Luki 12
12
Mɔ̃ Jeju mɩɩnɩ bɩnɛ yenyɔdaraada
(Mat 10:26–27)
1Ɔbɔɔlera tibil jɔjʋɔ kɔɔ kpa a jɛ jɛ paar gbɩlanɩ tə̃tə̃tə̃ a thʋ̃ dɩ wa‐n saar kha, dɩ Jeju ma da‐n so ɔɔ kpãkpãadarara caca ayɩ: Na‐n jɩɛ dʋ bʋrɛ jɔfʋ bʋ dʋdarasɔɔ tabɩraakɛ dɔnɩ bɩnɛ yenyɔ fɩlɛ.#Mat 16:6; Mar 8:15 2Thɩ̃ɛ na hale na ker sɩ ga do wɩ cʋʋrɛ dɩɩ thaa ga, dɩ thɩ̃ɛ na hale a na ha gbul sɩɩ do wa jɩ gaaga.#Mar 4:22; Lu 8:17 3Dɩ gɛr gɩ thɩ̃ɛ fɛʋʋkɛ na mɩɩnɩ pa birə paar, dahɩrɛra wa nɩ gɩ, dɩ gɩrɛ na bʋ̃bʋʋnɩ du bɩnɔ, nãsʋrɔ wa hulẽ gi.
Ʋrɛɛkɛ teananɩ na‐n ma
(Mat 10:28–31)
4Mɩ so narɛ nɛrɛɛkɛ dʋɔnnɩ ɩ̃ kuunsɔ: Na‐n ma wɩrɛɛkɛ n kɔnɩ tomɩr, sɩ agɩpɩ wa‐n puno cʋʋ dɩkha ɓaan bãa ga. 5Ma nɩ narɛ ntɛɛkɛ nɩ teenanɩ na‐n ma. Na‐n ma ʋrɛɛkɛ hananɩ punone a a kʋ pɩ, sɩ dɩ dʋna dɔɔra. Ɔɔ mɩ so narɛ, ɔr gɩɩkɛ teananɩ na‐n ma. 6Ga do war be yenã wɩ‐n dolõ ˈlominə yemɔɩaa? Sɩrakɛ bɩɛl na hale dɩ Thãgba na diinə ga. 7Dɩ anɩ yʋsũsɔrakɛ, Thãgba ther ger fɛʋ. Gɛr gɩ na‐n do maar na‐n fʋ naˈ, anɩ the nɔ khɩɩrɛ a jɔ ˈlomĩ jɔjɔjʋɔ.
Mɔ̃ tibil na tuni tɩbɩlaa ƴɛra dɩ Jejuuda a do
(Mat 10:32–33; 12:32; 10:19–20)
8Sɩ mɩ so narɛ, tibil wo tibilikɛ n tuon mini tɩbɩlaa ƴɛra, mɛr tibili Bikuun na tuure dakha Thãgbaa thɔ̃thɔ̃daar thusɔɔ ƴɛra. 9Sɩ ʋrɛɛkɛ bɔ mɩnɩ tɩbɩlaa ƴɛra, ma bor ntɛɛle dakha Thãgbaa thɔ̃thɔ̃daar thusɔɔ ƴɛra. 10Dɩ tibil wo tibilikɛ na mɩanɩ thɩmɩɩ puu na pɛ mɛr tibili Bikuunna, Thãgba na faarɛ ga sopugo caale na ha ntɛ. Sɩ tibilikɛ na kʋɛanɩ Thu Phuu i, Thãgba na faa ga sopugo caale kpɩɩrakaˈ.#Mat 12:32; Mar 3:29
11Dɩ ɔbɔɔkɛ wa kpa nɩnɩ wa‐n jalna kɩɩl paar Juifisɔɔ Thãgba fʋɔr cɔnana, na kɔ̃tɩnasɔɔ ƴɛra, na fãgadarasɔɔ ƴɛra, na‐n hana dɛ mɔ̃kɛ na mɩɩnɩ gɩ taa naˈ, agɩbo gɩrɛɛkɛ na sonaˈ;#Mat 10:19–20; Mar 13:11; Lu 21:14–15 12gɩdonɩ Thu Phuu na dɩrɛ nɩ gɩrɛɛkɛ teananɩ sor dɩ na so dabɔɔlera.
Sokpaa də̃bəəl lẽle kuunna
13Dɩ kũu bɩɛl tibil jɔɔlee thɩ̃thɩɩn sor Jejura: Dɩɩrdaar, sɔ ɩ̃ õkuunna sɩ tɩnɛ thɩ̃ɛɛkɛ asɩ thɩ khini sa faa sar, dɩ Jeju birsee: 14Kuun, amɛ kɔɔ pɛ mar ɩ̃ dɔ anɩ so gʋʋrdaar agɩbo anɩ khĩdi thɩ̃ tɩnɛdaar? 15Agɩpɩ dɩ so war: Na‐n jɩɛ dʋ bʋrɛ bɔɔbɔɔ ha pɩɛr caarsɔra dɩɩdɩɩ fɛʋ, gɩdonɩ tibil na puno na ˈlɛ yire ɔɔ lẽle thɩ̃ jɔ hanana ga, a a lerakɛ dɩɩ ha mɔ̃.
16Dɩ a so warɛ sokpaakɛ ayɩ: Lẽle kũu bɩɛl gɩ, a kɔɔ hale dɩ thɩ̃ɛ kɔɔ bʋɔraa lɔɔ dɩɩ ka. 17Dɩ a kpɩɛrɛ ɔɔ hara sa so: Anye ma cʋʋ ya fɛ? Gɩdonɩ ma hana thʋ̃ khɩɩ a na urro ɩ̃ jʋ bã. 18Sɩ agɩpɩ dɩ so: Hɩnɛ gɩrɛ ma cʋʋnɩ dɩphã. Ma tʋɔrɛ ɩ̃ thʋ̃sɔ a na kpɛɛ, sɩ ɩ̃ bir ɩ̃ mɩ dakɔ̃tɩna gɩ jɔ mɛ̃; agɩpɩ le ma ur ɩ̃ jʋ ɩ̃ thɩɩnna ɩ̃ lẽle thɩ̃sɔ fɛʋ. 19Dɩ ma sor ɩ̃barara nayɩ: Mɛrɛ, mɩ hananɛ lẽle thɩ̃ɛ a thɩɩn dɩɩ jɔr a na cʋʋ yɛna jɔɔjɔɔ. Ma toore ma‐n hɩɩr ɩ̃ kho ma‐n yɔna ma‐n kãkana. 20Sɩ Thãgba sʋʋraa: Fɛr də̃bəəlu, nĩ dɩtɩnɔɔkɛ ma teere afɩ thu, sɩ gɩrɛɛkɛra fɛʋ fɩ kɔɔ gbɛbɩnɩ amɛɛda ga do wo? 21Mɛ̃ gɩ ha na tibilikɛ n thɩnɛnɩ thɩ̃ɛ gɩ dɔ ɔɔ thɛthɛɛda, sɩ dɩɩ do Thãgbaa pa wer, aa do lẽledaaraˈ.
Ha pɛ hananɛ Thãgbara
(Mat 6:25–34)
22Agɩpɩ Jeju sor ɔɔ kpãkpãadarara: Gɛr gɩ dɩ ɩ̃ so nar ayɩ: Na‐n dɛ anɩ yirə dɩko thɩmɩɩrra, anye na kho yaa, dɩ tomɩrɩdara gɩ, anye na to yaa ga. 23Gɩdonɩ yire dor thɩ̃ kɔ̃tɩ̃ɩ a jɔ dɩkor, dɩ tomɩr dakha dor thɩ̃ kɔ̃tɩ̃ɩ a jɔ kɩ̃kɩɩn. 24Na‐n kpɩɛrna ˈlominəsɔ na hɩnɛ, wa‐n diirəˈ, wa‐n kha ga, wa‐n hana dɩko thɩɩn paar dɩ thʋnɛ ga, sɩ Thãgba n haanɛ wɩ. Anɩ the nɔ ga khɩɩr a jɔ ˈlominəəda fĩiəə? 25Amɛ nɛrɛɛ thɩ̃thɩɩn na punone a na tɔ ɔɔ yɛ nɔ na dɛɛnɔ dɛrra? 26Dɩ mɔ̃ na‐n marnɩ na cʋʋrakɛ thɩ̃ buəˈ, sɩ mɔ̃gɩdo dɩ na‐n dɛna gɩrɛɛkɛ sɛnɩ? 27Na‐n kpɩɛrna naporsɔ wo na hɩnɛ mɔ̃kɛ wɩ‐n phuni. Wa‐n kpar kẽkẽ wiirəˈ, wa‐n le kẽkena ga. Sɩ mɩ so narɛ Salomɔ̃ɔ thɛthɛrakɛ kɛ dɔnɩ fãgadaar, na ɔɔ nyɔ̃kor bɔ fɛʋ, aa kɔɔ to kɩ̃kɩɩn dɩɩ ho wɛr bɩɛllakaˈ.#1 Fãg 10:4–7; 2 Kur 9:3–6 28Dɩ a Thãgba to hʋɔnɩkɛ hanɩle hʋɔnɔ nĩ dɩɩ ha thaa, sɩɩ do cʋɔ wa to garɛ dɔɔ, a na ka na cʋʋ mɛ̃ nɛrɛra dakha gaa, nɛrɛɛkɛ kanɩ hana ha pɛrɛ gbe? 29Dɩ nɛrɛ na‐n ƴaal gɩrɛ na khonɩ na gɩrɛ na yɔnaˈ, dɩ na‐n too na dɛdɛdaˈ. 30Gɩdonɩ gele fɛʋ wɩrɛ na jɛnɩ Thãgba ga n ƴaalɛ gɩ, sɩ ado nɛr gɩ, anɩ Thɩ jɩrɛ gɩrɛ n ɓɔra nɩnɩ. 31Sɩ nɩ ka na ƴaalɛ Thãgbaa fãgadaar do, sɩ ga thɩ̃sɔɔlera fɛʋ Thãgba na ha nɛr na ɓaan.
Lẽle thɩ̃ɛɛkɛ hanɩ Thãgba fãgadaarɩ dɩra
(Mat 6:19–21)
32Ɩ̃ bana bi, na‐n do maar n fʋ naˈ, gɩdonɩ anɩ Thɩra gɩ da dɩ na ha nɩ Thãgba fãgadaarɩ dɩ. 33Nɩ dolone anɩ lẽle thɩ̃sɔ a na hana bɔdara. Nɩ yɩrana mũsũ lokanaakɛ na kʋɛanaˈ, na lẽle thɩ̃ɛɛkɛ hanɩ Thãgbaa dʋɔ, kɛ na dɔnɩ dapɩnanaˈ, kãkɛ yu na danaˈ, dɩ ɔphãkerẽsɔ wɛ a na kʋɛ ga. 34Gɩdonɩ kãkɛ anɩ lẽle thɩ̃sɔ hanɩ, le anɩ ha na ha dakha.
