Luka 6

Isa le Kuntii le Nɔningɛlon kunna

Matiyu 12.1-8; Malɛkɛ 2.23-28

1Nɔningɛlon dɔ, Isa nu timintɔla sɛnɛlu tɛma, a kɔbiladennu vɛ sɛnɛfen tizan dɔlu bɔla, k'ai sisa ai bolo le, k'ai dɔn. 2Wo lɔ, Falisi dɔlu vɛɛ ai yɛ: «Mindɛ y'a kɛla vɛ ài yi ko kɛla min ladaannin tɛ Nɔningɛlon?»

3Isa k'ai javi, a vɛɛ: «A yi di? Masakɛ Dawuda na min kɛla ale ni a taamaɲɔɔlu ya kɔɔn waate lɔ, ài ma wo kalan? 4A ka don mingɛ Alabatobon na, a ka bulu dɔlu ta, minu lasenin tɛɛ Ala ma. A ka wo dɔ dɔn, k'a dɔ di a taamaɲɔɔlu ma, k'a talan wolu ladaannin tɛɛ tɛ mɔɔ suu suu yɛ, mafɔ salakalasebalu dein.» 5Isa do vɛɛ ai yɛ kɔtunun: «Mɔɔnivin Tanin le Kuntii le Nɔningɛlon kunna.»

Isa ka kɛ́ dɔ lakɛnɛya teme min bolo faanin tɛɛ a ma

Matiyu 12.9-14; Malɛkɛ 3.1-6

6Nɔningɛlon gbɛlɛ, Isa ka taa don Aladalibon na ka mɔɔlu kalan. Kɛ́ dɔ tɛɛ je, min bolokini faanin tɛɛ a ma. 7Seliya kalanmɔɔlu ni Falisilu tɛɛ Isa lakɔlɔsila k'a ye ni a kɛtɔ mɔɔ dɔ lakɛnɛyala Nɔningɛlon, fɔsa ai yi dailu sɔlɔn a jalakiko lɔ. 8A do tɛɛ k'ai miliya lɔn. A do k'a fɔ kɛ́ yɛ, min bolo faanin tɛɛ a ma, a vɛɛ: «I wuli, i lɔ jama tɛma.» Wo do v'i wulila k'i lɔ. 9Isa ka jama maɲininga, a vɛɛ: «A yi di? A ladaanyine ka kokein kɛ Nɔningɛlon, baa koyon? Ka mɔɔ lakisi, baa k'a halaki?» 10Wo fɔ Isa bolo, a v'i ɲa kaana jama lɔ k'a fɔ kɛ́ yɛ, a vɛɛ: «I bolo lɔsama.» Kɛ́ k'a bolo lɔsama mingɛ, a bolo ka kɛnɛya. 11Wo lɔ, Falisilu ni seliya kalanmɔɔlu ka mɔnɛ bubale. Ai do ka taa ai kun bilin i ɲɔɔ ma, k'a lɔn ai yi min kɛ Isa la.

Isa ka aa keladen mɔɔ tan ni fila (12) ta teme

Matiyu 10.1-4; Malɛkɛ 3.13-19

12Wo waate lɔ, Isa ka taa Aladaliya lɔ tini dɔ kɔkan. A do ka su bɛ kɛ Ala dalila. 13Kɛnɛ bɔnin, a k'a kɔbiladennu kili ka mɔɔ tan ni fila (12) ta ai lɔ k'a fɔ ai ma ko keladennu: 14Simɔn, Isa ka min tɔɔla ko Piyɛli, ani a dɔɔni Andele, Janguba ni Yohana, Filipe ni Batolomu, 15Matiyu ni Tomasi, Alife denkɛ Janguba ni Simɔn (ai y'a fɔla min ma ko Fasokanuba), 16Janguba denkɛ Judasi, ani Judasi Isekaliyɔti min ka Isa janva.

Isa ka jama ba kalan ani ka jangalotɔlu lakɛnɛya teme

Matiyu 4.23-25

17Wo kɔ, Isa nu k'i jii tini la k'i lɔ gbɛkɛnɛ dɔ lɔ. A kɔbiladen siyama tɛɛ je ani jama ba minu bɔnin tɛɛ Jelusalɛmu, Jude koovi lɔ, ani Tili ni Sidɔn fannɔ kɔɔji dala. 18Ai bɛ nanin tɛɛ k'ai tolomalɔ Isa la, ani ka kɛnɛya sɔlɔn k'ai bɔ aiya jangalolu lɔ. Mɔɔ minu tɔlɔyanin tɛɛ jinajuulu bolo, wolu fana ka kɛnɛya. 19Jama bɛ t'i lɔjala k'ai bolo tuu Isa la, kamasɔlɔn fanga tɛɛ bɔla a lɔ ka jangalotɔ bɛ lakɛnɛya.

