Matiu 6

Iesua mupelototo no anu vote'i so tasu'uline'i tamenexinge

1Ioxe, Iesua muvikala aloxo 'ola, “Ngalaxa'i laixe so loxo nga'oxonu ilixo ane ulalapusi la no ie'i tamitema so isaxisingexu uasi. Xo loxo nga'oxo axone la ngano'u lapesou noxou Maminge uxolu no tualasou lailaixe uasi. 2Laso loxo ngingi a so ngapilixinu mi so su'uli noxi'a tamitema ta'oloxola la mamu so ngapalusi'a se'i i'uli laxungengi so itausou piuka. Xo se'i i'oxo axone no anu tatasou lavuloto xe no votevote'i. Ia ane'i ikalavoisi, i'oxonu so tamitema imaisi'a mo i'itine'i no anu. La avikalangengi manina lexe tamitema ane xo ne mino'u lapei'a se anesi, ixalisou mi vilela uasi. 3Ioxe, loxo ngapilixinu su'ulisi'a ta'oloxola la mamu so avonge kaisi ulavusou mi ane avonge tema u'oxonu uasi. 4Ngatalumeu su'uli no anu alauna axone xo Maminge ulavusou mi ane mutalume laso anu molu ukolinu lapesou noxinge ane.

Vote'i so tavikala noxou Mosinge

5La Iesua musolonu lexe, “Loxo ngavikala noxou Mosinge la nga'oxo loxo tamitema so kalavoi i'oxonu to uasi. Xo ane'i i'osa so itulu ivikala noxou Mosinge no tatasou lavuloto xe no anu kona so votevote'i no taoni. I'oxo axone so tamitema latala ipitanu ie'ii'a. La avikalangengi manina lexe tamitema ane xo ne mino'u lapei'a se anesi, ixalisou mi vilela uasi. 6Ia loxo ngamasaxa ngavikala noxou Mosinge la nga'unalai no ngiou nonano no tasinge ka ngatatu. Mukalu la ngavikala noxou Maminge e tasaxisou uasi. Xo Maminge ne anu usaxisou mimi ane utatalume mukalusi la anu molu ukolineni.

7Xe loxo ngavikala noxou la mamu so ngalemolu vaikala tavu'alo vuluvulusi a loxo tamitema so isivoxo i'oxonu. Xo ane'i ikalavoi lexe ulomuxa'a xo no anu vaikalai'a vu'alo axone. 8Nga'oxo aloxo ane'i uasi xo loxo ngalinga uao la Maminge ulavusou mi ma'ia laixe so xoluxolungenge lumamo.

9Loxo ngingi ngavikala noxou Mosinge la no anu vote'i aloxo 'o. 'Mamixe, nini so tualasine lailaixe, ualasine ukalipala uxolu malemalengasi. 10Mo voxo so nini mene na'uli laxune'i tamitemameni la laixe so une'e 'osi. Xe naxalixu nene'axu masaxa noxine no lialia 'o a loxo nalavusou naxalixu no tualasine lailaixe ne. 11Voxovoxo utotomu na'itinexe la'ilali umomomo no anu voxo anene. 12Mo oponeni ulu'e so susu noxixe a loxo nexi ta'oxo noxi'a tamenexixe 'o. 13Mo na'oxonu latolosixe mo so tovotovo ukasixe uasi. Na'umenexi no anu susu. Xo nini naxolu na'uli laxunu mimi mukalusi xe xavineni misevile xe ualasine utiatila avile ulai ulai xo mo kaluxu uasisi. Vaikala ano'o manina.#6.13 Tamitema so lavulavu se'i ixavutala lexe Matiu molu ukaukavunu vaikala pa'usou se no telexu 6:13 uasi, itema vilemo masi mukaukavunu.

14Ngalomu, loxo opongengi ulu'e so susu noxi'a tamenexinge la Maminge ane uxolu no tualasou lailaixe la oponu ulu'e so susu noxinge axone kalumo. 15Ia loxo opongengi ulu'e so susu noxi'a tamenexinge uasi la Maminge oponu ulu'e so susu noxinge uasi kalumo.

Iesua muvikalasou ilixo so i'apixa'a no anu la'ilali

16Xe muvikalala lexe, “Loxo voxo mose'i nga'oxonu ilixo so nga'apingengi no anu la'ilali avile la mamu so nga'oxonu iengi masua aloxo tamitema so kalavoi ilavusou i'oxonu. Xo ane'i ilavusou i'oxo ie'i masua toxonesi mo so tamitema ilavu lexe ane'i a i'apixa'a no anu la'ilali ne. La avikalangengi manina lexe tamitema ane xo ne mino'u lapei'a se anesi, ixalisou mi vilela uasi. 17Ia loxo ngingi nga'oxonu ilixo so nga'apingenge no anu la'ilali la nga'oxo loxo nga'oxonu voxovoxo utotomu. E loxo ngalutunu ueli no kisinge mo nga'uinu iengi. 18Mo so axone la tamitema ilavusingexu uasi, nga'apingengi no anu la'ilali ia utalumesi. Utalume noxi'a tamitema ia Maminge ane tasaxisou uasi anu usaxisou mimi e utalume mukalusi, laso anu molu ulosinge lapesou.

