Mattĕo 14

Zowănnī Baptĭsta Adèthĭ

(Mărko 6.14-29; Lŭka 9.7-9)

1Hlĕnu Èrŏdè, Tètrăka thîhè̆b́è bija d́ò Jezŭ awîakè̆, 2kî cò d́ògè zò khò̆ bĭsèpho gōjo, “Ajo dèbwè ḿî Zowănnī Baptĭsta lò. Za htabogegè dèthĭ aklè̆; ajo akhoacè̆ Zè mè kèhtakò̆ dèbòdèba.”

3Manè̄ kòd́òdo dō, ḿî d́ŏ cè thè̆buwe Philĭpo ahmè̆ Herŏdea akhoacè̆ Èrŏdè phògè Zowănnī; zò còglo lōwa kî zi htînī lōwa dèkî̆dî̄ abu lò. 4Manè̄, Zowănnī d́ògè cè, “Ńò dò mòphî amihmu ajo ńò.” 5Za thaè mèthĭ tepwè lōwa barasă zi scisăni htĭphogepho tòcò ale. Manè̄, cè tòcò gomo d́ŏ Zowănnī ḿî prò̆fèt dèbwè nu.

6B́ĕ Èrŏdè adèòla scige ani nu, Herŏdea aphohmu gecugekhagè bija ahlò̆mò̄ d́o ab́èthasôgè cè. 7Zô hôd́ă ze ne kî ŏlăphlala aki icè dè arră za da tòcò nu.

8D́ŏ zo mo adèhnakă acè̆, cò d́ò, “Ibò̄ jè Zowănnī Baptĭsta ako d́ŏ laba abu jo.”

9Saphra atha d́òmò be ńò, barasă d́ŏ zè dèhôd́ă ze ne tî̆tèḿè̆ ahlò̆mò̄ akhoacè̆ zè hmèlagè bija aki icè. 10Zo thodŏle bija agē le bēhtè̆dū Zowănnī ako d́ŏ dèkî̆dî̄ abu nu. 11Bija leigè co ko d́ŏ laba bu kî igè amihmupho kî ze leigè zo mo. 12Zo bōhmubicè tòcò le zāge ze neb́î̆cè kî b́ŭlăgè cè. Mèhwă ze le d́ŏsagè Jezŭ.

Jezŭ B́oa Bija Abwè Jè̄htò

(Mărko 6.30-44; Lŭka 9.10-17; Zowănnī 6.1-14)

13Jezŭ thîhè̆b́è hwă dè ajo d́ō, Cò d́ò khlĭ kî Ze geb́agè d́ŏ lothĭḿizekho nu, barasă bija aboahò aò d́ŏ u bu kî d́ŏbu tòcò thîhè̆b́è d́ō, hè akhakhò lôkôgè Ze le. 14B́ĕ Zè hèhta khò̆kho nu, Ca tcahtî bija aboahò kîd́ò̆ d́ŏ Zè dèkhòwèhmòb́è abu, Zè mèhmagegè gajă bija ascwiasè̆ lŏcăcè nu.

15B́ĕ lumula nu, Zo bōhmubicè tòcò lehtî Cè kî d́ò, “B́ĕjo nu ḿî lothĭḿizekho kîd́ò̆ lumulathulab́ăgè; hnagebò̄ bija dakha, cab́ô̆htè ze ge lenī d́ŏbu kî bwîabwîò̆bò̄ nu.”

16Barasă Jezŭ d́ò cè tòcò, “Ado loba cè tòcò hèphlòḿĭ ńò. Thĭ ibò̄ cè tòcò dèa dòkhò̆.”

17Cè tòcò d́òge Jezŭ gōjo, “Aòni wa ḿî toko jè̄d́ŏ kî dāpho gīb́ò̆ lò.”

