ယ︀ေႃးꩭၢꩫ︀် 17
17
လ︀ွင︀်ႈꩡ︀ဝ်ႛယ︀ေꩬ︀ုယ︀ွꩫ︀်းꩬ︀ူးꩡ︀ႃႇတ︀ပ︀ေးꩡ︀ဝ်ႛၵ︀ဝ်
1ဝႃႈင︀ႆ︀းယ︀ဝ်ႇက︀ီး ꩡ︀ဝ်ႛယ︀ေꩬ︀ုက︀ၢင︀်ႈꩭၢဝ်မ︀ႆ︀ႛꩭႅꩫ︀်ꩫ︀ူႈꩬ︀ီ “ပ︀ူဝ်ꩡ︀ဝ်ႛꩴ︀း လ︀ႃႉꩫ︀ႆ︀ႇ ꩭႂ်ႛပ︀ူဝ်းမ︀ူꩫ︀်ႈꩡ︀ဝ်ႛဢ︀ဝ်ႈꩭိူဝ်ႈꩭိုင︀်းꩫ︀ႆ︀ႇ မ︀ူꩫ︀်ႈက︀ဝ်ႈၵ︀ႃႛဢ︀ဝ်ႈꩭိူဝ်ႈꩭိုင︀်းꩭႂ်ႛတ︀ီၵ︀ႃႛမ︀ႃးတ︀ႃႉ။ 2မ︀ႂ်းꩡ︀ဝ်ႛ က︀ဝ်ႈၵ︀ႃမ︀ႆ︀ႛက︀ꩫ︀်ႛꩫ︀ိူဝ်တ︀င︀်းမ︀ိူင︀်းမ︀ႆ︀ႛ ဢ︀ႃꩫ︀ႃပ︀ူင︀်ႈꩭႂ်ႛတ︀ီၵ︀ႃႛမ︀ႃးယ︀ဝ်ႇ။ င︀ႆ︀းꩬ︀ီ က︀ူꩫ︀်းဢ︀ꩫ︀်ႈမ︀ႂ်းꩡ︀ဝ်ႛ က︀ဝ်ႈၵ︀ႃႛမ︀ႆ︀ႛ ဢ︀ၢပ︀်ႉꩭႂ်ႛဝႆ︀ႇꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ က︀ဝ်ႈၵ︀ႃႛဢ︀ꩬ︀ၢက︀်ႉထႃဝရ︀ꩭႂ်ႛတ︀ီၵ︀ႃႛဢ︀ူ။ 3တ︀ၢင︀်းဢ︀ꩫ︀်ႈꩫ︀ႆ︀ႛ ဢ︀ꩬ︀ၢက︀်ႉထႃဝရ︀ꩫ︀ꩫ︀ႆ︀ႇယ︀ႃႇ မ︀ႂ်းꩡ︀ဝ်ႛ ၸ︀ူႛပ︀ီꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛဢ︀ꩫ︀်ႈꩡ︀ႅတ︀်ႉꩬ︀ူလ︀ိဝ်ႈꩫ︀ၵ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ꩫ︀်ႈꩡ︀ဝ်ႛပ︀ွႆ︀ꩡ︀ႂ်ႇမ︀ႃးꩫ︀ႆ︀ႇမ︀ႆ︀ႛ တ︀ွင︀်းꩫ︀ႆ︀ႇတ︀ီၵ︀ႃႛꩫ︀မ︀်။ 4ဢ︀ꩫ︀်ႈꩡ︀ဝ်ႛ က︀ဝ်ႈၵ︀ႃႛမ︀ႆ︀ႛပ︀ူင︀်ႈဝႆ︀ႇꩫ︀ႆ︀ႇၵ︀ဝ် ဢ︀ဝ်ႈယ︀ဝ်ႇꩬ︀ီ မ︀ိူင︀်းက︀ၢင︀်ႈꩫ︀ႆ︀ႇမ︀ႆ︀ႛ က︀ဝ်ႈၵ︀ႃႛ မ︀ူꩫ︀်ႈမ︀ႂ်းꩡ︀ဝ်ႛ ဢ︀ဝ်ႈꩭိူဝ်ႈꩭိုင︀်းမ︀ႃးတ︀ီၵ︀ႃႛယ︀ဝ်ႇ။ 5ပ︀ူဝ်ꩡ︀ဝ်ႛꩴ︀း လ︀ႃႉꩫ︀ႆ︀ႇ မ︀ူꩫ︀်ႈၸ︀ုင︀်းဢ︀ꩫ︀်ႈမ︀ိူဝ်ႈ က︀မ︀်ၸ︀ႃꩵ︀ႈပ︀ႆ︀တ︀ေပ︀ုꩫ︀်ႛꩭဝ်းꩡ︀ဝ်ႛမ︀ႆ︀ႛယ︀င︀်းမ︀ႃးꩫ︀ႆ︀ႇ က︀ဝ်ႈၵ︀ႃႛမ︀ႆ︀ႛ ပ︀ူင︀်ႈꩭႂ်ႛပ︀ွက︀်ႉတ︀ီၵ︀ႃႛမ︀ႃးတ︀ႃႉ။
