Mattĕo 21

Dèlenī d́ŏ Jerŭsalèm u

(Mărko 11.1-11; Lŭka 19.28-40; Zowănnī 12.12-19)

1Kîd́ò̆ b́ĕ Zo do b́ôhtî Jerŭsalèm u, kî Zo dole Bèthphage d́ŏ nu, htè aò Òlĭvo khòlò̆ akăhtî tod́osò̆ nu d́ō, Jezŭ thodŏle Zo bōhmubicè gībwè; 2Cò d́ò lōwa, “Lebò̄ d́ŏ aò thĭ hlò̆mò̄ tod́osò̆ abu, kî thĭ gā pani danākò̆ thîrîd́ŏ amo aò cŏwè̄glo, apho òkô akă tod́ŏ; b́ăplè abi kî ge cwiibò̄ d́ŏ Jò ò jo. 3Kîd́ò̆ bija kò̄ d́ò thĭ dimimi d́ō, ‘B́ĭcè thaè mèi d́òbò̄ cè do,’ kîd́ò̆ taplakhălò̆ ci ki ikò̆ thĭ hèi.”

4Dè ajo phî̆hta lŏgè acab́ô̆ Prò̆fèt adèd́òdòlò gē pĕhtabò̄ nu, htè ad́ò, 5“Dòb́î̆sabò̄ Zion aphohmu gōjo, ‘Tcabò̄, Na Saphra lehtî nè, cî b́î zu jū, kî cò dò thîrîd́ŏ amo htè bija tò d́ò nènò hnî̆ńò tod́ŏ kî apho.’”

6Kîd́ò̆ bōhmubicè tòcò le kî mè tèpwè acab́ô̆ Jezŭ hmèla cè adĕ nu. 7Ze geigè thîrîd́ŏ athè̆ modwè b́ĕnu, cè d́è̆lagè dèkô̆dèthò akho kî Jezŭ htad́ògè. 8Bija aboahò d́è̆lagè adèkô̆dèthò tòcò d́ŏ klèbu. Tòcò cò ge hwă thohlèthophă, cè b́è̆lăgè dŏ klèbu. 9Zè le d́ŏ Jezŭ ahlò̆mò̄ tòcò cò kî d́ŏ lōwa alekă tòcò cò kî kèwo d́ò̆lēgè, “Hozăna d́ŏ Dăvid Apho! Ab́èhôwî ḿî bija ale d́ŏ B́ĭcè ami abu dèbwè nu! Hozăna d́ŏ Ahtajîgudŭ!”

10B́ĕ Zo donī Jerŭsalèm u bu nu, bija aò d́ŏ u bu tòcò hèhta bogalāgè kî zô htôtcadè̆cahlè lōwa tòcò, “Bija ajo dèbwè ḿîgè bò̄bwè?”

11Bija aboahò d́òscĭge cè tòcò, “Ajo dèbwè ḿî Jezŭ, Prò̆fèt htè aò d́ŏ Nazarè̆th U, Galilĕage dèbwè nu.”

Jezŭ Mèplî̆mètcăge Zarādo

(Mărko 11.15-19; Lŭka 19.45-48; Zowănnī 2.13-22)

12Jezŭ lenī Zarādo abu, Za hna hèhta lŏ bija abwîasè̆ dè d́ŏ Zarādo bu tòcò nu, kî Ca b́atòkòlakhu ad́ò̆khlè hô̆ tòcò acud́èkho kî asè̆ thokŏdru tòcò akătò. 13Kîd́ò̆ Cò d́ò lōwa tòcò gōjo, “Ja Zarādo kè̄ b́èjokò̆ dèthèb́è̆ ahi, aò Cè bu do; ḿî thĭ mèphî̆htagè dehwĕ abò.”

14Bija amēkhi kî akhad́e tòcò lehtî Cè Zarādo bu kî Zè mèhmage tèpwè lōwa. 15Kîd́ò̆ Phŭgido tòcò kî Skrĭbāpho tòcò tcahtî dèbòdèba Zè mè tòcò nu, kî abĭsèpho tòcò kèwo Zarādo bu, cò d́ò, “Osănna Dăvid Apho!” d́ō, cè thèhtègè tòcò. 16Kî cò d́ò Jezŭ, “Nî thîhè̆ tèpwè ajo tòcò d́ò danè̄ nu ā?”

Jezŭ d́òge cè tòcò, “Ji thîhè̆ hŏ, thĭ da phab́ègè dè ajo tòcò htè ‘Nè mègè abĭsèpho kî aò̆nu tòcò alòmò d́òhta dèhtăhtai,’ nu ńò ā?”

17Kîd́ò̆ Zè hèthĭwī hwă lōwa tòcò, Zè hèhta u akhlŏ kî Zè le sòd́è̆gè d́ŏ Bèthănia ad́ŏ bu thèd́è̆ nè d́o.

