ယ︀ေႃးꩭၢꩫ︀် 15
15
ꩡ︀ဝ်ႛယ︀ေꩬ︀ု ဢ︀ꩫ︀်ႈတ︀ူꩫ︀င︀်တ︀ူꩫ︀်ႛမ︀က︀်ꩡ︀ပ︀ႅတ︀်ႉ
1ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈယ︀ႃႇတ︀ူꩫ︀်ႛမ︀က︀်ꩡ︀ပ︀ႅတ︀်ႉꩫ︀က︀ꩫ︀်ႈꩫ︀မ︀်။ ပ︀ူဝ်က︀ဝ်ႈယ︀ႃႇ ၸ︀ူႛမ︀ိုင︀်ႇꩬ︀ူꩫ︀်ꩫ︀က︀ꩫ︀်ႈꩫ︀မ︀်။ 2မ︀ꩫ︀်းꩡ︀ဝ်ႛယ︀ႃႇ ၵ︀ႃႈက︀ဝ်ႈဢ︀ꩫ︀်ႈမ︀က︀်မ︀ဝ်ပ︀ီꩫ︀်ႈꩫ︀ႆ︀ႇၵ︀ဝ်မ︀ႆ︀ႛ လ︀ၢꩫ︀်းၵ︀ွတ︀်ꩬ︀ီ ၵ︀ႃႈဢ︀ꩫ︀်ႈမ︀က︀်ပ︀ီꩫ︀်ႈက︀ူႈၵ︀ႃႈမ︀ႆ︀ႛ ꩭႂ်ႛပ︀ူဝ်းမ︀က︀်ꩭွႆ︀ႇꩫ︀ႆ︀ႇ ꩡ︀ၢင︀်းꩭႂ်ႛဢ︀ူ။ 3ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩬ︀ူမ︀ႆ︀ႛဢ︀ဝ်ႈၵ︀ၢမ︀်းဢ︀ꩫ︀်ႈက︀ဝ်ႈဝႃႈꩫ︀ႆ︀ႇ ꩡ︀ၢင︀်းꩭႂ်ႛယ︀ဝ်ႇ။ 4ꩬ︀ူက︀ꩫ︀်ႛꩫ︀ႂ်းက︀ဝ်ႈမ︀ႆ︀ႛဢ︀ူတ︀ႃႉ။ က︀ဝ်ႈက︀ေႃႇ က︀ꩫ︀်ႛꩫ︀ႂ်းꩬ︀ူမ︀ႆ︀ႛၵ︀ိင︀်းက︀ွတ︀်။ ၵ︀ႃႈမ︀က︀်ꩡ︀ပ︀ႅတ︀်ႉꩫ︀ႆ︀ႇ တ︀ူꩫ︀်ႛမ︀ႆ︀ႛမ︀ဝ်ꩡ︀ပ︀်က︀ီး ပ︀ိူꩫ︀်ႈꩡ︀ဝ်ႛꩫ︀ႆ︀ၢႈမ︀က︀်ꩵ︀ႈပ︀ီꩫ︀်ႈ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩬ︀ူက︀ေႃႇက︀ꩫ︀်ႛꩫ︀ႂ်းက︀ဝ်ႈမ︀ႆ︀ႛမ︀ဝ်ဢ︀ူက︀ီး မ︀က︀်ပ︀ီꩫ︀်ႈꩵ︀ႈꩫ︀ႆ︀ႛ။ 5က︀ဝ်ႈယ︀ႃႇ တ︀ူꩫ︀်ႛမ︀က︀်ꩡ︀ပ︀ႅတ︀်ႉꩫ︀က︀ꩫ︀်ႈꩫ︀မ︀်။ ꩬ︀ူယ︀ႃႇၵ︀ႃႈꩫ︀က︀ꩫ︀်ႈꩫ︀မ︀်။ ꩬ︀ူတ︀င︀်းက︀ဝ်ႈက︀ၢင︀်းက︀ꩫ︀်ႈက︀ီး က︀ꩬ︀င︀်က︀ေႃႇꩵ︀ႈပ︀ီꩫ︀်ႈပ︀ေႇ။ က︀ူဝ်ႇဢ︀ꩫ︀်ႈက︀ꩫ︀်ႛꩫ︀ႂ်းက︀ဝ်ႈမ︀ႆ︀ႛဢ︀ူꩫ︀ႆ︀ႇယ︀ႃႇ က︀ဝ်ႈက︀ေႃႇက︀ꩫ︀်ႛꩫ︀ႂ်းမ︀ꩫ︀်းမ︀ႆ︀ႛၵ︀ိင︀်းꩫ︀ႆ︀ႇꩬ︀ီ မ︀က︀်ꩭွႆ︀ႇဢ︀ူ။ 6က︀ူဝ်ႇဢ︀ꩫ︀်ႈက︀ꩫ︀်ႛꩫ︀ႂ်းက︀ဝ်ႈမ︀ႆ︀ႛ မ︀ဝ်ဢ︀ူꩫ︀ႆ︀ႇယ︀ႃႇ ꩫ︀င︀်ၵ︀ႃႈမ︀ႆ︀ႇဢ︀ꩫ︀်ႈလ︀ၢꩫ︀်းၵ︀ွတ︀်ꩫ︀က︀ꩫ︀်ႈ တ︀ီꩭႅင︀်ႛꩭိဝ်က︀ႃꩫ︀မ︀်။ ၵ︀ႃႈမ︀ႆ︀ႇၸ︀ꩫ︀်းဢ︀မ︀ႂ်းꩫ︀ႆ︀ႇၵ︀ဝ်မ︀ႆ︀ႛယ︀ႃႇ က︀ူꩫ︀်းꩫ︀ႆ︀ႇၵ︀ဝ်ၸ︀ိဝ်ႛꩬ︀ီ တ︀ီꩬ︀ုမ︀်ၸ︀ႆ︀းၵ︀ွတ︀်ꩫ︀မ︀်။ 7ꩬ︀ူက︀ꩫ︀်ႛꩫ︀ႂ်းက︀ဝ်ႈမ︀ႆ︀ႛဢ︀ူက︀ီး ၵ︀ၢမ︀်းက︀ဝ်ႈက︀ေႃႇ က︀ꩫ︀်ႛꩫ︀ႂ်းꩬ︀ူမ︀ႆ︀ႛယ︀င︀်းꩬ︀ီ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဢ︀ꩫ︀်ႈꩫ︀င︀်ꩬ︀ူၵ︀ႂ်ႈယ︀ွꩫ︀်းꩫ︀ႆ︀ႇယ︀ွꩫ︀်းꩫ︀ႆ︀ႛဢ︀ူ။ မ︀ꩫ︀်းꩡ︀ဝ်ႛက︀ေႃႇ ဢ︀ꩫ︀်ႈꩫ︀င︀်ꩬ︀ူယ︀ွꩫ︀်းꩫ︀ႆ︀ႇꩭႂ်ႛဢ︀ူ။ 8ꩬ︀ူမ︀က︀်ဢ︀ၢꩫ︀်တ︀ၢꩫ︀်ပ︀ီꩫ︀်ႈက︀ီး ပ︀ီꩫ︀်ႈတ︀ပ︀ေးက︀ဝ်ႈꩫ︀မ︀်ꩫ︀ꩫ︀ႆ︀ႇပ︀ိူꩫ︀်ႈတ︀ွင︀်းꩬ︀ီ ပ︀ူဝ်က︀ဝ်ႈက︀ေႃႇ မ︀ူꩫ︀်ႈၸ︀ုင︀်းꩭိူဝ်ႈꩭိုင︀်းပ︀ိုင︀်းꩬ︀ႂ်ဢ︀ူ။ 9ꩫ︀င︀်က︀ဝ်ႈမ︀ႆ︀ႛ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩭၢက︀်ႉꩫ︀က︀ꩫ︀်ႈ ꩬ︀ူမ︀ႆ︀ႛက︀ဝ်ႈꩭၢက︀်ႉဢ︀ူ။ က︀ဝ်ႈမ︀ႆ︀ႛꩭၢက︀်ႉꩬ︀ီဢ︀ူတ︀ႃႉ။ 10ꩭႂ်ႛပ︀ူဝ်းက︀ဝ်ႈမ︀ႆ︀ႛ ပ︀ူဝ်က︀ဝ်ႈꩭၢက︀်ႉꩬ︀ီဢ︀ူꩫ︀ႆ︀ႇ ၵ︀ၢမ︀်းမ︀ꩫ︀်းꩡ︀ဝ်ႛမ︀ႆ︀ႛ က︀ဝ်ႈထွမ︀်ꩡ︀ွမ︀်းꩬ︀ီဢ︀ူꩫ︀မ︀်။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩭႂ်ႛပ︀ူဝ်းꩬ︀ူမ︀ႆ︀ႛက︀ဝ်ႈꩭၢက︀်ႉꩬ︀ီဢ︀ူꩫ︀ႆ︀ႇ ၵ︀ၢမ︀်းက︀ဝ်ႈထွမ︀်ꩡ︀ွမ︀်းꩬ︀ီဢ︀ူတ︀ႃႉ။ 11ꩫ︀င︀်က︀ဝ်ႈꩡ︀ူမ︀်းꩭုမ︀်ꩫ︀က︀ꩫ︀်ႈ ꩭႂ်ႛပ︀ူဝ်းꩬ︀ူꩡ︀ူမ︀်းꩭုမ︀်က︀ုမ︀်တ︀ီမ︀်ႈက︀ꩫ︀်ႈꩫ︀ႆ︀ႇ ၵ︀ၢမ︀်းꩫ︀ႆ︀ႇၵ︀ဝ်က︀ဝ်ႈဝႃႈမ︀ႃးယ︀ဝ်ႇ။ 12ꩫ︀င︀်က︀ဝ်ႈꩬ︀ူမ︀ႆ︀ႛꩭၢက︀်ႉꩫ︀က︀ꩫ︀်ႈ ꩬ︀ူက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈꩭၢက︀်ႉက︀ꩫ︀်ႈတ︀ႃႉ။ ဢ︀ꩫ︀်ႈꩫ︀ႆ︀ႇယ︀ႃႇꩬ︀ိꩫ︀်ဢ︀ꩫ︀်ႈက︀ဝ်ႈꩬ︀ွꩫ︀်ꩭႂ်ႛꩫ︀မ︀်။ 13မ︀ႅတ︀်ႉတ︀ႃဢ︀ꩫ︀်ႈၵ︀ႅꩫ︀်းယ︀ႂ်ယ︀ႃႇ ဢ︀ꩫ︀်ႈꩡ︀ႃႇꩭၢင︀်းတ︀ႆ︀းက︀ူဝ်ႇၸ︀ူႛꩡ︀ဝ်ႛ ဢ︀ꩬ︀ၢက︀်ႉၵ︀ွတ︀်ပ︀ီꩫ︀်ႈꩫ︀ႆ︀ႇꩫ︀မ︀်။ 14ꩬ︀ူꩫ︀င︀်က︀ဝ်ႈဝႃႈꩫ︀က︀ꩫ︀်ႈꩭီတ︀်က︀ီး တ︀ႆ︀းက︀ူဝ်ႇက︀ဝ်ႈꩫ︀မ︀်။ 15ꩬ︀ူမ︀ႆ︀ႛက︀ဝ်ႈ ၸ︀ူႛꩡ︀ႂ်ႇꩫ︀ꩬ︀ီꩵ︀ႈꩭွင︀်ႇယ︀ဝ်ႇ။ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ၸ︀ူႛꩡ︀ႂ်ႇꩫ︀ꩫ︀ႆ︀ႇယ︀ႃႇ ဢ︀ꩫ︀်ႈꩡ︀ဝ်ႛၸ︀ူႛꩡ︀ဝ်ႛꩭီတ︀်ꩬ︀ီဢ︀ူꩫ︀ႆ︀ႇꩵ︀ႈတ︀ွင︀်း။ က︀ဝ်ႈꩬ︀ူမ︀ႆ︀ႛ တ︀ႆ︀းက︀ူဝ်ႇꩫ︀ꩬ︀ီꩭွင︀်ႇဢ︀ူ။ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈꩫ︀င︀်လ︀ုက︀်ႉပ︀ူဝ်က︀ဝ်ႈမ︀ႆ︀ႛ ꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ႇ က︀ဝ်ႈꩬ︀ူမ︀ႆ︀ႛၵ︀ႆ︀ႈမ︀ႃးယ︀ဝ်ႇ။ 16ꩬ︀ူꩵ︀ႈꩡ︀ႂ်ႈ က︀ဝ်ႈမ︀ႆ︀ႛလ︀ိူက︀်ႉဝႆ︀ႇꩫ︀ႆ︀ႇ။ က︀ဝ်ႈꩫ︀မ︀်ꩬ︀ူမ︀ႆ︀ႛ လ︀ိူက︀်ႉင︀ႆ︀းပ︀ွႆ︀ꩡ︀ႂ်ႇꩬ︀ီ ꩫ︀င︀်မ︀က︀်ဢ︀ꩫ︀်ႈမ︀ꩫ︀်ႛဢ︀ꩫ︀်ႈၵ︀ိူင︀်ꩫ︀က︀ꩫ︀်ႈ ꩭႂ်ႛက︀ႃပ︀ီꩫ︀်ႈꩫ︀ႆ︀ႇ။ ꩫ︀င︀်က︀ဝ်ႈဝႃႈꩫ︀က︀ꩫ︀်ႈ ꩬ︀ူက︀ႃꩭီတ︀်က︀ီး ပ︀ူဝ်က︀ဝ်ႈက︀ေႃႇ ဢ︀ꩫ︀်ႈꩫ︀င︀်ꩬ︀ူဢ︀ဝ်ႈꩡ︀ိုဝ်ႈက︀ဝ်ႈယ︀ွꩫ︀်းꩫ︀ႆ︀ႇꩭႂ်ႛဢ︀ူ။ 17က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ꩬ︀ူꩭၢက︀်ႉက︀ꩫ︀်ႈတ︀ႃႉ။
လ︀ွင︀်ႈက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် ꩡ︀ဝ်ႛယ︀ေꩬ︀ုမ︀ႆ︀ႛꩡ︀င︀်း
18ꩬ︀ူမ︀ႆ︀ႛက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်ꩡ︀င︀်းက︀ီး က︀ဝ်ႈမ︀ႆ︀ႛꩫ︀မ︀် ꩡ︀င︀်းဢ︀ွꩫ︀်ႈꩫ︀ႆ︀ႇꩫ︀ꩫ︀ႆ︀ႇမ︀တ︀်ႉတ︀ႃႉ။ 19ꩬ︀ူပ︀ႃႛမ︀ိူင︀်းက︀ၢင︀်ႈမ︀ႆ︀ႛဢ︀ူက︀ီး က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်ယ︀ႃႇ ꩬ︀ူမ︀ႆ︀ႛꩫ︀င︀်ပ︀ီႈꩫ︀ွင︀်ႇၵ︀ဝ်ၸ︀ူႛꩡ︀ဝ်ႛꩫ︀က︀ꩫ︀်ႈတ︀ီꩭၢက︀်ႉꩬ︀ႃး။ ꩫ︀ႆ︀ႇꩫ︀က︀ေႃႇ ꩬ︀ူမ︀ႆ︀ႛက︀ဝ်ႈလ︀ုက︀်ႉမ︀ိူင︀်းက︀ၢင︀်ႈꩫ︀ႆ︀ႇမ︀ႆ︀ႛ လ︀ိူက︀်ႉဝႆ︀ႇꩫ︀ႆ︀ႇꩬ︀ီ ꩬ︀ူက︀ူꩫ︀်းမ︀ိူင︀်းက︀ၢင︀်ႈꩵ︀ႈꩡ︀ႂ်ႈယ︀ဝ်ႇ။ င︀ႆ︀းꩬ︀ီꩫ︀မ︀် ꩬ︀ူမ︀ႆ︀ႛက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်ꩡ︀င︀်းꩫ︀ႆ︀ႇ။ 20ၵ︀ႃႛꩫ︀ꩫ︀ႆ︀ႇꩡ︀ဝ်ႛမ︀ႆ︀ႛꩵ︀ႈယ︀ႂ်ꩬ︀ႃꩫ︀ꩬ︀ီ က︀ဝ်ႈဝႃႈမ︀ႃးꩫ︀ႆ︀ႇမ︀ႆ︀ႛ ဢ︀ွက︀်ꩡ︀ႂ်ႈက︀ꩫ︀်ႈတ︀ႃႉ။ ၵ︀ဝ်က︀ဝ်ႈမ︀ႆ︀ႛꩫ︀ိက︀်ႉꩬ︀ၢက︀်ႉက︀ီး ꩬ︀ူမ︀ႆ︀ႛက︀ေႃႇꩫ︀ိက︀်ႉꩬ︀ၢက︀်ႉဢ︀ူ။ ၵ︀ဝ်ၵ︀ၢမ︀်းက︀ဝ်ႈထွမ︀်က︀ီး ၵ︀ၢမ︀်းꩬ︀ူက︀ေႃႇထွမ︀်ဢ︀ူ။ 21က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်ယ︀ႃႇ ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛ ပ︀ွႆ︀ꩡ︀ႂ်ႇꩫ︀ႆ︀ႇမ︀ႆ︀ႛမ︀ဝ်တ︀ွင︀်းꩫ︀ႆ︀ႇꩬ︀ီ ꩬ︀ူက︀ဝ်ႈမ︀ႆ︀ႛယ︀ုမ︀်ယ︀မ︀်ႈက︀ီး ꩬ︀ူမ︀ႆ︀ႛတ︀ီꩫ︀ိက︀်ႉꩬ︀ၢက︀်ႉꩫ︀မ︀်။ 22က︀ဝ်ႈက︀ျွႃးမ︀ႃးꩬ︀ီ လ︀ွင︀်ႈꩬ︀မ︀်မ︀ႃတ︀ြႃးပ︀ူဝ်းမ︀ဝ်ဝႃႈက︀ီး ၵ︀ဝ်မ︀ႆ︀ႛဢ︀ပ︀ႅတ︀်ႉꩵ︀ႈယ︀င︀်း။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ၵ︀ဝ်မ︀ႆ︀ႛလ︀ွင︀်ႈꩬ︀မ︀်မ︀ႃတ︀ြႃးဝႃႈယ︀ဝ်ႇꩰꩫ︀ႆ︀ႇꩬ︀ီ ၵ︀ဝ်ဢ︀ပ︀ႅတ︀်ႉꩵ︀ႈယ︀င︀်းꩫ︀ꩫ︀ႆ︀ႇ ꩭိုဝ်လ︀ိုဝ်က︀ေႃႇပ︀ိꩫ︀်ႇ ꩵ︀ႈꩫ︀ႆ︀ႛယ︀ဝ်ႇ။ 23က︀ူဝ်ႇဢ︀ꩫ︀်ႈက︀ဝ်ႈမ︀ႆ︀ႛꩡ︀င︀်းꩫ︀ႆ︀ႇ ပ︀ူဝ်က︀ဝ်ႈမ︀ႆ︀ႛက︀ေႃႇꩡ︀င︀်းဢ︀ူ။ 24ꩬ︀င︀်ဝႃႈ ဝူင︀်ႈက︀ၢင︀်ႈၵ︀ဝ်မ︀ႆ︀ႛ လ︀ႆ︀ၢးဢ︀ꩫ︀်ႈၵ︀ိူင︀်ႈꩫ︀ီႈဢ︀ၢမ︀်းဢ︀ꩫ︀်ႈၸ︀ႂ်က︀ေႃႇ ꩭီတ︀်မ︀ဝ်ပ︀ီꩫ︀်ႈꩫ︀ႆ︀ႇၵ︀ဝ် က︀ဝ်ႈမ︀ဝ်ꩭီတ︀်မ︀ႃးက︀ီး ၵ︀ဝ်မ︀ႆ︀ႛဢ︀ပ︀ႅတ︀်ႉꩵ︀ႈယ︀င︀်း။ ꩫ︀ႆ︀ႇꩫ︀က︀ေႃႇ င︀ႆ︀ႚယ︀ႃႇ ဢ︀ꩫ︀်ႈက︀ဝ်ႈꩭီတ︀်မ︀ႃးꩫ︀ႆ︀ႇၵ︀ဝ်မ︀ႆ︀ႛ ၵ︀ဝ်ꩭꩫ︀်ꩬ︀ီက︀ဝ်ႈမ︀ႆ︀ႛတ︀မ︀ိူင︀်း ပ︀ူဝ်က︀ဝ်ႈမ︀ႆ︀ႛတ︀မ︀ိူင︀်းꩡ︀င︀်းဢ︀ူ။ 25င︀ႆ︀းꩫ︀ႆ︀ႇꩬ︀ီ “လ︀ွင︀်ႈက︀ꩬ︀င︀်က︀ေႃႇမ︀ဝ်ယ︀င︀်းꩬ︀ီ က︀ဝ်ႈမ︀ႆ︀ႛၵ︀ဝ်ꩡ︀င︀်းက︀ꩫ︀်ႈဢ︀ူ” ꩫ︀ꩬ︀ီဢ︀ꩫ︀်ႈက︀ျမ︀်းလ︀ိက︀်ႉမ︀ႆ︀ႛ ဝႃႈဝႆ︀ႇꩫ︀ႆ︀ႇပ︀ီꩫ︀်ႈတ︀ေႇတ︀ေႇမ︀ႃးယ︀ဝ်ႇ။ 26ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛၸ︀ူႛꩡ︀ွႆ︀ႈဢ︀ꩫ︀်ꩬ︀ူမ︀ႆ︀ႛꩡ︀ွႆ︀ႈ ဢ︀ꩫ︀်ႈက︀ဝ်ႈလ︀ုက︀်ႉပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛပ︀ွႆ︀ꩡ︀ႂ်ႇꩫ︀ႆ︀ႇ တ︀ီက︀ျွႃးမ︀ႃးꩫ︀မ︀်။ မ︀ꩫ︀်းꩡ︀ဝ်ႛယ︀ႃႇလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ႃးꩬ︀ီ လ︀ွင︀်ႈက︀ဝ်ႈတ︀ီၵ︀ႆ︀ႈꩬ︀ိုဝ်ႈꩰꩭႂ်ႛꩫ︀မ︀်။ 27င︀ႆ︀းꩫ︀ႆ︀ႇꩬ︀ီ ꩬ︀ူက︀ေႃႇလ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ တ︀င︀်းက︀ဝ်ႈꩭူမ︀်ႈဢ︀ူမ︀ႃးꩫ︀ႆ︀ႇꩬ︀ီ ပ︀ိူꩫ︀်ႈမ︀ႆ︀ႛလ︀ွင︀်ႈက︀ဝ်ႈ ဝႃႈꩭီတ︀်ꩬ︀ၢက︀်ႉꩬ︀ေꩫ︀မ︀်။
Currently Selected:
ယ︀ေႃးꩭၢꩫ︀် 15: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
