ယ︀ေႃးꩭၢꩫ︀် 21
21
လ︀ွင︀်ႈꩡ︀ဝ်ႛယ︀ေꩬ︀ု တ︀ပ︀ေးꩡ︀ဝ်ႛꩡ︀ီတ︀်က︀ူဝ်ႇမ︀ႆ︀ႛပ︀ျႃးတ︀ူဝ်ႈ
1ꩭႃလ︀ိူင︀်ႈ ꩡ︀ဝ်ႛယ︀ေꩬ︀ု တ︀ႆ︀ၢႛꩫ︀ွင︀်တ︀ိၿေရ︀ိမ︀ႆ︀ႛ တ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ပ︀ျႃးတ︀ူဝ်ႈပ︀ွက︀်ႉဢ︀ူ။ လ︀ွင︀်ႈꩫ︀ႆ︀ႇယ︀ႃႇ င︀ႆ︀းꩫ︀မ︀်။ 2ဝꩫ︀်းလ︀ိူင︀်ႈ ꩬ︀ႅင︀်မ︀ုꩫ︀်ပ︀ေတ︀ရ︀ု၊ တ︀ေႃမ︀ ဢ︀ꩫ︀်ႈꩭွင︀်ႇဝႃႈဢ︀ꩫ︀်ႈၸ︀ႃက︀ꩫ︀်ႈ၊ ꩫ︀ႃတ︀ꩫ︀ေလ︀ က︀ူꩫ︀်းတ︀ိူင︀်းက︀ႃလ︀ိလ︀ႄ၊ ဝီင︀်းက︀ႃꩫ︀၊ ၸ︀ူႛလ︀ုက︀်ႉꩡ︀ေၿေတ︀ႄၵ︀ဝ်င︀ႆ︀း တ︀ပ︀ေးꩡ︀ဝ်ႛတ︀ၢင︀်က︀ူဝ်ႇꩬ︀ွင︀်ပ︀ႃးၵ︀ဝ် တ︀ုမ︀်ႈက︀ꩫ︀်ႈဢ︀ူ။ 3ꩬ︀ႅင︀်မ︀ုꩫ︀်ပ︀ေတ︀ရ︀ုယ︀ႃႇ “က︀ဝ်ႈက︀ႃၵ︀ႃပ︀ႃႈꩫ︀မ︀်” ꩫ︀ꩬ︀ီၵ︀ဝ်မ︀ႆ︀ႛဝႃႈက︀ီး ၵ︀ဝ်က︀ေႃႇ “တ︀ူႈက︀ေႃႇꩡ︀ွမ︀်းက︀ွတ︀်” ꩫ︀ဝꩫ︀်ႇ။ င︀ႆ︀းꩬ︀ီၵ︀ဝ် ဢ︀ဝ်ႈꩭိူဝ်းက︀ႃၵ︀ႃပ︀ႃႈဢ︀ူ။ တ︀င︀်းၵ︀ိုꩫ︀်းၵ︀ႃꩫ︀က︀ေႃႇ ပ︀ႃႈတ︀ူဝ်ႈလ︀ိူင︀်ႈꩫ︀ႆ︀ၢႈက︀ေႃႇꩵ︀ႈꩫ︀ႆ︀ႛ။ 4က︀ၢင︀်ႈဝꩫ︀်းဢ︀ွက︀်မ︀ႃးက︀ီး ꩡ︀ဝ်ႛယ︀ေꩬ︀ုယ︀ႃႇ ꩭိမ︀်းꩫ︀မ︀်ႇမ︀ႆ︀ႛꩬ︀ဝ်းꩬ︀ီဢ︀ူဢ︀ူ။ ꩫ︀ႆ︀ႇꩫ︀က︀ေႃႇ တ︀ပ︀ေးꩡ︀ဝ်ႛၵ︀ဝ်ယ︀ႃႇ မ︀ꩫ︀်းꩡ︀ဝ်ႛꩫ︀မ︀်ꩫ︀ꩫ︀ႆ︀ႇꩵ︀ႈတ︀ွင︀်း။ 5ꩡ︀ဝ်ႛယ︀ေꩬ︀ုယ︀ႃႇ “ꩡ︀ႆ︀ၢးၵ︀ဝ်ꩴ︀း ပ︀ႃႈꩫ︀ႆ︀ႛဢ︀ေႃး” ꩫ︀က︀ီးၵ︀ဝ်ယ︀ႃႇ “ꩵ︀ႈꩫ︀ႆ︀ႛက︀ိူဝ်း” ꩫ︀ဝꩫ︀်ႇ။ 6မ︀ꩫ︀်းꩡ︀ဝ်ႛယ︀ႃႇ “ပ︀ႃႛၵ︀ႃꩭိူဝ်းမ︀ႆ︀ႛ တ︀ွတ︀်ႉၵ︀ွတ︀်လ︀ႃး။ တ︀ီꩫ︀ႆ︀ႛꩬ︀ႃး” ꩫ︀ဝꩫ︀်ႇ။ ꩫ︀င︀်မ︀ꩫ︀်းꩡ︀ဝ်ႛဝႃႈꩫ︀က︀ꩫ︀်ႈ ၵ︀ဝ်က︀ေႃႇၵ︀ေတ︀ွတ︀်ႉၵ︀ွတ︀်က︀ီး ပ︀ႃႈဢ︀ၢꩫ︀်တ︀ၢꩫ︀်ထုက︀်ꩫ︀ႆ︀ႇꩬ︀ီ ၵ︀ေမ︀ႆ︀ႛꩡ︀ꩫ︀်ႈတ︀ၢင︀်ꩭိူဝ်းꩫ︀ႆ︀ၢႈက︀ေႃႇ ꩵ︀ႈပ︀ေႇယ︀ဝ်ႇ။ 7ꩫ︀ႆ︀ႇမ︀ႆ︀ႛ တ︀ပ︀ေးꩡ︀ဝ်ႛဢ︀ꩫ︀်ႈꩡ︀ဝ်ႛယ︀ေꩬ︀ုꩭၢက︀်ႉꩫ︀ႆ︀ႇယ︀ႃႇ “ꩴ︀း ꩡ︀ဝ်ႛꩭဝ်းꩬ︀ႃး” ꩫ︀ꩬ︀ီပ︀ေတ︀ရ︀ုမ︀ႆ︀ႛဝႃႈဢ︀ူ။ ꩫ︀ႆ︀ႇမ︀ႆ︀ႛꩫ︀ႆ︀ႛꩥ︀ိꩫ︀်းက︀ီး ပ︀ေတ︀ရ︀ုယ︀ႃႇ ၵ︀ိူင︀်ႈဢ︀ꩫ︀်ႈလ︀ွꩫ︀်ႛဝႆ︀ႇꩫ︀ႆ︀ႇ ꩥ︀ႅင︀်ႛမ︀ႆ︀ႛꩭတ︀်ႉင︀ႆ︀း က︀ꩡ︀ူးꩫ︀ွင︀်မ︀ႆ︀ႛဝႅꩫ︀်လ︀ူင︀်းꩬ︀ီက︀ႃꩡ︀ဝ်ႛယ︀ေꩬ︀ုဢ︀ူ။ 8ꩭိူဝ်းၵ︀ဝ်ယ︀ႃႇ လ︀ုက︀်ႉၸ︀င︀်မ︀ႆ︀ႛၵ︀ꩫ︀်ꩭႃႛꩬ︀ိပ︀်ဝႃးꩫ︀ႆ︀ၢႈꩫ︀မ︀်က︀ႆ︀ႈꩫ︀ႆ︀ႇ။ င︀ႆ︀းꩬ︀ီ တ︀ပ︀ေးꩡ︀ဝ်ႛတ︀ၢင︀်က︀ူဝ်ႇꩫ︀ႆ︀ႇၵ︀ဝ်ယ︀ႃႇ ꩭိူဝ်းမ︀ႆ︀ႛဢ︀ူꩬ︀ီ ၵ︀ေဢ︀ꩫ︀်ႈပ︀ႃႈꩫ︀ႆ︀ၢႈတ︀ီမ︀်ႈက︀ꩫ︀်ႈꩫ︀ႆ︀ႇꩡ︀ꩫ︀်ႈတ︀ိတ︀်ႉꩬ︀ီ င︀ွꩫ︀်းမ︀ႆ︀ႛဢ︀ဝ်ႈမ︀ႃးဢ︀ူ။ 9ၵ︀ဝ်လ︀ုက︀်ႉꩭိူဝ်းမ︀ႆ︀ႛလ︀ူင︀်းမ︀ႃးက︀ီး ၵ︀ဝ်ႛမ︀ုꩫ︀်းꩫ︀ႆ︀ႇၵ︀ဝ်င︀ႆ︀း ပ︀ႃႈဢ︀ꩫ︀်ႈထၢꩫ︀်ၸ︀ႆ︀းမ︀ႆ︀ႛလ︀ၢင︀်က︀ႃဝႆ︀ႇꩫ︀ႆ︀ႇၵ︀ဝ်မ︀ႆ︀ႛꩭꩫ︀်ဢ︀ူ။ 10ꩡ︀ဝ်ႛယ︀ေꩬ︀ုယ︀ႃႇ “ပ︀ႃႈဢ︀ꩫ︀်ႈင︀ႆ︀ႚꩬ︀ူꩫ︀ႆ︀ႛꩫ︀ႆ︀ႇ က︀မ︀်ႈၸ︀ွင︀်းဢ︀ဝ်ႈမ︀ႃးလ︀ႃး” ꩫ︀ဝꩫ︀်ႇ။ 11ꩬ︀ႅင︀်မ︀ုꩫ︀်ပ︀ေတ︀ရ︀ုယ︀ႃႇ က︀ꩫ︀်ႛꩫ︀ိူဝ်ꩭိူဝ်းမ︀ႆ︀ႛၵ︀ိုꩫ︀်ႛꩬ︀ီ ၵ︀ေဢ︀ꩫ︀်ႈပ︀ႃႈလ︀ူင︀်ပ︀ၢက︀်ꩭႃႛꩬ︀ိပ︀်ꩬ︀ၢမ︀်တ︀ူဝ်ႈတ︀ီမ︀်ႈက︀ꩫ︀်ႈꩫ︀ႆ︀ႇ ꩡ︀ꩫ︀်ႈၵ︀ိုꩫ︀်ႛင︀ွꩫ︀်းမ︀ႃးဢ︀ူ။ ပ︀ႃႈၵ︀ႆ︀ႇလ︀ိူင︀်ႈပ︀ုꩫ︀်ႛꩫ︀မ︀်ꩫ︀က︀ေႃႇ ၵ︀ေယ︀ႃႇမ︀ိတ︀်ႉလ︀ိူင︀်ႈꩫ︀ႆ︀ၢႈက︀ေႃႇꩵ︀ႈတ︀ိꩫ︀်ႇ။ 12ꩡ︀ဝ်ႛယ︀ေꩬ︀ုယ︀ႃႇ “မ︀ႃးလ︀ိူဝ်း မ︀ႃးက︀ိꩫ︀်ႈလ︀ိူဝ်း” ꩫ︀ဝꩫ︀်ႇ။ ၵ︀ဝ်က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ꩡ︀ဝ်ႛၵ︀ဝ်ၸ︀ူႛꩡ︀ဝ်ႛꩫ︀မ︀်ꩫ︀ꩫ︀ႆ︀ႇတ︀ွင︀်းက︀ႃꩫ︀ႆ︀ႇꩬ︀ီ “မ︀ႂ်းꩡ︀ဝ်ႛ ၸ︀ႂ်တ︀ီၵ︀ႃႛꩫ︀ႆ︀” ꩫ︀ꩬ︀ီၸ︀ႂ်က︀ေႃႇထၢမ︀်ꩵ︀ႈပ︀ီꩫ︀်ႈယ︀ဝ်ႇ။ 13ꩡ︀ဝ်ႛယ︀ေꩬ︀ုက︀ေႃႇ ၵ︀ဝ်မ︀ႆ︀ႛမ︀ႃးꩬ︀ီ ၵ︀ဝ်ႛမ︀ုꩫ︀်းꩫ︀ၵ︀ႃပ︀ႃႈꩡ︀ီꩭႂ်ႛဢ︀ူ။ 14ဢ︀ꩫ︀်ႈꩫ︀ႆ︀ႇယ︀ႃႇ ဢ︀ꩫ︀်ႈꩡ︀ဝ်ႛယ︀ေꩬ︀ု လ︀ုက︀်ႉတ︀ၢင︀်းတ︀ႆ︀ၢႈမ︀ႆ︀ႛ လ︀ုက︀်ႉꩫ︀ိပ︀်မ︀ႃးꩬ︀ီ တ︀ၢင︀်ꩬ︀ၢမ︀်ပ︀ၢꩫ︀်ႈတ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ပ︀ျႃးတ︀ူဝ်ႈꩭႂ်ႛꩫ︀ႆ︀ႇꩫ︀မ︀်။
လ︀ွင︀်ႈꩡ︀ဝ်ႛယ︀ေꩬ︀ုꩫ︀ၵ︀ႃပ︀ေတ︀ရ︀ု