Thɔ̃daar bɔɩɩkɛ n pɩɛrɛnɩ awɩ kɔ̃tɩ̃ɩ bir ɩ̃
35Nɩ gbɛbɩrɛ anɩ dɩbara a cʋɛ anɩ lãphãsɔ ga‐n hɩrɛ.#Mat 25:1–13 36Dɩ nɛrɛ, nɩ hɔ tɩbɩlaakɛ tɔɔnɩ dɩ wa‐n pɩɛr awɩ kɔ̃tɩ̃ɩkɛ na thɛnɩ herra na ɩ̃, wɩ khɛrʋʋ loo khə̃khə̃ ɔbɔɔkɛ a na danɩ a na‐n be.#Mar 13:34–36 37Ga dar thɔ̃darasɔraale, a awɩ kɔ̃tɩ̃ na pɔ a yɩ wɩ dɩ wa jʋʋr. Sobɔr mɩ so nar, a na gbɛbɩrɛ ɔɔbara sa cʋʋ wɩ wɩ too dɩko kho paar, a tɔ a pɔ a na‐n tɩnɛ wɩ. 38Ga dar thɔ̃darasɔraale na ka, ado awɩ kɔ̃tɩ̃ na ɩ̃ a yɩ wɩ dɩ wa jʋʋr thakɛ, a dɩnɩrɔ gɩ, a yɔl ko khɩɩ bɔɔ gɩ. 39Nɩ jɩɛ jɩ gɩrɛɛkɛ bɔɔbɔɔ, ado cɔdaar kuun jɩrɛ bɔɔkɛ yu na pɔnɩ ɔɔ cɔ, a na‐n bɛrɛ a na sɩɩraa a lʋ̃ʋ cʋɔrɔaˈ.#Mat 24:43–44 40Nɛrɛ dakha nɩ gbɛbɩrɛ pɛ, gɩdonɩ mɛr tibili Bikuun na bire na ɩ̃ bɔɔkɛ na kpɩɛrna gɩnaˈ.
Thɔ̃daar bʋɔ na thɔ̃daar puuda
(Mat 24:45–51)
41Dɩ Pɩɛr bule: Kɔ̃tɩn, sɛr fɩ‐n sor sokpaakɛra yaa, agɩbo tɩbɩla fɛʋra gɩ? 42Dɩ Kɔ̃tɩn birsee: Ʋmɔ̃ dʋɔn thɩ̃ hɩɩndaarɩkɛ dʋɔnnɩ sobɔ cʋʋdaar, kɛ kpɛsɛnɛnɩ, dɩ ɔɔ kɔ̃tɩ̃ na pɛr da do ɔɔ cɔdaraa hɩɩndaar a na‐n hana wɩ dɩkɔ ɔbɔɔkɛ gɩ teenanɩ? 43Ga dar thɔ̃daar ca olela ɔɔ kɔ̃tɩ̃ na‐n danɩ a yɩɩ a na‐n cʋʋ mɛ̃. 44Sobɔr mɩ so nar, ɔɔ kɔ̃tɩ̃ na jɩɛ cʋgʋʋ da do hɩɩndaar ɔɔ thɩ̃sɔra fɛʋ. 45Sɩ ado thɔ̃daarɩle sor ɔɔbarara ayɩ: Ɩ̃ kɔ̃tɩ̃ n pʋɔrɛ, sa ma da‐n bɩɩr thɔ̃daar kona na thɔ̃daar khɛra, dɩ khona da‐n yɔna dɩ taan na‐n kʋʋ; 46thɔ̃daarɩlee kɔ̃tɩ̃ na phurore dawiikɛ aa‐n pɩɛrʋʋnaˈ, na bɔɔraakɛ aa kpɩɛrnanaˈ. Dɩ a na cɩɩrɛ yɩra yɩra, sɩ na gbaa na pɛ wɩrɛraakɛ na pɩɛrnɩ haaraˈ. 47Thɔ̃daarɩkɛ kɔɔ jɛnɩ ɔɔ kɔ̃tɩ̃ɩ tuur sɩ aa gbɛbɩ thɩ̃aˈ, agɩbo aa cʋʋ mɔ̃kɛ ɔɔ kɔ̃tɩ̃ n ƴaalnaˈ, a na ˈlɛr bɩɩrɛ dɩ a kɔ̃tɩ̃ na sobɔr. 48Sɩ ʋrɛɛkɛ na jɛnaˈ, sa cʋʋ gɩrɛɛkɛ dananɩ bɩɩrɛ, a na ˈlɛ bɩɩrɛ jɔaˈ. Tibilikɛ wɩ hanɩ jɔɔ, mɛ̃ wa bulee jɔɔ dakha, na tibilikɛ wɩ pɛrnɩ a na‐n hɩnɛ thɩ̃ɛ jɔɔ, mɛ̃ wa bulee a na kpãkpaanɔ jɔɔ.
