यूहन्ना 14

यीशु, परमेश्वर केईं घेणे बथ

1तोउं यीशु अपु चेली जे बोलु, “तुस दुखी ना भो! तुस परमेश्वर पुठ त विश्वास कते, मोउं पुठ बि विश्वास कते रिहे। 2में बोउए गी बिशण जे सुआ जगाह असी। त अउं तस तेयार करण जे घेण लगो असा। अगर ना भुन्तीथ त अउं तुसी जे बोल छताथ। 3अगर अउं घेई कइ तुसी जे जगाह तेयार करुं त दुबारी एई कइ तुसी साते घिन घेन्ता, ताकि जेठि अउं बिश्ता, तठि तुस बि बिशियेल। 4अउं को जे घेण लगो असा, तस बती तुसी पता असा।”

5थोमा नओएं चेले तस जे बोलु, “ए प्रभु, असी त पता नेईं कि तुस को जे घेण लगो असे, त बती बारे कीं पता लगाल?” 6यीशु तस जे बोलु, “बथ, सच्चाई#यूहन्ना 8:31-47 त जीवन#यूहन्ना 11:25 अउंए भो; मोउं बजन कोई बि बोउ केईं पूज ना सकता। 7त अगर तुस मोउं सुसुर जाणते त में बोउ बि जाणते। त अभेईं तुस तस जाणते त काओ बि असा।”

8फिलिप्पुसे तस जे बोलु, “प्रभु! असी बस बोउ हरालिण दिए, सेईंए रज्जि असु।” 9यीशु तस जे बोलु, “ए फिलिप्पुसा! अउं एत रोज तुसी जुए बिशा, तोउं बि तोउ पता ना लगा ना कि अउं कोउं भो? जेन अउं काओ असा, तेन बोउ बि काओ असा। त तु कीं बोता कि बोउ असी हराल? 10तु कि विश्वास ना कता ना कि बोउ मोउं जुए त अउं बोउ जुए यक सात असा? ए जे बोक अउं तुसी जे बोता, अउं अपफ नेईं बोलुण लगो, पर बोउ में अन्तर बिश कइ अपु कम करण लगो असा। 11बस अउं जे बोता कि अउं बोउ जुए त बोउ मोउं जुए असा, तेस पुठ विश्वास करे, ना त जे कम मेईं किओ असे, तस बझई जुए मोउं पुठ विश्वास करे। 12अउं तुसी जे बोता कि जे मोउं पुठ विश्वास कता, से जे चमत्कारे कम मेईं किए तस कता, त तस केआं बि बोडे बोडे कम कता, किस कि अउं अपु बोउ केईं घेण लगो असा। 13त में नओं नी कइ तुस जे बि छनेअरे करियेल, अउं तस कता ताकि कोईये बेलि बोउए इज्जत भोल। 14अगर तुस में नओं नी कइ मोउं केईआं कुछ मगेल, त अउं तस पूरु कता।”

शुची आत्मा लंघाणे बारे यीशु जुबान

15यीशु हउ बि बोलु “अगर तुस मोउं जुए परेम कते त में निआंग मानते। 16त अउं बोउए छनेअरे कता, ताकि से यक मदत करणे बाड़ा#14:16 मतलब शुची आत्मा तुं धे दिआल, जे हमेशा तुसी जुए बिशियाल। 17से मदत करणे बाड़ा भो सच्ची परमेश्वरे आत्मा। इस धरती मेह्‍णु तस अपणाई ना सकते किस कि ना त तेन्हि से काओ असी, होर ना तस जाणते। पर तुस तस जाणते किस कि से तुसी जुए असा त भविष्य अन्तर बि रेहन्ता। 18अउं तुसी अनाथ ना छता। बल्कि अउं तुसी केईं एण लगो असा। 19बस, कुछ देर पता इस धरती मेह्‍णु अउं ना केता, पर तुस मोउं काई सकते। किस कि अउं जीन्ता असा, तुस बि जीन्ते रेहन्ते। 20तेस रोज तुसी पता लगाल कि परमपिता परमेश्वर अन्तर अउं असा त तुस में अन्तर असे; होर अउं तुसी अन्तर असा। 21जे में निआंग अपणाई कइ तस मानते, से मोउं जोई परेम कते। जे मोउं जोई परेम कते, तस जोई में बोउ परेम कता त अउं बि तस जोई परेम कता त अउं अपफ तसे अगर खड़ भुन्ता।”

22तोउं यहूदा, जे इस्कारियती नेओथ, तस जे बोलु, “ए प्रभु, तुस अपफ हें अगर किस खड़ भुण चहन्ते त धरती मेह्‍णु अगर किस ना?” 23यीशु तस जे बोलु, “अगर कोई मोउं जोई परेम कता, त से में निआंग मानता। त में बोउ तस जोई परेम कता त अस दुहिए तस केईं घेई कइ साते बिश्ते। 24जे मोउं जोई परेम ना कता, से में निआंग ना मानता। जे बोक तुस मोउं केआं शुणते, से में नेईं पर मोउं लंघाणे बाड़े बोउए भो। 25ए बोक मेईं तुसी जुए साते बिश कइ बोली। 26पर मदत करणे बाड़ा मतलब शुची आत्मा जेस बोउ में नओं पुठ लंघान्ता, एई कइ तुसी सम्हाई बोक शिचालती त जे जे बि बोक मेईं तुसी जे बोलो असी, से सम्हाई तुसी याद दिआन्ती। 27अउं तुं धे शान्ति दी कइ घेण लगो असा। अउं तुं धे अपु शान्ति देण लगो असा। पर तीं देण नेईं लगो, जीं इस मतोके मेह्‍णु देन्ते। त तुस दुखी ना भुओ, होर ना डरे। 28तुसी शुणो असु कि तुसी जे मेईं बोलु, ‘अउं घेन्ता त तुं लिए दुबारी एन्ता।’ अगर तुस मोउं जे परेम कतेथ त इस बझई जुए खुश भोई घेन्तेथ, किस कि अउं बोउ केईं घेण लगो असा त से मोउं केआं बोडा असा। 29ई सोब भुणे पेहले ईं मेईं तुसी जे बोलो असु, ताकि जपल ए भोई घेन्तु त तुस विश्वास करे। 30अउं तुसी जुए अभेईं सुआ बोक कइ ना सकता, किस कि इस धरती पुठ राज करणे बाड़ा शैतान एण लगो असा। मोउं पुठ तसे कोई हक नेईं। 31पर ए सोब तोउं भुण लगो असु कि इस मतोके मेह्‍णु ई पता लगाल कि अउं बोउ जोई परेम कता त जे जे निआंग बोउए मेन्धे दुतो असी, तीं तीं अउं कता। खड़ भुए त चले! इठिआ नश घेन्ते।”

Currently Selected:

यूहन्ना 14: pgg

Highlight

Copy