San Lucas 21

Je̱'e̱ ayoobu̶ ku'o'ogytyo'oxyu̶jk lyimoosnu̶

(Mt 12.41-44)

1Jiiby najty je̱'e̱ Jesús ma je̱'e̱ mu̶jtzajptu̶jku̶ñ ko ijxy maygyumeeñjya'ay lyimoosnu̶ pu̶daakku̶xy ma je̱'e̱ limoosnu̶ kaaxu̶ju̶ñ. 2Y nan y'ijx ko tu'ug ayoobu̶ ku'o'ogytyo'oxyu̶jk najty pu̶da'agy me̱tzk pi'kmeeñ mu̶dyiibu̶ ka'p mu̶j kyapxyu̶ñ. 3Mu̶'it myu̶naañ:

—Tu̶y'ajtu̶ñ du'un nnu̶maaygyu̶xy ko adayaaba ayoobu̶ ku'o'ogytyo'oxyu̶jk, jakni'igyu̶ lyimoosnu̶ tu̶ yeky ka'p du'un ni pú̶nu̶ñu̶ba. 4Ku̶xyu̶ je̱'e̱ kumeeñjya'ay ye̱jkku̶xypy lyimoosnu̶ je̱' je̱'e̱ meeñ mu̶dyiibu̶ jaknadu̶gu̶u̶ybyu̶ñ, peru̶ adayaaba ayoobu̶ ku'o'ogytyo'oxyu̶jk, tu̶ yu̶'u̶ ku̶xyu̶ ye̱jkta'ay je̱'e̱ mu̶dyiibu̶ najty ñigaye̱e̱mby ñi'u'uge̱e̱mbyu̶ñ.

Jesús nigapxy ko je̱'e̱ mu̶jtzajptu̶jk nu̶kxy taj xit wyu̶'u̶my

(Mt 24.1-2; Mc 13.1-2)

5Nije̱'e̱játy je̱'e̱ ja'ay ko tyu̶gu̶u̶ygyu̶xy ma je̱'e̱ mu̶jtzajptu̶jku̶ñ, chi je̱'e̱ mu̶jtzajptu̶jk nigapx nimu̶dyaakku̶xy ko janch'oy y'oydyúñu̶ch mu̶u̶d je̱'e̱ oyjyatypyu̶ tzaa y mu̶u̶d je̱'e̱ tu̶u̶bu̶ najty jiiby yojxku̶xy mu̶dyiibu̶ du'un yaj'oygyu̶xu̶'kpu̶ñ. Chi je̱'e̱ Jesús myu̶naañ:

6—Mínu̶p je̱'e̱ xu̶u̶ tiempo mu̶naa; mu̶naa ku̶xyu̶ adaa mu̶dyiibu̶ cham m'ijxku̶xypyu̶ñ ma adaa mu̶jtzajptu̶jku̶ñ; nu̶kxy wyu̶'u̶my taj xit, ka'p pochkyopt ni tu'ug wyu̶'u̶mu̶ch. Ku̶xyu̶ yu̶'u̶ wyindu̶gooydya'awu̶ch.

Je̱'e̱ tu̶y'ajt ko je̱'e̱ naaxwiimbu̶ ka'anu̶ kyu̶xa'añ tyu̶goya'añ

(Mt 24.3-28; Mc 13.3-23)

7Chi je̱'e̱ Jesús yajtu̶u̶y ajku̶xy:

—Windzú̶n, ¿mu̶naa adaa du'un tyuna'añyii jyada'añyii neby tu̶ mmu̶na'añu̶ñ? ¿Ti ijxpe̱jt jii yaj'íxu̶p ko naty adaa du'un tyimytyún tyimyjyadaanu̶na?

8Chi je̱'e̱ Jesús y'adzooy: “Naygyweentu̶'ajtu̶gu̶x ka'pu̶ pu̶n xywyin'ú̶ngu̶xu̶ch. Je̱' ko minaamb je̱'e̱ ja'ay may mu̶dyiibu̶ nayyajnaxaanu̶gu̶xpu̶ñ neby u̶u̶chu̶ñ. Myu̶na'anaangu̶xy: ‘U̶u̶ch je̱' je̱'e̱ Cristo’, y ‘Tu̶ je̱'e̱ xu̶u̶ tiempo abaady mu̶naa je̱'e̱ naaxwiimbu̶ kyu̶xa'añ tyu̶goya'añu̶ñ.’ Peru̶ ka'p myajwin'ú̶ngu̶xu̶ch. 9Y ko naty je̱'e̱ ayuuk mmu̶doogu̶xy ko naty je̱'e̱ ja'ay chiptuungu̶xy y ñayñibu̶du̶'ku̶gu̶xy, ka'p mdzu̶gu̶u̶ygyu̶xu̶ch, je̱' ko ni'igu̶tún ni'igu̶jadu̶u̶wu̶p adaa du'un jayu̶jp, y ka'p naty je̱'e̱ naaxwiimbu̶ du'un timykyu̶jxp timytyu̶gooybyu̶ch.”