Jezŭ Hôkî̆kkè Thod́ohtĭthè Amu

(Mărko 11.12-14,20-24)

18Kîd́ò̆ b́ĕ lumuwò nu, Ze geb́a u bu d́ō, Za thaẃihtagè. 19Kîd́ò̆ Za tcahtî thod́ohtĭmu ò klèkhŏ dumu d́ō, Ze lewè̄ alò, barasă Za ta tcahtî athè dèmè̆ ńò, ḿî htĕ ahlè lò. Kî Cò d́ògè tho gōjo, “Khŏnujo phlò̆ ahlò̆mò̄ nè gè̄ tè thèb́è̆ d́ò̆è taplă ńò,” kîd́ò̆ thod́ohtĭmu hnò̆thĭ danāgè.

20Bōhmubicè tòcò le tca d́ō, zè htèdômô̄dahmă kî d́ò, “Thod́ohtĭmu du mu nu hnò̆thĭdanā magè nè?”

21Kîd́ò̆ Jezŭ d́òge cè tòcò, “Jò d́ò̆sa thĭ adî̄ahma, thĭ dèb́u kò ò kî ade gleglā ma ńò d́ō, thĭ gè̄ mèkèhta d́olĭkò̆ jè mè thod́ohtĭmu ajo nu. Ḿî thĭ kò d́ò khòlò̆ ajo dèmè̆, ‘Wè̄hto kî htîladē ne ne pèllèbu,’ d́ō agī phî̆hta tèpwè. 22Kîd́ò̆ thĭ gā dadè arră dèthèb́è̆ abu kî thĭ kū b́u d́ō, thĭ gī nib́è tèpwè.”

Dèd́è̆ Ab́èkja Jezŭ Aphlŭthere

(Mărko 11.27-33; Lŭka 20.1-8)

23Kîd́ò̆ Ze lenī hwă Zarādo abu Cò d́òŭd́ò̆sa thebĕ dè d́ō, Phŭgido, kî bija anedo tòcò lehtî Cè kî cò d́ò, “Nè mè dè ajo tòcò da aphlŭthere abu nè? Kîd́ò̆ bò̄bwè ila nè aphlŭthere jo bwè?”

24Jezŭ d́ò cè tòcò, “Jè Jè, Jè kè d́è̆ thĭ dèjî̄b́è dôhmô̆, thĭ kò d́ò̆sa Jè d́ō, Jò kò̄ d́ò̆sakò̆ thĭ Jè mè dè ajo tòcò da aphlŭthere abu nè nu nu. 25Zowănnī adèŭsab́ăhtĭ akăhtî ḿîgè d́òlè̄? Ḿîgè Mò̄kho è̆ ā? Ḿî̆dîḿî ńò, bija è̆ ā?”

Ḿî bija tòcò d́òhlè huzò lōwa, “‘Mò̄kho è̆,’ wò kò̄ d́òdo d́ō, Cò kò̄ d́ò wa, ‘Mègōnu thĭ tu b́u ma cè ńò nè?’ 26Kîd́ò̆ wò kò̄ d́ò, ‘Bija è̆,’ d́ō, wa scisăni kòd́ò̆ bija aboahò ale; manè̄ kòd́òdo dō, bija lŏcăcè bè̄ Zowănnī acab́ô̆ Prò̆fèt dèbwè nu.” 27Mègōnu cò d́òge Jezŭ, “Wi di thîhè̆ ńò.”

Jezŭ dòkhò̆ d́ò cè, “Jè Jè, Jò tò d́ò̆sa thĭ Jè mè dè ajo da aphlŭthere abu nè ńò ńò.”

Phokhŏ Gībwè Agèlè

28“Ḿî thĭ gomo cadè̄? Bija dèbwè, aphokhŏ ò gībwè; kîd́ò̆ ze lehtî aŭsu dèbwè d́ō cò d́ò lōwa, ‘Aphokhŏ, khŏdini le mèbò̄ dè dŏ jo thobiscige bu nu.’ 29Ḿî cò d́òge gōjo, ‘Je de le ńò!’ Barasă alekă za bajalage ze ne kî ze le tèpwè. 30Ze lehtî d́ò̆ alewe dèbwè d́ō, cò d́ò lōwa gōnu nu. Kîd́ò̆ cò d́òge lōwa, ‘Jē le hŏ; Apa.’ Barasă ze de le ńò. 31Ajo gībwè aklè̆ amè acab́ô̆ apa adèthaèni ò nu ḿî d́òlè̄ dèbwèbwè?”

“Ḿî aŭsu dèbwè nu,” cò d́ò Jezŭ d́o.

