मत्ती 21

यीशु मसीहे मरुण त दुबारी जीन्ता भुण

(मत्ती 21:1—28:20)

खरी इज्जत जुए यीशु यरुशलेम शेहर अन्तर घेण

मरकुस 11:1-11; लूका 19:28-38; यूहन्ना 12:12-19

1जपल यीशु त तसे चेले यरुशलेम शेहरे नीड़े एई गे त “जैतुन” नओएं फाट#21:1 एस फाट पुठ सुआ जैतुन फले बुटे थिए। तोउं एस नउ “जैतुने फाट” बोतेथ। पुठ बैतफगे ग्रां भेएड़ पुजे, त यीशु अपु दुई चेले ईं बोल कइ लंघाए, 2“तुस सामणि ग्रां घिए। तठि पूज कइ यक खोतुड़ बन्हो, त तेस जोई यक बच्चा बि तुसी मेता। तेन्हि खोल कइ मोउं केईं घिन एईए। 3अगर तुसी जे कोउं कुछ बोलियाल, त बोलुण, ‘प्रभु असे जरूरत असी’। तोउं से झठ लंघाई छता।” 4ए तोउं भु कि भविष्य वक्ते बोलो ई बोक पूरी भोल कि 5“यरुशलेम शेहरे बाड़ी जे बोले,

‘हेरे, तें राजा तोउ केईं जे अओ असा;

से शान्त असा, त खोतुड़ पुठ बिशो असा;

बल्कि खोतुड़ु बच्चे पुठ सवार असा।’”#यशायाह 62:11; जकर्याह 9:9

6चेली घेई कइ जिहांणि यीशु बोलो थिउ, तिहांणि किउ। 7चेले खोतुड़ त तसे बच्चा अण्ह कइ, तसे पुठे अपु झिणे छड़े, तोउं यीशु तेस पुठ बिश गा। 8त मेह्‍णु के सुआ हुसुड़े तस इज्जत देण जे अपु अपु फुलो टलिड़ बथ टडे। होरे मेह्‍णु खजूरे डाई कट कट बथ टडी। 9जे हुसुड़ा तसे अगर त पतूं थिआ हुशेरि देण लगे,

“राजा दाऊदे कोईये, जइ हो! होशान्ना#21:9 इसे मतलब “परमेश्वरे महिमा भो” असु। !

जे प्रभु नओं जोई एन्ता, से धन्य असा।

अम्बर अन्तर बि होशान्ना।”#छुआंरी 118:26

10जपल यीशु यरुशलेम शेहर अन्तर पुजा, त पूरे शेहर अन्तर हल्ला भोई गा, त मेह्‍णु बोलुण लगे, “ए कोउं भो?” 11हुसुड़े बोलु, “ए गलील राज्ये, नासरत ग्रांए भविष्य वक्ता ‘यीशु’ भो।”

यीशु यरुशलेमे देहेर अन्तरा व्यापारी बाहर किढ़ण

मरकुस 11:15-19; लूका 19:45-48; यूहन्ना 2:13-22

12तोउं यीशु परमेश्वरे देहेर अन्तर घेई कइ से सोब बाहर किढ़े जे तठि लेण देण करण लगो थिए। होर रुपेई अटा-बाटा करणे बाड़ी के मेज त अलिण बेचणे बाड़ी के कुण्सी उटेऊ फटाई छइ। 13तोउं तेन्हि जे बोलु, “धरमे कताब अन्तर लिखो असु,

‘में गी प्रार्थना करणे गी बोलिन्तु;#यशायाह 56:7

पर तुसी ए डाकु के कुड बणाई छओ असी।’”#यिर्मयाह 7:11

14तोउं देहेर अन्तर अन्हे त टूंटे यीशु भेएड़ आए, त तेन से सुसुरेरि छड़े। 15पर जपल मुख्य पुजारी त धर्मशास्त्री ई चमत्कार हेरे, होर हुसुड़े ई बोलुणे हुशेरि शुणी कि

“राजा दाऊदे कोईये, जइ हो! होशान्ना!”

