Marko 16
16
O Isus uštel andar e mule
(Mt 28,1–8; Lk 24,1–12; Jn 20,1–10)
1Kana nakhlo o savato, e Marija andar e Magdala, e Marija e deja Jakovešći thaj e Saloma ćindine mirisno pomast te maćhen e Isusesko telo. 2Pa detharinako rano prvo đes ando kurko čim inkljisto o kham, đele po limori. 3Thaj dromesa phučenas jek avrja: “Ko lela amenđe o bar majdur katar o vudar e limoresko?” 4Ali kana aresline, dikhline kaj o bar sas već spidino majdur katar o limori vi ako sas godova zurale baro bar. 5Kana dine andre ando limori, dikhline pe desno rig terne manuše ande parne haljina sar bešel. E manušnja darajle. 6A vo phendas lenđe: “Na daran! Tumen roden e razapnime Isuse andar o Nazaret. Vo naj akate. Uštilo andar e mule! Ake dićhen o than kaj pašljolas. 7Ali tumen džan thaj phenen lešće učenikonenđe, thaj e Petrešće: ‘O Isus džal angle tumende ande Galileja. Okote dićhena les, sago vi kaj phendas tumenđe.’ ” 8E manušnja inkljistine andar o limori thaj našline okotar kaj astarda len o izdrape thaj e dar gajda khonikašće khanči či phendine, kaj daranas.#16,8 Varesave katar e majpurane grčke rukopisurja akate završin. Varesave rukopisurja save aven majposle silen akava majharno završetko: “Ali ubrzo avile e manušnja thaj sa mothodine e Petrešće thaj e aver učenikonenđe. Pale godova o Isus korkoro bičhaldas e učenikonen katar o istok džiko zapad e sveto porukasa savi nikada či propadnila, te e manuša zauvek šaj aven spasime!”
[Ande varesave katar e majpurane rukopisurja naj akala stihurja 9–20.]
O Isus sikadol pire učenikonenđe
(Mt 28,9–10; Jn 20,11–18)
9[Kana o Isus uštilo andar e mule detharinako rano prvo đes ando kurko, majsigo sikadilo e Marijaće andar e Magdala, andar savi majsigo trada efta bilačhe duhonen. 10Voj đeli thaj javisarda godova okolenđe save sas lesa, a save akana tugujin thaj roven. 11Kana von ašundine kaj si o Isus džudo thaj kaj voj dikhla les, či paćajine.
O Isus sikavel pe e duje učenikonenđe
(Lk 24,13–35)
12Pale godova e Isusesko izgled promenisajlo thaj sikadilo pire duje učenikonenđe dok džanas ande aver gav. 13Kana pindžardine les, boldine pe thaj godova javisardine aver učenikonenđe, ali ni lenđe či paćajine.
E učenikonengo poslanje
(Mt 28,16–20; Lk 24,36–49; Jn 20,19–23; Dap 1,6–8)
14Pale godova o Isus sikadilo e dešujeće apostolenđe dok hanas pale sinija. Thaj ukorisarda len pale lengo bipaćipe thaj lenđe zurale ile kaj či paćajine okolenđe save dikhline les nakon so uštilo andar e mule.
15Askal phendas lenđe: “Džan pe sasto them thaj propovedin e Bahtali nevimata sa e themešće! 16Ko paćala thaj bolelpe, spasilape, a ko či paćala, osudilape. 17A akala čudesne znakurja pratina okolen save paćan: ande mungro alav tradena e bilačhe duhonen andar e manuša, ćerena svato neve čhibjenca, 18lena e sapen ande vas, ako vareso otrovno pijen, či naudila lenđe, čhona pire vas pe nasvale manuša thaj von sastona.”
O Isus vazdino ando nebo
(Lk 24,50–53; Dap 1,9–11)
19Pale godova kana o Gospod Isus godova phendas lenđe, sas vazdino ando nebo thaj bešlo pe Devlešći desno rig. 20E učenikurja đele thaj propovedinas e Bahtali nevimata pe sa e thana. A o Gospod pomožilas lenđe thaj prekal lende potvrdilas pire alava e čudesne znakonenca save pratinas len.]
Currently Selected:
Marko 16: RČB
Highlight
Share
Copy
Want to have your highlights saved across all your devices? Sign up or sign in
