యోహాను 19
19
1పిలాతు ఏశున్ ఓర్గి కొర్డాల్నాట్ అట్టినిటోండ్. 2బంట్రుకుల్ సప్పుల్ నాట్ కిరిటం కెయ్యి ఓండున్ తల్తిన్ ఎయ్యాసి, ఓండున్ ఊద రంగుటె చెంద్రాల్#19:2 కోసుల్ నూడ్దాన్ చెంద్రాలిన్ రంగు ఊద రంగు. ఏశున్ ఎకిరించాకున్ పైటిక్ ఓరు ఇప్పాడ్ కెన్నోర్. నూడుతోర్. 3ఓరు ఓండున్ పెల్ చెంజి, “యూదులున్ కోసు బెంగిట్ కాలె జీవించాకాండ్లె” ఇంజి పొక్కి ఓండున్ చెంపతిన్ అట్టికెన్నోర్.
4పిలాతు ఆరె పైనె వారి ఓర్నాట్ ఇప్పాడింటోండ్, “చూడుర్, ఓండున్ పెల్ ఏరెదె తప్పు ఆను చూడున్ మనాదింజి ఈము పున్నున్ పైటిక్ ఆను ఓండున్ ఇం పెల్ ఓర్గి వారిదాన్.” 5అందుకె ఏశు ఊద రంగుటె చెంద్రాల్ నూడి తల్తిన్ సప్పుల్ కిరిటం ఎయ్యాసి పైనె వన్నోండ్. పిలాతు ఓర్నాట్ ఇప్పాడింటోండ్, “ఇయ్యోది ఓండు.”
6యాజకులున్ ఎజుమానికిల్ పెటెన్ గుడి కాతాన్టోర్ ఓండున్ చూడ్దాన్ బెలేన్, “ఓండున్ సిలువ ఎయ్యాపుట్! ఓండున్ సిలువ ఎయ్యాపుట్!” ఇంజి కీకలెయతోర్. అప్పుడ్ పిలాతు ఇప్పాడింటోండ్, “ఈము ఓండున్ ఓర్గుయి సిలువ ఎయ్యాపుర్, గాని ఓండున్ పెల్ ఏరెదె తప్పు ఆను చూడున్ మన.”
7అప్పుడ్ ఓరు ఇప్పాడింటోర్, “అమున్ ఉక్కుట్ నియమం మెయ్య, అయ్ నియమం వడిన్ ఓండు సయిచెన్నిన్ గాలె, ఎన్నాదునింగోడ్ ఓండు దేవుడున్ చిండింజి ఓండి పొక్కేండ్.”
8పిలాతు ఇయ్ పాటెల్ వెయాన్ బెలేన్ బెర్రిన్ నర్చిచెయ్యోండ్. 9ఓండు ఆరె లోపున్ వారి ఏశు నాట్, “ఈను ఏమాకుట్ వారిదాట్?” ఇంజి అడ్గాతోండ్.
గాని ఏశు ఎన్నాదె పొక్కున్ మన. 10అప్పుడ్ పిలాతు ఓండ్నాట్ ఇప్పాడింటోండ్, “ఈను అన్నాట్ పర్కాటా? ఇనున్ విడుదల్ కేగిన్ పైటిక్ మెని సిలువ ఎయ్యాకున్ పైటిక్ మెని అనున్ అధికారం మెయ్యాదింజి ఈను పున్నాటా?”
11అప్పుడ్ ఏశు ఇప్పాడింటోండ్, “దేవుడు ఇనున్ అధికారం చిన్నోండ్ లగిన్ ఇనున్ అన్ పొయ్తాన్ అధికారం మెయ్య. అందుకె అనిన్ ఇన్ పెల్ పత్తి చీదాన్టోండున్ బెర్రిన్ పాపం మెయ్య.”
