Luki 21

Khaardaakɛ khikhɛrʋ ˈlaanɩ

(Mar 12:41–44)

1Dɩ Jeju gba da‐n hɩɩn a yɩ lɛ̃lɛɛkɛ n pɩɛrnɩ war Thãgba mũsũ pɛ paar. 2Dɩ le a yɩ dakha khikhɛr bɔdaar dɩ pɔna tama be yenyɔ a pɛr. 3Dɩ so: Sobɔr mɩ so nar, khikhɛr bɔdaarɩkɛ pɛrɛ war Thãgba mũsũ pɛ paar dɩɩ jɔ wɛr fɛʋ. 4Gɩdonɩ war harra wɩrɛ fɛʋʋkɛ kɔɔ pɛr war Thãgba mũsũ pɛ paar, sɩ ɔr, ɔɔ bɔdaar warɩkɛ na haanɛɛnɩ a gba koo a pɛr.

Thãgba fʋɔr cɔ kɔ̃tɩ̃ wɩɛr thɩmɩɩr

(Mat 24:1–2; Mar 13:1–2)

5Mɔ̃kɛ ɩkhasɔ n kɔɔ mɩɩnɩ boka ɓɔna na khaardaasɔɔkɛ wɩ cʋʋnanɩ Thãgba fʋɔr cɔ kɔ̃tɩ̃ɩ dɩɩ ɓɔ̃ kaada, Jeju so warɛ ayɩ: 6Bɔɔ na daan dɩ gɩrɛɛkɛra nɩ yɩnɩ, boka bɩɛl na bir na sɩ a na dɛ̃ɛ ʋ̃ bokara ƴũ bã, sɩ fɛʋ na derre.

Nɩwɛɛkɛ na kɔɔ dananɩ

(Mat 24:3–14; Mar 13:3–13)

7Dɩ wɩ bulee: Dɩɩrdaar, ʋmɔ̃ bɔɔ gelela na dã? Dɩ anye dɔ jɩɩnɩkɛ na nɛnanɩ bɔɔkɛ gelesɔra na‐n danɩ? 8Dɩ Jeju birse wi: Na‐n jɩɛ dʋ bʋrɛ, na‐n do tibil n fɩɩl naˈ, gɩdonɩ tɩbɩla bərəəm na gbaar ɩ̃ i na ɩna wa‐n sona wɩ yɩ, ɩnɛr dʋɔn mɛrɛ; dɩ wo, bɔɔ n daan. Na‐n ha na kpa waraˈ koe. 9Dɩ ɔbɔɔkɛ na nɩɛnɩ kʋʋr hale na lãʋsɔ, na‐n do maar n fʋ naˈ, gɩdonɩ dɔ gele n kɔɔ dã ɓo, sɩ ga do gɛr na dʋɔn thɩ pɩ paar dapaara paˈ.

10Le a so war: Ʋ̃ ca na ɩɩrɛ a na‐n khena ʋ̃ ca, dɩ ʋ̃ fãgadaarɩ dɩ bɩɛl na ɩɩrɛ a na‐n kena ʋ̃ fãgadaarɩ dɩ kpɩɩ. 11Dɩ thɩ jẽ kɔ̃tɩna, na kho mananɛsɔ, na kɔmɛ kɔ̃tɩnasɔ na hale paar dɩɩdɩɩsɔ. Hərə thɩ̃ɛ na nɔ kpaa thɩ̃ kɔ̃tɩnasɔɔkɛ thɛnɩ ƴũ na hale dakha. 12Sɩ gɩrɛ na kʋlɛnɩ gele ƴɩɛ, tɩbɩla na fʋlɛ nɛr wa‐n kpoo nar. Wa fʋlɛ nɛr na jalna Juifisɔɔ Thãgba fʋɔr cɔnanɔ na khaɩ cɔnanɔ. Wa kpa nɛr na jalna fãgadarara na gobanɛrsɔɔ ƴɛra, gɩ do ɩ̃ i dɔ nɔɔ. 13Gɛr na yɩrɔ hʋɛ a na mɩɩ wɩ anɩ sobɔ so jɩ thɩmɩɩ. 14Gɛr gɩ na‐n jɛna gɩ dɩ na‐n ha na kɔɔ dɛ anye na so yaa ga.#Lu 12:11–12 15Gɩdonɩ mɛr na sɔ nar gɩrɛɛkɛ na mɩɩnɩ, ɩ̃ hana nɩ kpɛsɛrɛɛkɛ anɩ lãlaardarasɔ fɛʋ na punoni a na maraˈ, agɩbo a na bana ga. 16Anɩ thɩrakɛ, na anɩ nɩ, na anɩ õkuunsɔ, na anɩ too, na anɩ kuunsɔ, wa liirna nɛr, dɩ wa cʋʋrɛ ɩkhaa tibilsɔ anɩ thɩ̃thɩɩn dɩ wa khiir. 17Tɩbɩla fɛʋ na‐n laar nɛr gɩ do ɩ̃ i dɔ nɔɔ. 18Sɩ anɩ yʋsũ bɩɛllakɛ na ˈla na buəˈ. 19A nɩ yɩr, na ˈlɛr taarɛ.