18Jezŭ d́ò, “Leibò̄ d́ŏ jò ò jo.” 19Kîd́ò̆ b́ĕ Za hna sanălăò hwă bija d́ŏ mizekho nu, Zi phî toko jè̄d́ŏ kî dāpho gīb́ò̆, Za tcahta Mò̄kholè̄, Zô hôwî, Zî b́îhtè̆pha hwă toko d́ō, Ci igè Zo bōhmubicè tòcò agē be abija aboahò nu. 20Bija lŏcăcè a sô̆ a hwă zu htuge akholakăsè tòcò nu d́ō, apĕhtagè scigīṕahlu be. 21Bija a ab́è toko nu kô tô d́ôca amihmu kî abĭsèpho hnî̆ńò, htĕ amikhŏ lò nu ògè bija abwè jè̄htò.

Jezŭ Hè Htĭkho

(Mărko 6.45-52; Zowănnī 6.15-21)

22Kîd́ò̆ Jezŭ hna Zo bōhmubicè tòcò khè̆htanī khlĭbu aplă, kî le Zò hlò̆mò̄ d́ŏ pèllè alewe dòkhòwō nu, ḿî Cè dòkhò̆ Za hnagegè bija aboahò tòcò nu. 23Kîd́ò̆ Za b́ăhlôge hwă bija aboahò tòcò d́ō Za htagè khòlò̆kho cab́ô̆htè Zè gè thèb́è̆hta nu. Kîd́ò̆ b́ĕ lumuhè nu, Cò ògè b́ĕnu dèbwè lò. 24Barasă b́ĕnu khlĭ do d́ŏ pèllè athaklăḿè̆bŭ akhî htĭ papipapò̆gè, manè̄ kò̄ d́òdo dō, Gīlli dobōsôgè.

25B́ĕ klĭdôi lwīgla akhî nu, Ze lehtîgè lōwa tòcò, Zè hègè pèllè htĭkho nu. 26Kidò̆ cè tòcò tcahtî lōwa hè pèllè htĭkho d́ō, za hmăkî ḿî lūhnè d́ō zi scisă kî za haphuhasiri cò d́ò, “Anu ḿî dèhnè!”

27Kîd́ò̆ taplakhă lò Jezŭ jî̄b́èhtîgè cè, Cò d́ò lōwa, “Ò mòthomòthabò̄, ḿî Jè lò. Scisăbò̄ ḿè!”

28Kîdò̆ Petru d́òge Cè alī, “B́ĭcè, agī ḿî nè̄ d́ō hmèlabò̄ jè agē lehtî Nè htĭkho.”

29“Le d́o!” Cò d́ò lōwa do. Petru khè̆ladē khlĭbu kî zè hègè htĭkho cab́ô̆htè ze ge lehtî Jezŭ nu. 30Ḿî za tcahtî Gīlli dobōsô d́ō, zi scisăgè kî za laprugè, za haphu, cò d́ò, “B́ĭcè, mèhlô̆htagebò̄ jè tîkî.”

31Jezŭ jò̄jòwè̄ plă acukhò, Zô pôglo lōwa acukhò kî Cò d́ò, “Ŏ bija adèb́u tîkîpho dèbwè, nè htèniwĭniwa manè̄?”

32Kîd́ò̆ b́ĕ zè khè̆htanī hwă khlĭbu tòcò nu, Gīlli òzògè. 33Kîd́ò̆ bija aò khlĭbu tòcò le gò̄la Zò hlò̆mò̄ kî cò d́ò, “Nî ḿî hnèhnè Kib́ĭcè Apho hŏ!”

Jezŭ Mèhlè̆mè̄ Bwèsè̆ d́ŏ Genesarè̆tge

(Mărko 6.53-56)

34Kîd́ò̆ zu kŭwè̄ hwă htĭ, Ze lenī d́ŏ Genesarè̆t agebu nu. 35Kîd́ò̆ bija aò d́ŏnu tòcò thîhè̆ Cè d́ō, za hna le bija thèdè̆ge lei lŏ bija ab́èscwib́èsè̆ tòcò nu lōwa ò. 36Kîd́ò̆ za damògè lōwa cab́ô̆htè anu tòcò kò tòwè̄b́è Zi scid́ŏ akăjwī alò nu. Kîd́ò̆ gajă bija atòwè̄ tòcò hmage lŏ tèpwè.

Currently Selected:

Mattĕo 14: GRNT21

Highlight

Copy

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament