uYohane uYohane 8

uYohane 8

1uYesu ke waya eNtabeni yemiNquma. 2Kwathi kwakusa, wabuya wangena etempileni; baye bonke abantu besiza kuye; wahlala phantsi, wabafundisa. 3Ababhali nabaFarisi bazisa kuye umfazi obanjwe ekrexeza; bammisa ke esazulwini, 4bathi kuye, Mfundisi, lo mfazi wabanjwa ekrexeza, kanye kuloo ntlondi. 5Ke kaloku, emthethweni uMoses wasiyalela ukuba abanjalo bagityiselwe ngamatye; 6Bakutsho ke oko, bemlinga, ukuze babe nokummangalela. Kodwa uYesu, ethobe phantsi, wabhala ngomnwe emhlabeni, ngokungathi akeva. 7Uthe ke bakumana bembuza, waphakama, wathi kubo, Ongenasono kuni makaqale amgibisele ngelitye. 8Wabuya wathoba, wabhala emhlabeni. 9Bathe ke bona bakuva, besohlwaywa naluvalo lwabo, baphuma ngabanye, beqalela kwabakhulu, kwada kwaba kwabokugqibela. Wasala yedwa uYesu, waye umfazi emi phakathi. 10Ephakamile ke uYesu, akabona mntu kwakuphela ngumfazi lowo; wathi kuye, Mfazindini, baphi na abo bamangaleli bakho? Akukho ukugwebileyo na? 11Wathi ke yena, Noko amnye, Nkosi. Wathi ke uYesu kuyo, Nam andikugwebi; hamba, ungabi sona. 12Wabuya ngoko uYesu wathetha kubo, esithi, Ndim ukhanyiselo lwehlabathi; lowo undilandelayo akasayi kuhamba ebumnyameni; yena uya kuba nalo ukhanyiso lobomi. 13Bathe ngoko abaFarisi kuye, Wena uyazingqinela; Ingxelo yakho ayinyanisekanga. 14Waphendula uYesu wathi kubo, Nokuba ndithi ndizingqinele mna ngokwam, buyinene ubungqina bam; ngokuba ndiyazi apho ndavela khona, nalapho ndiya khona; ke nina anazi apho ndivela khona, nalapho ndiya khona. 15Nina nigweba ngokwenyama; mna andigwebi mntu. 16Nokuba ndithi ndigwebe mna, umgwebo wam uyinene; ngokuba andindedwa, ndim noBawo owandithumayo. 17Nasemthethweni wenu ke kubhaliwe kwathiwa, Ubungqina babantu ababini buyinene. 18Mna ndingulowo uzingqinelayo; uyandingqinela nalowo wandithumayo, uBawo. 19Bathi ngoko kuye, Uphi na uYihlo? Waphendula uYesu wathi, Anindazi mna; anindazi noBawo; ukuba benindazile mna, ninge nimazile noBawo. 20Loo mazwi wawathetha uYesu ngasemkhumbini wokulondoloza imali, efundisa endlwini kaThixo. Akubangakho namnye umsa izandla; ngokuba belingekafiki ilixa lakhe. 21Wabuya ngoko uYesu wathi kubo, Ndiyemka mna; niya kundifuna, nifele esonweni senu; apho ndiya khona mna, aninako ukufika nina. 22Ayesithi ngoko amaYuda, Angaba uya kuzibulala na? ngokuba esithi, Apho ndiya khona mna, aninako ukufika nina. 23Wathi kuwo, Nina ningabangaphantsi; mna ndingowaphezulu; nina ningabeli hlabathi; mna andingoweli hlabathi. 24Ndatsho ngoko kuni ukuthi, Niya kufela ezonweni zenu; kuba ekubeni nithe anakholwa ukuba ndinguye, niya kufela ezonweni zenu. 25Athi ngoko kuye, Ungubani na? Athi kubo uYesu, Ndiyiloo nto ndayixelayo kuni kwasekuqaleni. 26Ndineendawo ezininzi zokuthetha nokugweba ngani; lowo wandithumayo uyinene; ndaye mna ndithetha ehlabathini, izinto endazivayo kuye, ndizithethe. 27Akaqondanga ukuba ebethetha ngoYise kuwo. 28Wathi ngoko uYesu kuwo, Xa nithe namphakamisa uNyana woMntu, noqonda oko ukuba ndinguye, nokuba andenzi nto ngokwam; ndisuka ndizithethe ezi zinto njengoko wandifundisayo uBawo. 29Lowo wandithumayo unam; uBawo akandishiyanga ndedwa; kuba mna ndihlala ndizenza izinto ezikholekileyo kuye. 30Akubon’ ukuba uyazithetha ezi zinto, bakholwa kuye, baba baninzi. 