेर्मा तोहङबो नाहङला लेप्क्योगी सेनगी तेहन्दादी च्यि यिहम्बा मासीमाना, लाहलागी किन्ज्योगी सुङदेन ङ्यिहन्ज्येनी ङ्यिहन्गे, यिहॱनाङ जाम्बुलीङगी तुहङाल दाङ क्युह-नोहर ओहले ङ्याहम्साङ-खाम्साङगी पेहती यिह-छ्य़ेला छारॱराङ मी़हच्युएँ ओहले खुङ लाहमले च्यिॱआङ सेदो मे़हयाहगेन। 15ओहले या़हबु साला लेप्क्योगी सेनगी तेहन्दादी च्यि यिहम्बा मासीमाना, लाहलागी किन्ज्योगी सुङदेन ङ्यिहन्दी सेमला ज़्या़एँ, ओहले सुङदेनगी सुङग्यो ल़ेहमुराङ ल़ेहया़ पेहकें ओहले ती़हजी लेप्केमु माहङबु म़ेदी माहङबु सेदो या़हगे” म़ेदी येशूगी स्याहप्च्यीया़ला ह्अ कोह च्य़ू नाङसीन।
लोगी पे
(मर्क ४:२१-२५)
16 “सुज्यीगीॱआङ लो पार फान्ज्यो नाह डा़लोगी उप्ती ज़्या़एँ, नाह माहल्डी चो़ला पे़हदी ज़्या़एँ। लोॱनी खाङबाला ओहङगेन्गी मिहया़गी मी़ थोङज्यु म़ेदी ग्या़ थोम्बु ग्या़ला गा ज़्या़गे। #
मत्ती ५:१५; लूक ११:३३ 17ओ़हठीॱराङ पेहती पे़हदी ज़्या़क्योगी से़हया़, ओ़ह खा फ़ेज्ये येह ओहले ङोह स्य़ेज्येला का़हबु काहल्ग्योगी से़हया़, ओ़ह थाम्ज्यी छ्यिसाल-नाहङसाल थोङज्ये येह, ओहले थाम्ज्यीगी ङोह स्ये़ज्ये येह। #मत्ती १०:२६; लूक १२:२ 18ओ़ह सोङबे ख्या सेम माहयाहङबा पेहती ङ्यिहन्ग्योगी तामला या़हबु पेहती साम्लु ताङदोङ। च्यिबे मासीमाना सु ङ्याम्बु येहबा, ओ़हदीला माहङबुराङ तेर्च्ये येह, ओहले सु ङ्याम्बु म़ेहबा, खो ङ्याम्बु सिपाज्यी येहबा म़ेदी साम्लु ताङग्योदीॱआङ खोलेगी फ्रो़दी ख्येर्च्ये येह” म़ेदी येशूगी सुङ नाङसीन।#मत्ती २५:२९; लूक १९:२६
येशूगी आमा दाङ नो़हया़
(मत्ती १२:४६-५०; मर्क ३:३१-३५)
19ङ्यिहमा च्यी़ येशूगी आमा दाङ नो़हया़ येशूला थ़ू ओहङसीन। थु ओहङगेमु मिह मिह-माहङया़गी पेहती थु मा़हखु। 20ओहले मिह च्यी़गी येशूला स्युहसीन, “राहङगी आमा दाङ नो़हया़ राहङला थू़ज्ये म़ेदी फिला क़ूह तेहती येह!” 21ओहले येशूगी सुङ नाङसीन, “किन्ज्योगी सुङदेन ङ्यिहन्गे दाङ ची़नाङ डुप्केया़राङ ङाहगी आमा दाङ ङाहगी नो़हया़ यिहम्बा!”