15တ︀ပ︀ေးꩡ︀ဝ်ႛၵ︀ဝ်က︀ိꩫ︀်ႈယ︀ဝ်ႇက︀ီး ꩡ︀ဝ်ႛယ︀ေꩬ︀ုယ︀ႃႇ ꩬ︀ႅင︀်မ︀ုꩫ︀်ပ︀ေတ︀ရ︀ုမ︀ႆ︀ႛ “ꩬ︀ႅင︀်မ︀ုꩫ︀်ၸ︀ူႛလ︀ုက︀်ႉယ︀ေႃးꩭၢꩫ︀်ꩴ︀း ဢ︀ꩫ︀်ႈၵ︀ဝ်က︀ဝ်ႈမ︀ႆ︀ႛꩭၢက︀်ႉꩫ︀ႆ︀ႇမ︀ႆ︀ႛ ꩬ︀ႃꩬ︀ီမ︀ႂ်းက︀ဝ်ႈမ︀ႆ︀ႛꩭၢက︀်ႉဢ︀ေႃး” ꩫ︀ꩬ︀ီထၢမ︀်ဢ︀ူ။ ꩬ︀ႅင︀်မ︀ုꩫ︀်ယ︀ႃႇ “ဢ︀ေႃးတ︀ီၵ︀ႃႛ။ ꩡ︀ဝ်ႛမ︀ႆ︀ႛက︀ဝ်ႈၵ︀ႃႛꩭၢက︀်ႉꩫ︀ႆ︀ႇ ꩡ︀ဝ်ႛတ︀ွင︀်းတ︀ီၵ︀ႃႛဢ︀ူ” ꩫ︀ဝꩫ︀်ႇ။ င︀ႆ︀းက︀ီးမ︀ꩫ︀်းꩡ︀ဝ်ႛယ︀ႃႇ “ပ︀ူႇဢ︀ွꩫ︀်က︀ဝ်ႈၵ︀ဝ်မ︀ႆ︀ႛမ︀ိုင︀်ႇတ︀ႃႉ” ꩫ︀ဝꩫ︀်ႇ။ 16တ︀ၢင︀်ꩬ︀ွင︀်ပ︀ၢꩫ︀်ႈ “ꩬ︀ႅင︀်မ︀ုꩫ︀်ၸ︀ူႛလ︀ုက︀်ႉယ︀ေႃးꩭၢꩫ︀်ꩴ︀း မ︀ႂ်း က︀ဝ်ႈမ︀ႆ︀ႛꩭၢက︀်ႉဢ︀ေႃး” ꩫ︀ꩬ︀ီမ︀ꩫ︀်းꩡ︀ဝ်ႛထၢမ︀်က︀ီး မ︀ꩫ︀်းက︀ေႃႇ “ဢ︀ေႃးတ︀ီၵ︀ႃႛ၊ ꩡ︀ဝ်ႛမ︀ႆ︀ႛက︀ဝ်ႈၵ︀ႃႛꩭၢက︀်ႉꩫ︀ႆ︀ႇ ꩡ︀ဝ်ႛတ︀ွင︀်းတ︀ီၵ︀ႃႛဢ︀ူ” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုက︀ေႃႇ “ပ︀ူႇက︀ဝ်ႈၵ︀ဝ်မ︀ႆ︀ႛမ︀ိုင︀်ႇတ︀ႃႉ” ꩫ︀ဝꩫ︀်ႇ။ 17တ︀ၢင︀်ꩬ︀ၢမ︀်ပ︀ၢꩫ︀်ႈ “ꩬ︀ႅင︀်မ︀ုꩫ︀်ၸ︀ူႛလ︀ုက︀်ႉယ︀ေႃးꩭၢꩫ︀်ꩴ︀း မ︀ႂ်း က︀ဝ်ႈမ︀ႆ︀ႛꩭၢက︀်ႉဢ︀ေႃး” ꩫ︀ꩬ︀ီမ︀ꩫ︀်းꩡ︀ဝ်ႛထၢမ︀်ဢ︀ူ။ င︀ႆ︀းꩬ︀ီ တ︀ၢင︀်ꩬ︀ၢမ︀်ပ︀ၢꩫ︀်ႈပ︀ုꩫ︀်ႛထၢမ︀်မ︀ႃးက︀ီး ပ︀ေတ︀ရ︀ုꩡ︀ႂ်ႈꩬ︀ဝ်ႛမ︀ႃးꩬ︀ီ “ꩡ︀ဝ်ႛꩴ︀း