31Uthe ngoko uYesu kuloo maYuda akholiweyo kuye, Ukuba nina nithe nahlala elizwini lam, noba ningabafundi bam, inyaniso. 32Naniya kuyazi inyaniso, yaye inyaniso iya kunikhulula. 33Aphendula athi kuye, Thina siyimbewu ka-Abraham, asizanga sibe ngamakhoboka amntu; utsho ngani na ukuthi, Niya kukhululwa? 34Wawaphendula uYesu wathi, Inene, inene, ndithi kuni, Bonke abenza isono bangamakhoboka esono. 35Ikhoboka ke alihlali endlwini ngonaphakade; ngunyana ohlala ngonaphakade. 36Ngoko ukuba uNyana uthe wanikhulula, noba nikhululekile inene. 37Ndiyazi ukuba niyimbewu ka-Abraham; ke nifuna ukundibulala, ngokuba ilizwi lam lingenakuhamba kuni. 38Mna ndithetha endikubonileyo kuBawo; nani ke nenza enikubonileyo kuyihlo. 39Aphendula athi kuye, Ubawo nguAbraham. Athi kuwo uYesu, Ukuba beningabantwana baka-Abraham, ninge niyenza imisebenzi ka-Abraham. 40Kaloku ke, nifuna ukubulala mna, mntu unixelele inyaniso endayiva kuThixo; akakwenzanga oko uAbraham. 41Nina nenza imisebenzi yooyihlo. Athi ngoko kuye, Thina asizelwe ngabuhenyu; mnye uBawo wethu, uThixo. 42Uthe ke uYesu kuwo, Ukuba uThixo ebenguYihlo, ninge nindithanda; kuba mna ndaphuma kuThixo, ndifikile ke; kuba andizanga ngokwam, nguye owandithumayo. 43Yini na ukuba ningayiqondi intetho yam? ngenxa yokuba ningenakuliva ilizwi lam. 44Nina ningaboyihlo uMtyholi, neenkanuko zoyihlo niyathanda ukuzenza. Yena waye esisibulala-mntu kwasekuqaleni, akemi enyanisweni, ngokuba akukho nyaniso kuye. Xa sukuba ethetha ubuxoki, uthetha okukokwakhe; ngokuba ulixoki, noyise wawo. 45Mna ke, ngokuba ndithetha inyaniso, anikholwa ndim. 46Ngubani na kuni ondohlwayayo ngenxa yesono? Ukuba ke ndithetha inyaniso, kungani na ukuba ningakholwa ndim? 47Lowo ungokaThixo, uyaweva amazwi kaThixo; ngenxa yoko aniweva nina, ngokuba ningengabakaThixo. 48Aphendula ke ngoko amaYuda, athi kuye, Asitsho na ukuthi, ungumSamariya na, kwaye unedemon? 49Waphendula uYesu wathi, Andinademon mna; ndibeka uBawo; nina ke nibe nindihlaza. 50Mna ke andifuni luzuko lwam; ukho lowo ufunayo, ugwebayo. 51Inene, inene, ndithi kuni, Ukuba umntu uthe waligcina ilizwi lam, akasayi kuza abone kufa naphakade. 52Athi ngoko amaYuda kuye, Kukalokunje, siyazi ukuba unedemon. uAbraham wafa, nabo abaprofeti bafa; wena ke uthi, Ukuba umntu uthe waligcina ilizwi lam, akasayi kuza eve kufa naphakade. 53Wena ungaba umkhulu yini na kunobawo wethu uAbraham, yena wafayo? nabaprofeti bafa; uzenza bani na? 54Waphendula uYesu wathi, Ukuba mna ndithi ndizizukise, uzuko lwam alungebi nto; nguBawo ondizukisayo; enithi nguThixo wenu; 55Kambe animazanga; Mna ke ndiyamazi; nokuba ndithe andimazi, ndoba ndilixoki njengani; ndiyamazi, ndiligcinile nelizwi lakhe. 56Uyihlo uAbraham wagcobela ukuwubona umhla wam, wawubona, wavuya. 57Athi ngoko amaYuda kuye, Ungekabi naminyaka imashumi mahlanu nje, umbonile na uAbraham? 58Wathi kuwo uYesu, Inene, inene, ndithi kuni, Engekabikho uAbraham, mna ndikho kade. 59Ngoko achola amatye ukuba amgibisele. Wazimela ke uYesu, waphuma etempileni, wacanda phakathi kwabo;

Currently Selected:

uYohane uYohane 8: CXB24

Highlight

Copy