Luki 22

Kɩɛr wɩ‐n ƴaal Jejuu yʋ

(Mat 26:1–5; Mar 14:1–2; Jã 11:45–53)

1Fɛtɩɩkɛ wɩ‐n wenɩ Pakɩ, kɛ dʋɔnnɩ buruukɛ na hananɩ tabɩɩraada n wɔrɔnɛ.#Thɩɩ 12:1–27 2Le bonɩ jidaar kɔ̃tɩna na jɔfʋ dɩɩrdara n kɔɔ ƴaal hʋɛ mɔ̃ wa cʋʋnɩ sɩ wɩ kʋ Jeju, gɩdonɩ maar n fʋɔn wɩ tɩbɩlala.

Mɔ̃ Judasɩ liirnanɩ Jeju

(Mat 26:14–16; Mar 14:10–11)

3Dɩ Satã lõ Judasɩraakɛ thɛnɩ Karɩyɔtɩ, ʋrɛɛkɛ dɔnɩ kpãkpãadaar bɩɛl yʋɔr yenyɔra. 4Dɩ a jaal a gʋʋrna bonɩ jidaar kɔ̃tɩna na Thãgba fʋɔr cɔ kɔ̃tɩ̃ gardɛɛ kʋmãdasɔ mɔ̃ a na cʋʋnɩ sɩ na liirna Jeju na ha wɩ. 5Dɩɩ da war na sobɔr dɩ wɩ yɩ, ɩna haarɛ war. 6Dɩ tu a jɩɩ ma da‐n ƴaal hʋɛ waa a liirna wɩ Jeju, sɩ tibil jɔ na jaˈ.

Kɔ̃tɩnɩ dɩko kho fʋ pa

(Mat 26:17–25; Mar 14:12–21; Jã 13:21–30)

7Dɩ buruukɛ na hananɩ tabɩɩraa fɛtɩ wi dã, kɛ dʋɔnnɩ wireekɛ wɩ‐n jinəni Pakɩ bana bire bonɩɛ. 8Dɩ Jeju thɔ̃ Pɩɛr na Jã a so war ayɩ: Nɩ jala a gbɛbɩrɛ sar Pakɩ dɩkor dɩ sa kho. 9Dɩ wɩ bulee: Kana fɩ‐n ƴaal dɩ sa gbɛbɩ? 10Dɩ birse wi: Nɩ hɩnɛ, ɔbɔɔkɛ na lonɩ dɩɩra, kuunikɛ heenenɩ nyʋɔn na daa na caana nɛr. Na‐n kpaaraa cʋɔrraakɛ a na lonɩ; 11dɩ nɩ sɔ cɔdaar kuunna: Dɩɩrdaar n bule fer aa, kana duu na ha dɩ ɩna khoro Pakɩ dɩkor na ɩnɩ kpãkpãadara ya? 12Dɩ a na nɩ narɛ lɩ̃gã kɔ̃tɩ̃ɩkɛ wɩ thɩɩnɔnɩ thɩ̃ɛ. Le na gbɛbɩrɩ Pakɩ dɩkor. 13Dɩ wɩ jaal a yɩ thɩ̃ɛ fɛʋ dɩɩ ha mɔna Jeju kɔɔ so warnɩ, dɩ mɛ̃ wɩ gbɛbɩ Pakɩ dɩkor.

Kɔ̃tɩnɩ dɩko

(Mat 26:26–30; Mar 14:22–26; 1 Kor 11:23–25)

14Ɔbɔɔkɛ bɔɔ danɩ, Jeju toore dɩko kho paar na ɔɔ thɔ̃thɔnaakɛ wɩ hananɩ kha. 15Dɩ a so warɛ ayɩ: Mɩ kɔɔ ƴaalɛ na ɩ̃ ha fɛʋ dɩ ma kho Pakɩ dɩkorɩkɛ na nɛrɛ ɓo sɩ bɔ gaarɛ n dã mɩ. 16Gɩdonɩ mɩ so narɛ: Ma bir na kho Pakɩ dɩkorɩkɛ kpɩɩ bã, phaphapha gɩrɛ gelela ƴaalnɩ gɩ so n yɩr casɩ Thãgba fãgadaarɩ dɩra. 17Dɩ a gbaar thɩ̃ yɔnanɛ a bɩɛl Thãgba pɛr sa so: Nɩ gba thɩ̃ yɔnanɛɛkɛ a tɩnɛnɛ anɩ ha. 18Gɩdonɩ mɩ so narɛ: Ma bir na yɔ dɩvɛ̃ bã, phaphapha Thãgba n gba fãga. 19Agɩpɩ dɩ gba buru. Ɔbɔɔkɛ a bɩɛlnɩ Thãgba pɛr pɩ, a kuure a ha wɩ sa so: Gɩrɛ dʋɔn ɩ̃ tomɩɩkɛ [mɩ ˈlaanɩ ha nɩ, na‐n cʋɛ thakɛ a na jɛna mɩ. 20Dɩ mɛ̃ a cʋʋ na thɩ̃ yɔnanɛ dakha. Ɔbɔɔkɛ wɩ khonɩ dɩkor pɩ, a ha wɛr sa so: Thɩ̃ yɔnanɛɛkɛ dʋɔn nɔ bɩɛl ʋlfɛ phaakɛ thɛnɩ ɩ̃ tɔmɩnaakɛ na deerenɩ nɛrɛɛ sora.]#Jer 31:31–34

21Sɩ nɩ hɩnɛ, ʋrɛɛkɛ na lirena mɩnɩ hakɛ dɩko kho paar na mɛrɛ.#Khɩ 41:9 22Mɛr tibili Bikuun n jaal mɔ̃kɛ Thãgba pɛrnɩ gɩ hana. Sɩ ga puure tibilləəkɛ na lirena mɩnɩ. 23Dɩ wɩ ma dɩ wa‐n bule kha bɩɛlbɩɛl awɩ ha ayɩ, amɛ ɩnɛrɛɛ thɩ̃thɩɩn na cʋɛ ga thɩ̃ɩkɛ?

Amɛ dʋɔn kɔ̃tɩn

24Thɩ̃ banaa kɔɔ ɩɩrɛ dakha awɩ thɩ̃thɩɩn, dɩ wa‐n bana kha awɩ ha aa: Amɛ asɩ thɩ̃thɩɩn teana gɩrɛra a dɔ kɔ̃tɩn ya fɛ?#Mat 18:1; Mar 9:34; Lu 9:46 25Dɩ Jeju so war: Ca kpalaa fãgadara n ʋʋnɛ tɩbɩlala kpɛ, dɩ wɩrɛɛkɛ hananɩ fãga wɛrra n cʋʋrɛ dɩ wa‐n we wɩ bɔ cʋʋdara.#Mat 20:25–27; Mar 10:42–44 26Sɩ ga teena gɩ hana mɛ̃ anɩ thɩ̃thɩɩnaa koe; sɩ tibilikɛ kanɩ do kɔ̃tɩn anɩ thɩ̃thɩɩn, dɔ ɔr n ka a do dabuu, dɩ ʋrɛɛkɛ dʋɔnnɩ yʋʋ, dɔ ɔr n ka a do thɔ̃daar.#Mat 23:11; Mar 9:35 27Gɩdonɩ ʋmɔ̃ n dɔ kɔ̃tɩn, ʋrɛɛkɛ n tɔɔnɩ dɩko kho paar gɩ yaa, agɩbo ʋrɛɛkɛ n tɩnɛnɛnɩ gɩ? Ga do ʋrɛɛkɛ n tɔɔnɩ dɩko kho paar gaa? Sɩ mɛrɛ, mɩ ka har anɩ thɩ̃thɩɩn a ho thɔ̃daar.#Jã 13:12–15 28Nɛrɛ, nɛr dʋɔn wɩrɛɛkɛ jɩlɛ marnɩ kɩbɩ ɩ̃ bɔ gaarra. 29Gɛr gɩ dɩ ɩ̃ thɩɩn Thãgba fãgadaarɩ dɩ anɩ thɩɩn, mɔ̃kɛ ɩ̃ Thɩ kɔɔ thɩɩn gɩnɩ ɩ̃ thɩɩn; 30dɩ mɛ̃ na kho na‐n yɔna ɩ̃ dɩko kho para ɩ̃ fãgadaarɩ dɩra, nɩ too dakha fãga too paarsɔ na‐n kɩɩlna Ɩjɩrayɛl ca yʋɔr yenyɔ.#Mat 19:28