Mɔɔ minu yi duwawuden ne

Matiyu 5.1-12

20Isa k'i ɲa kaa a kɔbiladennu lɔ k'a fɔ ai yɛ, a vɛɛ:

«Duwawuden ne àilu fandannilu le,

kamasɔlɔn ài fɛ yi Ala ya masaya la.

21Duwawuden ne ài le, kɔɔn yi àilu minu la yi ne,

kamasɔlɔn ài kɛtɔ balo sɔlɔnna k'ai wasa.

Duwawuden ne ài le, àilu minu yi kasila yi ne,

kamasɔlɔn ài kɛtɔ jɛlɛla.

22 # 1 Piyɛli 4.14. «Duwawuden ne ài le, ni mɔɔlu k'ài lagbeyaɲɛ, k'i ban ài lɔ, k'ài nɛnin, ani k'ài tɔɔyon fɔ ka bɛn Mɔɔnivin Tanin ya ko ma. 23#Kɛkolu 7.52.Wo vɛ kɛla lon min, ài y'ài gban sawa boloma, kamasɔlɔn ài kɛtɔ balayi ba le sɔlɔnna haijɛnɛ. Kamasɔlɔn mɔɔ minu yi koyon wo suu kɛla ài la, wolu bemanu na wo ɲɔɔzii le kɛla kelalu la.

24Gbalo yi àilu nafolotiilu yɛ,

kamasɔlɔn ài vɛ ban àiya josolajii sɔlɔnna.

25Gbalo yi ài yɛ, àilu minu fanin ne butu,

kamasɔlɔn kɔɔn kɛtɔ gbala ài la.

Gbalo yi ài yɛ, àilu minu yi jɛlɛla yi ne,

kamasɔlɔn ài kasitɔ k'ài ɲaji bɔ.

26Gbalo yi ài yɛ, ni bɛ y'ài matɔɔla,

kamasɔlɔn ai bemanu tɛɛ faɲafɔ kelalu matɔɔla ten ne.»

Ài y'ài juulu kanu

Matiyu 5.38-48

27«Kɛɛ àilu minu tolo malɔnin ǹ kumakan na yi ne, ǹ'a fɔla ài yɛ, ài y'ài juulu kanu ka kokein kɛ ài lagbeyaɲɛbalu yɛ. 28Mɔɔ minu y'ài daanna, ài yi duwawu kɛ wolu yɛ, ani ka Ala dali mɔɔlu yɛ minu juuyanin ài la. 29Ni mɔɔ k'i bolokini tolo te, i bolonunma tolo di a ma fana. Ni do mɔɔ k'iya faaniba mina i la, i kà a dansii, iya faani kɔlɔbila la a kɔkan fana. 30Ni mɔɔ k'i dali fen na, i y'a di a ma. Ni do mɔɔ k'i bolofen bɔ i bolo, i kà wo makili a la. 31#Matiyu 7.12.Ni ài y'a fɛ mɔɔlu yi ko min bɛ kɛ ài yɛ, àilu gbu yi wo suu dɔ kɛ ai yɛ.

32«Ni ài k'ài niilu kanu dein, ài kɛtɔ nafa mindɛ sɔlɔnna wo lɔ? Hali julumbutɔlu y'ai niilu kanula. 33Mɔɔ minu yi kokein kɛla ài yɛ, ni ài ka kokein kɛ wolu le yɛ dein, ài kɛtɔ nafa mindɛ sɔlɔnna wo lɔ? Hali julumbutɔlu gbu yi wo ɲɔɔzii kɛla. 34Ni ài ka julu la mɔɔlu la, ài jii y'a ma k'a fɔ ko minu kɛtɔ a salala, ài kɛtɔ nafa mindɛ sɔlɔnna wo lɔ? Hali julumbutɔlu gbu yi julu lala i ɲɔɔ na, ai jii vɛ wo jate salako ma. 35Àilu koni, fɔ ài y'ài juulu kanu ka kokein kɛ ai yɛ. Ài yi julu la k'ài jii bɔ a salako kɔ. Wo vɛ kɛla, ài kɛtɔ balayi ba sɔlɔnna ka kɛ Masa Taala dennu le. Kamasɔlɔn ale le yi kokein kɛla mɔɔ bɛ yɛ, hali koɲumalɔnbalilu ni mɔɔ yonnu. 36Ài yi kɛ henandelu le, iwo ài Fa Ala yi henande le teme.»