Bɔ gaar kɔ̃tɩ̃daa

(Mat 24:15–21; Mar 13:14–19)

20Ɔbɔɔkɛ na yɩnɩ sɔrasɛsɔ dɩ wa kpala Jerujalɛm dɩɩra, nɩ jɛ gɩ do ɔɔ bũburõ bɔ n daan. 21Le wɩrɛ hanɩ Jude n fuo ca jala gɔ̃gʋɔna, wɩrɛ hanɩ Jerujalɛm dɩ bɩnɔ n ɩrɛ na thɛ, wɩrɛ hanɩ kõgosora na lõ dɩ bɩnɔ bã. 22Gɩdonɩ ga wisɔɔle na do wiresɔɔkɛ Thãgba na tiirni helu, gɩ cʋʋ gɩrɛ kherenenɩ fɛʋ Thãgbaa sɛbɛra gɩ dã.#Oje 9:7 23Ga wisɔɔle, ga puurore khɛ pɛmɛdarara na wɩrɛ n mamanɩ bibɔrɔsɔ. Gɩdonɩ nɩ kɔ̃tɩ̃ɩ na hale dɩɩraale na Thãgbaa nĩkhiikɛ na‐n kɛ̃kɛrɛnɛnanɩ ga tibil caakɛ. 24Bajɩna na kʋʋrɛ wɩ, wa fʋlɛ wɛr na jalna wɩ do dea ca kpalaa dɩra fɛʋ, dɩ Jerujalɛm na dor ca kpalaa nɛ saar pa phaphapha ca kpalaa bɔ n dã.

Tibili Bikuuni bir ɩ̃

(Mat 24:29–31; Mar 13:24–27)

25Jɩɩnsɔ na hale wirera na porra na ƴepələ̃besɔra; sɩ kɛkɛ thɩɩra bɔ gaar kɔ̃tɩ̃ɩ na hale tibil caarra fɛʋ, kɛ na jɛnɩ mɔ̃ wa donɩ lanyʋɔnnaakɛ n uboni dɩ a‐n bɛɛna ga.#Eja 13:10; Eje 32:7; Jow 2:31; Nɩr 6:12–13 26Tɩbɩla na khiire maarra mɔ̃ wɩ‐n kpɩɛrnanɩ gɩrɛɛkɛ na dananɩ thɩɩra, gɩdonɩ gɩrɛ dɔnɩ fãgaakɛ hanɩ thãgbara ƴũ ga gbugbuyore. 27Le wa yɩ mɛr tibili Bikuun ma‐n ɩna ndɔlɔ̃paar, na fãga, na carbarɛ jɔɔ.#Dan 7:13; Nɩr 1:7 28Ɔbɔɔkɛ gelela na tɔ̃tʋɔnnɩ ga‐n dã, nɩ jɩɛ jɩɩl sa gba ƴɩɛ ƴũ na hɩnɛ, gɩdonɩ anɩ birse bɔ n daan.

Thɩ̃ dɩɩrɛ thɩrʋraakɛ dɔnɩ thɩr khonanɛ

(Mat 24:32–35; Mar 13:28–31)

29Dɩ Jeju so war sokpa bɩɛl ayɩ: Nɩ hɩnɛ thɩr khonanɛ na thɩrasɔɔkɛ fɛʋ. 30Ɔbɔɔkɛ awɩ fasɔ n thɔɔnɩ, nɩ jɩrɛ nɛrɛɛ thɛthɛrakɛ dɩ ubulo wɩllɛ pɩ. 31Dɩ mɛ̃ gɩ nɛrɛ dakha, a nɩ yɩ thɩ̃ɛsɔɔkɛ dɩ a dã, nɩ jɛ dɩ Thãgbaa fãga gba bɔ daan. 32Sobɔr mɩ so nar, nĩdaraakɛ na khiir koo sɩ thɩ̃ɛsɔɔkɛ fɛʋ na dã ga. 33Thãgbara ƴũ na thɩɩ na phor na ka, sɩ ɩ̃ thɩmɩɩsɔ na pho na ka kpɩɩrakaˈ.

34Na‐n jɩɛ dʋ bʋrɛ, dɩ kɛbɩrɛ, na ta laarɛ, na dɛrɩkɛ dɔnɩ thɩɩkɛɛda na‐n cʋʋ nɩ dɩ na jʋʋr bã, dɩ ga wiile na danɩ gɩ ho mɔ̃kɛ pheru n cɩnaˈ. 35Gɩdonɩ mɛ̃ wireele na phã tɩbɩlala fɛʋʋkɛ hanɩ thɩɩra. 36Gɛr gɩ na‐n jʋrɛ a na bɩɛlna Thãgba bɔɔ fɛʋ, a ˈlɛ fãga a fuona gɩrɛraakɛra fɛʋ na dananɩ, dɩ mɛ̃ na jɩɩl mɛr tibili Bikuuni ƴɛra. 37Hɩwɛra Jeju n kɔɔ hale Thãgba fʋɔr cɔ kɔ̃tɩɩna da‐n dɩɩr tɩbɩla, sɩ a dɩɩ tɩ̃, dɩ jal dɩ cɔ olɩvɩ thɩr gɔ̃gʋɔnaakɛ.#Lu 19:47 38Sɩ jijiirə tɩbɩla fɛʋ n pʋɔraarɛ le Thãgba fʋɔr cɔ kɔ̃tɩɩna, dɩ wa‐n pɩɛ nũu.

Currently Selected:

Luki 21: LOBIRI

Highlight

Copy