Jeju mɩɩrɛ mɔ̃ Pɩɛr na bananɩ nayɩ, ɩna jɩaˈ

(Mat 26:31–35; Mar 14:27–31; Jã 13:36–38)

31Dɩ Kɔ̃tɩn so aa: Sɩmɔ̃, Sɩmɔ̃, hɩnɛ Satã n kɔɔ luure ka ɩnɩ‐n jɛ nɩ jʋ khaa. 32Sɩ mɩ kɔɔ bɩɛlɛ Thãgba a pɛ far dɩ afɩ ha pɛ na‐n buəˈ, sɩ fɛrɛ ɔbɔɔkɛ fa kɛrnɩ na bir Thãgbara, cʋɛ afɩ omisɔ wɩ tɩ. 33Dɩ Pɩɛr sʋʋraa: Kɔ̃tɩn, mɩ gbɛbɩrɛ pɩ dɩ sa lõ kha khaɩra, dɩ ma khi dakha na fɛrɛ. 34Sɩ Jeju sʋʋraa: Pɩɛr, mɩ so farɛ yɔl kʋʋ na khɩɩ nɩ̃kɛ paˈ, sɩ balãther fa bana nayɩ fa jɩ maˈ.

35Dɩ Jeju bule wer wo ayɩwɔɔ: Ɔbɔɔkɛ mɩ kɔɔ thɔ̃ nɩnɩ sɩ na kɔɔ hana pɔtɩma, dɩ lokaar gɩ dɩ nɛfaa ga, thɩ̃ɛ kɔɔ ɓɔr nɛr ya? Dɩ wɩ birsee: Thɩ̃ bɩɛllakɛ na kɔɔ ɓɔr saˈ.#Mat 10:9–10; Mar 6:8–9; Lu 9:3; 10:4 36Dɩ so war: Sɩ nɛnɛ̃kɛ ga ha mãˈ. Tibilikɛ hananɩ pɔtɩma, dɔ a gba a fʋrɔ, mɛna gɩ na tibilikɛ hananɩ lokaar. Dɩ ʋrɛɛkɛ na hananɩ bajɩna ga, dɔ a dolõ ɔɔ kẽkẽ a thena bajɩna. 37Gɩdonɩ mɩ so narɛ, gɩrɛɛkɛ kɔɔ kherenenɩ Thãgbaa sɛbɛra teenanɛ gɩ dã mɩ, gɩ sor: “Wɩ kɔɔ theruure a ɓã puu cʋʋdarara.” Dɩ gɩrɛɛkɛ ba mɩnɩɩ bɔɔ n daan.#Eja 53:12 38Dɩ wɩ so: Kɔ̃tɩn hɩnɛ, bajɩna yenyɔ hakɛ; dɩ birse wi: Gɩ daan.

Jejuu Thãgba bɩɛl Jɛcɛmanɛ

(Mat 26:36–46; Mar 14:32–42)