10Chi je̱'e̱ Jesús jyaknu̶maay'adu̶u̶tzu̶ ajku̶xy: “Nayñibu̶du̶'u̶gu̶u̶wu̶p je̱'e̱ naax kajpt mu̶u̶d je̱'e̱ wiingpu̶ naax kajpt y gobierno mu̶u̶d je̱'e̱ wiingpu̶ gobierno. 11Y mínu̶p mu̶k temblor, y mu̶j'yuu y mu̶jpa'am xii yaa, y yaj'íxu̶p tzajpwingú̶xy mu̶j'adzu̶gu̶'u̶ñ mu̶j'aju̶wu̶'u̶ñ y mu̶j'ijxpe̱jt.

12“Ma naty adaa du'un ka'anu̶ tyuñyii jyadyiiñu̶ju̶ñ, miich ajku̶xy xymyajtzku̶xu̶p y xypyawu̶dijtku̶xu̶p je̱'e̱ ja'ay ajku̶xy, y xykyu̶'u̶ye̱jkku̶xu̶ch neby myajtu̶ydyuungu̶xu̶chu̶ñ ma je̱'e̱ judío ja'ay ñaymyujktaakt ajku̶xyu̶ñ. Chi pujxtu̶gooty xypyu̶daakku̶xu̶ch y xyajnú̶kxku̶xu̶ch mach ma je̱'e̱ mu̶j'ane̱'e̱mbu̶ y ma je̱'e̱ gobernador winduuy ajku̶xyu̶ñ je̱' gyu̶xpu̶ ko u̶u̶ch naty xymyu̶bu̶jkku̶xy. 13Y du'unu̶tz je̱'e̱ tiempo mmu̶dajtku̶xu̶ch neby je̱'e̱ tu̶y'ajt mu̶baad mye̱jkku̶xyu̶ñ mu̶u̶d u̶u̶ch kyu̶xpu̶. 14Ka'p mdajku̶xu̶ch mmaaygyu̶xu̶ch, ni mga'a''a'ajt mga'ajoot'ajtu̶gu̶xu̶ch neby mnayñi'igapxtuuttu̶gu̶xu̶chu̶ñ. 15Je̱' ko u̶u̶ch miich je̱'e̱ wij'ajt ayuuk nmooygyu̶xu̶py neby je̱'e̱ mmu̶dzip mu̶baad m'adzoogu̶xyu̶ñ, mu̶dyiibu̶ je̱'e̱ mmu̶dzip ka'p ni tu'ug mu̶baad jajtku̶xyu̶ñ neby xy'adzoowimbijtku̶xu̶chu̶ñ y neby xyjyakni'ixu̶'u̶be̱jtku̶xu̶chu̶ñ. 16Miich ajku̶xy je̱'e̱ mgu̶'u̶mdeedy, je̱'e̱ mgu̶'u̶mmu̶gue̱'e̱xk, je̱'e̱ mgu̶'u̶m'ajuugy mgu̶'u̶m'amu̶gu'ug y je̱'e̱ mgu̶'u̶mmu̶gu'ug xykyu̶'u̶ye̱jkku̶xu̶p. Y nije̱'e̱játy m'o'ogu̶ch mdu̶góyu̶ch ajku̶xy. 17Y ku̶xyu̶ je̱'e̱ ja'ay miich xykya'a'ixa'an xykya'atzoga'anu̶ch ajku̶xy je̱' gyu̶xpu̶ ko u̶u̶ch naty xymyu̶bu̶jkku̶xy. 18Peru̶ ni tu'uk je̱'e̱ mgu'uwaay kya'atu̶góygu̶xyu̶ch. 19¡Me̱kxtujkku̶x mu̶k mu̶u̶d adaa ayo'on, neby je̱'e̱ m'aanu̶mu̶ mu̶baad ñi'idzookku̶xyu̶ñ wiinu̶u̶xu̶u̶!

20“Ko m'ijxu̶ch ajku̶xy ko je̱'e̱ Jerusalén kajpt naty tu̶ jyu'ubigu̶'u̶yii je̱'e̱ tziptuumbu̶tu̶jk ajku̶xy, mu̶'it mnejwu̶u̶ygyu̶xu̶ch ko wingonu̶ñ naty je̱' ma tyu̶goyaanu̶ju̶ñ. 21Mu̶'it miich ajku̶xy pu̶njaty naty jim Judea naaxjooty tzu̶naaygyu̶xpu̶ñ, mke̱e̱kku̶xu̶ch mnú̶kxku̶xu̶ch yuugjooty e̱e̱myjyooty; y pu̶njaty naty jim Jerusalén yajpaatku̶xpu̶ñ, nan ke̱'e̱gu̶p je̱'e̱ ajku̶xy, y pu̶njaty naty kamjooty yajpaatku̶xpu̶ñ, ka'p je̱'e̱ mu̶baad y'okwimbijtku̶xnu̶ ma je̱'e̱ Jerusalén kajptu̶ñ. 22Je̱'e̱ mu̶'it tiempo mu̶naa je̱'e̱ ayo'on du'un tyuna'añyii jyada'añyii, je̱' je̱'e̱ du'un ku̶xyu̶ yajkuydyuunda'awaamb neby kyuja'ayu̶chu̶ñ ma je̱'e̱ Dios ñakyu̶ñ. 23¡Ayo'onbadaamb je̱'e̱ to'oxyu̶jktu̶jk ajku̶xy mu̶dyiibu̶ naty ungjom'ijtku̶xpu̶ñ je̱'e̱ mu̶'it xu̶u̶ o je̱'e̱ mu̶dyiibu̶ naty ungma'axúng yajtzi'tzku̶xpu̶ñ! Je̱' ko jadu̶u̶wu̶p mu̶j'ayo'on y mu̶jtzaachpyu̶ yaa, ma adayaaba naaxwiiñu̶ñ y ma adayaaba kajptu̶ñ. 24Y o'ogu̶p nije̱' ajku̶xy tzipjooty espaadu̶'aam y nije̱' yajnú̶kxu̶gu̶xu̶ch tzumy mach ma je̱'e̱ wiingpu̶ naax wiingpu̶ kajpt xii yaaju̶ñ. Y je̱'e̱ Jerusalén kajpt naaxmu̶te̱nu̶ydya'awu̶u̶ju̶p je̱'e̱ ja'ay ajku̶xy, mu̶dyiibu̶ ka'p jyudíoja'ayu̶ch, u̶xtu̶ koonu̶ je̱'e̱ Dios yajmu̶baad'ádu̶ch mu̶naa je̱'e̱ y'ane̱'e̱mu̶ñ yajkú̶x yajtu̶goyaanu̶ju̶ñ je̱'e̱ mu̶dyiibu̶ ka'p jyudíoja'ayu̶chu̶ñ ajku̶xy.

Neby je̱'e̱ Dios y'Ung myínu̶chu̶ñ ja'adu'ook

(Mt 24.29-35, 42-44; Mc 13.24-37)

25“Je̱'e̱ mu̶'it xu̶u̶ je̱'e̱ mu̶'it tiempo ku̶xu̶'u̶gu̶p je̱'e̱ ijxpe̱jt ma je̱'e̱ xu̶u̶, ma je̱'e̱ po'o y ma je̱'e̱ mu̶dza'aju̶ñ; y yaa naaxwiiñ je̱'e̱ ja'ay ka'p je̱'e̱ oknejwu̶u̶ygyu̶xnu̶ch tii tyuungu̶xu̶u̶ybyu̶ñ, y tzu̶gu̶'u̶wu̶p ju̶wu̶'u̶wu̶p mu̶k ajku̶xy ko je̱'e̱ mejy naty mu̶k jyanchne'emy y nan ko naty mu̶k jyanchpu̶du̶'u̶gy. 26U̶xtu̶ o'kwindzu'uju̶'u̶wu̶p je̱'e̱ ja'ay ajku̶xy mu̶u̶d je̱'e̱ tzu̶gu̶'u̶ñ ko naty du'un ijxku̶xy tú̶kxku̶xy neby je̱'e̱ naaxwiiñ jyada'añu̶ñ; y u̶xtu̶ je̱'e̱baad ku̶xyu̶ yu'kxu̶p tijaty jiiby tzajpjooty mu̶k'ajtmu̶u̶du̶ñ. 27Mu̶'it u̶u̶ch nyaj'íxu̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty ko u̶u̶ch naty nmiñ jokjooty mu̶u̶d u̶u̶ch je̱'e̱ nmu̶jmu̶k'ajtu̶ñ y nmu̶j'oy'ajtu̶ñ. 28Ko adayaaba ayo'on aga'an chonda'agu̶ch, mu̶'it mjootkugu̶u̶ygyu̶xu̶ch y mju̶jp'ijxku̶xu̶ch, je̱' ko wingonu̶ñ naty je̱' mu̶naa je̱'e̱ Dios xyñiwa'ana'añ xyajtzo'oga'añu̶ñ ajku̶xy.”

