ယ︀ေႃးꩭၢꩫ︀် 10
10
ပ︀ုင︀်ၵ︀ိူင︀်ႈၵ︀ၢမ︀်းၸ︀ူႛလ︀ီင︀်ႇပ︀ူႇ
1ꩭႃလ︀ိူင︀်ႈ ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈꩬ︀ိုဝ်ႈꩰဝႃႈက︀ွတ︀်။ က︀ူဝ်ႇဢ︀ꩫ︀်ႈၵ︀ွက︀်ႉပ︀ူႇမ︀ႆ︀ႛ လ︀ုက︀်ႉတ︀ၢင︀်းပ︀တ︀ူႈမ︀ႆ︀ႛ မ︀ဝ်ၵ︀ဝ်ႛꩬ︀ီ လ︀ုက︀်ႉတ︀ၢင︀်တ︀ီႈမ︀ႆ︀ႛမ︀ွင︀်ၵ︀ဝ်ႛꩫ︀ႆ︀ႇယ︀ႃႇ ၸ︀ူႛလ︀ၢက︀်ႉမ︀ဝ်ꩡ︀ႂ်ႈက︀ီး က︀ူꩫ︀်းꩡ︀ူꩫ︀်ႈꩫ︀မ︀်။ 2က︀ူဝ်ႇဢ︀ꩫ︀်ႈ လ︀ုက︀်ႉတ︀ၢင︀်းပ︀တ︀ူႈမ︀ႆ︀ႛၵ︀ဝ်ႛꩫ︀ႆ︀ႇယ︀ႃႇ ၸ︀ူႛလ︀ီင︀်ႇပ︀ူႇꩫ︀မ︀်။ 3ၸ︀ူႛလ︀ီင︀်ႇပ︀ူႇမ︀ႆ︀ႛယ︀ႃႇ ၸ︀ူႛပ︀ႂ်ႇတ︀ၢင︀်းပ︀တ︀ူႈꩫ︀ႆ︀ႇ တ︀ၢင︀်းပ︀တ︀ူႈပ︀ူတ︀်ꩭႂ်ႛဢ︀ူ။ ပ︀ူႇꩫ︀ႆ︀ႇၵ︀ဝ်က︀ေႃႇ ꩬ︀ီင︀်ၸ︀ူႛလ︀ီင︀်ႇပ︀ူႇထွမ︀်က︀ꩫ︀်ႈဢ︀ူ။ ၸ︀ူႛလ︀ီင︀်ႇပ︀ူႇက︀ေႃႇ ပ︀ူႇꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈꩡ︀ိုဝ်ႈၵ︀ဝ်ၸ︀ူႛꩡ︀ဝ်ႛꩭွင︀်ႇꩬ︀ီ လ︀ုက︀်ႉၵ︀ွက︀်ႉမ︀ႆ︀ႛ ဢ︀ဝ်ႈဢ︀ွက︀်က︀ႃဢ︀ူ။ 4မ︀ိူဝ်ႈပ︀ူႇမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ ဢ︀ွꩫ︀်ႈဢ︀ွက︀်ꩫ︀ႆ︀ႇ က︀ꩫ︀်ႛꩫ︀ႃႛပ︀ူႇꩫ︀ႆ︀ႇၵ︀ဝ်မ︀ႆ︀ႛ ဢ︀ွꩫ︀်ႈက︀ႃꩬ︀ီ ပ︀ူႇꩫ︀ႆ︀ႇၵ︀ဝ်က︀ေႃႇ က︀ꩫ︀်ႛလ︀င︀်မ︀ꩫ︀်းမ︀ႆ︀ႛ ꩡ︀ွမ︀်းက︀ꩫ︀်ႈဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ီင︀်မ︀ꩫ︀်းမ︀ႆ︀ႛ ပ︀ူႇꩫ︀ႆ︀ႇၵ︀ဝ်တ︀ွင︀်းꩬ︀ီꩫ︀မ︀်။ 5က︀ꩫ︀်ႛလ︀င︀်ပ︀ိူꩫ︀်ႈတ︀ၢင︀်က︀ူဝ်ႇမ︀ႆ︀ႛယ︀ႃႇ ပ︀ူႇꩫ︀ႆ︀ႇၵ︀ဝ် မ︀ဝ်ꩡ︀ွမ︀်းꩬ︀ေႇမ︀ဝ်က︀ႃး ꩬ︀ီင︀်မ︀ꩫ︀်းမ︀ႆ︀ႛက︀ေႃႇ မ︀ဝ်မ︀ွꩫ︀်ႛꩫ︀ႆ︀ႇꩬ︀ီ လ︀ုက︀်ႉမ︀ꩫ︀်းမ︀ႆ︀ႛ တ︀ီပ︀ႆ︀ၢႈဢ︀ွက︀်က︀ႃꩫ︀မ︀်” ꩫ︀ဝꩫ︀်ႇ။ 6ꩡ︀ဝ်ႛယ︀ေꩬ︀ု ပ︀ုင︀်ၵ︀ိူင︀်ႈၵ︀ၢမ︀်းꩫ︀ႆ︀ႇဝႃႈꩫ︀က︀ေႃႇ က︀ူꩫ︀်းꩫ︀ႆ︀ႇၵ︀ဝ်ယ︀ႃႇ တ︀ီႈပ︀ွင︀်ပ︀ုင︀်ၵ︀ိူင︀်ႈၵ︀ၢမ︀်းꩫ︀ႆ︀ႇꩵ︀ႈတ︀ွင︀်း။
လ︀ွင︀်ႈꩡ︀ဝ်ႛယ︀ေꩬ︀ု ၸ︀ူႛလ︀ီင︀်ႇပ︀ူႇဢ︀ꩫ︀်ႈꩫ︀ီႈ
7င︀ႆ︀းꩬ︀ီ မ︀ꩫ︀်းꩡ︀ဝ်ႛဝႃႈဢ︀ိက︀်ꩫ︀ႆ︀ႇ “က︀ဝ်ႈꩬ︀ိုဝ်ႈꩰဝႃႈက︀ွတ︀်။ က︀ဝ်ႈယ︀ႃႇ တ︀ၢင︀်းပ︀တ︀ူႈ ဢ︀ꩫ︀်ႈပ︀ူႇၵ︀ဝ်ႛꩫ︀က︀ꩫ︀်ႈꩫ︀မ︀်။ 8က︀ူဝ်ႇဢ︀ꩫ︀်ႈက︀ꩫ︀်ႛꩫ︀ႃႛက︀ဝ်ႈမ︀ႆ︀ႛ မ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း ၸ︀ူႛလ︀ၢက︀်ႉꩫ︀ႆ︀ႇၵ︀ဝ် က︀ူꩫ︀်းꩡ︀ူꩫ︀်ႈꩫ︀ႆ︀ႇၵ︀ဝ်ꩫ︀ႆ︀ၢႈꩫ︀မ︀်။ ပ︀ူႇꩫ︀ႆ︀ႇၵ︀ဝ်က︀ေႃႇ ꩬ︀ီင︀်ၵ︀ဝ်မ︀ႆ︀ႛ ꩵ︀ႈထွမ︀်ꩵ︀ႈꩡ︀ွမ︀်း။ 9က︀ဝ်ႈယ︀ႃႇ တ︀ၢင︀်းပ︀တ︀ူႈꩫ︀က︀ꩫ︀်ႈꩫ︀မ︀်။ က︀ူဝ်ႇဢ︀ꩫ︀်ႈလ︀ုက︀်ႉက︀ဝ်ႈမ︀ႆ︀ႛ ၵ︀ဝ်ႛမ︀ႃးꩫ︀ႆ︀ႇ ၵ︀ဝ်ယ︀ႃႇ ၸ︀ေးက︀ၢင︀်းဢ︀ူ။ ၵ︀ဝ်ယ︀ႃႇ လ︀ုက︀်ႉက︀ဝ်ႈမ︀ႆ︀ႛ ၵ︀ဝ်ႛၵ︀ဝ်ႛဢ︀ွက︀်ꩰꩬ︀ီ တ︀ီႈလ︀ႃႈꩫ︀ႆ︀ႛꩭꩫ︀် ဢ︀ူ။ 10ၸ︀ူႛလ︀ၢက︀်ႉယ︀ႃႇ ꩭၢင︀်းလ︀ၢက︀်ႉ၊ ꩭၢင︀်းဢ︀ဝ်ႈတ︀ႆ︀ၢႈ၊ ꩭၢင︀်းဢ︀ဝ်ႈလ︀ူႇပ︀ႅက︀်ႉꩫ︀ႆ︀ၢႈꩫ︀မ︀်မ︀ႃးꩫ︀ႆ︀ႇ။ က︀ဝ်ႈယ︀ႃႇ ꩭႂ်ႛပ︀ူဝ်းꩬ︀ူ ဢ︀ꩬ︀ၢက︀်ႉꩫ︀ိပ︀်ꩫ︀ႆ︀ၢႈꩬ︀ေႇမ︀ဝ်က︀ႃး ꩭႂ်ႛပ︀ူဝ်းဢ︀ꩬ︀ၢက︀်ႉ ဢ︀ꩫ︀်ႈတ︀ီမ︀်ႈက︀ုမ︀်ꩫ︀ႆ︀ႛꩫ︀ႆ︀ႇꩫ︀မ︀် မ︀ႃးꩫ︀ႆ︀ႇ။ 11က︀ဝ်ႈယ︀ႃႇ ၸ︀ူႛလ︀ီင︀်ႇပ︀ူႇဢ︀ꩫ︀်ႈꩫ︀ီႈꩫ︀မ︀်။ ꩡ︀ႃႇꩭၢင︀်းပ︀ူႇꩫ︀ႆ︀ႇၵ︀ဝ် ဢ︀ꩬ︀ၢက︀်ႉက︀ဝ်ႈၸ︀ူႛꩡ︀ဝ်ႛတ︀မ︀ိူင︀်းၵ︀ႂ်ႈꩭႂ်ႛဢ︀ူ။ 12က︀ူꩫ︀်းꩡ︀ၢင︀်ႛယ︀ႃႇ ၸ︀ူႛလ︀ီင︀်ႇပ︀ူႇက︀ေႃႇမ︀ဝ်ꩡ︀ႂ်ႈ၊ ꩡ︀ဝ်ႛပ︀ူႇက︀ေႃႇမ︀ဝ်ꩡ︀ႂ်ႈꩫ︀ႆ︀ႇꩬ︀ီ ၸ︀ၢꩫ︀်းထွႆ︀မ︀ႃးက︀ီး ပ︀ူႇꩫ︀ႆ︀ႇၵ︀ဝ်မ︀ႆ︀ႛ ၵ︀ွတ︀်ဝႆ︀ႇꩬ︀ီ ပ︀ႆ︀ၢႈက︀ႃဢ︀ူ။ ၸ︀ၢꩫ︀်းထွႆ︀က︀ေႃႇမ︀ႃးꩬ︀ီ ပ︀ူႇꩫ︀ႆ︀ႇၵ︀ဝ်မ︀ႆ︀ႛ ꩬ︀ႅဝ်ႛက︀ၢပ︀်ႉꩬ︀ီ ပ︀ူႇꩫ︀ႆ︀ႇၵ︀ဝ်မ︀ႆ︀ႛ ဢ︀ဝ်ႈၸ︀ူင︀်ႇပ︀ႆ︀ၢႈက︀ႃမ︀ူတ︀်ဢ︀ူ။ 13က︀ူꩫ︀်းꩡ︀ၢင︀်ႛယ︀ႃႇ ꩡ︀ဝ်ႛမ︀ဝ်ꩡ︀ႂ်ႈꩫ︀ႆ︀ႇꩬ︀ီ ပ︀ူႇꩫ︀ႆ︀ႇၵ︀ဝ်မ︀ႆ︀ႛ ꩵ︀ႈက︀ုမ︀်ႇ။ ပ︀ႆ︀ၢႈက︀ႃဢ︀ူ။ 14-15က︀ဝ်ႈယ︀ႃႇ ၸ︀ူႛလ︀ီင︀်ႇပ︀ူႇဢ︀ꩫ︀်ႈꩫ︀ီႈꩫ︀မ︀်။ က︀ဝ်ႈမ︀ႆ︀ႛ ပ︀ူဝ်က︀ဝ်ႈတ︀ွင︀်းꩬ︀ီ က︀ဝ်ႈက︀ေႃႇ ပ︀ူဝ်ႈက︀ဝ်ႈမ︀ႆ︀ႛတ︀ွင︀်းဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ပ︀ူႇက︀ဝ်ႈꩫ︀ႆ︀ႇၵ︀ဝ်မ︀ႆ︀ႛ က︀ဝ်ႈတ︀ွင︀်းꩬ︀ီ ၵ︀ဝ်က︀ေႃႇက︀ဝ်ႈမ︀ႆ︀ႛတ︀ွင︀်းဢ︀ူ။ က︀ဝ်ႈယ︀ႃႇ ꩡ︀ႃႇꩭၢင︀်းပ︀ူႇꩫ︀ႆ︀ႇၵ︀ဝ် ၵ︀ွတ︀်ဢ︀ꩬ︀ၢက︀်ႉပ︀ီꩫ︀်ႈဢ︀ူ။ 16က︀ဝ်ႈမ︀ႆ︀ႛပ︀ူႇတ︀ၢင︀်တ︀ူဝ်ႈ ဢ︀ꩫ︀်ႈꩫ︀ႂ်းၸ︀ုင︀်ပ︀ူႇꩫ︀ႆ︀ႇမ︀ႆ︀ႛ မ︀ဝ်လ︀ွေႛꩫ︀ႆ︀ႇၵ︀ဝ်က︀ေႃႇ ယ︀င︀်းဢ︀ိက︀်ဢ︀ူ။ ပ︀ူႇဢ︀မ︀ႂ်းၵ︀ဝ်မ︀ႆ︀ႛ က︀ဝ်ႈဝႃႈဢ︀ဝ်ႈတ︀ုမ︀်ႈမ︀ႃးဢ︀ူ။ ၵ︀ဝ်က︀ေႃႇ ꩬ︀ီင︀်က︀ဝ်ႈထွမ︀်ꩬ︀ီ တ︀ီပ︀ီꩫ︀်ႈပ︀ူႇၸ︀ုင︀်လ︀ိဝ်ႈမ︀ႃးꩫ︀မ︀်။ ၸ︀ူႛလ︀ီင︀်ႇပ︀ူႇက︀ေႃႇ တ︀ီပ︀ီꩫ︀်ႈပ︀ႃးလ︀ိဝ်ႈꩫ︀ႆ︀ၢႈꩫ︀မ︀်။ 17က︀ဝ်ႈယ︀ႃႇ ꩭႂ်ႛပ︀ူဝ်းဢ︀ꩬ︀ၢက︀်ႉꩫ︀ႆ︀ႛပ︀ွက︀်ႉꩫ︀ႆ︀ႇ ၵ︀ွတ︀်ဢ︀ꩬ︀ၢက︀်ႉပ︀ီꩫ︀်ႈꩫ︀ႆ︀ႇꩬ︀ီ က︀ဝ်ႈမ︀ႆ︀ႛ ပ︀ူဝ်က︀ဝ်ႈꩭၢက︀်ႉဢ︀ူ။ 18ဢ︀ꩬ︀ၢက︀်ႉက︀ဝ်ႈမ︀ႆ︀ႛ ၸ︀ႂ်က︀ေႃႇ ဢ︀ဝ်ႈꩵ︀ႈꩫ︀ႆ︀ႛ။ က︀ဝ်ႈၸ︀ူႛꩡ︀ဝ်ႛꩫ︀မ︀် ၵ︀ွတ︀်ꩫ︀ႆ︀ႇ။ က︀ဝ်ႈမ︀ႆ︀ႛ ဢ︀ၵ︀ၢင︀်းဢ︀ꩫ︀်ႈၵ︀ွတ︀်ဢ︀ꩬ︀ၢက︀်ႉတ︀မ︀ိူင︀်း ဢ︀ၵ︀ၢင︀်းဢ︀ꩫ︀်ႈဢ︀ဝ်ႈဢ︀ꩬ︀ၢက︀်ႉပ︀ွက︀်ႉꩫ︀ႆ︀ႇတ︀မ︀ိူင︀်း ယ︀င︀်းဢ︀ူ။ က︀ဝ်ႈမ︀ႆ︀ႛ ပ︀ူဝ်က︀ဝ်ႈꩡ︀ႂ်ႇꩫ︀ႆ︀ႇ ꩭၢင︀်းꩭီတ︀်ဢ︀ꩫ︀်ႈꩫ︀ႆ︀ႇꩫ︀မ︀်” ꩫ︀ဝꩫ︀်ႇ။ 19ꩡ︀ဝ်ႛယ︀ေꩬ︀ု ဝႃႈင︀ႆ︀းꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ် ꩡ︀ႂ်ႈက︀ၢက︀်ႉက︀ႃက︀ꩫ︀်ႈပ︀ွက︀်ႉဢ︀ူ။ 20က︀ူꩫ︀်းလ︀ႆ︀ၢက︀ူဝ်ႇယ︀ႃႇ “မ︀ꩫ︀်းမ︀ႆ︀ႛ ၸ︀ီꩭၢႆ︀ႇလ︀ွေႛဢ︀ူ။ မ︀ꩫ︀်းယ︀ႃႇ ၸ︀ူႛမ︀ႃႛꩫ︀မ︀်။ ꩭၢင︀်းက︀ꩬ︀င︀်ꩫ︀ႆ︀ ၵ︀ၢမ︀်းမ︀ꩫ︀်းထွမ︀်ꩫ︀ႆ︀ႇ” ꩫ︀ဝꩫ︀်ႇ။ 21ꩫ︀ႆ︀ႇꩫ︀က︀ေႃႇ တ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ “က︀ူꩫ︀်းဢ︀ꩫ︀်ႈၸ︀ီꩭၢႆ︀ႇလ︀ွေႛယ︀ႃႇ ၵ︀ၢမ︀်းၸ︀ꩫ︀်းꩫ︀ႆ︀ႇ ꩭိုဝ်လ︀ိုဝ်က︀ေႃႇဝႃႈꩵ︀ႈꩫ︀ႆ︀ႛ။ မ︀ꩫ︀်းမ︀ႆ︀ႛ ၸ︀ီꩭၢႆ︀ႇလ︀ွေႛက︀ီး ၸ︀ူႛတ︀ႃႈမ︀ွတ︀်ꩫ︀ႆ︀ႇၵ︀ဝ်မ︀ႆ︀ႛ မ︀ꩫ︀်း ဢ︀ဝ်ႈꩭꩫ︀်ꩭႂ်ႛꩵ︀ႈꩫ︀ႆ︀ႛပ︀ိူင︀်ႈလ︀ူင︀်” ꩫ︀ဝꩫ︀်ႇ။