39Ɔbɔɔkɛ Jeju kɔɔ thenɩ, a jaal olɩvɩ thɩr gɔ̃gʋɔna mɔ̃kɛ a mɩlna gɩnɩ. Ɔɔ kpãkpãadara kpaaraarɛ. 40Dɩ ɔbɔɔkɛ a kɔɔ danɩ paarɩle, a so warɛ ayɩ: Nɩ bɩɛlnɛ Thãgba dɩ mɛ̃ na lõ fifiləlela ga. 41Agɩpɩ Jeju tɔ jal ƴɔɔ gbe dɩɩ mãkha na mɔ̃kɛ tibil n dʋnanɩ bokaar dɩɩ dã, a gburõku da‐n bɩɛl Thãgba da‐n sona: 42Thɩrɛ, ado fɩ‐n ƴaalɛ hʋnɔnɛ mar thɩ̃ yɔnanɛɛkɛ, sɩ ga do mɔ̃ mɩ‐n ƴaalnɩ ga, sɩ mɔ̃ fɛrɛ n pɛrnɩ haar gɩ hana. [ 43Dɩ Thãgbaa thɔ̃thɔ̃daar thu bɩɛl ther Thãgbaa dʋɔ a pɔ a haa fãga. 44Sɩ mɔ̃ Jeju hanɩ da‐n ˈwãga, a yɩrrɛ a jɩɩ bɩɛl Thãgba dɩ ga‐n pɛr; dɩ ɔɔ hʋ̃ʋsɛɛkɛ a hʋ̃ʋsɛnɩ thʋ̃ debi a ho tɔmɩn dɩ ga‐n ˈlũ thɩɩra.] 45Dɩ ɔbɔɔkɛ Jeju bɩɛlnɩ Thãgba pɩ, a ɩɩrɛ a bir pɔ kpãkpãadaraa pa, a yɩ wɩ dɩ wa‐n daar gɩdonɩ wɩ gbobire. 46Dɩ bule wi: Mɔ̃gɩdo dɩ na‐n daar? Nɩ ɩrɛ a na bɩɛlnɛ Thãgba dɩ mɛ̃ na lõ fifiləlela ga.

Jejuu fʋ

(Mat 26:47–56; Mar 14:43–50; Jã 18:3–11)

47Mɔ̃ Jeju hanɩ mɩɩrɔ, hɩnɛ tibil jɔ kɔɔ daan. Dɩ ʋrɛɛkɛ wɩ‐n wenɩ Judasɩɩkɛ dʋɔnnɩ bɩɛl kpãkpãadara yʋɔr yenyɔra kʋlɛ wɩ ƴɩɛ, a tɔ pɔ Jejura a palʋʋ. 48Dɩ Jeju bulee: Judasɩ, pallɛla fɩ liirna mɛr tibili Bikuun bɛɛ?

49Dɩ ɔbɔɔkɛ wɩrɛɛkɛ hanɩ kha na Jeju kɔɔ yɩnɩ gɩrɛɛkɛ n dananɩ, wɩ buleele: Kɔ̃tɩn, sɩ cɛna bajɩna ya? 50Dɩ bɩɛl wɛrra cɩrɛ gbõdaarɩ thɔ̃daar nyɔ̃bɔ nũu a kʋr. 51Sɩ Jeju bir so: Na‐n cʋʋ thakɛ bã, sa thar kuuni nunəəle dɩɩ ba. 52Agɩpɩ Jeju so bonɩ jida kɔ̃tɩnasɔra, na Thãgba fʋɔr cɔ kɔ̃tɩ̃ gardɛɛ kʋmãdasɔra, na kɔ̃tɩnasɔraakɛ kɔɔ pʋɔnnɩ wɩ fʋʋ ayɩ: Nɩ ɩnanɛ bajɩna na gbolasɔ nɩ fʋ mɩ, mɔ̃kɛ wɩ‐n fʋnɩ yu hɔ̃hʋɔldaar koe. 53Mɩ‐n kɔɔ har kha na nɛrɛ wire fɛʋ Thãgba fʋɔr cɔ kɔ̃tɩɩna, sɩ na kɔɔ tha mar nyɔ̃aˈ. Sɩ nɛnɛ̃ dʋɔn anɩ bɔ dã pa, na dabirəə fãga bɔ.#Lu 19:47; 21:37

Mɔ̃ Pɩɛr bananɩ ɩna jɩ ntɛ Jeju donaˈ

(Mat 26:57–58, 69–75; Mar 14:53–54, 66–72; Jã 18:12–18, 25–27)