Jezŭ d́ò cè tòcò, “Jò d́ò̆sa thĭ adî̄ahma, adadèhmŭ kî momarè tòcò gē lenī ŭsukò̆ thĭ d́ŏ Kib́ĭcè Ahtĭage abu nu. 32Manè̄ kòd́òdo dō, Zowănnī lehtî ŭsu thĭ, zè khè̆kô dèdî̄dèhma aklè, barasă thĭ tu b́u cè ńò. Ḿî adadèhmŭ kî momarè tòcò b́u tèpwè cè. Kîd́ò̆ thĭ kèhtî nòthò̆ dè ajo hnò̆nu, alekă thĭ da bajalage thĭ ne ńò, thĭ tu b́u cè ńò ńò.

Bwèkhwèi Thobiscimu Agèlè

(Mărko 12.1-12; Lŭka 20.9-19)

33“Sòkhĕńebò̄ dègèlè alewe dèdè̆ be. Bija dèbwè htè dugumu apa nu, solagè thobiscimu dege. Zo so khwè̆b́a thara, zu khu dèscila thobiscihtĭ ale, ca prahta lòlè̆khè dèdôi ale dèmè̆, kî ci ila hwă dèmèpho tòcò mèa i d́ō, zè hèpôd́ŏgè d́ŏ htĭge alewe nu. 34B́ĕ amò d́e thobiscithè akhî b́ôhtî nu, za hna le zô zôpho d́ŏ amèai ge tòcò ò, cab́ô̆htè zi gī phîge dèthè athwè̆ nu. 35Ḿî amèai ge tòcò pô hwă lōwa azôpho, zu mū dèbwè, mèthĭ dèbwè, kî hwĕgè cè lo dèbwè. 36Tapla be, za hna le zô zôpho alewe tòcò aòè d́olĭ aŭsu dopho nu; barasă bija mè tèpwè cè gōnu lò lò. 37Agudulă za hnagè zo phokhŏ d́ŏ lōwa tòcò ò kî cò d́ò, ‘Cò kò̄ d́ŏb́èj́ab́èkò̆ jo phokhŏ.’ 38Barasă b́ĕ amèai ge tòcò tcahtî lōwa aphokhŏ nu, cò d́òhlè lōwa gōjo, ‘Ajo dèbwè ḿî agā hta apa ale. Le, gè̄ mèthĭ cè kha, kîd́ò̆ gī nib́èkò̆ cè è̆ dèila.’ 39Cô pô hwă lōwa, za saphlòḿĭ lōwa thobiscige akhlŏ, kî zè mèthĭ tèpwè lōwa.

40“Mègōnu d́ō, b́ĕ thobiscige ab́icè gō doge nu, zè gè mèkò̆ amèai ge tòcò cadè̄?”

41Cè tòcò d́ò lōwa, “Zè gè̄ mèthĭmèhlè̆mè̄kò̆ bija akî̆kkè anu tòcò, kî ci ki ilakò̆ bija alewe tòcò mèa i thobiscige, htè b́ĕ akhîagla b́è, aki ikò̆ cè dèthè athwè̆ tòcò nu.”

42Jezŭ d́ò cè tòcò, “Thĭ da phab́è Cè Tcahtĭ abu dèjî̄b́è ajo taplă ńò ā?

‘Lo htè ab́òhta hi tòcò htîphlòḿĭ tod́ŏ nu,

phî̆htagè hi anebu akăd́ò̆.

B́ĭcè mègè dè ajo;

kîd́ò̆ aḿî dè amò htèdômô̄dahmă d́ŏ wa gādŭbu nu dimi,’ atò d́ò do ńò ā?

43“Mègōnu d́ō, Jò d́ò̆sa thĭ, Kib́ĭcè Ahtĭage kèb́è phîthĭwīkò̆ thĭ ò, kî akè b́è ilakò̆ bija da thara, htè aige dèathwè̆ tòcò nu.

44“Kîd́ò̆ bija alakhu lo tod́ŏ akho dèbwè akhwi gè htè̆dū îklôîklèkò̆; kî lo ajo gā ladē akho dèbwè agè mè prîmèprôkò̆ cè.” 45Kîd́ò̆ b́ĕ Phŭgido kî Pharizè̆pho tòcò thîhè̆b́è hwă zè dègèlè tòcò nu, zi nigu phlò̆gè htè Jezŭ d́ò cè tòcò lò nu. 46Kîd́ò̆ cè tòcò kŏhtakjala cab́ô̆htè zò gò̄ phò lōwa nu, barasă zi scisăni bija aboahò ale, manè̄ kòd́òdo dō, bija lè̄ Jezŭ acab́ô̆ Prò̆fèt dèbwè akhoacè̆ nu.

Currently Selected:

Mattĕo 21: GRNT21

Highlight

Copy

Want to have your highlights saved across all your devices? Sign up or sign in

Geba Roman New Testament © Bible Society of Myanmar, 2021.

Learn More About Geba Roman New Testament