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ က︀ျူးꩫ︀ႆ︀ႇၵ︀ဝ်ပ︀ႆ︀ၵ︀ွတ︀်
22မ︀ိူဝ်ႈꩫ︀ၢဝ်ဝꩫ︀်းလ︀ိူင︀်ႈ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛ ပ︀ွႆ︀းလ︀ူꩡ︀ွင︀်းၿိက︀်ႉမ︀ၢꩫ︀် ꩭီတ︀်ꩬ︀ီဢ︀ူဢ︀ူ။ 23ꩡ︀ဝ်ႛယ︀ေꩬ︀ုယ︀ႃႇ ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ꩡ︀ၢꩫ︀်းꩬ︀ေႃလ︀မ︀ုꩫ︀်ꩫ︀ꩫ︀ႆ︀ႇမ︀ႆ︀ႛ ၸ︀ႆ︀ၢႛꩬ︀ၢင︀်းက︀ႅမ︀်ꩬ︀ီဢ︀ူဢ︀ူ။ 24မ︀ိူဝ်ႈဢ︀မ︀ႂ်း ၸ︀ုင︀်က︀ူꩫ︀်းꩫ︀ႆ︀ႇၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛၵ︀ုမ︀်ႇꩬ︀ီ “မ︀ႂ်းပ︀ီꩫ︀်ႈၸ︀ႂ်ꩫ︀ꩫ︀ႆ︀ႇ ꩭီတ︀်က︀ꩬ︀င︀်ꩫ︀ႆ︀တ︀ူက︀်ꩡ︀ိူမ︀်ႈင︀ႆ︀ႚက︀ေႃႇမ︀ဝ်ဝႃႈꩡ︀ုꩫ︀်ႈꩰꩫ︀ႆ︀ႇ။ မ︀ႂ်းမ︀ေꩬ︀ိယ︀ꩫ︀မ︀်ꩫ︀က︀ီး တ︀ူႈမ︀ႆ︀ႛဝႃႈꩡ︀ုꩫ︀်ႈꩰမ︀လ︀ႃး” ꩫ︀ဝꩫ︀်ႇ။ 25ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈဝႃႈယ︀ဝ်ႇꩰ။ ꩬ︀ူꩫ︀မ︀်မ︀ဝ်ယ︀ုမ︀်ꩫ︀ႆ︀ႇ။ ဢ︀ꩫ︀်ႈꩫ︀င︀်ပ︀ူဝ်က︀ဝ်ႈ ပ︀ူင︀်ႈဢ︀ၵ︀ၢင︀်းꩬ︀ီ က︀ဝ်ႈꩭီတ︀်မ︀ႃးꩫ︀ႆ︀ႇၵ︀ဝ်ယ︀ႃႇ က︀ဝ်ႈပ︀ီꩫ︀်ႈၸ︀ႂ်ꩫ︀ꩫ︀ႆ︀ႇ ပ︀ျႃးꩬ︀ၢက︀်ႉꩬ︀ေꩬ︀ီဢ︀ူꩫ︀မ︀်။ 26ꩬ︀ူယ︀ႃႇ ပ︀ူႇက︀ဝ်ႈမ︀ဝ်ꩡ︀ႂ်ႈꩬ︀ီ ၵ︀ၢမ︀်းက︀ဝ်ႈတ︀ီမ︀ဝ်ယ︀ုမ︀်ꩬ︀ႃး။ 27ပ︀ူႇက︀ဝ်ႈၵ︀ဝ်ယ︀ႃႇ ၵ︀ၢမ︀်းက︀ဝ်ႈထွမ︀်ဢ︀ူ။ က︀ဝ်ႈက︀ေႃႇၵ︀ဝ်မ︀ႆ︀ႛတ︀ွင︀်းꩬ︀ီ ၵ︀ဝ်က︀ေႃႇ က︀ꩫ︀်ႛလ︀င︀်က︀ဝ်ႈမ︀ႆ︀ႛ ꩡ︀ွမ︀်းက︀ꩫ︀်ႈဢ︀ူ။ 28ၵ︀ဝ်မ︀ႆ︀ႛ က︀ဝ်ႈဢ︀ꩬ︀ၢက︀်ႉထႃဝရ︀ꩭႂ်ႛꩫ︀ႆ︀ႇꩬ︀ီ ၵ︀ဝ်မ︀ိူဝ်ႈလ︀ႂ်ႈက︀ေႃႇ ꩵ︀ႈꩫ︀ႆ︀ႛလ︀ူႇꩬ︀ုမ︀်း။ ၵ︀ဝ်မ︀ႆ︀ႛ ၸ︀ႂ်က︀ေႃႇ လ︀ုက︀်ႉမ︀ိုဝ်းက︀ဝ်ႈမ︀ႆ︀ႛ ꩭိမ︀်ဢ︀ဝ်ႈꩵ︀ႈꩫ︀ႆ︀ႛ။ 29ပ︀ူဝ်က︀ဝ်ႈဢ︀ꩫ︀်ႈက︀ဝ်ႈမ︀ႆ︀ႛ ပ︀ူႇဢ︀မ︀ႂ်းၵ︀ဝ်ဢ︀ၢပ︀်ႉꩭႂ်ႛꩫ︀ႆ︀ႇ ꩫ︀ိူဝ်တ︀င︀်းမ︀ိူင︀်းမ︀ႆ︀ႛ ယ︀ႂ်မ︀ႅတ︀်ႉꩬ︀ႃဢ︀ူ။ င︀ႆ︀းꩬ︀ီၸ︀ႂ်က︀ေႃႇ ပ︀ူႇဢ︀ꩫ︀်ႈꩫ︀ႆ︀ႇၵ︀ဝ်မ︀ႆ︀ႛ လ︀ုက︀်ႉꩫ︀ႂ်းမ︀ိုဝ်းပ︀ူဝ်က︀ဝ်ႈမ︀ႆ︀ႛ ꩭိမ︀်ဢ︀ဝ်ႈꩵ︀ႈꩫ︀ႆ︀ႛ။ 30က︀ဝ်ႈꩫ︀ၵ︀ႃပ︀ူဝ်က︀ဝ်ႈယ︀ႃႇ ပ︀ႃးလ︀ိဝ်ႈꩫ︀ႆ︀ၢႈꩫ︀မ︀်” ꩫ︀ဝꩫ︀်ႇ။
31ꩫ︀ႆ︀ႇမ︀ႆ︀ႛ က︀ူꩫ︀်းꩫ︀ႆ︀ႇၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈꩭိꩫ︀်ꩬ︀ိင︀်းက︀ွတ︀်ꩫ︀ꩬ︀ီ က︀ီပ︀်ꩭိꩫ︀်က︀ꩫ︀်ႈပ︀ွက︀်ႉဢ︀ူ။ 32ꩡ︀ဝ်ႛယ︀ေꩬ︀ုယ︀ႃႇ “ပ︀ူဝ်က︀ဝ်ႈꩡ︀ႂ်ႇꩬ︀ီ လ︀ွင︀်ႈꩫ︀ီႈꩫ︀ႆ︀ႇၵ︀ဝ် က︀ဝ်ႈꩭီတ︀်မ︀ႃးယ︀ဝ်ႇ။ ꩫ︀ႂ်းဢ︀မ︀ႂ်းၵ︀ဝ်မ︀ႆ︀ႛ လ︀ႆ︀ၢးပ︀ိူဝ်ႈလ︀ွင︀်ႈဢ︀လ︀ႂ်ႈꩫ︀ႆ︀ ꩬ︀ူက︀ဝ်ႈမ︀ႆ︀ႛ ꩭိꩫ︀်ၵ︀ႂ်ႈꩬ︀ိင︀်းꩫ︀ႆ︀ႇ” ꩫ︀ဝꩫ︀်ႇ။ 33ၵ︀ဝ်ယ︀ႃႇ “က︀ွပ︀်ႉပ︀ိူဝ်ႈꩭီတ︀်လ︀ွင︀်ႈꩫ︀ီႈꩬ︀ီꩵ︀ႈꩡ︀ႂ်ႈ။ မ︀ႂ်းꩫ︀ႆ︀ႇ ပ︀ီꩫ︀်ႈက︀ူꩫ︀်းတ︀င︀်းꩬ︀ၢင︀်းꩬ︀ီက︀ေႃႇ ၸ︀ြႃးꩫ︀ꩬ︀ီဝႃႈꩫ︀ႆ︀ႇ။ မ︀ႂ်ၵ︀ၢမ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ဝ်ꩫ︀ၢပ︀်ႉမ︀ဝ်ယ︀မ︀်ႈꩫ︀ႆ︀ႇၵ︀ဝ် တ︀ၢꩫ︀်ႛꩬ︀ီꩬ︀ႃး