12ఇయ్ పాటెల్ వెయాన్ బెలేన్ పిలాతు ఏశున్ విడుదల్ కేగిన్ గాలె ఇంజి ఇంజెన్నోండ్. గాని లొక్కు ఆరె బెర్రిన్ కీకలెయాసి, “ఈను ఓండున్ విడిపించాకోడ్ ఈను కైసరున్ జట్టు ఏరాట్. ఎయ్యిర్ మెని ఆనీ కోసు ఇంజి పొగ్గోడ్ ఓండు కైసరున్ విరోదంగ మెయ్యాన్టోండ్” ఇంట్టోర్.
13ఇద్దు వెయాన్ బెలేన్ పిలాతు ఏశున్ పైనె ఓర్గి వన్నోండ్. ఓండు కండు బాశె ఇంజి పిదిర్ మెయ్యాన్ బాశెతిన్ ఉండి మంజి తీర్పు కేగిన్ పైటిక్ మెయ్యాన్ కుర్చితిన్ ఉండేండ్. హెబ్రీ పాటెతిన్ ఇద్దున్ అర్ధం గబ్బతా. 14అప్పుడ్ పస్కా పర్బున్ ముందెల్టె రోజు శల్దిబెలేన్ మంటె. పిలాతు ఓర్నాట్ ఇప్పాడింటోండ్, “ఇయ్యోది ఇం కోసు!”
15అప్పుడ్ ఓరు, “ఓండున్ అనుక్పుట్! ఓండున్ అనుక్పుట్! ఓండున్ సిలువ ఎయ్యాపుట్!” ఇంజి బెర్రిన్ కీకలెయతోర్.
పిలాతు ఓర్నాట్, “ఇం కోసున్ ఆను సిలువ ఎయ్యాకున్ గాలె ఇంజి ఈము ఇంజేరిదారా?” ఇంజి అడ్గాతోండ్.
యాజకులున్ ఎజుమానికిల్ ఇప్పాడింటోర్, “అమున్ కోసు ఉక్కురి, ఓండి కైసరు!”
16అప్పుడ్ పిలాతు ఏశున్ సిలువ ఎయ్యాకున్ పైటిక్ ఓర్ పెల్ ఒపజెపాతోండ్.
ఏశున్ సిలువ ఎయ్యాకుదార్
మత్తయి 27:32-44; మార్కు 15:21-32; లూకా 23:26-43
17అందుకె ఓరు ఏశున్ పైనె ఓర్గి వన్నోర్. ఏశు ఓండున్ సిలువ కాంజి పెండ్తెల్ బాశె#19:17 అయ్ బాశె చూడ్దాన్ బెలేన్ మనిషిన్ పెండ్తె వడిన్ తోండేరిదా. ఇంజి పిదిర్ మెయ్యాన్ బాశెతిన్ వన్నోండ్. హెబ్రీ పాటెతిన్ ఇదునర్ధం “గొల్గొతా.” 18ఓరు ఓండున్ అల్లు సిలువ ఎయ్యాతోర్. ఓండున్ ఇడ్డిగ్ పక్కాల్ ఆరె ఇరువులున్ మెని ఓరు సిలువ ఎయ్యాతోర్. ఏశు ఓర్ నెండిన్ మంటోండ్. 19అప్పుడ్ పిలాతు, “నజరేతుటె ఏశు యూదలొక్కున్ కోసు” ఇంజి రాయాసి సిలువ పొయ్తాన్ ఎయ్యాకునిట్టోండ్. 20బెంగుర్తుల్ ఇద్దు చదవాతోర్, ఎన్నాదునింగోడ్ ఏశున్ సిలువ ఎయ్యాతాన్ బాశె పట్నం కక్కెల్ మంటె. రాయాపోండిల్ హెబ్రీ, గ్రీకు, రోమా పాటెల్తిన్ రాయనేరి మంటె.
21యాజకులున్ ఎజుమానికిల్ పిలాతు నాట్ ఇప్పాడింటోర్, “యూదులున్ కోసు” ఇంజి రాయాకున్ కూడేరా, ఇయ్యోండు పొక్కేండ్, “ఆనీ యూదులున్ కోసు” ఇంజి రాయాకున్ గాలె.