Mɔ̃ Jeju ɩnanɩ leere
(Mat 10:34–36)
49Dɔɔ mɩ ɩna ɩ̃ pɛ thɩɩra, dɩ anye mɩ‐n ƴaal ˈlo a gɩ ˈli mar? 50Mɩ teenanɛ ɩ̃ ˈlɛ yɔ kpɛɛrɛɛkɛ dɔnɩ bʋɔɔkɛ ma gaarnɩ, sɩ nɩ yɛ mɔ̃ gɩ do marnɩ kpɩɛrɛɛkɛ n ˈwaan mɩnɩ ɓoɓo phaphapha gɩ dã.#Mar 10:38 51Nɩ‐n kpɩɛrɛ ha ɩɩ mɩ ɩna ɩ̃ ˈlaa thɩɩra gaa bɛ? Ə̃ˈə̃, mɩ so narɛ leere gɩ. 52Gɩdonɩ a fʋna nɛnɛ̃kɛ, tɩbɩla yemɔɩ cɔ bɩɛlla na leere kha. Yẽther na yenyɔ na ti kha dɔaˈ, dɩ yenyɔ na yẽther dakha na ti kha dɔaˈ. 53Thɩrɛ na ti kha dɔɔ na ɔɔ bikuunaˈ, dɩ bikuun na ti kha dɔɔ na ɔɔ thɩ dakha ga. Nɩrɛ na ti kha dɔɔ na bikhɩɛnaˈ, dɩ bikhɩɛn na ti kha dɔɔ na nɩrɛ dakha ga. Nɩrɛ na ti kha dɔɔ na ɔɔ bikuuni khɛraˈ, dɩ bikuuni khɛr na ti kha dɔɔ na ɔɔ koo nɩ dakha ga.#Mis 7:6
Mɔ̃ fa jɩnɩ dɩ bɔɔ n daan
(Mat 16:2–3)
54Dɩ Jeju sor tibil jɔraale wo ayɩ: Ɔbɔɔkɛ nɩ‐n yɩnɩ ndɔlɔ̃paar gananɔ#12:54 Gananɔ: Ado Juifisɔɔ pa gɩ, gananɔ thãgba nyʋɔn n the. dɩɩ birə, mee nɩ‐n sor dapaara dɩ nɩ yɩ, thãgba nyʋɔn na daan, dɩɩ dã ger oti. 55Dɩ ɔbɔɔkɛ nɩ‐n yɩnɩ jɩɛ dɩ ga‐n the wi#12:55 Wi phã paar nyɔ̃bɩlana: Ado Juifisɔɔ pa gɩ, wi phã paar nyɔ̃bɩlana jɩɛ n the. phã paar nyɔ̃bɩlana, nɩ‐n sor dɩ nɩ yɩ aa: Susuur na kʋrɛ, dɩɩ dã ger oti. 56Nɛr bɩnɛ yenyɔdara, nɩ‐n punone dɩ nɩ jɩ mɔ̃kɛ thɩ̃ɛ n hanɩ thãgbara ƴũ na thɩɩra, sɩ mɔ̃ na‐n ka dɩ nɩ jɩ mɔ̃ nɛnɛ̃ bɔɔkɛ wer hana?
Mɔ̃ fa gʋʋrnɩ sor na afɩ sodaar
(Mat 5:25–26)
57Dɩ mɔ̃gɩdo dɩ na‐n ka nɩ jɩ anɩbara gɩrɛ dɔnɩ dasarʋa? 58Ado afɩ sodaar we fɩ kɩɩl paar kɔ̃tɩnaa ƴɛra, ɔbɔɔkɛ fɩ hanɩ jaal na afɩ sodaarra, dɔ bʋɔ sɩ nɩ gʋʋr kha sorra gɩ pɩ le hʋɛra; agado mɛ̃ gaa, a na jalna fɛr so kɩɩldaarɩ ƴɛra, dɩ so kɩɩldaar dakha na gba fɩ a na ha gardɩ, dɩ gardɩ na khaan fɩ khaɩra. 59Sɩ mɩ so farɛ, fa the le kpɩɩrakaˈ, phaphapha fɩ lɩmɩ gɩ pɩna.
Currently Selected:
Luki 12: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