त से लेहरी गे। 16त से यीशु जे बोलुण लगे, “तोउ शुणतु ना, ए की बोलुण लगो असे?” यीशु तेन्हि जे बोलु, “आं! मोउं शुणतु। पर तुसी कि धरमे कताब अन्तर ई नेईं ना पढ़ो:

‘ए परमेश्वरा! तुसी दुध पीन्ते गभुर त होरे गभुर केआं

अपु गुणगान करवाण ठीक किओ असु’”?#छुआंरी 8:2

17तोउं यीशु तेन्हि छड़ दी कइ शेहर केआं बाहर बैतनिया ग्रां घेई गा त तठि रात कटी।

बजन फले अंजीरे बुटा

मरकुस 11:12-14; 11:20-24

18भ्यागे जपल यीशु त तसे चेले यरुशलेम शेहर जे अओ थिए त तेस ढुक लगी। 19बते औत यक अंजीरे बुटा काई कइ से तसे भेएड़ गा। तेस बुटे पुठ पन्नी के अलावा होर कुछ न मेउ त तेन तेस जे बोलु, “इढ़िया पता तोउ पुठ कदी फल न लौते लगो।” तोउं अंजीरे बुटा तिखेईंए शुख गा। 20ई हेर कइ चेले हैरान भोई गे त तेन्हि बोलु, “ई अंजीरे बुटा एतु झठ कीं शुख गा?” 21यीशु तेन्हि जे बोलु, “अउं तुसी जे बोता, अगर तुस विश्वास रखियेल, होर धिखुभई बि शक न करियेल त जीं मेईं इस अंजीरे बुटे जोई किउ, तीं तुस बि कइ सकते। पक्का विश्वास रख कइ अगर तुस इस फाट जे बि बोलियेल कि उखिड़ कइ समन्दर अन्तर गा, त तीं भोई घेन्तु।#मत्ती 17:20; 1 कुरिन्थ 13:2 22होर जे कुछ तुस प्रार्थना करण पेंत विश्वास जोई मगते से सोब मेई घेन्तु।”

यीशु हके बारे सवाल

मरकुस 11:27-33; लूका 20:1-8

23जपल यीशु देहेर अन्तर घेई कइ शिचालुण लगो थिआ, टजे स्याणे त मुख्य पुजारे तसे भेएड़ एई कइ पुछु, “तुस अन्हि कमी केस हक जोई कते? होर तुन्धे ए हक केन दुतो असा?” 24यीशु तेन्हि जे बोलु, “अउं बि तुसी केआं यक सवाल पुछता; अगर तुस मोउं बताल त अउं बि तुसी बतान्ता कि ए कम अउं केस हक जोई कता? 25यूहन्ने मेह्‍णु पुओणि अन्तर चुसुणे हक कोठिआ थिआ? स्वर्गे कनारा#21:25 इठि “स्वर्गे कनारा” मतलब “परमेश्वर दुतो थिआ” असु। थिआ या मेह्‍णु के कनारा थिआ?” त से अपफ बुच बेहसेईण लगे, “अगर अस बोलियेल ‘स्वर्गे कनारा’, त से असी जे बोता, ‘त फिर तुसी तेसे बोकी पुठ विश्वास किस ना किआ?’ 26होर अगर बोलियेल कि ‘मेह्‍णु के कनारा’, त हुसुड़े डर असा, किस कि ए सोब यूहन्ने भविष्य वक्ता समझते।” 27त तेन्हि यीशु जे जवाब दिता, “असी नेईं पता।” तेन बि तेन्हि जे बोलु, “त अउं बि तुसी जे न बतान्ता कि ए सोब कम अउं केस हक जोई कता।”

दुई कोयी के कथा

28यीशु बोलु, “इस कथा शुणे। तोउं बोले कि तुस की सोचते? केसे मेह्‍णु दुई कुआ थिए। से जेठा कुआ केईं गा त बोलु, ‘बे कोईया, आज दछि बग कम करण जे गा।’ 29तेन बोलु, ‘अउं न घेन्ता’, पर पता पछतेई कइ बग घेई गा। 30तोउं बोउए केंठे कुआ केईं घेई कइ तेस जे बि तिहांणि बोलु, त तेन जवाब दुतु, ‘जी! अउं घेन्ता’, पर ना गा। 31अन्हि दुहि अन्तरा केन जेईं बोउए इच्छा पूरी की?” तेन्हि बोलु, “जेठा तेन।” यीशु तेन्हि जे बोलु, “अउं तुसी जे बोता कि मामला नेणे बाड़े त वेश्या तुसी केआं पेहलाई परमेश्वरे राज्य अन्तर घेन्ते। 32किस कि चुसुणे बाड़ा यूहन्ना धरमे बथ हरालता तुसी केईं आ, पर तुसी तसे विश्वास न किआ। पर मामला नेणे बाड़ी त वेश्या तेस पुठ विश्वास किआ। पर तुसी ई हेर कइ बि पछतावा न भुआ, होर तुसी तेस पुठ विश्वास ना किआ।”#लूका 3:12; 7:29,30

दुष्ट आधिबाड़ी कथा

मरकुस 12:1-12; लूका 20:9-19

33तोउं यीशु बोलु, “यक होरी कथा बि शुणे: यक मालिक थिआ। तेन यक दछि बगिंचा ला, त तसे चोहरो कना घोड़ी के बाड़ि दी छइ। दछि रस किढ़ुण जे पलण अन्तर खोपर बणा, त पेहरा देण जे छपिर बड़ाई। तोउं तस मेह्‍णु कें धे आधी दी कइ परदेश जे घेई गा। 34जपल दछि उह्‍णणे टेम आ, त फल नेण जे तेन अपु नौखर आधिबाड़ी केईं लंघाए। 35पर आधिबाड़े तसे नौखर टाइ कइ यक मडा, कोउं घोड़िआ त कोउं मार छड़ा। 36तोउं तेन मालिके दुबारी होरे सुआ नौखर लंघाए, पर तेन्हि जोई बि तिहांणि किउ। 37अखिरकार, तेन ईं सोच कइ अपु कुआ तेन्हि केईं लंघा कि से तसे इज्जत करियेल। 38पर आधिबाड़े कुआ हेर कइ से अपफ बुच बोलुण लगे, ‘एईएं त हकदार भो; चले, अस एस मार छते त असे सोब धन दौलत नी छते।’ 39तोउं तेन्हि से टाता त दछि बगिंचे बाहर किढ़ कइ मार छड़ा। 40त अब जपल दछि बगे मालिक एईयाल त से तेन्हि आधिबाड़ी जोई की कता?” 41तेन्हि तेस जे बोलु, “से तेन्हि बुरे मेह्‍णु के खेया खाट कइ छता; त दछि बगिंचा तेन्हि आधिबाड़ी कें धे देन्ता, जे टेम टेम पुठ तसे धे फल देन्ते रेहेल।”

42यीशु तेन्हि जे बोलु, “तुसी कि कदी धरमे कताब अन्तर ईं नेईं न पढ़ो:

‘जे घोड़ मिस्त्री रेज समझ कइ फटओ थिआ,

सेईंए कुणे खास घोड़ बण गा#21:42 इठि यहूदी मेह्‍णु मिस्त्री असे त यीशु कुणे खास घोड़ भो।?’

‘ए प्रभु कनारा भुओ असु

त हें नजर अन्तर ए चमत्कारी कम भो!’#छुआंरी 118:22-23

43तोउं त अउं तुसी जे बोता कि परमेश्वरे राज्य अन्तर भुणे अशुश तुसी केआं नीइ घेन्ति, त ईं जाति धे दिईन्‍ती, जे तसे निआंग मान कइ सही फल देन्ता। 44जे इस घोड़ पुठ झड़ता, से चूर चूर भोई घेन्ता; होर जेस पुठ ए घोड़ झड़ता, से ढची घेन्ता।”

45जपल मुख्य पुजारे त फरीसी तसे कथा शुणी त बिझ गे कि से तेन्के बारे बोलुण लगो असा। 46तोउं त से यीशु टाण चहन्तेथ, पर मेह्‍णु हेर डर गे किस कि मेह्‍णु तेस भविष्य वक्ता मानतेथ।

Currently Selected:

मत्ती 21: pgg

Highlight

Copy