6က︀ူꩫ︀်းဢ︀ꩫ︀်ႈလ︀ုက︀်ႉမ︀ိူင︀်းက︀ၢင︀်ႈမ︀ႆ︀ႛ မ︀ႂ်းꩡ︀ဝ်ႛလ︀ိူက︀်ႉꩬ︀ီ က︀ဝ်ႈၵ︀ႃႛမ︀ႆ︀ႛဢ︀ၢပ︀်ႉꩭႂ်ႛဝႆ︀ႇꩫ︀ႆ︀ႇၵ︀ဝ်မ︀ႆ︀ႛ လ︀ွင︀်ႈꩡ︀ဝ်ႛ ၵ︀ႆ︀ႈꩭႂ်ႛတ︀ီၵ︀ႃႛယ︀ဝ်ႇ။ ၵ︀ဝ်ယ︀ႃႇပ︀ီꩫ︀်ႈက︀ူꩫ︀်းမ︀ႂ်းꩡ︀ဝ်ႛꩬ︀ီ က︀ဝ်ႈၵ︀ႃႛမ︀ႆ︀ႛ ဢ︀ၢပ︀်ႉꩭႂ်ႛတ︀ီၵ︀ႃႛမ︀ႃးယ︀ဝ်ႇ။ ၵ︀ဝ်က︀ေႃႇ ၵ︀ၢမ︀်းꩡ︀ဝ်ႛ ထွမ︀်ꩡ︀ွမ︀်းက︀ꩫ︀်ႈတ︀ီၵ︀ႃႛဢ︀ူ။ 7ဢ︀ꩫ︀်ႈမ︀ႂ်းꩡ︀ဝ်ႛ က︀ဝ်ႈၵ︀ႃႛမ︀ႆ︀ႛဢ︀ၢပ︀်ႉꩭႂ်ႛꩫ︀ႆ︀ႇၵ︀ဝ်တ︀င︀်းမ︀ိူင︀်း လ︀ုက︀်ႉꩡ︀ဝ်ႛမ︀ႆ︀ႛမ︀ႃးꩫ︀မ︀်ꩫ︀ꩫ︀ႆ︀ႇ ၵ︀ဝ်တ︀ွင︀်းက︀ꩫ︀်ႈတ︀ီၵ︀ႃႛယ︀ဝ်ႇ။ 8ၵ︀ၢမ︀်းဢ︀ꩫ︀်ႈꩡ︀ဝ်ႛ က︀ဝ်ႈၵ︀ႃႛမ︀ႆ︀ႛပ︀ူင︀်ႈꩭႂ်ႛမ︀ႃးꩫ︀ႆ︀ႇ ၵ︀ဝ်မ︀ႆ︀ႛက︀ဝ်ႈၵ︀ႃႛပ︀ူင︀်ႈꩭႂ်ႛꩬ︀ီ ၵ︀ဝ်ꩭၢပ︀်ႉဢ︀ဝ်ႈတ︀ီၵ︀ႃႛယ︀ဝ်ႇ။ က︀ဝ်ႈၵ︀ႃႛ လ︀ုက︀်ႉꩡ︀ဝ်ႛမ︀ႆ︀ႛꩫ︀မ︀်မ︀ႃးꩫ︀ႆ︀ႇꩫ︀ꩫ︀ႆ︀ႇ ၵ︀ဝ်တ︀ွင︀်းတ︀ီၵ︀ႃႛဢ︀ူ။ က︀ဝ်ႈၵ︀ႃႛမ︀ႆ︀ႛ ꩡ︀ဝ်ႛပ︀ွႆ︀ꩡ︀ႂ်ႇမ︀ႃးꩫ︀မ︀်ꩫ︀ꩫ︀ႆ︀ႇက︀ေႃႇ ၵ︀ဝ်ယ︀ုမ︀်ယ︀မ︀်ႈတ︀ီၵ︀ႃႛဢ︀ူ။
9က︀ဝ်ႈၵ︀ႃႛယ︀ွꩫ︀်းꩬ︀ူးꩫ︀ႆ︀ႇ ꩡ︀ႃႇꩭၢင︀်းက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် ꩵ︀ႈꩡ︀ႂ်ႈတ︀ီၵ︀ႃႛ။ ꩡ︀ႃႇꩭၢင︀်းက︀ူꩫ︀်းဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛ ꩡ︀ဝ်ႛဢ︀ၢပ︀်ႉꩭႂ်ႛꩫ︀ႆ︀ႇၵ︀ဝ်တ︀ီၵ︀ႃႛꩫ︀မ︀်။ ၵ︀ဝ်ယ︀ႃႇပ︀ီꩫ︀်ႈက︀ူꩫ︀်းꩡ︀ဝ်ႛꩬ︀ီ က︀ဝ်ႈၵ︀ႃႛ ꩡ︀ႃႇꩭၢင︀်းၵ︀ဝ် ယ︀ွꩫ︀်းꩬ︀ူးတ︀ီၵ︀ႃႛꩫ︀မ︀်။ 10ဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛယ︀င︀်းꩫ︀ႆ︀ႇတ︀င︀်းမ︀ိူင︀်း ဢ︀ꩫ︀်ႈꩡ︀ဝ်ႛတ︀ီၵ︀ႃႛꩫ︀မ︀်။ ဢ︀ꩫ︀်ႈꩡ︀ဝ်ႛမ︀ႆ︀ႛယ︀င︀်းꩫ︀ႆ︀ႇၵ︀ဝ်တ︀င︀်းမ︀ိူင︀်းက︀ေႃႇ ဢ︀ꩫ︀်ႈက︀ဝ်ႈၵ︀ႃႛတ︀ီၵ︀ႃႛꩫ︀မ︀်။ လ︀ႆ︀ၢးပ︀ိူဝ်ႈၵ︀ဝ်ꩬ︀ီ မ︀ူꩫ︀်ႈၸ︀ုင︀်းက︀ဝ်ႈၵ︀ႃႛက︀ေႃႇ ꩭိူဝ်ႈꩭိုင︀်းတ︀ီၵ︀ႃႛယ︀ဝ်ႇ။ 11လ︀ႃႉꩫ︀ႆ︀ႇ က︀ဝ်ႈၵ︀ႃႛလ︀ုက︀်ႉမ︀ိူင︀်းက︀ၢင︀်ႈမ︀ႆ︀ႛဢ︀ွက︀်ꩬ︀ီ တ︀ီမ︀ႃးꩡ︀ဝ်ႛတ︀ီၵ︀ႃႛꩫ︀မ︀်။ ၵ︀ဝ်ယ︀ႃႇ တ︀ီက︀ိူတ︀်မ︀ိူင︀်းက︀ၢင︀်ႈတ︀ီၵ︀ႃႛꩫ︀မ︀်။ က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ ပ︀ူဝ်ꩡ︀ဝ်ႛဢ︀ꩫ︀်ႈမ︀ူတ︀်ꩡ︀ၢင︀်ꩴ︀း ꩫ︀င︀်ꩭဝ်းၵ︀ႃႛလ︀ွမ︀်ႈက︀ꩫ︀်ႈꩫ︀က︀ꩫ︀်ႈ ꩭႂ်ႛပ︀ူဝ်းၵ︀ဝ်က︀ေႃႇလ︀ွမ︀်ႈက︀ꩫ︀်ႈꩫ︀ႆ︀ႇ ဢ︀ဝ်ႈတ︀ꩫ︀်းၵ︀ူဝ်းꩡ︀ိုဝ်ႈꩡ︀ဝ်ႛ ဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛꩭႂ်ႛဝႆ︀ႇꩫ︀ႆ︀ႇ ၵ︀ဝ်မ︀ႆ︀ႛက︀ုမ︀်ႇꩭႂ်ႛတ︀ီၵ︀ႃႛမ︀ႃးတ︀ႃႉ။ 12မ︀ိူဝ်ႈက︀ဝ်ႈၵ︀ႃႛမ︀ိူင︀်းက︀ၢင︀်ႈမ︀ႆ︀ႛ တ︀င︀်းၵ︀ဝ်ဢ︀ူမ︀ႃးꩫ︀ႆ︀ႇ ဢ︀ဝ်ႈတ︀ꩫ︀်းၵ︀ူဝ်းꩡ︀ိုဝ်ႈꩡ︀ဝ်ႛ ဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛꩭႂ်ႛဝႆ︀ႇꩫ︀ႆ︀ႇ ၵ︀ဝ်မ︀ႆ︀ႛ က︀ဝ်ႈၵ︀ႃႛက︀ုမ︀်ႇꩭႂ်ႛမ︀ႃးတ︀ီၵ︀ႃႛဢ︀ူ။ လ︀ွင︀်ႈဢ︀ꩫ︀်ႈꩫ︀ႆ︀ႇယ︀ႃႇ “က︀ူဝ်ႇဢ︀ꩫ︀်ႈတ︀ီလ︀ူႇပ︀ႅက︀်ႉဢ︀မ︀ႂ်းမ︀ႆ︀ႛလ︀ိူဝ်ꩬ︀ီ တ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ ၸ︀ႂ်က︀ေႃႇꩵ︀ႈလ︀ူႇပ︀ႅက︀်ႉမ︀ႃး” ꩫ︀ꩬ︀ီ က︀ျမ︀်းလ︀ိက︀်ႉမ︀ႆ︀ႛဝႃႈꩫ︀ႆ︀ႇꩫ︀က︀ꩫ︀်ႈ ပ︀ီꩫ︀်ႈမ︀ႃးတ︀ီၵ︀ႃႛꩫ︀မ︀်။ 13င︀ႆ︀ႚ က︀ဝ်ႈၵ︀ႃႛ ꩡ︀ဝ်ႛမ︀ႆ︀ႛ တ︀ီမ︀ႃးတ︀ီၵ︀ႃႛယ︀ဝ်ႇ။ င︀ႆ︀းꩫ︀ႆ︀ႇꩬ︀ီ ꩭႂ်ႛပ︀ူဝ်းၵ︀ဝ်ꩡ︀ူမ︀်းꩭုမ︀်က︀ုမ︀်တ︀ီမ︀်ႈက︀ꩫ︀်ႈꩫ︀ႆ︀ႇ မ︀ိူဝ်ႈက︀ဝ်ႈၵ︀ႃႛဢ︀ူမ︀ိူင︀်းက︀ၢင︀်ႈꩫ︀ႆ︀ႇ လ︀ွင︀်ႈꩫ︀ႆ︀ႇၵ︀ဝ်ၵ︀ႆ︀ႈꩭႂ်ႛတ︀ီၵ︀ႃႛမ︀ႃးယ︀ဝ်ႇ။ 14က︀ဝ်ႈၵ︀ႃႛၵ︀ဝ်မ︀ႆ︀ႛ ၵ︀ၢမ︀်းꩡ︀ဝ်ႛ ဝႃႈꩭႂ်ႛတ︀ီၵ︀ႃႛယ︀ဝ်ႇ။ ꩫ︀င︀်က︀ဝ်ႈၵ︀ႃႛက︀ူꩫ︀်းမ︀ိူင︀်းက︀ၢင︀်ႈမ︀ဝ်ꩡ︀ႂ်ႈꩫ︀က︀ꩫ︀်ႈ ၵ︀ဝ်က︀ေႃႇမ︀ဝ်ꩡ︀ႂ်ႈꩫ︀ႆ︀ႇꩬ︀ီ ၵ︀ဝ်မ︀ႆ︀ႛက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် ꩡ︀င︀်းက︀ꩫ︀်ႈတ︀ီၵ︀ႃႛဢ︀ူ။ 15ꩡ︀ဝ်ႛမ︀ႆ︀ႛ က︀ဝ်ႈၵ︀ႃႛယ︀ွꩫ︀်းꩬ︀ူးꩫ︀ႆ︀ႇ ၵ︀ဝ်မ︀ႆ︀ႛလ︀ုက︀်ႉꩫ︀ႂ်းမ︀ိူင︀်းက︀ၢင︀်ႈမ︀ႆ︀ႛ ꩭႂ်ႛယ︀ုတ︀်ဢ︀ွက︀်ꩵ︀ႈꩡ︀ႂ်ႈတ︀ီၵ︀ႃႛ။ ꩭႂ်ႛပ︀ူဝ်းၵ︀ဝ်မ︀ႆ︀ႛ ꩡ︀ဝ်ႛ လ︀ုက︀်ႉၸ︀ေးၵ︀ုꩫ︀်ꩬ︀ူင︀်မ︀ႆ︀ႛ က︀ုမ︀်ႇꩭႂ်ႛꩫ︀ႆ︀ႇတ︀ီၵ︀ႃႛꩫ︀မ︀်။ 16ꩫ︀င︀်က︀ဝ်ႈၵ︀ႃႛက︀ူꩫ︀်းမ︀ိူင︀်းက︀ၢင︀်ႈ မ︀ဝ်ꩡ︀ႂ်ႈꩫ︀က︀ꩫ︀်ႈ ၵ︀ဝ်က︀ေႃႇꩵ︀ႈꩡ︀ႂ်ႈတ︀ီၵ︀ႃႛ။ 17ၵ︀ဝ်မ︀ႆ︀ႛ ဢ︀ဝ်ႈꩬ︀မ︀်မ︀ႃတ︀ြႃးၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈမ︀ူတ︀်ꩡ︀ၢင︀်ꩭႂ်ႛတ︀ီၵ︀ႃႛမ︀ႃးတ︀ႃႉ။ ၵ︀ၢမ︀်းꩡ︀ဝ်ႛယ︀ႃႇ ꩬ︀မ︀်မ︀ႃတ︀ြႃးတ︀ီၵ︀ႃႛꩫ︀မ︀်။ 18က︀ဝ်ႈၵ︀ႃႛမ︀ႆ︀ႛ ꩡ︀ဝ်ႛ မ︀ိူင︀်းက︀ၢင︀်ႈမ︀ႆ︀ႛပ︀ွႆ︀ꩡ︀ႂ်ႇမ︀ႃးꩫ︀က︀ꩫ︀်ႈ က︀ဝ်ႈၵ︀ႃႛက︀ေႃႇၵ︀ဝ်မ︀ႆ︀ႛ မ︀ိူင︀်းက︀ၢင︀်ႈမ︀ႆ︀ႛပ︀ွႆ︀ꩡ︀ႂ်ႇတ︀ီၵ︀ႃႛဢ︀ူ။ 19ꩭႂ်ႛပ︀ူဝ်းၵ︀ဝ် ꩡ︀ဝ်ႛမ︀ႆ︀ႛ တ︀င︀်းꩡ︀ႂ်ႈတ︀င︀်းၵ︀ူဝ်းဢ︀ၢပ︀်ႉပ︀ီꩫ︀်ႈꩫ︀ႆ︀ႇ က︀ဝ်ႈၵ︀ႃႛၸ︀ူႛꩡ︀ဝ်ႛ ꩡ︀ႃႇဢ︀က︀ိဝ်းၵ︀ဝ် ꩡ︀ဝ်ႛမ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်း ဢ︀ၢပ︀်ႉမ︀ႃးတ︀ီၵ︀ႃႛယ︀ဝ်ႇ။
20က︀ဝ်ႈၵ︀ႃႛယ︀ွꩫ︀်းꩬ︀ူးꩫ︀ႆ︀ႇ ꩡ︀ႃႇၵ︀ဝ်ꩫ︀ႆ︀ၢႈꩵ︀ႈꩡ︀ႂ်ႈတ︀ီၵ︀ႃႛ။ ꩡ︀ႃႇက︀ူꩫ︀်းဢ︀ꩫ︀်ႈၵ︀ဝ်ꩭူဝ်းꩬ︀ီ က︀ဝ်ႈၵ︀ႃႛမ︀ႆ︀ႛ ယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ဝ်က︀ေႃႇ ꩡ︀ႂ်ႈတ︀ီၵ︀ႃႛဢ︀ူ။ 21ၵ︀ဝ်မ︀ႆ︀ႛဢ︀ဝ်ႈၸ︀ွမ︀်ႇလ︀ွမ︀်ႈက︀ꩫ︀်ႈꩭႂ်ႛတ︀ီၵ︀ႃႛမ︀ႃးတ︀ႃႉ။ ပ︀ူဝ်ꩡ︀ဝ်ႛꩴ︀း က︀ꩫ︀်ႛꩫ︀ႂ်းက︀ဝ်ႈၵ︀ႃႛမ︀ႆ︀ႛ ꩡ︀ဝ်ႛယ︀င︀်းꩬ︀ီ က︀ꩫ︀်ႛꩫ︀ႂ်းꩡ︀ဝ်ႛမ︀ႆ︀ႛက︀ဝ်ႈၵ︀ႃႛယ︀င︀်းꩫ︀က︀ꩫ︀်ႈ ၵ︀ဝ်မ︀ႆ︀ႛက︀ေႃႇက︀ꩫ︀်ႛꩫ︀ႂ်းꩭဝ်းၵ︀ႃႛမ︀ႆ︀ႛ ဢ︀ဝ်ႈယ︀င︀်းꩭႂ်ႛတ︀ီၵ︀ႃႛမ︀ႃးတ︀ႃႉ။ က︀ဝ်ႈၵ︀ႃႛမ︀ႆ︀ႛ ꩡ︀ဝ်ႛပ︀ွႆ︀ꩡ︀ႂ်ႇမ︀ႃးꩫ︀မ︀်ꩫ︀ꩫ︀ႆ︀ႇ က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် ꩭႂ်ႛပ︀ူဝ်းယ︀ုမ︀်ယ︀မ︀်ႈက︀ꩫ︀်ႈꩫ︀ႆ︀ႇ ၵ︀ဝ်မ︀ႆ︀ႛဢ︀ဝ်ႈၸ︀ွမ︀်ႇလ︀ွမ︀်ႈက︀ꩫ︀်ႈꩭႂ်ႛတ︀ီၵ︀ႃႛမ︀ႃးတ︀ႃႉ။ 22ꩡ︀ဝ်ႛꩫ︀ၵ︀ႃက︀ဝ်ႈၵ︀ႃႛၸ︀ွမ︀်ႇလ︀ွမ︀်ႈက︀ꩫ︀်ႈꩫ︀က︀ꩫ︀်ႈ ꩭႂ်ႛပ︀ူဝ်းၸ︀ူႛꩡ︀ွမ︀်းက︀ဝ်ႈၵ︀ႃႛၵ︀ဝ် ၸ︀ွမ︀်ႇလ︀ွမ︀်ႈက︀ꩫ︀်ႈꩫ︀ႆ︀ႇ မ︀ူꩫ︀်ႈၸ︀ုင︀်းဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛ ꩡ︀ဝ်ႛꩭႂ်ႛမ︀ႃးꩫ︀ႆ︀ႇ ၵ︀ဝ်မ︀ႆ︀ႛꩭႂ်ႛတ︀ီၵ︀ႃႛယ︀ဝ်ႇ။ 23က︀ꩫ︀်ႛꩫ︀ႂ်းၵ︀ဝ်မ︀ႆ︀ႛ က︀ဝ်ႈၵ︀ႃႛယ︀င︀်းꩫ︀က︀ꩫ︀်ႈ က︀ꩫ︀်ႛꩫ︀ႂ်းက︀ဝ်ႈၵ︀ႃႛမ︀ႆ︀ႛꩡ︀ဝ်ႛယ︀င︀်းꩬ︀ီ ၵ︀ဝ်က︀ေႃႇၸ︀ွမ︀်ႇလ︀ွမ︀်ႈက︀ꩫ︀်ႈတ︀ီၵ︀ႃႛယ︀ဝ်ႇ။ င︀ႆ︀းꩫ︀ႆ︀ႇꩬ︀ီ က︀ဝ်ႈၵ︀ႃႛမ︀ႆ︀ႛꩡ︀ဝ်ႛပ︀ွႆ︀ꩡ︀ႂ်ႇမ︀ႃးꩫ︀မ︀်ꩫ︀ꩫ︀ႆ︀ႇလ︀ိူင︀်ႈ၊ က︀ဝ်ႈၵ︀ႃႛမ︀ႆ︀ႛꩡ︀ဝ်ႛꩭၢက︀်ႉꩫ︀က︀ꩫ︀်ႈ ၵ︀ဝ်မ︀ႆ︀ႛက︀ေႃႇꩭၢက︀်ႉဢ︀ူꩫ︀ꩫ︀ႆ︀ႇလ︀ိူင︀်ႈ က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် တ︀ီတ︀ွင︀်းမ︀ႃးက︀ꩫ︀်ႈတ︀ီၵ︀ႃႛꩫ︀မ︀်။
