Luka 12

Verba dı-rüyını fınderê

1A sırı, tonê mılet ama cao kı İsa teyo. Uca hente sılxet bi kı waxt nêbo kı mılet jübini phan kero. İsay sıftı, telebanê xo rê nia vat: “Mirazê Ferisiyan ra, dı-rüyını ra xo peyser pêgerê. 2Çiyo kı munıtayiyo vecino wertı. Çiyo kı wedardayiyo êno zanıtenı. 3Çiyo kı sıma tari de vato, o pêro roştia tici de êno vatenı. Çiyo kı pê kêberanê cadayiyan de dıjdi amo qeşikerdenı, serê banan ra êno vatenı.”

4“Havalê mın, sıma rê nay vaceri: Mordeman ra metersê. İ şikinê canê sıma bigêrê, feqet ay ra daa zêdı nêşkinê thaba bıkerê. 5Sıma rê nay vaceri: Teyna Heqi ra bıtersê. Teyna o şikino canê sıma bigêro u sıma bırusno cenemı. Sıma rê vanan: Gereko owo kı sıma cı ra bıtersê, Heqo. 6Phanc milçıki bı dı qurusan'a nênê rotenı? Feqet Heq qe teka de inan xo vira nêkeno. 7Heq çend muyê porê sıma estê, ay bilı zano. Metersê, sıma milçıkan ra daa hewlê.

8“Sıma rê nay vaceri: Kamo kı mıleti ver de mın qebul keno, ez Lacê Mordemi ki inan vırniya melekanê Heqi de qebul kenan. 9Feqet kamo kı mın mıleti ver de inkar keno, ezi kı inan vırniya melekanê Heqi de inkar kenan. 10Owo kı Lacê Mordemi rê qesan vano, o ef beno, feqet owo kı Rowo Bımbareki rê qesan vano, o ef nêbeno.

11“Beno kı rocê sıma benê xavra ya ki benê hukumdaran u hakiman ver, mevacerê, ‘Ma senên cüab bıdım cı?’ yan ‘Ma se vacım?’ Saba nay qısawetı mekerê. 12Rowo Bımbarek a waxt çiyo kı sıma vacerê, muskıno sıma.”

Mesela variyetınê bêaqıli

13Wertê sılxetiye ra jüyê İsay rê vat: “Malım, bıraê mı rê vacı, mêraso kı piyê mı ra mando, mın de parı kero.”

14İsay iy rê nia vat: “Ne bıra, kami ez kerdan hakim kı saba sıma ni çiyan parı keri?” 15Bado İsay sılxetiye rê nia vat: “Hadarê xo bêrê. Xo çım-vêsaninı ra duri pêgerê; weşiya mordemi çiyê kı i wayirê cıyê, jü a niya.”

16İsay bado inan rê na mesela qeşi kerdı: “Rocê, mêrıko de variyetın esti biyo. Herdê ni mêrıki zaf genım çi-mi denê. 17Mêrıki xo xo de vato, ‘Ca çino kı ez ni genımi çi-mi cı keri. Ez se bıkeri?’ 18Bado ki vato, ‘Nia kenan: Ambaranê xo rıznenan, daa gırsan vırazenan. Genım çi-miyê xo u her çiyê xo ni ambaranê xoyê newiyan de darenan we. 19Xo rê nia vanan: Canê mın, xo rê çiyê to bı serran'a to rê beso. Borı, bısımı, bıfeteli, kêfê xo ro sêr kı.’

20“Feqet Heqi iy rê vato, ‘Mêrıko bêaqıl! Na peşew, canê xo ra benay. Owo kı to do arê, kami rê mano?’

21“Kamo kı saba xo variyetı dano arê, feqet qatê Heqi de variyetın niyo, peyniya iy nia bena.”

Qısawetı mekerê

22İsay telebanê xo rê nia vat: “Ay rao kı sıma rê nay vaceri: Saba canê xo qısawetı mekerê. ‘Çık wenım?’ yan ‘Çık gênım pıra?’, ninan xo rê qısawetı mekerê. 23Can werdi ra ki, kıncı ra ki hewlo. 24Qılancıkan ro sêr kerê! Nı ramınê, nı çinenê, nı merekê xo, nı ambarê xo estê. Feqet Heq inan keno mırd. Sıma çuçıkan ra daa zêdı hewlê. 25Sıma ra qe jüyê bı qısawetı kerden'a nêşkino omrê xo jü deqa bilı derg kero. 26Saba ni çiyê qıckeki bilı qeweta sıma kı çina, saba çiyê bini çay qısawetı kenê?

27“Sêr kerê, sosıni senên benê gırs. İ nı gurinê nı ki restıkı resenê. Sıma rê nay vaceri: Qıral Sılemani bilı gorê hente ihtişamê xo nêşkiya hente jü vilıkı rındek pıra gero. 28Ey sımayê kı itıqatê xo kêmiyo! No vaso kı hêgan dero, eyro esto, sodıra ercino locını. Ancia ki, Heqi no vas bilı nia rındek xemelno, Heq sıma daa zêdı dano pıra. 29A waxt, ‘Çık wenım, çık sımınım?’, saba ninan qısawetı mekerê. 30Mıletê dina her waxt ni çiyan dıma sonê. Piyê sımao kı asmên de, o ki zano, sıma rê kınc u werd lazımo. 31Sıma Hukumdariya Heqi dıma sêrê, a waxt ni ki ênê dayenı.