မ︀ႂ်းꩡ︀ဝ်ႛတ︀င︀်းမ︀ိူင︀်းတ︀ွင︀်းတ︀ီၵ︀ႃႛဢ︀ူ။ ꩡ︀ဝ်ႛမ︀ႆ︀ႛက︀ဝ်ႈၵ︀ႃႛꩭၢက︀်ႉꩫ︀ႆ︀ႇ ꩡ︀ဝ်ႛတ︀ွင︀်းတ︀ီၵ︀ႃႛဢ︀ူ” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုက︀ေႃႇ “ပ︀ူႇက︀ဝ်ႈၵ︀ဝ်မ︀ႆ︀ႛမ︀ိုင︀်ႇတ︀ႃႉ” ꩫ︀ဝꩫ︀်ႇ။ 18က︀ဝ်ႈꩬ︀ိုဝ်ႈꩰဝႃႈက︀ွတ︀်။ မ︀ႂ်း မ︀ိူဝ်ႈꩫ︀ုမ︀်ꩫ︀ႆ︀ႇ ဢ︀မ︀ႆ︀ႚၵ︀ႂ်ႈက︀ႃက︀ေႃႇ က︀ꩡ︀ူးက︀ႃပ︀ီꩫ︀်ႈဢ︀ူ။ မ︀ႂ်းထဝ်ႛမ︀ႃးက︀ီးယ︀ႃႇ မ︀ိုဝ်းမ︀ႂ်းတ︀င︀်းꩬ︀ွင︀်ပ︀ႃႛယ︀ုꩫ︀်ႈင︀ႆ︀း ပ︀ိူꩫ︀်ႈၸ︀ုက︀်ꩬ︀ီ တ︀ီႈဢ︀ꩫ︀်ႈမ︀ႂ်းမ︀ဝ်ၵ︀ႂ်ႈက︀ႃမ︀ႆ︀ႛ တ︀ီꩭွင︀်ႇက︀ႃꩬ︀ႃး” ꩫ︀ဝꩫ︀်ႇ။ 19မ︀ꩫ︀်းꩡ︀ဝ်ႛဝႃႈင︀ႆ︀းꩫ︀ႆ︀ႇ ꩭႂ်ႛပ︀ူဝ်းမ︀ူꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩭိူဝ်ႈꩭိုင︀်းပ︀ိုင︀်းꩬ︀ႂ်ꩫ︀ႆ︀ႇ ပ︀ေတ︀ရ︀ု ꩭိုဝ်လ︀ိုဝ်တ︀ီတ︀ႆ︀ၢႈꩫ︀ꩫ︀ႆ︀ႇ ၵ︀ႆ︀ႈပ︀ျႃးဝႆ︀ႇꩫ︀မ︀်။ မ︀ꩫ︀်းꩡ︀ဝ်ႛဝႃႈင︀ႆ︀းယ︀ဝ်ႇက︀ီး “က︀ꩫ︀်ႛလ︀င︀်က︀ဝ်ႈမ︀ႆ︀ႛ ꩡ︀ွမ︀်းမ︀ႃးတ︀ႃႉ” ꩫ︀ꩬ︀ီပ︀ေတ︀ရ︀ုမ︀ႆ︀ႛဝႃႈဢ︀ူ။
လ︀ွင︀်ႈꩡ︀ဝ်ႛယ︀ေꩬ︀ုꩫ︀ၵ︀ႃတ︀ပ︀ေးꩡ︀ဝ်ႛတ︀ၢင︀်က︀ူဝ်ႇ
20ပ︀ေတ︀ရ︀ုဝိꩫ︀်လ︀ႅမ︀်းၵ︀ွတ︀်က︀ီး က︀ꩫ︀်ႛလ︀င︀်မ︀ꩫ︀်းမ︀ႆ︀ႛ တ︀ပ︀ေးꩡ︀ဝ်ႛဢ︀ꩫ︀်ႈꩡ︀ဝ်ႛယ︀ေꩬ︀ုꩭၢက︀်ႉꩫ︀ႆ︀ႇမ︀ႆ︀ႛꩭꩫ︀်ဢ︀ူ။ တ︀ပ︀ေးꩡ︀ဝ်ႛဢ︀မ︀ႂ်းယ︀ႃႇ မ︀ိူဝ်ႈၵ︀ဝ်ꩭူမ︀်ႈက︀ိꩫ︀်ႈၵ︀ဝ်ပ︀ၢင︀်ႛၵ︀မ︀်ႈꩫ︀ႆ︀ႇ ဢ︀ꩫ︀်ႈဢ︀ူင︀်ႛꩡ︀ႂ်ႈꩡ︀ဝ်ႛယ︀ေꩬ︀ုမ︀ႆ︀ႛဢ︀ိင︀်ႈꩬ︀ီ “ꩡ︀ဝ်ႛꩴ︀း က︀ူဝ်ႇဢ︀ꩫ︀်ႈꩡ︀ဝ်ႛမ︀ႆ︀ႛ တ︀ီၸ︀ုꩫ︀်ႇꩬ︀ႅတ︀်ႉꩡ︀ႃꩫ︀ႆ︀ႇ ၸ︀ႂ်တ︀ီၵ︀ႃႛꩫ︀ႆ︀” ꩫ︀ꩬ︀ီ ထၢမ︀်မ︀ႃးꩫ︀ႆ︀ႇꩫ︀မ︀်။ 21ပ︀ေတ︀ရ︀ုယ︀ႃႇ မ︀ꩫ︀်းမ︀ႆ︀ႛꩭꩫ︀်က︀ီး “ꩡ︀ဝ်ႛꩴ︀း ꩫ︀ႄ မ︀ꩫ︀်းယ︀ႃႇတ︀ီပ︀ီꩫ︀်ႈꩭိုဝ်တ︀ီၵ︀ႃႛꩫ︀ႆ︀” ꩫ︀ဝꩫ︀်ႇ။ 22ꩡ︀ဝ်ႛယ︀ေꩬ︀ုယ︀ႃႇ “ꩬ︀င︀်ဝႃႈတ︀ူဝ်ထိုင︀်ဝꩫ︀်းဢ︀ꩫ︀်ႈက︀ဝ်ႈက︀ျွႃးပ︀ွက︀်ႉမ︀ႃးꩫ︀ႆ︀ႇ မ︀ꩫ︀်းမ︀ႆ︀ႛ က︀ဝ်ႈဢ︀ꩬ︀ၢက︀်ႉၵ︀ႂ်ႈꩭႂ်ႛꩫ︀ိပ︀်ꩬ︀ီဢ︀ူꩫ︀က︀ေႃႇ ဢ︀မ︀ူးမ︀ႂ်းꩵ︀ႈꩡ︀ႂ်ႈ။ မ︀ႂ်းယ︀ႃႇ က︀ꩫ︀်ႛလ︀င︀်က︀ဝ်ႈမ︀ႆ︀ႛꩬ︀ိုင︀်ꩡ︀ွမ︀်းမ︀ႃးလ︀ႃး” ꩫ︀ဝꩫ︀်ႇ။ 23င︀ႆ︀းꩬ︀ီ တ︀ပ︀ေးꩡ︀ဝ်ႛဢ︀မ︀ႂ်းယ︀ႃႇ ꩵ︀ႈꩫ︀ႆ︀ႛတ︀ႆ︀ၢႈယ︀ဝ်ႇꩫ︀ꩬ︀ီ ဝူင︀်ႈက︀ၢင︀်ႈတ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ꩭူင︀်က︀ꩫ︀်ႈက︀ႃယ︀ဝ်ႇ။ ꩫ︀ႆ︀ႇꩫ︀က︀ေႃႇ ꩡ︀ဝ်ႛယ︀ေꩬ︀ုယ︀ႃႇ တ︀ပ︀ေးꩡ︀ဝ်ႛဢ︀မ︀ႂ်းꩵ︀ႈꩫ︀ႆ︀ႛတ︀ႆ︀ၢႈꩫ︀ꩬ︀ီဝႃႈꩵ︀ႈꩡ︀ႂ်ႈ။ “ꩬ︀င︀်ဝႃႈတ︀ူဝ်ထိုင︀်ဝꩫ︀်းဢ︀ꩫ︀်ႈက︀ဝ်ႈက︀ျွႃးပ︀ွက︀်ႉမ︀ႃးꩫ︀ႆ︀ႇ မ︀ꩫ︀်းမ︀ႆ︀ႛက︀ဝ်ႈဢ︀ꩬ︀ၢက︀်ႉၵ︀ႂ်ႈꩭႂ်ႛꩫ︀ိပ︀်ꩫ︀က︀ေႃႇ ဢ︀မ︀ူးမ︀ႂ်းꩵ︀ႈꩡ︀ႂ်ႈ” ꩫ︀ꩫ︀ႆ︀ၢႈꩫ︀မ︀်ဝႃႈမ︀ႃးꩫ︀ႆ︀ႇ။ 24တ︀ပ︀ေးꩡ︀ဝ်ႛဢ︀မ︀ႂ်းယ︀ႃႇ က︀ူဝ်ႇဢ︀ꩫ︀်ႈလ︀ွင︀်ႈꩫ︀ႆ︀ႇၵ︀ဝ်တ︀ႅမ︀်ႛꩬ︀ီ ꩭီတ︀်ꩬ︀ၢက︀်ႉꩬ︀ေဝႆ︀ႇꩫ︀ႆ︀ႇꩫ︀မ︀်။ ဢ︀ꩫ︀်ႈမ︀ꩫ︀်းတ︀ႅမ︀်ႛဝႆ︀ႇꩫ︀ႆ︀ႇၵ︀ဝ် ꩡ︀ႂ်ႈဢ︀ူꩫ︀ꩫ︀ႆ︀ႇက︀ေႃႇတ︀ူႈတ︀ွင︀်းဢ︀ူ။
တ︀ွꩫ︀်ႈလ︀ူပ︀်
25ဢ︀ꩫ︀်ႈꩡ︀ဝ်ႛယ︀ေꩬ︀ုꩭီတ︀်မ︀ႃးꩫ︀ႆ︀ႇၵ︀ဝ် တ︀ၢင︀်ဢ︀ꩫ︀်ႈဢ︀ၢꩫ︀်တ︀ၢꩫ︀်ယ︀င︀်းဢ︀ိက︀်ဢ︀ူ။ ဢ︀မ︀ႂ်းၵ︀ဝ်က︀ႃႈꩫ︀င︀်ယ︀င︀်းꩫ︀ႆ︀ႇတ︀ႅမ︀်ႛမ︀တ︀်ႉဝႆ︀ႇက︀ွတ︀်ꩫ︀က︀ီး တ︀ီႈဢ︀ꩫ︀်ႈတ︀ီဝႆ︀ႇပ︀ၢပ︀်ႉဢ︀မ︀ႂ်းၵ︀ဝ်ꩫ︀ႆ︀ၢႈက︀ေႃႇ တ︀ီပ︀ူဝ်းꩵ︀ႈꩡ︀ႂ်ႈ။
Currently Selected:
ယ︀ေႃးꩭၢꩫ︀် 21: kht
Highlight
Share
Copy

Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
Free Reading Plans and Devotionals related to ယ︀ေႃးꩭၢꩫ︀် 21

John Explained Part 3 | Light Overcomes the Darkness

God’s Not Done With You: Encouragement From the Bible's Greatest Comeback Stories

Slow Down, Show Up & Pray. Wellbeing the Jesus Way. 5 Day Bible Plan With Ruth Rice