54Ɔbɔɔkɛ wɩ fʋnɩ Jeju pɩ, wɩ kpaarɛ jalna gbõdaarɩ cɔ, sɩ Pɩɛr n kpar Jejura nɔ bɩɛl nɔ bɩɛl. 55Dɩ tɩbɩla kɔɔ gbɔɔrɛ dɔɔ gbaya thɩ̃thɩɩn a tooro, dɩ Pɩɛr kɔɔ toore kha na wɛr. 56Dɩ thɔ̃daar khɛ bɩɛl yɩɩ dɩ too a wɔrɔ̃ dɔɔ, dɩ hɩɩnʋʋ kirkirkir sa so aa: Kuunikɛ dakha kɔɔ har kha na ɔr. 57Sɩ a bananɛ da‐n sona ayɩ: Khɛr, ma jɩaˈ. 58Bɔɔ gbe tibil kpɩɩ yɩɩ a so: Fɛrɛ dakha, wa tibil ca bɩɛl fɩ do. Dɩ Pɩɛr birsee: Kuun, ma do wa tibil ca ga. 59A lɩɛr bɩɛl ka wo, tibil kpɩɩ borrakɛ da‐n ɩɩraa ayɩ: Sobɔr gɩ gel, kuunikɛ kɔɔ har kha na Jeju gɩdonɩ Galiledaar a do. 60Sɩ Pɩɛr sʋʋraa: Kuun, ma jɩ gɩrɛɛkɛ fɩ‐n ƴaalnɩ fɩ soaˈ. Dɩ mɔna a hanɩ mɩɩrɔ ˈlo, dapaara yɔl kʋʋ khɩɩrɛ. 61Dɩ Kɔ̃tɩn kɩɩl a hɩɩnʋʋ. Dɩ Pɩɛr jɩna thɩmɩɩrɩkɛ Kɔ̃tɩn kɔɔ sʋʋraanɩ ayɩ: Yɔl kʋʋ na ˈlɛ na khɩɩ nɩ̃kɛ paˈ, sɩ fa bananɛ balãther nayɩ fa jɩ maˈ. 62Dɩ Pɩɛr the khuirə da‐n bɩ sɔsɔsɔ.

Mɔ̃ wɩ maannɩ Jeju

(Mat 26:67–68; Mar 14:65)

63Tɩbɩlaakɛ n bɛranɩ Jeju wɩ‐n maanʋʋnɛ dɩ wa‐n bɩɩrnaa, 64a thii ƴɩɛ, sɩ wa‐n bulee: Jɛ ntɛɛkɛ n bɛ fɩnɩ. 65Dɩ wɩ kɔɔ mɩɩrɛ i kʋɛ thɩmɩa jɔɔjɔɔ a pɩɛraa.

Jeju so gʋʋrdaraa ƴɛra

(Mat 26:59–66; Mar 14:55–64; Jã 18:19–24)

66A dɩɩ wɩl, tibil kɔ̃tɩnasɔ, na bonɩ jidaar kɔ̃tɩna, na jɔfʋ dɩɩrdarasɔ kɔɔ kpar kha jɛ, sɩ dɩ wɩ kpa Jeju a pɔna awɩ so gʋʋrdarasɔɔ ƴɛra. 67Dɩ wa‐n bulee: Ado fɛr dʋɔn Kirisiti, sɔ sar. Dɩ Jeju birse wi: A mɩ so narrakɛ na pɛ gɩ haaraˈ. 68Dɩ a mɩ bule ni thɩ̃ɛ na tuəˈ. 69Sɩ a fʋna nɛnɛ̃kɛ dɩphã, mɛr tibili Bikuun na toore Thãgbaa fãga nyɔ̃bɔra. 70Dɩ wɛr fɛʋ bulee: A thɩɛna ga, Thãgbaa Bikuun ha fɩ bɛɛ? Dɩ Jeju birse wi: Sobɔr nɩ so, gɛr mɩ do ger. 71Dɩ wɩ so: Dɩ anye hale dɩ sa bir na ˈlo dɩkha ˈlo, gɩdonɩ asɩ thɛthɛ nɩɛrɛ dɩ mɩɩna ɔɔ nɔ.

Currently Selected:

Luki 22: LOBIRI

Highlight

Copy