प्रतिनिधि 3

टूंटा भिकारी ठीक करण

1यक रोज पतरस त यूहन्ना देहेर जे घेण लगो थिए। तपल ब्यादली टाई बजो थिए, जे कि मेह्‍णु के प्रार्थना दुआ करणे टेम थिआ। 2रोज के ईं, मेह्‍णु यक जमोरा टूंटा अण्ह कइ देहरे तेस बोडे दुआर पुठ बिशाणा जेस जे “अब्बल” बोतेथ, ताकि से देहेर जे एणे घेणे बाड़ी केआं भीक मग सकियेल। 3त जपल तेन पतरस त यूहन्ना देहेर जे घेन्ते काए, त तेन्हि केआं भीक मगी। 4पतरसे त यूहन्ने साते तसे धे ध्यान जोई हेरु त बोलु, “हें कना जे हेर!” 5त से तेन्हि केआं कुछ मेएणे उम्मीद अन्तर खुश भोई कइ तेन्के धे हेरण लगा। 6पर पतरसे बोलु, “मोउं केईं ना सुन्ना असा, होर ना चन्नी। पर जे मोउं केईं असु तेस तेन्धे देन्ता; नासरत ग्रांए यीशु मसीहे नओएं बेलि खड़ भो त हंटिण दे।” 7होर तेन तसे देहणा हथ टाता त खड़ किआ; त झठ तसे खुरी त डिएलु अन्तर जान एई गई। 8त से झठ खड़ भोई गा त हंटण-फिरण लगा। तोउं से हंटता, टाउ देन्ता, परमेश्वरे गुणगान कते-कुते तेन्हि जोई देहेर अन्तर गा। 9सोबी मेह्‍णु से हंटता-फिरता, परमेश्वरे गुणगान कता, काई छा। 10तेन्हि से पिछाण छड़ा कि ए सेईंए भो जे देहरे “अब्बल” नओएं बोडे दुआर पुठ बिश कइ भीक मगताथ। त तेस जुए भुओ घटनाई बेलि से हैरान त परेशान भोई गे।

देहेर अन्तर पतरसे प्रचार

11से टूंटा पतरस त यूहन्ना जुओई साते “सुलैमाने मण्डप” नओएं यक जगाई थिआ कि सोब मेह्‍णु हैरान भोई कइ तेन्के भेएड़ जे दौड़े। 12ई हेर कइ पतरसे तेन्हि मेह्‍णु जे बोलु, “ए इस्राएली मेह्‍णुओ! तुस इस मेह्‍णु हेर कइ हैरान किस असे? होर हेन्धे ईं किस हेरण लगो असे कि जीं असी ए मेह्‍णु अपु ताकते या भक्ति बेलि हंटणे-फिरणे लेएक किआ? 13अब्राहमे, इसहाके त याकूबे परमेश्वरे, होर हें पुरखी के परमेश्वरे अपु सेवक यीशु मसीह सुआ इज्जत दुतो असी, जे तुसी दुश्माणी के हातेउ टोवाई छो थिआ। होर जपल राज्यपाल पिलातुसे यीशु छड़ देणे ठीक किओ थिउ, त तपल तुसी तसे समाणि नाह कइ छड़ा। 14तुसी तेस शुचे त धर्मी मेह्‍णु नाह किआ, त छने किउ कि तुं लिए यक मेह्‍णुमार छड़ दिए। 15होर तुसी जीवन देणे बाड़ा मरवाई छड़ा, जे परमेश्वरे मरो तेन्हि अन्तरा दुबारी जीन्ता कइ छो असा। एस बोकी अस उगाह असे। 16त इस मेह्‍णु, जेस तुस हेरण लगो असे त जाणते बि, तस यीशु मसीहे नओएं, त तेस नओं पुठ विश्वासे बेलि ईं ताकत मेई। तेस यीशु पुठ विश्वासे ईं ए खरा तकड़ेरी छो असा, जे अभेईं तुं समाणि असा।”

17“अब ए भाईओ! अउं जाणता कि ए कम तुसी ना समझी कइ किउ, होर तिहांणि तुं मुखिये बि किउ। 18पर जे बोके परमेश्वरे सोबी भविष्य वक्ती के बेलि पेहलाई बोल छओ थी कि तसे मसीह दुख सेहन्ता, से ईं कर कइ पूरी भुई। 19तोउं त, अपु अपु मन बदल कइ परमेश्वर केईं वापस एईए, ताकि तुं पाप माफ भोई घियेल। 20त प्रभु केआं सुख शान्ति दन एईयेल। होर से यीशु लंघाल, जे तुसी जे पेहलाई मसीह नियुक्त किओ असा। 21पेहलकण जमाने केआं परमेश्वरे अपु शुचे भविष्य वक्ती के बेलि मसीह बारे अन्हि सोबी बोकी के चर्चा किओ थी। त ए जरूरी असु कि मसीह तोउं तकर स्वर्ग अन्तर रिहे, जपल तकर कि से सोब पूरी ना भोल। 22जीं मूसे बोलो असु: ‘प्रभु परमेश्वर तुं भाई बुचा ईं तुं लिए में ईं यक भविष्य वक्ता बणान्ता। होर जे कुछ से तुसी जे बोता, तस माने।#विधि 18:15-16 23होर जे कोई मेह्‍णु तेस भविष्य वक्ते ना शुणियाल, से परमेश्वरे प्रजाई केआं बखरा करी घेन्ता त से पूरा खतम भोई घेन्ता।’#विधि 18:19; पुजारोठि 23:29 24शामुयेल भविष्य वक्ते केआं खड़ तसे पता जतर बि भविष्य वक्ती भविष्य वाणि किओ असी, तेन्हि सोबी इन्हि रोजी के बारे बोलो असु। 25तुस भविष्य वक्ती के त परमेश्वरे तेस जुबाने गभुर भो, जे तेन तुं पुरखा अब्राहमे धे ईं बोल कइ दुतो थी कि ‘तें वंशे बेलि धरती सोबी जाति अशुश मेती।’#शुरुवात 22:18 26परमेश्वरे अपु सेवक यीशु मसीह मरो तेन्हि अन्तरा दुबारी जीआई कइ पेहले तुसी केईं लंघा, कि तुसी अन्तरा हर यक जेईं बुराई केआं मन बदलाल, होर तुसी अशुश मेईंयेल।”

Currently Selected:

प्रतिनिधि 3: pgg

Highlight

Copy