Genesis 12
12
De hagahi o Abram
1Gai Tagi Maolunga ga hai ange gi Abram, “Hano gee mai i doo henua, ma oo dangada, ma de huaabodu o doo damana, gai koe hannoo gi de henua aagu e hagaago adu gi de goe.#Acts 7.2-3; Heb 11.8
2Gai au e hai naa goe gi se huaahenua soa mmao,
au e hagamanuuia naa goe;
au e hai naa doo ingoo gi maolunga,
gai koe e hai naa gi se mee e manuuia ai dangada.
3Au e hagamanuuia naa dangada e hagamanuuia ina goe,
gai e hagamalaia gilaadeu e hagamalaia ina goe;
gai denga huaadangada alodahi o henua i lalo
e manuuia naa i oo hiidinga.” #Gal 3.8
4Gai Abram ne hano, bei de hai a Tagi Maolunga gu tala ange gi de ia; gai a Lot ne hano madali ia. Gai Abram gu madahidu ma lima ono ngadau i de masavaa oona ne hano gee ai i Haran. 5Ia ne kave hogi dono bodu go Sarai, ma Lot, tama daane a dono daina daane, ma alaadeu mee alodahi ne mau, aama de gau hai hegau alaadeu ne kave mai i Haran, gai gilaadeu ne hulo ga tae gi de henua go Canaan.
6Gai Abram ga hano laa lo te henua ga hano ai gu dae gi Shechem, i de mommee iai de oak#12.6 de mommee iai de oak se mommee haimeedabu. o Moreh. De masavaa laa gai go de gau Canaan e nnoho i de henua laa. 7Gai Tagi Maolunga ga hakide ange gi Abram, ga hai ange, “Au e gaavange naa gi oo hagadiilinga de henua nei.” Gai Abram ne bae dahi mommee o ssigidaumaha ange gi Tagi Maolunga i kilaa, go de ia ne hakide ange laa gi de ia.#Acts 7.5; Gal 3.16
8Gai ia ne hano gee mai i kilaa ga hano gi de mounga i baasi i dua o Bethel, ga hagaduu dono hale malo; Bethel i de baasi i dai, gai Ai i de baasi i dua. Gai ia ne hagaduu ange hogi dahi mommee o ssigidaumaha ange gi Tagi Maolunga i kilaa, gai ia ga dalodalo ange gi Tagi Maolunga.
9Gai Abram ne dugu iho ono hale ga ngalue adu ange gi Negev.
Abram i Egypt
10Gai gu onge honga de henua, gai Abram ne hano gi Egypt ga noho ai, go hiidinga gu kona de laumalie de onge i honga de henua. 11Gai ga dai baa ange huu ia gi Egypt, gai ia ga hai ange gi dono bodu go Sarai, “Au e iloo bolo koe se hine mahamaha, 12gai de masavaa naa huu a de gau Egypt e gidee ai goe, gai gilaadeu ga hagataba, ‘Deenei dono bodu,’ gai gilaadeu e daa naa au ga magau, gai ga dugu goe gi mouli. 13Aude haihaia, daalaa bolo koe se daina hahine niiogu, gi abodonu mai ai gilaadeu gi de au i oo hiidinga, gai koe ga hagaola ai au.” #Gen 20.2; 26.7
14Gai ga dae huu Abram gi Egypt, gai de gau Egypt gu gidee bolo dono bodu se hine mahamaha mmao. 15Gai ga gidee huu e denga daane hai hegau o Pharaoh Sarai, gai gilaadeu ga tuhi ange ia gi Pharaoh. Gai de hine laa gu gaavee gi de hale o Pharaoh. 16Gai Pharaoh ga abodonu ange gi Abram i hiidinga o Sarai, gai Abram gu maua hanu ssiibi, ma kaau, ma donkey daane ma donkey haahine, ma daane ma haahine hai hegau, aama gamelo.
17Aagai Tagi Maolunga ga hai gi loomai denga mee hagamaakau gi honga o Pharaoh ma dangada i dono hale, i hiidinga o Sarai, de bodu o Abram. 18Gai Pharaoh ga aalu Abram gi humai, ga hai ange, “Gu aha gu hai mai ai nei goe de hegau nei gi de au? Gu aha tee tala mai ai laa goe bolo de hine nei go doo bodu donu? 19Gai gu aha goe gu hagadaba ai laa goe bolo ia go doo daina hahine? Gai au ne kave ia e hai ai dogu bodu. Tilo, deenei doo bodu, gaavee ia ga hulo ai gooluu mai i kinei!” 20Gai Pharaoh ga basa ange gi ono daane, gai gilaadeu ga hai ia gi hano madali dono bodu ma ana mee alodahi.
Currently Selected:
Genesis 12: DBD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