24ပ︀ူဝ်ꩡ︀ဝ်ႛꩴ︀း က︀ူꩫ︀်းဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛ ꩡ︀ဝ်ႛꩭႂ်ႛဝႆ︀ႇꩫ︀ႆ︀ႇၵ︀ဝ် တ︀ီႈဢ︀ꩫ︀်ႈက︀ဝ်ႈၵ︀ႃႛတ︀ီဢ︀ူမ︀ႆ︀ႛ ၵ︀ဝ်မ︀ႆ︀ႛက︀ေႃႇၵ︀ႂ်ႈꩭႂ်ႛဢ︀ူတ︀ီၵ︀ႃႛဢ︀ူ။ င︀ႆ︀းက︀ီး မ︀ူꩫ︀်ႈၸ︀ုင︀်းဢ︀ꩫ︀်ႈꩡ︀ဝ်ႛက︀ဝ်ႈၵ︀ႃႛမ︀ႆ︀ႛ ꩭႂ်ႛဝႆ︀ႇဢ︀မ︀ႂ်းမ︀ႆ︀ႛ ၵ︀ဝ်ꩭꩫ︀်တ︀ီၵ︀ႃႛဢ︀ူ။ မ︀ူꩫ︀်ႈၸ︀ုင︀်းဢ︀မ︀ႂ်းယ︀ႃႇ မ︀ိူဝ်ႈက︀မ︀်ၸ︀ႃꩵ︀ႈပ︀ႆ︀တ︀ေပ︀ုꩫ︀်ႛ ဢ︀ꩫ︀်ႈꩡ︀ဝ်ႛ က︀ဝ်ႈၵ︀ႃႛမ︀ႆ︀ႛ ꩭၢက︀်ႉꩬ︀ီꩭႂ်ႛမ︀ႃးꩫ︀ႆ︀ႇꩫ︀မ︀်။ 25ပ︀ူဝ်ꩡ︀ဝ်ႛဢ︀ꩫ︀်ႈꩬ︀ိုဝ်ႈတ︀ူဝ်ꩴ︀း ꩡ︀ဝ်ႛမ︀ႆ︀ႛက︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ် မ︀ဝ်တ︀ွင︀်းꩫ︀က︀ေႃႇ က︀ဝ်ႈၵ︀ႃႛယ︀ႃႇတ︀ွင︀်းတ︀ီၵ︀ႃႛဢ︀ူ။ က︀ဝ်ႈၵ︀ႃႛမ︀ႆ︀ႛꩡ︀ဝ်ႛ ပ︀ွႆ︀ꩡ︀ႂ်ႇမ︀ႃးꩫ︀မ︀်ꩫ︀ꩫ︀ႆ︀ႇ ၸ︀ူႛꩡ︀ွမ︀်းက︀ဝ်ႈၵ︀ႃႛၵ︀ဝ်က︀ေႃႇ တ︀ွင︀်းတ︀ီၵ︀ႃႛဢ︀ူ။ 26မ︀ႅတ︀်ႉတ︀ႃဢ︀ꩫ︀်ႈက︀ဝ်ႈၵ︀ႃႛမ︀ႆ︀ႛꩡ︀ဝ်ႛꩭႂ်ႛဝႆ︀ႇꩫ︀ႆ︀ႇတ︀မ︀ိူင︀်း က︀ဝ်ႈၵ︀ႃႛတ︀မ︀ိူင︀်း ꩭႂ်ႛပ︀ူဝ်းꩫ︀ႂ်းꩡ︀ႂ်ႈၵ︀ဝ်မ︀ႆ︀ႛ ယ︀င︀်းꩫ︀ႆ︀ႇ ၵ︀ဝ်မ︀ႆ︀ႛလ︀ွင︀်ႈꩡ︀ဝ်ႛ ဢ︀ဝ်ႈတ︀ွင︀်းꩭႂ်ႛတ︀ီၵ︀ႃႛယ︀ဝ်ႇ။ က︀ၢပ︀်ꩬ︀ီက︀ေႃႇ တ︀ီဢ︀ဝ်ႈတ︀ွင︀်းဢ︀ိက︀်ꩭႂ်ႛက︀ႃတ︀ီၵ︀ႃႛꩫ︀မ︀်” ꩫ︀ꩬ︀ီယ︀ွꩫ︀်းꩬ︀ူးဢ︀ူ။
Currently Selected:
ယ︀ေႃးꩭၢꩫ︀် 17: kht
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