Tamolo tanengeou mimi ane laixesi

19Mo musolonula lexe, “Ngingi ngasu'anu la'oluxu mimi lailaixe so lialia 'o uasi. Xo lai 'o loxo lavuluti la tasaisave ixotosou xe mi loxo tamitema i'oxonu no anu aini la losu uvila'isou. Xe tamitema talasikeli imamulonu tani ka ipakalinu mi ma'ia laixe ngemulaxu ne. 20Ia ngasu'anu la'oluxu mimimengi lailaixe no tualasou Mosingesi. Xo lai ne tasaisave ixotosou o losi uvila'isou o talasikeli imamulonu tani so ipakalinu uasisi. 21Xo tanixu mimi lailaixe noxinge uai no anu ne'ei ne, la anene tanixu so opongengi ututuluousi.

Latilovo so lalamo uka

22Xe muvikalala lexe, “Iengi ne anu loxo lalamo so vasimenge. Xo loxo iengi laixe la lamana u'una no anu vasimenge mukalusi. 23Ia loxo iengi masua la vasimenge ne isivoxosi. Laso loxo lalamo e uxolu nonano noxinge isivoxosi la isivoxo ne ukasinge avile.

Itema umomomo so uxolu no laxa'a tatiatilasou tamei uasi

24Xe musolonula lexe, “Itema umomomo so uxaxai noxi'a tatilasou tamei uasisi. Xo anu oponu masi tu'umaxuou vile mo ulomuanu xe u'osasou vile la ulomuxu. Anu umomomo so opongengi ututuluou mi tamei ukei loxo xaixai noxou Mosinge xe masaxa so lamoli uasi.”

Oponenge uauavutiou xoluxolu so vasimenge uasi

25Ioxe, Iesua muvikala aloxo 'ola, “Laso eni avikalangengi lexe mamu so opongengi uauavutiou xoluxolungenge so lexe nga'ou ma'ia o ngaie ne'ei o ngasakinu ma'ia. Xo axova, temanu mauli so vasimenge uxolu no anu la'ilali xe lavulutisi? E uasi. 26Ningi ngasaxisi'a tangiala. Ane'i ilavusou itou la'ilali o imolo? Xe ane'i isu'a la'oluxu mixamixa'a no tasou iauvaxe? Uasi, xo Maminge uxolu no tualasou lailaixe molu ua'a'ane'i. Ia ngingi to ne anu tanungenge muua'ulixa'a tangiala avile ane.

27Loxo ngingi vile oponeni uauavuti so naxavutala piena no anu xoluxoluxene, la xavutalameni usolonu lamakisou mauli noxine usuku aso iou vilela? Uasi to! 28Mo axova so opongengi uauavutiou lavuluti so ngasakinu? Xo ngasaxisou xixi sesenu no pa'upa'umenge lexe uleme axova. Ane'i sasaie'i so isimenu i'a lavalava uasi. 29Ia avikalangengi lexe tatei kingi Solomoni mutokolomonu no anu lavulutiou lailaixe umomomo no anu tokolomosou xixi sesenu 'o uasi. 30Ia xixi sesenu e uleme vaimomo 'o ne, masi ne'iela la tamitema ine'e isilanu mo isexeteluxusi. Laso loxo Mosinge utokolomonu mi vitanisi axone la axova noxinge ane mi mutiatila no anu xavutalaou? Ai, ngingi tamitema so lopala uasisi, anu ulosinge lavuluti ane. 31Mamu so opongengi uauavuti mo nga'oxo lexe, 'Iu, masi ta'ou mi ma'iae?' o 'Iu, masi taie avae?' o 'Iu, taxalisou lavuluti so tasakinu a ne'eio?' 32Xo tamitema so isivoxo opone'i uuali misevile no anu mimi axone so ixalisou. Ia ngingi Maminge mulavusou mimi mukalusi ane laixe so xoluxolu noxinge ne. 33Laso laixe so ngingi opongengi u'oxoxu voxo ane Mosinge molu u'uli laxune'i tamitemaou xe ilixo malemalenga noxou. Xo loxo mimi so xoluxolungenge 'o ne anu a upipilixinu noxinge 'oe. 34Ioxe, opongengi uauavuti so mi ma'ia loxo uxali ne'iela uasi. Xo voxo ne'iela ne anu so ne'ielamo. Voxo vaimomo 'o tu'umaxusou u'isalili, la anu axone ne'iela mo voxovoxo mukalusi.

Currently Selected:

Matiu 6: ATA

Highlight

Copy