29Nan yajmu̶dmu̶dyaaku̶ adayaaba ijxpe̱jtu̶ñ ajku̶xy: “Ijxku̶x yu̶'u̶ higueeru̶ kepy y oytimymyu̶dyii képyu̶ch. 30Ko jyitztu̶gu̶'u̶y mu̶'it mnejwu̶u̶ygyu̶xy ko tu̶u̶ wyingoonu̶ mu̶naa pyoottu̶gu̶u̶yñu̶ju̶ñ. 31Y nandu'un ko naty adaa du'un m'ijxku̶xy mdú̶kxku̶xy tyuñyii jyadyii neby yam tu̶ nnu̶maaygyu̶xyu̶ñ, nejwu̶u̶ygyu̶x du'un ko je̱'e̱ xu̶u̶ tiempo naty tu̶ wyingoonu̶ mu̶naa je̱'e̱ Dios yaa naaxwiiñ y'ane̱'e̱ma'añu̶ñ.

32“Janch tu̶y'ajtu̶ñ du'un nnu̶maaygyu̶xy ko adaa du'un ku̶xyu̶ tyunu̶u̶ jyadu̶u̶ju̶ch ma naty je̱'e̱ ja'ay ka'anu̶ y'o'ktaaygyu̶xyu̶ñ mu̶dyiibu̶ jada'achámbu̶ xu̶u̶ tiempo tzu̶naaygyu̶xp jugy'ajtku̶xpu̶ñ. 33Je̱'e̱ tzajp y je̱'e̱ naaxwiimbu̶ kú̶xu̶p tu̶góyu̶p je̱', peru̶ u̶u̶ch je̱'e̱ n'ayuuk ka'p je̱'e̱ nimu̶naaxu̶u̶ kyú̶xu̶ch tyu̶góyu̶ch.

34“Naygyweentu̶'ajtu̶gu̶x miich ajku̶xy, ka'p nigoo mjanchnijoot'ajtku̶xy je̱'e̱ kaayu̶ñ uuku̶ñ, je̱'e̱ u'ugu̶u̶ ju̶kxu̶u̶ y je̱'e̱ mdzu̶naayu̶ñ mjugy'ajtu̶ñ ajku̶xy, ka'pu̶ je̱'e̱ ayo'on xu̶u̶ je̱'e̱ ayo'on tiempo amoñygyu̶joot xyñimínu̶ch ajku̶xy, 35du'un neby je̱'e̱ ja'ay tzojku̶ y'ayo'onbaadyu̶ñ. Du'un je̱'e̱ ayo'on myínu̶ch ma je̱'e̱ ja'ay ku̶xyu̶ mu̶dyiibu̶ yaa naaxwiiñ tzu̶naaygyu̶xpu̶ñ. 36Ni'ixu̶'u̶ ijtku̶x, mu̶bu̶jktzoogu̶x je̱'e̱ Dios jaboom jaboom, neby mni'idzookku̶xu̶chu̶ñ ma je̱'e̱ ayo'on mu̶dyiibu̶ tunaanu̶p jadaanu̶bu̶ñ y neby jiiby tzajpjooty mu̶baad myajpaatku̶xyu̶ñ ma u̶u̶ch je̱'e̱ nwinduuyu̶ñ, u̶u̶ch je̱' je̱'e̱ ja'ay mu̶dyiibu̶ tzon tzajpjooty.”

37Xu̶u̶m najty je̱'e̱ Jesús yaj'u̶xpú̶ky ma je̱'e̱ mu̶jtzajptu̶jku̶ñ, y koodz najty chooñ ñu̶kxy jim ma je̱'e̱ kopt mu̶dyiibu̶ xu̶u̶'ajtpu̶ñ Olivos. 38Y nigu̶xyu̶ najty je̱'e̱ kajptja'ay jop jop ñú̶kxku̶xy ma je̱'e̱ mu̶jtzajptu̶jku̶ñ nu̶kxy je̱'e̱ Jesús y'ayuuk amdo'ijtu̶ ajku̶xy.

Currently Selected:

San Lucas 21: MIXE

Highlight

Copy