येशूगी ल्हा़बा लुङजीला छ्येबे तेह म़ेदी का नाङग्यो
(मत्ती ८:२३-२७; मर्क ४:३५-४१)
22ङ्यिहमा च्यी़ येशूगी राहङगी स्याहप्च्यीया़ला, “ओहराङ छोगी फार्केन देपला डो” म़ेदी क़े क्याहप नाङसीन। ओहले खुङ फ़ेबेॱया टुह-छ्युङला स्य़ूहदी फेप नाङसीन। 23फेप-फेप्पा काहङला येशू नाल जेसीन। ओहले याहम्बीज्यीलाराङ ल्हा़बा लुङजी ओहङदी टुह-छ्युङ छ्युगी काहङज्ये पेहसीन ओ़ह सोङबे खुङया़ खेन्दा-का़हबुला छ्यिसीन। 24ओहले स्याहप्च्यीया़ येशू पोहला ओहङदी येशूला नाल साङ च्य़ूदी स्युहसीन, “ओ़ लोबेन ला़ह, ओ़ लोबेन ला़ह, ओहराङ थाम्ज्यीराङ नुप्च्येराङ पेहसीन!” ओहले येशू ज़्याङदी ल्हा़बा लुङजीला छ्येबे तेह म़ेदी काप्क्येन नाङसीन। ओहले काप्क्येन नाङ फान्ज्यो ल्हा़बा लुङजी छ्येप तेहती छ्युॱआङ ङ्योमे काहल्सीन। 25ओहले येशूगी स्याहप्च्यीया़ला “के, ख्यागी यिह-छ्य़े?” म़ेदी टी़ह नाङसीन। खुङया़ ज्यिबुराङ ज्यी़सीन ओहले ह्अ ल़ेहदी खुङ नाहङदुङ ताम मामा चासीन, “दि मिह सु यिहम्बानी? ल्हा़बा लुङजी दाङ छ्युगीॱआङ मिहरोगी सुङग्योगी स्याहल ङ्यिहन्गु दु!” म़ेदी मासीन।
ल्हेन्डी स्य़ूहक्यो मिह च्यी़ टा़हक्यो
(मत्ती ८:२८-३४; मर्क ५:१-२०)
26ओहले खुङ फ़ेबेॱया टुह-छ्युङला जा़दे गालील छोगी फार्केन देपकी गेरासेनी माएँ युहलला लेप नाङसीन। 27ओहले येशू टुह-छ्युङले फाप नाङगेमु ओ़ह क्याहसालेगी ल्हेन्डी स्य़ूहक्यो मिह च्यी़ थेन्दी ओहङसीन। ओ़ह मिहगी ङ्यिहमा माहङबुराङ यिहन्ज्यु काप्च्या माहकेहम्बा येहकें ओहले खो खाङबाला माहतेहपा पेहती तुहर्सागी फुक्पाया़ला तेहको येहकें। 28ओहले खोगी येशूला थोङ-लुहङ मे़हबाराङ क़े छ्यिम्बुच्यी तेन्दी येशूगी कुम्देनला खेप्चु क्याहप्ती “ओ़ चा़ छ्यिम्बु जेते ज़्य़ू नाङगेन्गी किन्ज्योगी स़ेबु येशू, राहङगी ङाहला च्यि जेच्ये छोल नाङग्यो? ङाहला तुहक्पु माहनाङ ला़ह ओहर-छ्य़े!” म़ेदी स्युहसीन। 29येशूगी मेहचाङा नाम्स्यीला, “दि मिहलेगी थेन्दी सोङ” म़ेदी का नाङग्यो सोङगोराङ खोगी ओ़ह रोहवा म़ेदी क़े तेन्ग्यो येहकें। ओ़ह मिहला मेहचाङा नाम्स्यी स्य़ूहदी ङ्यिहमा माहङबुराङ काहल्दी येहकें, लेहमा माहङबुराङ ओ़ह ल्हेन्डीगी खोला ज़ुङदी तुहक्पु तेर्को येहकें। मिहया़गी खोगी काङबा लाहक्पाला च्याल्दागी ताहम्दी ता़ ज़्या़ॱनाङ खोगी च्याल्दाया़ च्येती, ओ़ह ल्हेन्डीगी खोला रिह काम्बु ग्या़या़ला ख्येर्को येहकें।