Ài k'ài mɔɔɲɔɔlu ya kiti tɛɛ

Matiyu 7.1-5

37«Ài k'ài mɔɔɲɔɔlu ya kiti tɛɛ, fɔsa Ala kana àilu gbu kiti. Ài do k'ài mɔɔɲɔɔlu jobaliya, fɔsa Ala kana àilu gbu jobaliya. Ài y'ài mɔɔɲɔɔlu makoto, Ala fana kɛtɔ àilu gbu makotola. 38Ài y'ài mɔɔɲɔɔlu sɔ, Ala fana kɛtɔ àilu gbu sɔla. A do kɛtɔ àiya sumali kɛla kobɛn, ka àiya bɔlɔ lafa kpekpe, k'a lajaajaa, k'a dɔ kafon a kɔkan fɔɔ ka bɔn. Kamasɔlɔn ài yi sumali kɛla ài mɔɔɲɔɔlu yɛ teme, Ala fana kɛtɔ sumali kɛla ài yɛ ten ne.»

39 # Matiyu 15.14. Isa ka sana gbɛlɛ la ai yɛ kɔtunun, a vɛɛ: «A yi di? Jalasa ɲagbɛ yi kɛle a ɲagbɛ ɲɔɔ ɲabila le? Ai mɔɔ fila t'i ben diɲa lɔ? 40#Matiyu 10.24, 25; Yohana 13.16; 15.20.Kalannaden tɛ buɲa sɔlɔnna ka timin aa kalanmɔɔ la. Kɛɛ ni a ka aa kalan dafanin sɔlɔn, a yi kɛle aa kalanmɔɔ ɲɔɔzii le.

41«A yi di vɛ i yi jilimuu lasaala i badenma ɲa ma, k'a talan i tɛ jilifɛlɛn yena min ile gbu ɲa ma? 42Ni i tɛ jilifɛlɛn yena i jɛlɛkanu ɲa ma, i yi se a fɔla i badenma yɛ di: ‹I yi lɔ, ǹ'i jilimuu bɔ i ɲa ma›? Ile filangafo! Fɔ i yi jilifɛlɛn bɔ i jɛlɛkanu ɲa ma kunfɔlɔ le. Wo vɛ kɛla, i kɛtɔ yeni kɛla kobɛn ka jilimuu bɔ i badenma ɲa ma.»

Kɔlɔman yi lɔnna a den ne ma

Matiyu 7.17-20; 12.34-35

43«Kɔlɔman kein tɛ se den kɛwon kɛla. Kɔlɔman yon fana tɛ se den kein kɛla. 44#Matiyu 12.33.Mɔɔlu yi kɔlɔman lɔnna a den ne ma. Kamasɔlɔn mɔɔ tɛ lɛzɛn bɔla tazan na, i do tɛ toloden bɔla bin woninma la. 45#Matiyu 12.34.Mɔɔ kein yi kokein ne kɛla, kamasɔlɔn wo yi bɔla a josokun kein ne lɔ. Kɛɛ do, mɔɔ yon yi koyon ne kɛla, kamasɔlɔn wo yi bɔla a josokun yon ne lɔ. Kamasɔlɔn mɔɔ josokun lafanin ko min na, a da yi wo le fɔla.»

Bonlɔba fila ma sana

Matiyu 7.24-27

46«Mindɛ y'a kɛla vɛ ài y'a fɔla m̀ ma ko ‹Kuntii, Kuntii,› k'a talan ài tɛ ǹ kumakannu labatola? 47Mɔɔ min yi nala m̀ ma ka ǹ kumakannu labato, ǹ'i se wo tii lala min ma, ǹ kɛtɔ wo le fɔla ài yɛ. 48A kɛyine iwo bonlɔba min na diɲa ba senna, ka aa bonjusii falakolo kɔkan. Kɔɔ ka fa ka se bon wo ma, kɛɛ bon ma jaajaa, kamasɔlɔn a lɔnin tɛɛ kobɛn. 49Kɛɛ mɔɔ min yi ǹ kumakannu mɛnna, a do tɛ ai labatola, wo tii kɛyine iwo bonlɔba min ma diɲa sen aa bonjusii waate. Kɔɔfa ka se bon wo ma mingɛ, a do ka te telemanin tɛtɛ!»

Currently Selected:

Luka 6: MBT2023

Highlight

Copy