မ︀ႂ်းမ︀ႆ︀ႛ ꩭိꩫ︀်ၵ︀ႂ်ႈꩬ︀ိင︀်းꩫ︀ႆ︀ႇ” ꩫ︀ဝꩫ︀်ႇ။ 34မ︀ꩫ︀်းꩡ︀ဝ်ႛယ︀ႃႇ “က︀ျမ︀်းꩬ︀ိꩫ︀်ꩬ︀ူမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ “ꩬ︀ူၸ︀ြႃးꩫ︀မ︀်” ꩫ︀ꩬ︀ီဝႃႈဝႆ︀ႇဢ︀ူ။ 35ဢ︀ꩫ︀်ႈက︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇꩫ︀ႆ︀ႇၵ︀ဝ် မ︀ိူဝ်ႈလ︀ႂ်ႈက︀ေႃႇ ꩡ︀ႂ်ႈဢ︀ူꩫ︀ꩫ︀ႆ︀ႇ ꩭဝ်းတ︀ွင︀်းဢ︀ူ။ က︀ျမ︀်းလ︀ိက︀်ႉမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူꩫ︀်းဢ︀ꩫ︀်ႈ ထွမ︀်ၵ︀ၢမ︀်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ်မ︀ႆ︀ႛ “ꩬ︀ူၸ︀ြႃးꩫ︀မ︀်” ꩫ︀ꩬ︀ီဝႃႈဝႆ︀ႇဢ︀ူ။ 36ပ︀ူဝ်က︀ဝ်ႈလ︀ိူက︀်ႉင︀ႆ︀းပ︀ွႆ︀ꩡ︀ႂ်ႇꩫ︀ႆ︀ႇꩬ︀ီ က︀ဝ်ႈမ︀ိူင︀်းက︀ၢင︀်ႈမ︀ႆ︀ႛ မ︀ႃးꩫ︀မ︀်။ “က︀ဝ်ႈပ︀ီꩫ︀်ႈၸ︀ူႛလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်” ꩫ︀ꩬ︀ီ က︀ဝ်ႈဝႃႈꩫ︀ႆ︀ႇမ︀ႆ︀ႛ ဢ︀ꩫ︀်ႈၸ︀ိတ︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်ꩫ︀ꩬ︀ီ ꩭိုဝ်လ︀ိုဝ်ꩬ︀ီ ꩬ︀ူဝႃႈꩫ︀ႆ︀။ 37ꩬ︀င︀်ဝႃႈက︀ဝ်ႈ ဢ︀ꩫ︀်ႈပ︀ူဝ်က︀ဝ်ႈ ၵ︀ႂ်ႈꩭႂ်ႛꩭီတ︀်ꩫ︀ႆ︀ႇၵ︀ဝ် မ︀ဝ်ꩭီတ︀်ꩫ︀မ︀်ꩫ︀က︀ီး က︀ဝ်ႈမ︀ႆ︀ႛပ︀ီယ︀ုမ︀်။ 38ꩫ︀ႆ︀ႇꩫ︀က︀ေႃႇ ꩬ︀င︀်ဝႃႈꩭီတ︀်က︀ီး က︀ဝ်ႈမ︀ႆ︀ႛမ︀ဝ်ယ︀ုမ︀်ꩫ︀က︀ေႃႇ ဢ︀ꩫ︀်ႈက︀ဝ်ႈꩭီတ︀်ꩫ︀ႆ︀ႇၵ︀ဝ်မ︀ႆ︀ႛ ယ︀ုမ︀်တ︀ႃႉ။ င︀ႆ︀းက︀ီးꩬ︀ိုင︀် ပ︀ူဝ်က︀ဝ်ႈယ︀ႃႇ က︀ꩫ︀်ႛꩫ︀ႂ်းက︀ဝ်ႈမ︀ႆ︀ႛ ꩭူမ︀်ႈၵ︀ိင︀်းꩬ︀ီဢ︀ူꩫ︀က︀ꩫ︀်ႈ က︀ဝ်ႈက︀ေႃႇ က︀ꩫ︀်ႛꩫ︀ႂ်းပ︀ူဝ်က︀ဝ်ႈမ︀ႆ︀ႛ ꩭူမ︀်ႈဢ︀ူꩫ︀မ︀်ꩫ︀ꩫ︀ႆ︀ႇမ︀ႆ︀ႛ ꩬ︀ူတ︀ီတ︀ွင︀်းမ︀ႃးꩬ︀ႃး” ꩫ︀ဝꩫ︀်ႇ။ 39ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ မ︀ꩫ︀်းꩡ︀ဝ်ႛမ︀ႆ︀ႛ ꩬ︀ၢင︀်ꩬ︀ႅဝ်ႛက︀ꩫ︀်ႈပ︀ွက︀်ႉဢ︀ူ။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛယ︀ႃႇ လ︀ုက︀်ႉမ︀ိုဝ်းၵ︀ဝ်မ︀ႆ︀ႛင︀ိူင︀်ႇꩬ︀ီ က︀ျွႃးက︀ႃဢ︀ူ။ 40ဝႆ︀ၢးဢ︀မ︀ႂ်း ꩡ︀ဝ်ႛယ︀ေꩬ︀ု ၸ︀ၢက︀်ႉꩫ︀မ︀်ႇယ︀ေႃတ︀ၢꩫ︀် တ︀ီႈဢ︀ꩫ︀်ႈꩬ︀ြႃယ︀ေႃးꩭၢꩫ︀် ꩭႂ်ႛမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇမ︀ႃးမ︀ႆ︀ႛ ၵ︀ၢမ︀်ႛက︀ႃပ︀ွက︀်ႉꩬ︀ီ ဢ︀မ︀ႂ်းမ︀ႆ︀ႛဢ︀ူဢ︀ူ။ 41က︀ူꩫ︀်းဢ︀ၢꩫ︀်တ︀ၢꩫ︀် မ︀ꩫ︀်းꩡ︀ဝ်ႛမ︀ႆ︀ႛ မ︀ႃးက︀ꩫ︀်ႈဢ︀ူ။ ၵ︀ဝ်ယ︀ႃႇ “ꩬ︀ြႃယ︀ေႃးꩭၢꩫ︀်ယ︀ႃႇ လ︀ႆ︀ၢးꩫ︀မ︀ိတ︀်ႉꩫ︀ႆ︀ႇၵ︀ဝ် ꩵ︀ႈပ︀ျႃးမ︀ႃး။ ꩫ︀ႆ︀ႇꩫ︀က︀ေႃႇ လ︀ွင︀်ႈက︀ူဝ်ႇꩫ︀ႆ︀ႇ ဢ︀ꩫ︀်ႈꩬ︀ြႃယ︀ေႃးꩭၢꩫ︀်ဝႃႈမ︀ႃးꩫ︀ႆ︀ႇၵ︀ဝ် တ︀င︀်းမ︀ိူင︀်းꩡ︀ႂ်ႈဢ︀ူ။ ꩥ︀ႃးဢ︀ူ” ꩫ︀ꩬ︀ီဝႃႈက︀ꩫ︀်ႈဢ︀ူ။ 42င︀ႆ︀းꩬ︀ီ က︀ူꩫ︀်းဢ︀ꩫ︀်ႈဢ︀မ︀ႂ်းမ︀ႆ︀ႛယ︀င︀်းꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။
Currently Selected:
ယ︀ေႃးꩭၢꩫ︀် 10: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