22అప్పుడ్ పిలాతు ఇప్పాడింటోండ్, “ఆను రాయాపోండి అప్పాడియి, ఆరె మార్చాపాన్.”
23బంట్రుకుల్ ఏశున్ సిలువ ఎయ్యాతాన్ తర్వాత ఓండున్ చెంద్రాల్ నాలిగ్ ముక్కాల్ కెయ్కెయ్యి ఉక్కురునుక్కుర్ పుచ్చెన్నోర్. ఓండున్ అంగి మెని పుచ్చెన్నోర్. గాని అదు కుట్టు మనాగుంటన్ పొయ్తాకుట్ కీడిన్ దాంక వెయ్ఞేరి మంటె. 24అందుకె ఉక్కుర్నాటుక్కుర్ ఇప్పాడింటోర్, “ఇద్దు ఆము అక్సికేగిన్ కూడేరా, ఇద్దు ఎయ్యిరిన్ వద్దాదింజి చీటిలెయాకుంకం.” దేవుడున్ వాక్యంతున్ రాయనేరి మెయ్యార్ వడిన్ ఇద్దు జరిగెన్నె.
“ఓరు అన్ చెంద్రాల్ పైచి పుచ్చెన్నోర్,
అన్ అంగి కోసం ఓరు చీటిల్ ఎయ్యాతోర్.”#కీర్తన 22:18
అందుకె బంట్రుకుల్ ఇప్పాడ్ కెన్నోర్. 25ఏశున్ సిలువ కక్కెల్ నిల్చి మెయ్యాన్టోర్తున్ ఏశున్ ఆయ మరియ, ఓండున్ ఆయాన్ తోడుద్, క్లోపాన్ అయ్యాల్ మరియ, మగ్దలేనేటె మరియ మంటోర్. 26ఓండున్ ఆయ పెటెన్ ఓండు బెర్రిన్ ప్రేమించాతాన్ శిషుడ్ కక్కెల్ నిల్చిమనోండిన్ చూడి, ఏశు ఓండున్ ఆయ నాట్, “ఓండు ఇన్ చిండు” ఇంట్టోండ్.
27ఆరె శిషుడ్నాట్, “అదు ఇన్ ఆయ.” ఇంట్టోండ్.
అప్పుడ్ కుట్ ఓండు అదున్ ఓండున్ ఉల్లెన్ చేర్పాతోండ్.
ఏశున్ సావు
మత్తయి 27:45-56; మార్కు 15:33-41; లూకా 23:44-49
28అయ్ తర్వాత ఏశు, పట్టీన పోలికెన్నోన్ ఇంజి పుంజి దేవుడున్ వాక్యంతున్ రాయనేరి మనోండి అప్పాడ్ జరిగేరిన్ పైటిక్, “అనున్ కొండ్రోం వట్టిదాద్” ఇంట్టోండ్. 29అమాన్ ఉక్కుట్ కుడ్కాతిన్ పుల్లాంటె ద్రాక్షరసం కొప్పునేరి మంటె. అందుకె ఓరు ఉక్కుట్ దూది ద్రాక్షరసంతున్ ములుక్సి అదు ఉక్కుట్ హిస్సోపు#19:29 పాలస్తిన దేశంతున్ మెయ్యాన్ ఉక్కుట్ మొక్క కండ్వెతిన్ కట్టి ఓండున్ చొల్తున్ అందించాతోర్. 30అప్పుడ్ ఏశు అయ్ పుల్లాంటె ద్రాక్షరసం ఉంజి, “పట్టీన పోలికెన్నోన్” ఇంజి పొక్కి తల్లు వంచాసి జీవె సాయికెన్నోండ్.
31వద్దాన్ రోజు, విశ్రాంతి రోజు పెటెన్ పస్క పర్రుబ్ రోజు మంటె. అందుకె సిలువతిన్ పీన్గుల్ మన్నిన్ కూడేరాదింజి, ఓర్ కాల్గిల్ పుణ్సి ఓరున్ సిలువకుట్ ఇడుక్కున్ గాలె ఇంజి యూదలొక్కు పిలాతున్ అడ్గాతోర్. 32అందుకె బంట్రుకుల్ వారి ఏశు నాట్ సిలువ ఎయ్యాసి మెయ్యాన్ ఇరువులున్ కాల్గిల్ పుణ్సికెన్నోర్. 33గాని ఏశున్ పెల్ వద్దాన్ బెలేన్ ఓండు సయిచెయ్యోండింజి చూడి ఓండున్ కాల్గిల్ పుణ్కున్ మన.
34అప్పుడ్ బంట్రుకుల్తున్ ఉక్కుర్ బల్లెం నాట్ ఏశున్ పక్కాన్ సిత్తెండ్, గబుక్నె నెత్తీర్ పెటెన్ నీరు వాఞెటె. 35ఇద్దు చూడ్దాన్ యోహాను ఇయ్యాన్ ఆను పొక్కోండి సాక్ష్యం నిజెమి ఇంజి ఆను పుయ్యాన్, ఈము మెని నమాకున్ పైటిక్ ఆను రాయాకుదాన్. 36“ఓండున్ ఎముకల్ తిన్ ఉక్కుట్ మెని పుయ్ఞా” #కీర్తన 34:20ఇంజి దేవుడున్ వాక్యంతున్ రాయనేరి మనోండి అప్పాడ్ ఏరిన్ పైటిక్ ఇద్దు జరిగెన్నె. 37“లొక్కు, ఓరు సిద్దాన్టోండున్‍గిదాల్ చూడ్దార్”#జెకర్యా 12:10 ఇంజి ఆరుక్కుట్ పెల్ రాయనేరి మెయ్య.
ఏశున్ సమాది కేగిదార్
మత్తయి 27:57-61; మార్కు 15:42-47; లూకా 23:50-56
38అయ్ తర్వాత అరిమతయి#19:38 యూదయ దేశంతున్ మెయ్యాన్ ఉక్కుట్ పట్నం పొలుబ్టె యోసేపు పిలాతున్ పెల్ వారి ఏశున్ పీన్గు పోర్తోండ్. యోసేపు యూదలొక్కున్ నర్చి ఎయ్యిరె పున్నాగుంటన్ ఏశున్ శిషుడేరి మంటోండ్. పిలాతు ఒప్పుకునాతాలెన్ ఓండు ఏశున్ పీన్గు పత్తి చెయ్యోండ్. 39ఏశున్ పెల్ రాత్రిబెలేన్ వద్దాన్ నీకొదేము మెని యోసేపు నాట్ వన్నోండ్. ఓండు బెర్రిన్ వాసన మెయ్యాన్ నెయ్యు ముపైఐదు ఆడెల్ పత్తివన్నోండ్.
40ఓరు ఏశున్ పీన్గు పుచ్చి, యూదలొక్కు సమాది కెద్దాన్ ఆచారాల్ వడిన్ వాసన నెయ్యు మారుసి నూలు చెంద్రాల్ చుట్టాతోర్. 41ఏశున్ సిలువ ఎయ్యాతాన్ బాశెన్ కక్కెల్ ఉక్కుట్ తోంట మంటె. అయ్ తోంటతిన్ ఎచ్చెలె ఎయ్యిరె పీన్గున్ ఇర్రాయె ఉక్కుట్ పున్ సమాది మంటె. 42యూదలొక్కు విశ్రాంతి రోజున్ కోసం తయ్యార్ ఎద్దార్ లగిన్ కక్కెల్ మెయ్యాన్ సమాదితిన్ ఏశున్ సమాది కెన్నోర్.
Currently Selected:
యోహాను 19: gau
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust
