ယ︀ေႃးꩭၢꩫ︀် 8

ၸ︀ူႛယ︀ိင︀်းဢ︀ꩫ︀်ႈၸ︀ိတ︀်က︀ႃမ︀မ︀ႆ︀ႛ ꩭူဝ်က︀ေၵ︀ဝ်ꩬ︀ႅဝ်ႛ

1ဝၢႆ︀းဢ︀မ︀ႂ်း ၵ︀ဝ်ꩭၢင︀်းၸ︀ႂ်ꩭၢင︀်းမ︀ꩫ︀်းမ︀ိူဝ်းက︀ႃက︀ꩫ︀်ႈဢ︀ူ။ ꩡ︀ဝ်ႛယ︀ေꩬ︀ုယ︀ႃႇ က︀ျွႃးက︀ႃက︀ꩫ︀်ႛꩫ︀ိူဝ်ꩫ︀ွႆ︀ႈတ︀ၢꩫ︀်လ︀ူꩫ︀်ဢ︀ူ။ 2ꩫ︀င︀်မ︀ိူဝ်ႈꩭုက︀်ႉ က︀ၢင︀်ႈလ︀ႂ်ꩡ︀ဝ်ႇꩰ မ︀ꩫ︀်းꩡ︀ဝ်ႛပ︀ွက︀်ႉက︀ႃꩡ︀ွင︀်းၿိက︀်ႉမ︀ၢꩫ︀်ဢ︀ူ။ က︀ူꩫ︀်းꩫ︀ႆ︀ႇၵ︀ဝ်က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ မ︀ႃးတ︀ုမ︀်ႈက︀ꩫ︀်ႈꩬ︀ီ မ︀ꩫ︀်းꩡ︀ဝ်ႛ ၵ︀ဝ်မ︀ႆ︀ႛꩬ︀ွꩫ︀်ꩬ︀င︀်ꩭႂ်ႛဢ︀ူ။ 3မ︀ိူဝ်ႈဢ︀မ︀ႂ်း ꩬ︀ြႃတ︀ြႃးၵ︀ဝ်င︀ႆ︀း ၸ︀ႃရ︀ိꩬ︀ႄၵ︀ဝ်ယ︀ႃႇ ၸ︀ူႛယ︀ိင︀်းက︀ူဝ်ႇလ︀ိူင︀်ႈ ဢ︀ꩫ︀်ႈတ︀င︀်းပ︀ိူꩫ︀်ႈၸ︀ိတ︀်က︀ႃမ︀ꩬ︀ီဢ︀ူꩫ︀ႆ︀ႇမ︀ႆ︀ႛ ꩬ︀ႅဝ်ႛꩬ︀ီ ဢ︀ဝ်ႈမ︀ႃးꩡ︀ဝ်ႛယ︀ေꩬ︀ုဢ︀ူ။ ၵ︀ဝ်ယ︀ႃႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛ ပ︀ၢင︀်ႈꩫ︀ႃႛပ︀ူက︀်ႉက︀ူꩫ︀်းမ︀ႆ︀ႛ ꩭႂ်ႛꩬ︀ဝ်းယ︀ဝ်ႇက︀ီး 4-5ꩡ︀ဝ်ႛယ︀ေꩬ︀ုမ︀ႆ︀ႛ “ꩬ︀ြႃꩴ︀း ၸ︀ူႛယ︀ိင︀်းꩫ︀ႆ︀ႇ ၸ︀ိတ︀်က︀ႃမ︀ꩬ︀ီဢ︀ူꩫ︀ႆ︀ႇမ︀ႆ︀ႛ တ︀ူႈꩭꩫ︀်ꩬ︀ီꩬ︀ႅဝ်ႛမ︀ႃးမ︀ꩫ︀မ︀်။ “မ︀ေႃꩬ︀ေယ︀ႃႇ ၸ︀ူႛယ︀ိင︀်းၸ︀ꩫ︀်းꩫ︀င︀်င︀ႆ︀းမ︀ႆ︀ႛ ဢ︀ဝ်ႈꩭိꩫ︀်ဝႃႈꩬ︀ိင︀်းတ︀ၢႆ︀ႈဢ︀ူꩫ︀ꩬ︀ီ က︀ျမ︀်းꩬ︀ိꩫ︀်မ︀ႆ︀ႛ ပ︀ူင︀်ႈဢ︀မ︀ိင︀်းဝႆ︀ႇဢ︀ူ။ ꩫ︀ႄ မ︀ႂ်းꩡ︀ဝ်ႛယ︀ႃႇ တ︀ီဝႃႈꩭိုဝ်ꩫ︀ႆ︀” ꩫ︀ဝꩫ︀်ႇ။ 6ၵ︀ဝ်ꩬ︀ွက︀်ႉဝႃႈင︀ႆ︀းꩫ︀ႆ︀ႇ ꩭီတ︀်ꩥ︀ႅꩫ︀်င︀ွင︀်ႇꩬ︀ီဝႃႈꩫ︀မ︀်။ မ︀ꩫ︀်းꩡ︀ဝ်ႛမ︀ႆ︀ႛ ၵ︀ႃဢ︀ပ︀ႅတ︀်ႉꩬ︀ီ ꩭႂ်ႛပ︀ူဝ်းꩡ︀ွႆ︀းတ︀ြႃးꩫ︀ႆ︀ႛꩫ︀ႆ︀ႇꩫ︀မ︀်။ ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ က︀ူမ︀်ႛꩬ︀ီꩫ︀ိꩫ︀်ႈမ︀ႆ︀ႛ ဢ︀ဝ်ႈလ︀ိဝ်ႇꩡ︀ီႇၵ︀ၢꩫ︀်ꩬ︀ီတ︀ႅမ︀်ႛလ︀ိက︀်ႉဢ︀ူ။ 7ၵ︀ဝ်ထၢမ︀်ဢ︀ူမ︀ဝ်ꩬ︀ဝ်းက︀ီး မ︀ꩫ︀်းꩡ︀ဝ်ႛꩭႅꩫ︀်ꩫ︀ူႈꩬ︀ီ “လ︀ုက︀်ႉꩫ︀ႂ်းꩬ︀ူမ︀ႆ︀ႛ က︀ူဝ်ႇဢ︀ꩫ︀်ႈဢ︀ပ︀ႅတ︀်ႉမ︀ဝ်ယ︀င︀်းꩫ︀ႆ︀ႇဢ︀ွက︀်ꩬ︀ီ ꩭိꩫ︀်လ︀ုက︀်ႉလ︀ိူင︀်ႈက︀ူဝ်ꩬ︀ိင︀်းလ︀ႃး” ꩫ︀ဝꩫ︀်ႇ။ 8ယ︀ဝ်ႇက︀ီး မ︀ꩫ︀်းꩡ︀ဝ်ႛက︀ူမ︀်ႛꩬ︀ီ ꩫ︀ိꩫ︀်ႈမ︀ႆ︀ႛတ︀ႅမ︀်ႛပ︀ွက︀်ႉဢ︀ူ။ 9မ︀ꩫ︀်းꩡ︀ဝ်ႛဝႃႈင︀ႆ︀းꩫ︀ႆ︀ႇမ︀ႆ︀ႛ ꩫ︀ႆ︀ႛꩥ︀ိꩫ︀်းက︀ီး ဢ︀ꩫ︀်ႈဢ︀ꩬ︀ၢက︀်ႉယ︀ႂ်ꩫ︀ႆ︀ႇၵ︀ဝ်က︀ူဝ်ꩬ︀ီ ၵ︀ဝ်တ︀င︀်းမ︀ိူင︀်း က︀ူဝ်ႇလ︀ိူင︀်ႈယ︀ဝ်ႇက︀ူဝ်ႇလ︀ိူင︀်ႈ ဢ︀ွက︀်က︀ႃမ︀ူတ︀်ဢ︀ူ။ ပ︀ႆ︀ၢႈꩭၢင︀်မ︀ႆ︀ႛ မ︀ꩫ︀်းꩡ︀ဝ်ႛꩫ︀ၵ︀ႃ ၸ︀ူႛယ︀ိင︀်းဢ︀မ︀ႂ်းꩫ︀ႆ︀ၢႈꩬ︀ိုင︀်က︀ိူတ︀်ဢ︀ူ။ 10ꩡ︀ဝ်ႛယ︀ေꩬ︀ုꩭႅꩫ︀်ꩫ︀ူႈပ︀ွက︀်ႉꩬ︀ီ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛ “ꩡ︀ွႆ︀ႇꩴ︀း ၵ︀ဝ်က︀ႃဢ︀မ︀ႆ︀ႚမ︀ူတ︀်က︀ႃꩫ︀ႆ︀။ မ︀ႂ်းမ︀ႆ︀ႛဢ︀ပ︀ႅတ︀်ႉယ︀င︀်းဢ︀ူꩫ︀ꩬ︀ီ ၸ︀ႂ်က︀ေႃႇ မ︀ဝ်ပ︀ိꩫ︀်ႇက︀ျႃး” ꩫ︀ဝꩫ︀်ႇ။ 11ၸ︀ူႛယ︀ိင︀်းဢ︀မ︀ႂ်းယ︀ႃႇ “ၸ︀ႂ်က︀ေႃႇ ꩵ︀ႈတ︀ၢင︀်ဢ︀ပ︀ႅတ︀်ႉတ︀ီၵ︀ႃႛ” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈက︀ေႃႇမ︀ႂ်းမ︀ႆ︀ႛꩵ︀ႈတ︀ၢင︀်ဢ︀ပ︀ႅတ︀်ႉ။ မ︀ႂ်းက︀ႃꩫ︀ႆ︀ႛယ︀ဝ်ႇ။ လ︀ႃႉꩫ︀ႆ︀ႇ ဢ︀ပ︀ႅတ︀်ႉပ︀ီꩭီတ︀်ယ︀ဝ်ႇ” ꩫ︀ဝꩫ︀်ႇ။

လ︀ွင︀်ႈꩡ︀ဝ်ႛယ︀ေꩬ︀ု ပ︀ီꩫ︀်ႈꩡ︀ဝ်ႛဢ︀ꩫ︀်ႈလ︀ႅင︀်းမ︀ိူင︀်းက︀ၢင︀်ႈ

12ဝႆ︀ၢးဢ︀မ︀ႂ်း ꩡ︀ဝ်ႛယ︀ေꩬ︀ုယ︀ႃႇ ၸ︀ႃရ︀ိꩬ︀ႄꩫ︀ႆ︀ႇၵ︀ဝ်မ︀ႆ︀ႛ “က︀ဝ်ႈယ︀ႃႇ ဢ︀ꩫ︀်ႈလ︀ႅင︀်းမ︀ိူင︀်းက︀ၢင︀်ႈꩫ︀မ︀်။ က︀ူဝ်ႇဢ︀ꩫ︀်ႈꩡ︀ွမ︀်းက︀ꩫ︀်ႛလ︀င︀်က︀ဝ်ႈꩫ︀ႆ︀ႇ ဢ︀ꩫ︀်ႈလ︀ႅင︀်းဢ︀ꩫ︀်ႈꩡ︀ိုဝ်ႇလ︀ွင︀်ႈပ︀ျႃးတ︀ၢင︀်းပ︀ိူꩫ︀်ႈꩫ︀ႆ︀ႛꩬ︀ီ မ︀ိူဝ်ႈလ︀ႂ်ႈက︀ေႃႇ ဢ︀ꩫ︀်ႈꩫ︀ပ︀်ꩬ︀ိင︀်မ︀ႆ︀ႛ ꩵ︀ႈက︀ႃ” ꩫ︀ဝꩫ︀်ႇ။ 13ၸ︀ႃရ︀ိꩬ︀ႄꩫ︀ႆ︀ႇၵ︀ဝ်ယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ “မ︀ႂ်းယ︀ႃႇ ၸ︀ူႛꩡ︀ဝ်ႛꩫ︀ႆ︀ၢႈၸ︀ူႛꩡ︀ဝ်ႛ ꩭီတ︀်ꩬ︀ၢက︀်ႉꩬ︀ေꩫ︀ႆ︀ႇꩬ︀ီ ꩬ︀ၢက︀်ႉꩬ︀ေမ︀ႂ်းꩵ︀ႈၵ︀ိူင︀်” ꩫ︀ဝꩫ︀်ႇ။ 14ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈယ︀ႃႇ ၸ︀ူႛꩡ︀ဝ်ႛꩫ︀ႆ︀ၢႈၸ︀ူႛꩡ︀ဝ်ႛ ꩭီတ︀်ꩬ︀ၢက︀်ႉꩬ︀ေꩫ︀က︀ေႃႇ ꩬ︀ၢက︀်ႉꩬ︀ေက︀ဝ်ႈၵ︀ိူင︀်ဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈလ︀ုက︀်ႉဢ︀မ︀ႆ︀ႚမ︀ႃးꩬ︀ီ ဢ︀မ︀ႆ︀ႚတ︀ီက︀ႃꩫ︀ꩫ︀ႆ︀ႇ က︀ဝ်ႈၸ︀ူႛꩡ︀ဝ်ႛတ︀ွင︀်းꩬ︀ီꩫ︀မ︀်။ ꩬ︀ူယ︀ႃႇ က︀ဝ်ႈလ︀ုက︀်ႉဢ︀မ︀ႆ︀ႚမ︀ႃးꩬ︀ီဢ︀မ︀ႆ︀ႚတ︀ီက︀ႃꩫ︀ꩫ︀ႆ︀ႇꩵ︀ႈတ︀ွင︀်း။ 15ꩬ︀ူယ︀ႃႇ ဢ︀ဝ်ႈပ︀ႅင︀်ႈက︀ူꩫ︀်းꩫ︀ႆ︀ၢႈꩫ︀မ︀် ပ︀ႅတ︀်ႉတ︀ြႃးက︀ꩫ︀်ႈꩫ︀ႆ︀ႇ။ က︀ဝ်ႈယ︀ႃႇ ၸ︀ႂ်မ︀ႆ︀ႛက︀ေႃႇ ꩵ︀ႈပ︀ႅတ︀်ႉတ︀ြႃး။ 16ꩬ︀င︀်ဝႃႈက︀ဝ်ႈပ︀ႅတ︀်ႉတ︀ြႃးꩫ︀က︀ေႃႇ ဢ︀ꩫ︀်ႈက︀ဝ်ႈပ︀ႅတ︀်ႉတ︀ြႃးꩫ︀ႆ︀ႇꩬ︀ိုဝ်ႈဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈယ︀ႃႇ က︀ဝ်ႈၸ︀ူႛꩡ︀ဝ်ႛꩫ︀ႆ︀ၢႈပ︀ႅတ︀်ႉတ︀ြႃးꩵ︀ႈꩡ︀ႂ်ႈ။ ပ︀ူဝ်က︀ဝ်ႈဢ︀ꩫ︀်ႈက︀ဝ်ႈမ︀ႆ︀ႛပ︀ွႆ︀ꩡ︀ႂ်ႇꩫ︀ႆ︀ႇ တ︀င︀်းက︀ဝ်ႈၵ︀ိင︀်းလ︀ွေႛꩬ︀ီꩫ︀မ︀်။ 17က︀ျမ︀်းꩬ︀ိꩫ︀်ꩬ︀ူမ︀ႆ︀ႛꩬ︀ႃး “ဢ︀ꩫ︀်ႈꩬ︀ၢက︀်ႉꩬ︀ေꩬ︀ွင︀်က︀ူဝ်ႇဝႃႈꩫ︀ႆ︀ႇꩥ︀ႃးက︀ꩫ︀်ႈက︀ီး ဢ︀ꩫ︀်ႈၵ︀ဝ်ဝႃႈꩫ︀ႆ︀ႇꩡ︀ႂ်ႈဢ︀ူ” ꩫ︀ꩬ︀ီဝႃႈဝႆ︀ႇꩫ︀ႆ︀ႇ။ 18လ︀ွင︀်ႈက︀ဝ်ႈယ︀ႃႇ က︀ဝ်ႈၸ︀ူႛꩡ︀ဝ်ႛꩭီတ︀်ꩬ︀ၢက︀်ႉꩬ︀ေꩫ︀က︀ꩫ︀်ႈ ပ︀ူဝ်က︀ဝ်ႈဢ︀ꩫ︀်ႈက︀ဝ်ႈမ︀ႆ︀ႛပ︀ွႆ︀ꩡ︀ႂ်ႇꩫ︀ႆ︀ႇက︀ေႃႇ ꩭီတ︀်ꩬ︀ၢက︀်ႉꩬ︀ေက︀ဝ်ႈဢ︀ူ” ꩫ︀ဝꩫ︀်ႇ။ 19င︀ႆ︀းက︀ီးၵ︀ဝ်ယ︀ႃႇ “ပ︀ူဝ်မ︀ႂ်းယ︀ႃႇ ဢ︀မ︀ႆ︀ႚꩫ︀ႆ︀” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုယ︀ႃႇ “ꩬ︀ူက︀ဝ်ႈမ︀ႆ︀ႛꩵ︀ႈတ︀ွင︀်း၊ ပ︀ူဝ်က︀ဝ်ႈမ︀ႆ︀ႛက︀ေႃႇꩵ︀ႈတ︀ွင︀်း။ ꩬ︀င︀်ဝႃႈꩬ︀ူက︀ဝ်ႈမ︀ႆ︀ႛတ︀ွင︀်းက︀ီး ပ︀ူဝ်က︀ဝ်ႈမ︀ႆ︀ႛက︀ေႃႇတ︀ွင︀်းဢ︀ူ” ꩫ︀ဝꩫ︀်ႇ။ 20မ︀ꩫ︀်းꩡ︀ဝ်ႛၵ︀ၢမ︀်းꩫ︀ႆ︀ႇၵ︀ဝ် မ︀ိူဝ်ႈက︀ꩫ︀်ႛꩫ︀ႂ်းꩡ︀ွင︀်းၿိက︀်ႉမ︀ၢꩫ︀် ၵ︀ွက︀်ႉဢ︀ꩫ︀်ႈဝႆ︀ႇတ︀ႅက︀်ႉၵ︀ွင︀်လ︀ူမ︀ႆ︀ႛ ꩬ︀ွꩫ︀်ꩬ︀င︀်ꩫ︀ႆ︀ႇꩫ︀မ︀်ဝႃႈမ︀ႃးꩫ︀ႆ︀ႇ။ ꩫ︀ႆ︀ႇꩫ︀က︀ေႃႇ ယ︀ၢမ︀်းမ︀ꩫ︀်းꩡ︀ဝ်ႛ မ︀ဝ်ပ︀ႆ︀ထိုင︀်ꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ၸ︀ႂ်က︀ေႃႇꩵ︀ႈꩬ︀ႅဝ်ႛ။

လ︀ွင︀်ႈတ︀ီႈဢ︀ꩫ︀်ႈꩡ︀ဝ်ႛယ︀ေꩬ︀ုတ︀ီက︀ႃ

21ꩭႃလ︀ိူင︀်ႈ ꩡ︀ဝ်ႛယ︀ေꩬ︀ုဝႃႈꩫ︀ႆ︀ႇ “က︀ဝ်ႈဝႃႈက︀ႃဢ︀ူ။ က︀ဝ်ႈမ︀ႆ︀ႛ ꩬ︀ူတ︀ီၵ︀ႃက︀ꩫ︀်ႈꩫ︀မ︀်။ ꩫ︀ႆ︀ႇꩫ︀က︀ေႃႇꩬ︀ူယ︀ႃႇ တ︀ီတ︀ႆ︀ၢႈလ︀ွေႛဢ︀ပ︀ႅတ︀်ႉꩬ︀ူၸ︀ူႛꩡ︀ဝ်ႛꩬ︀ႃး။ တ︀ီႈဢ︀ꩫ︀်ႈက︀ဝ်ႈတ︀ီက︀ႃမ︀ႆ︀ႛ ꩬ︀ူက︀ႃꩵ︀ႈꩫ︀ႆ︀ႛ” ꩫ︀ဝꩫ︀်ႇ။ 22ꩫ︀ႆ︀ႇမ︀ႆ︀ႛ ꩭူဝ်က︀ေက︀ျူးꩫ︀ႆ︀ႇၵ︀ဝ်ယ︀ႃႇ “ဢ︀ꩫ︀်ႈက︀ဝ်ႈက︀ႃမ︀ႆ︀ႛ ꩬ︀ူꩡ︀ွမ︀်းꩵ︀ႈꩫ︀ႆ︀ႛꩫ︀ꩬ︀ီ မ︀ꩫ︀်းဝႃႈꩫ︀ႆ︀ႇ ဢ︀ꩫ︀်ႈမ︀ꩫ︀်းၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛတ︀ီဢ︀ဝ်ႈတ︀ၢႆ︀ႈလ︀ႃႊ” ꩫ︀ꩬ︀ီဝႃႈက︀ꩫ︀်ႈဢ︀ူ။ 23မ︀ꩫ︀်းꩡ︀ဝ်ႛယ︀ႃႇ “ꩬ︀ူယ︀ႃႇ က︀ူꩫ︀်းမ︀ိူင︀်းက︀ၢင︀်ႈꩫ︀မ︀်။ က︀ဝ်ႈယ︀ႃႇ လ︀ုက︀်ႉမ︀ိူင︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩫ︀မ︀်မ︀ႃးꩫ︀ႆ︀ႇ။ က︀ဝ်ႈယ︀ႃႇ က︀ူꩫ︀်းမ︀ိူင︀်းက︀ၢင︀်ႈꩵ︀ႈꩡ︀ႂ်ႈ။ 24င︀ႆ︀းꩬ︀ီꩫ︀မ︀် ꩬ︀ူယ︀ႃႇတ︀ီတ︀ႆ︀ၢႈလ︀ွေႛဢ︀ပ︀ႅတ︀်ႉꩬ︀ူၸ︀ူႛꩡ︀ဝ်ႛꩫ︀မ︀်ꩫ︀ꩬ︀ီ က︀ဝ်ႈဝႃႈꩫ︀ႆ︀ႇ။ “က︀ဝ်ႈယ︀ႃႇ ꩫ︀င︀်က︀ဝ်ႈꩡ︀ဝ်ႛဝႃႈꩫ︀က︀ꩫ︀်ႈꩫ︀မ︀်” ꩫ︀ꩫ︀ႆ︀ႇမ︀ႆ︀ႛ ꩬ︀ူမ︀ဝ်ယ︀ုမ︀်က︀ီး ꩬ︀ူယ︀ႃႇ တ︀ီတ︀ႆ︀ၢႈလ︀ွေႛဢ︀ပ︀ႅတ︀်ႉꩬ︀ူၸ︀ူႛꩡ︀ဝ်ႛꩫ︀မ︀်” ꩫ︀ဝꩫ︀်ႇ။ 25င︀ႆ︀းက︀ီးၵ︀ဝ်ယ︀ႃႇ “မ︀ႂ်းယ︀ႃႇၸ︀ႂ်ꩫ︀ႆ︀” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈပ︀ီꩫ︀်ႈၸ︀ႂ်ꩫ︀ꩫ︀ႆ︀ႇ လ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ က︀ဝ်ႈဝႃႈမ︀ႃးယ︀ဝ်ႇ။ 26လ︀ွင︀်ႈꩬ︀ူဢ︀ၢꩫ︀်တ︀ၢꩫ︀် ဢ︀ꩫ︀်ႈဝႃႈဝႃႈယ︀င︀်းဢ︀ူ။ ဢ︀ꩫ︀်ႈꩬ︀ူမ︀ႆ︀ႛဝႃႈတ︀ၢင︀်ဢ︀ပ︀ႅတ︀်ႉက︀ေႃႇ ဢ︀ၢꩫ︀်တ︀ၢꩫ︀်ယ︀င︀်းဢ︀ူ။ ꩫ︀ႆ︀ႇꩫ︀က︀ေႃႇ က︀ဝ်ႈꩵ︀ႈꩭီတ︀်။ ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛ ပ︀ွႆ︀ꩡ︀ႂ်ႇꩫ︀ႆ︀ႇ ဢ︀ꩫ︀်ႈꩬ︀ိုဝ်ႈꩫ︀ꩫ︀်ႈꩫ︀ႆ︀ၢႈꩬ︀ိုင︀်ဝႃႈꩫ︀ႆ︀ႇꩬ︀ီ က︀ဝ်ႈယ︀ႃႇဢ︀ꩫ︀်ႈလ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ ꩫ︀ႆ︀ႛꩥ︀ိꩫ︀်းမ︀ႃးꩫ︀ႆ︀ၢႈꩫ︀မ︀် က︀ူꩫ︀်းမ︀ိူင︀်းက︀ၢင︀်ႈꩫ︀ႆ︀ႇၵ︀ဝ်မ︀ႆ︀ႛ ၵ︀ႆ︀ႈꩫ︀ႆ︀ႇ” ꩫ︀ဝꩫ︀်ႇ။ 27ꩫ︀ႆ︀ႇꩫ︀က︀ေႃႇ ၵ︀ဝ်ယ︀ႃႇ ဢ︀ꩫ︀်ႈꩡ︀ဝ်ႛယ︀ေꩬ︀ု ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩡ︀ိုဝ်ꩬ︀ီဝႃႈꩫ︀ႆ︀ႇမ︀ႆ︀ႛ ꩵ︀ႈတ︀ွင︀်း။ 28င︀ႆ︀းꩬ︀ီမ︀ꩫ︀်းꩡ︀ဝ်ႛယ︀ႃႇ “မ︀ိူဝ်ႈလ︀ုက︀်ႉက︀ူꩫ︀်းမ︀ႆ︀ႛ ပ︀ိူꩫ︀်ႈၵ︀ႅꩫ︀်ꩬ︀ဝ်ဝႆ︀ႇꩫ︀ႆ︀ႇ “ꩫ︀င︀်က︀ဝ်ႈပ︀ီꩫ︀်ႈꩫ︀ႆ︀ႇ က︀ဝ်ႈꩫ︀မ︀်ꩫ︀ꩫ︀ႆ︀ႇမ︀ႆ︀ႛလ︀ိူင︀်ႈ၊ က︀ဝ်ႈယ︀ႃႇ က︀ꩬ︀င︀်က︀ေႃႇ ဢ︀ဝ်ႈဢ︀ႃꩫ︀ႃၸ︀ူႛꩡ︀ဝ်ႛ မ︀ဝ်ꩭီတ︀်ꩬ︀ီ ဢ︀ꩫ︀်ႈꩫ︀င︀်ပ︀ူဝ်က︀ဝ်ႈ ꩫ︀ေꩭႂ်ႛꩫ︀ႆ︀ၢႈꩫ︀မ︀် ဝႃႈꩫ︀ႆ︀ႇꩫ︀ꩫ︀ႆ︀ႇမ︀ႆ︀ႛလ︀ိူင︀်ႈ ꩬ︀ူတ︀ီတ︀ွင︀်းꩬ︀ႃး။ 29ꩡ︀ႃႇလ︀ိူင︀်ႈ ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛ ပ︀ွႆ︀ꩡ︀ႂ်ႇꩫ︀ႆ︀ႇ တ︀င︀်းက︀ဝ်ႈၵ︀ိင︀်းလ︀ွေႛꩬ︀ီဢ︀ူꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ က︀ဝ်ႈၸ︀ူႛꩡ︀ဝ်ႛမ︀ႆ︀ႛꩫ︀ႆ︀ၢႈ မ︀ဝ်ႈလ︀ႂ်ႈက︀ေႃႇꩵ︀ႈၵ︀ွတ︀်ဝႆ︀ႇ။ လ︀ႆ︀ၢးပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ဢ︀ꩫ︀်ႈမ︀ꩫ︀်းꩡ︀ဝ်ႛထုက︀်ꩡ︀ႂ်ႈꩫ︀ႆ︀ႇ က︀ဝ်ႈက︀ူႈမ︀ိုဝ်ႇꩭီတ︀်ꩬ︀ီꩫ︀မ︀်” ꩫ︀ဝꩫ︀်ႇ။ 30မ︀ꩫ︀်းꩡ︀ဝ်ႛဝႃႈင︀ႆ︀းꩫ︀ႆ︀ႇမ︀ႆ︀ႛ ၸ︀ူႛꩫ︀ႆ︀ႛꩥ︀ိꩫ︀်းꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀် မ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးက︀ꩫ︀်ႈဢ︀ူ။

လ︀ွင︀်ႈၸ︀ူႛၵ︀ႃႛꩫ︀ၵ︀ႃ က︀ူꩫ︀်းလ︀ွတ︀်ꩫ︀ႆ︀ႇၵ︀ဝ်

31ꩡ︀ဝ်ႛယ︀ေꩬ︀ုယ︀ႃႇ က︀ူꩫ︀်းဢ︀ꩫ︀်ႈမ︀ꩫ︀်းꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈမ︀ႃးꩫ︀ႆ︀ႇၵ︀ဝ်မ︀ႆ︀ႛ “ꩬ︀ူၵ︀ၢမ︀်းက︀ဝ်ႈထွမ︀်ꩡ︀ွမ︀်းက︀ီး တ︀ပ︀ေးက︀ဝ်ႈꩡ︀ႅတ︀်ႉဢ︀ူ။ 32ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ ꩬ︀ူတ︀ွင︀်းꩬ︀ိုဝ်ႈꩰမ︀ႃးꩬ︀ီ ꩬ︀မ︀်မ︀ႃတ︀ြႃးလ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ꩬ︀ူမ︀ႆ︀ႛဢ︀ဝ်ႈလ︀ွတ︀်ႉꩭႂ်ႛဢ︀ူ” ꩫ︀ဝꩫ︀်ႇ။ 33ꩫ︀ႆ︀ႇမ︀ႆ︀ႛ ၵ︀ဝ်ယ︀ႃႇ “တ︀ူႈယ︀ႃႇလ︀ုက︀်ႉလ︀ၢင︀်းဢ︀ႃပ︀ြႃꩭၢမ︀်ꩫ︀မ︀်။ တ︀ူႈမ︀ိူဝ်ႈလ︀ႂ်ႈက︀ေႃႇ ꩵ︀ႈꩭွꩫ︀်ပ︀ီꩫ︀်ႈၵ︀ႃႛပ︀ိူꩫ︀်ႈ။ င︀ႆ︀းꩬ︀ီ ꩬ︀ူတ︀ီꩫ︀ႆ︀ႛလ︀ွတ︀်ႉꩫ︀မ︀်ꩫ︀ꩫ︀ႆ︀ႇ မ︀ႂ်းꩭိုဝ်လ︀ိုဝ်ꩬ︀ီဝႃႈꩫ︀ႆ︀” ꩫ︀ဝꩫ︀်ႇ။ 34ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈꩬ︀ိုဝ်ႈꩰဝႃႈက︀ွတ︀်။ က︀ူဝ်ႇဢ︀ꩫ︀်ႈꩭီတ︀်ဢ︀ပ︀ႅတ︀်ႉꩫ︀ႆ︀ႇၵ︀ဝ်တ︀င︀်းမ︀ိူင︀်း ပ︀ီꩫ︀်ႈၵ︀ႃႛဢ︀ပ︀ႅတ︀်ႉꩫ︀က︀ꩫ︀်ႈ ဢ︀ပ︀ႅတ︀်ႉမ︀ဝ်ꩭီတ︀်က︀ီး ဢ︀ူမ︀ဝ်ꩫ︀ႆ︀ႛဢ︀ဝ်ႈမ︀ဝ်လ︀ိဝ်ႈꩫ︀မ︀်။ 35ၸ︀ူႛၵ︀ႃႛꩫ︀ꩫ︀ႆ︀ႇယ︀ႃႇ တ︀င︀်းက︀ူꩫ︀်းꩭိူꩫ︀်းꩡ︀ူဝ်ႈဢ︀ꩬ︀ၢက︀်ႉꩵ︀ႈꩬ︀ႅင︀်။ လ︀ုက︀်ႉယ︀ႃႇꩬ︀ႅင︀်ဢ︀ူ။ 36င︀ႆ︀းꩫ︀ႆ︀ႇꩬ︀ီ ꩬ︀ူမ︀ႆ︀ႛလ︀ုက︀်ႉꩫ︀ႆ︀ႇ ပ︀ွႆ︀ꩭႂ်ႛက︀ီး ꩬ︀ူလ︀ွတ︀်ႉတ︀ေႇတ︀ေႇဢ︀ူ။ 37ꩬ︀ူလ︀ုက︀်ႉလ︀ၢင︀်းဢ︀ႃပ︀ြႃꩭၢမ︀်ꩫ︀မ︀်ꩫ︀ꩫ︀ႆ︀ႇ က︀ဝ်ႈတ︀ွင︀်းဢ︀ူ။ ꩫ︀ႆ︀ႇꩫ︀က︀ေႃႇ ဢ︀ꩫ︀်ႈက︀ဝ်ႈꩬ︀ွꩫ︀်ꩫ︀ႆ︀ႇမ︀ႆ︀ႛ ꩬ︀ူမ︀ဝ်ၵ︀ႂ်ႈꩭၢပ︀်ႉက︀ꩫ︀်ႈꩫ︀ႆ︀ႇꩬ︀ီ က︀ဝ်ႈမ︀ႆ︀ႛ ꩬ︀ူꩬ︀ၢင︀်ဢ︀ဝ်ႈတ︀ႆ︀ၢႈက︀ꩫ︀်ႈမ︀ဝ်ꩡ︀ႂ်ႈ။ 38က︀ဝ်ႈယ︀ႃႇ ဢ︀ꩫ︀်ႈလ︀ုက︀်ႉပ︀ူဝ်က︀ဝ်ႈမ︀ႆ︀ႛတ︀ွင︀်းꩫ︀ႆ︀ႇꩫ︀မ︀် ဝႃႈꩫ︀ႆ︀ႇ။ ꩫ︀ႆ︀ႇꩫ︀က︀ေႃႇ ꩬ︀ူယ︀ႃႇ ဢ︀ꩫ︀်ႈပ︀ူဝ်ꩬ︀ူဝႃႈꩫ︀ႆ︀ႇꩫ︀မ︀်ꩭီတ︀်ꩫ︀ႆ︀ႇ” ꩫ︀ဝꩫ︀်ႇ။ 39ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ “ပ︀ူဝ်တ︀ူႈယ︀ႃႇ ဢ︀ႃပ︀ြႃꩭၢမ︀်ꩫ︀မ︀်” ꩫ︀ဝꩫ︀်ႇ။ ꩡ︀ဝ်ႛယ︀ေꩬ︀ုယ︀ႃႇ “ꩬ︀ူၸ︀ူႛလ︀ုက︀်ႉဢ︀ႃပ︀ြႃꩭၢမ︀်က︀ီး ꩫ︀င︀်မ︀ꩫ︀်းꩫ︀က︀ꩫ︀်ႈတ︀ီꩭီတ︀်ꩬ︀ႃး။ 40က︀ဝ်ႈယ︀ႃႇ ꩬ︀မ︀်မ︀ႃတ︀ြႃး ဢ︀ꩫ︀်ႈလ︀ုက︀်ႉပ︀ူဝ်က︀ဝ်ႈမ︀ႆ︀ႛꩫ︀ႆ︀ႛꩥ︀ိꩫ︀်းမ︀ႃးꩫ︀ၢႆ︀ႈꩬ︀ိုင︀် ꩭူဝ်းမ︀ႃးက︀ေႃႇ ꩬ︀ူက︀ဝ်ႈမ︀ႆ︀ႛ က︀ႅမ︀်တ︀ႆ︀ၢႈက︀ꩫ︀်ႈꩫ︀ႆ︀ႇ။ ဢ︀ႃပ︀ြႃꩭၢမ︀်ယ︀ႃႇ င︀ႆ︀းꩵ︀ႈꩭီတ︀်မ︀ႃး။ 41ꩬ︀ူယ︀ႃႇ ꩫ︀င︀်ပ︀ူဝ်ꩬ︀ူꩫ︀က︀ꩫ︀်ႈꩫ︀မ︀်က︀ႅင︀်းꩫ︀ႆ︀ႇ” ꩫ︀ဝꩫ︀်ႇ။ ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ “ပ︀ူဝ်တ︀ူႈယ︀ႃႇ ꩡ︀ဝ်ႛထႃဝရ︀ၸ︀ြႃးဢ︀ꩫ︀်ႈပ︀ီꩫ︀်ႈꩬ︀ူလ︀ိဝ်ႈပ︀ႃးလ︀ိဝ်ႈꩫ︀ႆ︀ႇꩫ︀မ︀်။ တ︀ူႈယ︀ႃႇ လ︀ုက︀်ႉမ︀ꩫ︀်းꩡ︀ဝ်ႛꩡ︀ႅတ︀်ႉꩰꩬ︀ႃး” ꩫ︀ဝꩫ︀်ႇ။ 42ꩡ︀ဝ်ႛယ︀ေꩬ︀ုယ︀ႃႇ “ၸ︀ြႃးပ︀ီꩫ︀်ႈꩡ︀ဝ်ႛ ပ︀ီꩫ︀်ႈပ︀ူဝ်ꩬ︀ူတ︀ေႇတ︀ေႇက︀ီး ꩬ︀ူက︀ဝ်ႈမ︀ႆ︀ႛꩭၢက︀်ႉဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး က︀ဝ်ႈယ︀ႃႇလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ႃးꩬ︀ီꩫ︀မ︀်။ က︀ဝ်ႈယ︀ႃႇ ဢ︀ဝ်ႈဢ︀လ︀ၢင︀်းက︀ဝ်ႈၸ︀ူႛꩡ︀ဝ်ႛ ꩫ︀ႆ︀ၢႈမ︀ႃးꩵ︀ႈꩡ︀ႂ်ႈ။ မ︀ꩫ︀်းꩡ︀ဝ်ႛပ︀ွႆ︀ꩡ︀ႂ်ႇꩬ︀ီꩫ︀မ︀်မ︀ႃးꩫ︀ႆ︀ႇ။ 43ဢ︀ꩫ︀်ႈက︀ဝ်ႈဝႃႈမ︀ႆ︀ႛ ꩬ︀ူမ︀ဝ်ပ︀ွင︀်ꩡ︀ႂ်ႈက︀ꩫ︀်ႈꩫ︀ႆ︀ႇ ၵ︀ၢမ︀်းက︀ဝ်ႈမ︀ႆ︀ႛ ꩬ︀ူꩭၢပ︀်ႉထွမ︀်မ︀ဝ်ပ︀ီꩫ︀်ႈꩬ︀ီꩬ︀ႃး။ 44ပ︀ူဝ်ꩬ︀ူယ︀ႃႇ ၵ︀ုꩫ︀်ꩬ︀ူင︀်ꩬ︀ႃး။ င︀ႆ︀းꩬ︀ီꩬ︀ႃး ꩬ︀ူၵ︀ႂ်ႈꩡ︀ွမ︀်းဢ︀လ︀ၢင︀်းမ︀ꩫ︀်းꩫ︀ႆ︀ႇ။ ၵ︀ုꩫ︀်ꩬ︀ူင︀်ꩫ︀ႆ︀ႇ လ︀ုက︀်ႉမ︀ိူဝ်ႈꩭူဝ်က︀ူဝ်ပ︀ုꩫ︀်ႛ ၸ︀ူႛဢ︀ဝ်ႈတ︀ႆ︀ၢႈက︀ူꩫ︀်းꩬ︀ႃး။ မ︀ꩫ︀်းယ︀ႃႇ ꩬ︀မ︀်မ︀ႃတ︀ြႃးမ︀ဝ်ꩭွꩫ︀်ဝႃႈꩫ︀ႆ︀ႇꩬ︀ီ မ︀ိူဝ်ႈလ︀ႂ်ႈက︀ေႃႇꩵ︀ႈꩬ︀ိုဝ်ႈတ︀ူဝ်။ မ︀ꩫ︀်းယ︀ႃႇ ၸ︀ႅတ︀်ႉလ︀ူင︀်ꩬ︀ႃး။ ꩫ︀င︀်မ︀ꩫ︀်းꩡ︀ဝ်ႛၸ︀ႅတ︀်ႉꩬ︀ီဢ︀ူꩫ︀က︀ꩫ︀်ႈ က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩬ︀ွꩫ︀်ꩭႂ်ႛၸ︀ႅတ︀်ႉꩬ︀ီဢ︀ူꩬ︀ႃး။ 45က︀ဝ်ႈယ︀ႃႇ တ︀ၢꩫ︀်ႛၵ︀ၢမ︀်းဢ︀ꩫ︀်ႈꩬ︀ိုဝ်ႈတ︀ူဝ်ꩬ︀ီꩬ︀ႃး ꩬ︀ူက︀ဝ်ႈမ︀ႆ︀ႛ မ︀ဝ်ယ︀ုမ︀်ꩫ︀ႆ︀ႇ။ 46က︀ဝ်ႈမ︀ႆ︀ႛ ဢ︀ပ︀ႅတ︀်ႉယ︀င︀်းဢ︀ူꩫ︀ꩫ︀ႆ︀ႇ ꩬ︀ူၸ︀ႂ်က︀ေႃႇ ပ︀ျႃးꩬ︀ၢက︀်ꩬ︀ေꩵ︀ႈꩫ︀ႆ︀ႛ။ က︀ဝ်ႈဝႃႈꩬ︀ိုဝ်ႈꩰꩫ︀ႆ︀ႇမ︀ႆ︀ႛ ꩭီတ︀်က︀ꩬ︀င︀်ꩫ︀ႆ︀ ꩬ︀ူမ︀ဝ်ယ︀ုမ︀်ꩫ︀ႆ︀ႇ။ 47က︀ူဝ်ႇဢ︀ꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛမ︀ႃးꩫ︀ႆ︀ႇ ၵ︀ၢမ︀်းꩡ︀ဝ်ႛၸ︀ြႃးထွမ︀်ဢ︀ူ။ ꩫ︀ႆ︀ႇꩫ︀က︀ေႃ ꩬ︀ူယ︀ႃႇလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်ꩡ︀ႂ်ႈꩬ︀ီꩬ︀ႃး မ︀ဝ်ထွမ︀်ꩫ︀ႆ︀ႇ” ꩫ︀ဝꩫ︀်ႇ။

လ︀ွင︀်ႈꩡ︀ဝ်ႛယ︀ေꩬ︀ုꩫ︀ၵ︀ႃဢ︀ႃပ︀ြႃꩭၢမ︀်

48ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ ꩡ︀ဝ်ႛယ︀ေꩬ︀ုမ︀ႆ︀ႛ “မ︀ႂ်းယ︀ႃႇ ပ︀ီꩫ︀်ႈက︀ူꩫ︀်းꩬ︀မ︀ႃရ︀ိင︀ႆ︀း ၸ︀ီꩭၢႆ︀ႇက︀ေႃႇလ︀ွေႛဢ︀ူꩫ︀ꩬ︀ီ မ︀ႂ်းမ︀ႆ︀ႛတ︀ူႈဝႃႈꩫ︀ႆ︀ႇꩡ︀ႂ်ႈတ︀ေႇတ︀ေႇဢ︀ူ” ꩫ︀ဝꩫ︀်ႇ။ 49ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈက︀ူꩫ︀်းဢ︀ꩫ︀်ႈၸ︀ီꩭၢႆ︀ႇလ︀ွေႛꩵ︀ႈꩡ︀ႂ်ႈ။ က︀ဝ်ႈယ︀ႃႇ ပ︀ူဝ်က︀ဝ်ႈမ︀ႆ︀ႛ ယ︀ူဝ်းယ︀ွင︀်ႛဢ︀ူ။ ꩫ︀ႆ︀ႇꩫ︀က︀ေႃႇ ꩬ︀ူယ︀ႃႇ က︀ဝ်ႈမ︀ႆ︀ႛꩵ︀ႈယ︀ူဝ်းယ︀ွင︀်ႛ။ 50က︀ဝ်ႈယ︀ႃႇ မ︀ူꩫ︀်ႈၸ︀ုင︀်းက︀ဝ်ႈၸ︀ူႛꩡ︀ဝ်ႛမ︀ႆ︀ႛ ꩵ︀ႈၵ︀ႃ။ ꩫ︀ႆ︀ႇꩫ︀က︀ေႃႇ ꩡ︀ဝ်ႛဢ︀ꩫ︀်ႈမ︀ူꩫ︀်ႈၸ︀ုင︀်းက︀ဝ်ႈမ︀ႆ︀ႛၵ︀ႃꩬ︀ီ လ︀ုက︀်ႉပ︀ႃႛက︀ဝ်ႈမ︀ႆ︀ႛ ပ︀ႅတ︀်ႉတ︀ြႃးꩫ︀ႆ︀ႇ ပ︀ႃးလ︀ိူင︀်ႈယ︀င︀်းဢ︀ူ။ 51က︀ဝ်ႈꩬ︀ိုဝ်ႈꩰဝႃႈက︀ွတ︀်။ က︀ူဝ်ႇဢ︀ꩫ︀်ႈထွမ︀်ၵ︀ၢမ︀်းက︀ဝ်ႈꩫ︀ႆ︀ႇ မ︀ိူဝ်ႈလ︀ႂ်ႈက︀ေႃႇ ꩵ︀ႈတ︀ႆ︀ၢႈ” ꩫ︀ဝꩫ︀်ႇ။ 52ꩫ︀ႆ︀ႇမ︀ႆ︀ႛ က︀ျူးꩫ︀ႆ︀ႇၵ︀ဝ်ယ︀ႃႇ “ပ︀လ︀ေႃး မ︀ႂ်းမ︀ႆ︀ႛၸ︀ီꩭၢႆ︀ႇလ︀ွေႛဢ︀ူꩫ︀ꩫ︀ႆ︀ႇ င︀ႆ︀ႚတ︀ွင︀်းယ︀ဝ်ႇ။ ဢ︀ႃပ︀ြႃꩭၢမ︀်ယ︀ႃႇ ပ︀ူးတ︀ႆ︀ၢႈက︀ေႃႇ။ ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်က︀ေႃႇ တ︀ႆ︀ၢႈက︀ႃမ︀ူတ︀်ယ︀ဝ်ႇ။ င︀ႆ︀းꩬ︀ီက︀ေႃႇမ︀ႂ်းယ︀ႃႇ က︀ူဝ်ႇဢ︀ꩫ︀်ႈထွမ︀်ၵ︀ၢမ︀်းက︀ဝ်ႈꩫ︀ႆ︀ႇ ꩵ︀ႈꩫ︀ႆ︀ႛတ︀ႆ︀ၢႈꩫ︀ꩬ︀ီဝႃႈꩫ︀ႆ︀ႇ။ 53ပ︀ူဝ်တ︀ူႈဢ︀ႃပ︀ြႃꩭၢမ︀် တ︀ႆ︀ၢႈက︀ႃယ︀ဝ်ႇ။ မ︀ႂ်းယ︀ႃႇ ၵ︀ꩫ︀်က︀ႃႈမ︀ꩫ︀်းꩡ︀ဝ်ႛꩫ︀ႆ︀ၢႈက︀ေႃႇ မ︀ဝ်ယ︀ႂ်မ︀ႅတ︀်ႉꩬ︀ီက︀ေႃႇꩫ︀ႃႊ။ ပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်တ︀မ︀ိူင︀်းက︀ေႃႇ ပ︀ူဝ်းတ︀ၢႆ︀ႈက︀ႃမ︀ူတ︀်က︀ေႃႇ။ မ︀ႂ်းယ︀ႃႇၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ၵ︀ꩫ︀်တ︀ႂ်းက︀ꩬ︀င︀်ꩫ︀ႆ︀” ꩫ︀ဝꩫ︀်ႇ။ 54ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈꩫ︀ႆ︀ႇ ꩬ︀င︀်ဝႃႈ ၸ︀ူႛꩡ︀ဝ်ႛမ︀ႆ︀ႛၸ︀ူႛꩡ︀ဝ်ႛ ယ︀ူဝ်းယ︀ွင︀်ႛက︀ီး မ︀ူꩫ︀်ႈၸ︀ုင︀်းက︀ဝ်ႈꩫ︀ႆ︀ႇ ဢ︀လ︀က︀ႃးꩫ︀မ︀်။ ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛယ︀ူဝ်းယ︀ွင︀်ႛꩫ︀ႆ︀ႇယ︀ႃႇ ပ︀ူဝ်က︀ဝ်ႈꩫ︀မ︀်။ ꩡ︀ဝ်ႛဢ︀မ︀ႂ်းယ︀ႃႇ ꩡ︀ဝ်ႛဢ︀ꩫ︀်ႈꩬ︀ူꩭွင︀်ႇ ၸ︀ြႃးꩬ︀ူꩫ︀ꩫ︀ႆ︀ႇꩫ︀မ︀်။ 55ꩫ︀ႆ︀ႇꩫ︀က︀ေႃႇ ꩡ︀ဝ်ႛဢ︀မ︀ႂ်းမ︀ႆ︀ႛ ꩬ︀ူꩵ︀ႈတ︀ွင︀်း။ က︀ဝ်ႈယ︀ႃႇတ︀ွင︀်းဢ︀ူ။ ꩬ︀င︀်ဝႃႈက︀ဝ်ႈꩵ︀ႈတ︀ွင︀်းꩫ︀က︀ီး က︀ဝ်ႈၸ︀ူႛꩡ︀ဝ်ႛက︀ေႃႇꩫ︀င︀်ꩬ︀ူꩫ︀က︀ꩫ︀်ႈ ပ︀ီꩫ︀်ႈၸ︀ူႛၸ︀ႅတ︀်ႉꩫ︀မ︀်။ က︀ဝ်ႈယ︀ႃႇပ︀ူဝ်က︀ဝ်ႈမ︀ႆ︀ႛ တ︀ွင︀်းတ︀ေႇတ︀ေႇꩫ︀ႆ︀ႇꩬ︀ီ ၵ︀ၢမ︀်းမ︀ꩫ︀်းꩡ︀ဝ်ႛမ︀ႆ︀ႛ ထွမ︀်ဢ︀ူ။ 56ပ︀ူဝ်ꩬ︀ူဢ︀ႃပ︀ြႃꩭၢမ︀်ꩫ︀ႆ︀ႇ ꩡ︀ူဝ်ႈပ︀ၢꩫ︀်ႈဢ︀ꩫ︀်ႈက︀ဝ်ႈတ︀ီက︀ျွႃးမ︀ႃးꩫ︀ႆ︀ႇမ︀ႆ︀ႛ တ︀ီꩫ︀ႆ︀ႛꩭူပ︀်ႉꩫ︀ႆ︀ႇꩬ︀ီ မ︀ꩫ︀်းꩡ︀ူမ︀်းလ︀ူင︀်မ︀ႃးꩫ︀မ︀်။ ꩡ︀ူဝ်ႈပ︀ၢꩫ︀်ႈဢ︀မ︀ႂ်းမ︀ႆ︀ႛ မ︀ꩫ︀်းꩭꩫ︀်က︀ေႃႇꩭꩫ︀်မ︀ႃးꩬ︀ီ ꩫ︀ႆ︀ႛꩡ︀ူမ︀်းလ︀ူင︀်မ︀ႃးယ︀ဝ်ႇ” ꩫ︀ဝꩫ︀်ႇ။ 57ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ “မ︀ႂ်းꩬ︀လ︀ႂ်ႈꩫ︀ႃႊ ဢ︀ႃပ︀ြႃꩭၢမ︀်မ︀ႆ︀ႛ ꩭꩫ︀်မ︀ႃး၊ မ︀ႂ်းဢ︀ꩬ︀ၢက︀်ႉꩭႃႛꩬ︀ိပ︀်ꩫ︀ႆ︀ၢႈက︀ေႃႇ မ︀ဝ်ပ︀ႆ︀ထူꩫ︀်ႛꩬ︀ီက︀ေႃႇꩫ︀ႃႊ” ꩫ︀ဝꩫ︀်ႇ။ 58ꩡ︀ဝ်ႛယ︀ေꩬ︀ုယ︀ႃႇ “က︀ဝ်ႈꩬ︀ိုဝ်ႈꩰဝႃႈက︀ွတ︀်။ မ︀ိူဝ်ႈဢ︀ႃပ︀ြႃꩭၢမ︀်ꩵ︀ႈပ︀ႆ︀ယ︀င︀်းပ︀ုꩫ︀်ႛꩫ︀မ︀် က︀ဝ်ႈယ︀င︀်းꩬ︀ီဢ︀ူꩫ︀ႆ︀ႇ” ꩫ︀ဝꩫ︀်ႇ။ 59ꩫ︀ႆ︀ႇမ︀ႆ︀ႛၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛ ဢ︀ဝ်ႈꩭိꩫ︀်ꩬ︀ိင︀်းက︀ွတ︀်ꩫ︀ꩬ︀ီ က︀ီပ︀်ꩭိꩫ︀်က︀ꩫ︀်ႈဢ︀ူ။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛယ︀ႃႇ ꩭႆ︀ၢꩫ︀ႆ︀ၢႈꩬ︀ီ လ︀ုက︀်ႉꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ဢ︀ွက︀်က︀ႃဢ︀ူ။

Currently Selected:

ယ︀ေႃးꩭၢꩫ︀် 8: kht

Highlight

Copy