32“Tı metersı, ey bela qıckekı! Piyê sımao kı asmên de zerri ra Hukumdariya xo dano sıma. 33Çiyê xo bıroserê, peranê ni çi bıderê feqiran. Sıma kı nia bıkerê, jü kesê sımao kı khan nêbeno beno. Jü ki asmên de, ğezna sımawa kı qe nêqedina bena. Uca de qe jü dızd nêşkino sêro nejdiyê na ğezna, loliki ki nêşkinê ay borê. 34Ğezna sıma kı koti dera, zerria sıma ki uca dera.”

Her waxt hazır bêrê

35İsay vat: “Sıma her waxt hazır bıberê, çılê sıma her waxt bıvêserê! 36Xızmetkarê kı veyvı ra amayena wayirê xo pinê, zê inan bıberê. Wayir êno, kêber cıneno, xızmetkari ki a deqa iy rê kêber kenê ya. 37Key kı wayir gêra ya kê xo, xızmetkarê kı nêkutê ra, ğeji bê inan! Sıma rê rastiye vaceri: Wayir kıncanê xo vurneno ya, xızmetkaranê xo saba werdi dano ronistenı, inan rê xızmetı keno. 38Wayir şew nêmı de yan tenêna heri kı bêro, xızmetkarê kı pay derê vêneno, ğeji bê inan! 39Nay bızanerê, ekı wayirê kêyi bızanero dızd kamcin waxt êno, wayir nêverdano dızd çiyê iy bıtıro. 40Ay ra sıma her waxt hazır bıberê, Lacê Mordemi waxto kı sıma qe nêpinê, a waxt êno.”

41Petrusi nia pers kerd: “Wayir, na mesela saba ma yan saba her kesi vanay?”

42İsay nia vat: “Xızmetkaro sadıq u baqıl kamo? Wayirê iy, iy keno begê xızmetkaranê binan kı waxtê nani de werdê ninan bıdero. 43Wayir kı peyser ama kê, xızmetkarê xo kı guri sero di, ğeji bê ni xızmetkari! 44Sıma rê rastiye vaceri: Wayirê iy, idarê kê xo dano iy. 45Feqet ekı xızmetkar kı xo xo de vano, ‘Wayirê mın hona heri êno’, ay ra dano xızmetkaranê binan ro, weno, sımıno, beno serxos. 46Wayirê xızmetkari roca kı xızmetkar nêpino, saata kı nêzano, a waxt de êno, cezawa de gıranı dano ni xızmetkari. Niy bêimanan'a jü gêno pê.

47“Xızmetkaro kı wastena wayirê xo zano, feqet xo hazır nêkeno, wastena wayirê xo niano hurindi, ceza iy gıran bena! 48Ma, owo kı wastena wayirê xo nêzano, iy rê se beno? Guna xo bıbo ki ceza iy senık bena. Ê kami kı zêdı amo dayenı, iy ra zêdı êno pitenı. Ê kami kı zêdı amo amanat kerdenı, iy ra zêdı êno wastenı.

49“Ez aman kı dina bıçarni hurindia adıro kılı. Keşkanê no adır nıka ra bıvêsenê. 50Gereko kı ez jü dec ra ravêri#12:50 Greki de “Jü vaftiz esto, gereko ez iy bıbi.” Nejdiyan de İsay finê çarmıx; o niy rê vaftiz vano., hata kı ni deci ra ravêri, baro de gıran mın serowo. 51Sıma vanê, ez aman kı sılametiye biyari herdê dina? Nê, ez aman kı mordeman jübini ra abırrni. 52Nay ra tepia, mulxıtê kamci kêyi kı phanc mordemê, i hirêyın rê dıdı bırrinê ya. 53Pi vera laci de, lac vera pi de, may vera kêna de, kêna vera may de, vıstewriye vera veyvıkı de, veyvıkı ki vera vıstewriye de fındena.”

Waxtan fam bıkerê

54Bado İsay mıleti rê nia vat: “Sıma key kı vênenê rocawan ra jü hewr berc bi, sıma vanê, ‘Sıliye êna’, hini beno. 55Ekı hetê veroci ra va bêro, sıma vanê, ‘Zaf beno germ’, hini beno. 56Sımawo dı-rüyıni! Sıma herd ro yan ki asmên ro sêr kenê, gorê ninan manan vecenê. Senên beno kı waxto kı sıma tey derê, i waxti fam nêkenê?

57“Çay sıma bıxo qerer nêdanê çiyo kı rasto? 58Ekı jüyê sıma gerrı keno, owo kı destê sıma ra êno, bıkerê kı raya mekemi de bêrê werı. Ekı mêrê werı, sıma benê mekemı, vecenê hakimi ver. Hakim ki sıma dano xızmetkari, o ki sıma erceno zerrı. 59Sıma rê vanan: Hata kı dênê xo pêro mederê, nêşkinê zerrı ra veciyê.”

Currently Selected:

Luka 12: kiu

Highlight

Copy