30ओहले येशूगी खोला, “ख्येगी मिहन च्यि यिहम्बा?” म़ेदी टी़ह नाङसीन। “ङाहगी मिहन बुङजी यिहम्बा” म़ेदी खोगी स्युहसीन। च्यिबेमाना, खोला ल्हेन्डी माहङबुराङ स्य़ूहदी येहकें। 31ओहले ओ़ह ल्हेन्डीया़गी येशूला, “ङ्यिहला साप्स्यी तिहङला#८:३१ साप्स्यी तिहङ : साप्स्यी तिहङलाती ल्हान्डा ल्हेन्डीया़ला तिङमा ङ्यिहमाला ङ्य़ेहबा तेर्केन्गी क्याह यिहम्बा। रोम १०:७; ज्याल ९:१,२,११; ११:७; १७:८; २०:१,३ ताङ माहनाङ” ओहर-छ्य़े! म़ेदी स्युहसीन। 32ओ़ह काहङदोगी फाच्चीला फा़ बा़ल छ़े तेहती येहकें। ओहले ल्हेन्डीया़गी येशूला, “ङ्यिहया़ला ओ़ह फा़ बा़ल नाहङला स्य़ूह च्य़ू नाङदोङ” म़ेदी स्युहसीन। ओहले येशूगी सुङ नाङसीन “सोङ!” 33ल्हेन्डीया़ ओ़ह मिहलेगी थेन्दी फा़ नाहङला स्य़ूहसीन, ओहले ओ़ह फा़ बा़ल प्रा़हले माहर छ्योङदी छोला नुप्ती स्यिसीन।
34दि थोङदी फा़ कोहरोवाया़ छ्योङदी क्याहसा दाङ युहलया़ला काहल्दी ताम थाम्ज्यीराङ स्येसीन। 35ओहले युहल्बाराङ लाहङदी ता ओहङसीन। ओहले येशू येहकेन्गी ग्या़ला लेप्केमु खुङगी ओ़ह ल्हेन्डी स्य़ूहक्योगी मिह टा़हदी काप्च्या केहन्दी येशूगी स्याहप पोहला तेहक्यो थोङसीन। दि थोङदी मिह थाम्ज्यीराङ ज्यी़सीन। 36ओहले ओ़ह ल्हेन्डी स्य़ूहक्यो मिह टा़हक्यो थोङगेनया़गी खो काहन्डुमु पेहती टा़हबा माएँ ताम मिहया़ला स्येसीन। 37ओहले गेरासेनी लुहङबागी थाम्ज्यीराङ मिहया़गी, “दि ग्या़ले फेप्तोङ लाह, ओहर-छ्य़े!” म़ेदी स्युहसीन च्यिबेमाना खुङया़ ज्यिबुराङ ज्यी़क्यो येहकें। ओ़ह सोङबे येशू टुह-छ्युङला जा़दे लो़ह फेप नाङसीन। 38ओहजे ती़हजीला ओ़ह ल्हेन्डी स्य़ूहदी टा़हक्यो मिहगी येशूला, “ङाहॱलाङ राहङ ङ्याम्बुराङ नोम फेप नाङदोङ ला़ह” म़ेदी स्युहसीन। 39ओहले येशूगी खोला, “ख्ये राहङ खाङबाला सोङ ओहले किन्ज्योगी ख्येगी तेहन्दाला च्यि जे नाङबा, ओ़ह ताम लेहमेनया़ला स्ये तेर” म़ेदी सुङ नाङसीन। येशूगी राहङगी तेहन्दाला जे नाङग्योगी जेबापया़ ओ़ह मिहगी क्याहसा काहङ्येॱराङ स्येती काहल्सीन।
नेहपा पी़हमी-पेहजा दाङ याइरसगी पोहमो
(मत्ती ९:१८-२६; मर्क ५:२१-४३)
40ओहले येशू गालील छोगी छुर्केन सुहरला लो़ह फेप नाङगेमु मिह मिह-माहङ छ्यिम्बुज्यीगी येशूला कू़हदी तेहक्यो येहकें। खुङया़गी येशूला फेप स्युहसीन। 41ओहले याइरस माएँ मिह च्यी़ येशूला थ़ू ओहङसीन। खो ओ़ह क्याहसाकी छो़खाङगी पोम्बो यिहन्गे। ओहले खो येशूगी दिनला पी़मु च़ूदी, “ङाहगी खाङबाला फेप नाङदोङ लाह” म़ेदी येशूला स्युहसीन। 42च्यिबेमाना लोह च्यिङ्यी़ काहल्ग्यो खोगी च्यिमे च्यी़ पोहमोॱआङ स्यिज्ये पेहक्यो येहकें। ओहले येशू खोगी खाङबाला फेप्नाङगेमु मिहया़ छ्यो़ ज़्यिलेराङ च्येप्ती-च्येप्ती ओहङसीन।
43ओ़ह मिह मिह-माहङ नाहङला पी़हमी-पेहजा च्यी़ ज़ुबु ली़ह माहङबु ओहङगेन्गी नाहजा क्याहप्ती लोह च्यिङ्यी़ काहल्ग्यो येहकें। ओहले च्यि मेन पेहतीॱआङ सुगीॱआङ मोहला टा़ह च्य़ू मा़हखुबा येहकें। 44ओहले मोह, मिह मिह-माहङ नाहङला येशूगी क्याहप ङो़ले ओहङदी येशूगी नाहम्सागी सुहर च्यी़ला दे़सीन। दे़-लुहङ मे़हबाराङ मोहगी ज़ुबु ली़ह माहङबु ओहङगेन्गी नाहजा टा़हसीन। 45ओहजेला येशूगी, “ङाहला सुगी दे़बा?” म़ेदी टी़ह नाङसीन। सुगीॱआङ, “ङाहगी दे़क्यो” म़ेदी मा़हमे। ओहले पत्रुसगी, “लोबेन ला़ह, मिह मिह-माहङया़गीनी राहङला च्येप्ती-च्येप्ती ओहङ दु!” म़ेदी स्युहसीन। 46ओहले येशूगी, “मिहम्बा, सुज्यीगी ङाहला दे़क्योॱराङ यिहम्बा च्यिबेमाना ङाहलेगी ओङ थेन्दी काहल्ग्योदी ङाहगी छोर्सीन!” म़ेदी सुङ नाङसीन। 47ओहले दि केच्या पे़ह ज़्या़ ख़ूज्ये मिहन्दु म़ेदी ह्अ केह फान्ज्यो ओ़ह पी़हमी ज्यी़सुगी दार्ते ओहङदी येशूगी स्याहपला खेप्चु क्याहप्सीन। ओहले मोहगी येशूला दे़क्यो दाङ दे़-लुहङ मे़हबाराङ टा़हक्योगी केच्या मी़ह थाम्ज्यीगी दिनला स्येसीन। 48ओहले येशूगी, “पोहमो, ख्येगी तेहपा पेहक्यो सोङगोराङ ख्ये टा़हक्यो यिहम्बा। ता़हनी ख्ये सेम लो तेहमु पेहती सोङ!” म़ेदी सुङ नाङसीन।
49येशूगी स्याहल सुङगे सुङगेमुराङ छो़खाङगी पोम्बो याइरसगी खाङबाले मिह च्यी़ ओहङदी याइरसला, “राहङगी पोहमो स्योर्सीन, ता़हनी लोबेनला ओहप्क्याल फुल मेहकोहएँ” म़ेदी मासीन। 50येशूगी दि ताम सेन्दी याइरसला, “का माहक्याहल, यिह-छ्य़े च्यी़राङ पेहतोङ, ओहले ख्येगी पोहमो थार्च्ये येह!” म़ेदी सुङ नाङसीन। 51याइरसगी खाङबाला लेप्ते येशूगी पत्रुस, यूहन्ना, याकूब दाङ पोहमोगी आबा आमाज्यीला मिहम्बा लेहमेन सुॱलाङ नाहङला स्य़ूह च्य़ू-माहनाङ। 52ओहले नाहङला येहकेन्गी मिहया़ ङी़हदी ङुहप्रा तिहङरा पेहती तेहक्यो येहकें। ओहले येशूगी खुङया़ला “ख्या माहङुह, दि पोहमो मा़हस्यी येह, ङ्यिज्यीराङ लो़हक्यो यिहम्बा” म़ेदी सुङ नाङसीन। 53येशूगी स्याहल थे़दे मिहया़गी स्ये़हन्डील पेहती क़ेहमु क्याहप्सीन च्यिबे माना ओ़ह पोहमो स्यि सिहन्ग्यो येहकें। 54यिहॱनाङ येशूगी ओ़ह पोहमोगी लाहक्पाला ज़ुङ नाङदी, “ए पोहमो, ख्ये लाहङदोङ!” म़ेदी सुङ नाङसीन। 55ओ़हजेलाराङ ओ़ह पोहमोगी यिह लो़ह ओहङसीन, ओहले लाहम्साङराङ लाहङसीन। ओहले येशूगी, “दि पोहमोला च्यिरा साहज्ये स़ेह तेर्तोङ” म़ेदी सुङ नाङसीन। 56पोहमोगी आबा-आमाला याहम्जेनज्यी ऩेसीन। ओहले येशूगी खुङला, “दि केच्या सुॱलाङ माहस्ये” म़ेदी सुङ नाङसीन।
Currently Selected:
लूका 8: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
