मत्ती 27
27
पिलातोन सामने येसु
(मरकुस 15:1; लुका 23:1-2; योहान 18:28-32)
1हिमी जेतार सोंदारे होय गोयो ती प्रधान पुजारू एने माणसो मायला डाहला पुढारी माणसे जे येसु काजे मारनेण छोमचू कोऱ्या. 2जे तीना काजे बांद्या एने लीजायीन पिलात सुभेदारोन हातोमा सोप देदा.
यहुदा इस्कारीयोतन आत्महत्या
3जेतार सोंदारे धोरावने वावू यहुदा देख्यू कि चू गुणावू ठेराय गोयलु छे, चू पोस्तायु एने चे तीस चांदीन सिक्का प्रधान पुजारू एने पुढारी इंदरे सामने पोछु लाव्यू. 4एने कोयू, “मे बेगुना काजे बिगर गुणावावा काजे लुय वोयाळनेन कोरता धोरावीन पाप कोरलु छे,” चे कोया “आमुक काय? तू जाणे.” 5तेत्यार चू तीनु शिक्का काजे मंदीरमा नाखदिन जात रोयू एने जायीन आपसुत फासी लागाळीन मोर गोयू.
6प्रधान पुजारू तीना शिक्का काजे लीन कोयू, “इनाक भोंडारमा मेकने वारू नी होय काहाकि यो लुयोन किमोत छे.” 7आखरी चे छोमचू कोरीन तिना चांदीन सिक्कान परदेशा काजे गाळनेन कोरता कुमायडान खेत मुले ली लेदा. 8इनान वोजेसी चो खेत आज तोक लुयोन खेत कोवायतेलो छे. 9तेत्यार यो वचन यीर्मया भविष्य कोरतान लारे कोवाय गोयलो होतो चो पुरो होयो “चे तीस चांदीन सिक्का मतलब तिना ठेरावला किमोत काजे (जीनाक इस्राईलोन पुऱ्यामा गोथो कोतरा जोना ठेरावला होता) ली लेदा, 10एने जोसू प्रभू मेसेक आग्या आपलु होतु तोसुच तीनुक कुमायडान खेतोक पोयशापोर आप देदु.”
पिलातुसोन येसु काजे सवाल
(मरकुस 15:2-5; लुका 23:3-5; योहान 18:33-38)
11जेतार येसु सुभेदारोन सामने उभू होतु ती सुभेदार हिनाक पुछु, “काय तू यहुदिन राजा छे?” येसु तिना काजे कोयू, “तू खुदुत कोयने बाज रोयू.” 12जेतार प्रधान पुजारू एने डायला पोर गुणू लागाळ रोया होता, ती चू काय जोवाब नी आप्यू. 13तिना पोरसी पिलात तीना काजे कोयू, “काय तू नी सोमवतू कि ये तारा खिलापमा कोतरा गोवाया आपने बाज रोया?” 14बाकीन चू तीना काजे एक वातोन बी जोवाब नी आप्यू, न्या तोक कि सुभेदार काजे मोटी नोवलाय लागी.
येसु काजे छुळनेमा असफल
(मरकुस 15:6-15; लुका 23:13-25; योहान 18:39)
15सुभेदारोन जी नोवली रिती होती कि तिना वोलांडोनोन तीहीवारोमा माणसोन कोरता काहना एक बोंदी वावा काजे जीनाक जू जुवे तीनाक छुळ देतला. 16तिने टेमे तेरेनचा बरब्बा नावोन एक बोंदी होतु. 17आखरी जेतार चे एखठा होया, ती पिलात तीनु काजे कोयू, “तुमु काजे कून जुवे कि मे तूमरेन कोरीन छुळ दोम? बरब्बा काजे, नीती येसु काजे जू मसिह कोवायतलु छे?” 18काहाकि चू जानतू होतु कि चे हिनाक दोगासी धोरावला छे. 19जेतार चू नियावोन गादीपोर बोसलु होतु ती हेरी लाडी हिनाक कोय मुकली, “तू हीना धोरमीन मामलामा हात झुन घालतू, काहाकि मे आज सोपनामा हेरे लारे जादा दुख उठावली छे”?
20प्रधान पुजारू एने डाह-डाहा माणसो काजे जोताळ्या कि चे बरब्बा काजे मांग लेये, एने येसुन नास कोरावे. 21सुभेदार तीनु काजे पुछु, “इनू दुयुमा गोथू कून जुवे कि मे तुमरेन कोरता छुळ दोम?” चे कोया, “बरब्बा काजे.” 22पिलात तीनु काजे पुछु, “ती येसु काजे जू मसिह कोवायतलु छे, काय कोरो?” आखा तीना काजे कोया, “चू ख्रुस पोर चडवाय जाय” 23सुबेदार कोयू, “काहा, होयू काय बुराई कोर रोयू?” बाकीन चे एने बी आयळी आयळीन कोयने बाज गोया, “हिनाक ख्रुस पोर चढावू”. 24जेतार पिलात देख्यू कि काहीन होयतो नी बाकीन एरेन उलटोत भोडकनेपोर छे, ती चू पाणी लीन गोरदीन सामने खुद हात धुवीन कोयू, “मे इना धोरमीन लुयसी बिना गुणावावू छे; तुमुत जाणे.” 25आखा माणसे जोवाब आप्या, “एरू लुय आमरेपोर एने आमरा पुऱ्या पोर होये” 26इनापोरसी चू बरब्बा काजे छुळ देदु, एने येसु काजे चाबका दिन सोप देदू, कि ख्रुस पोर चोळाव देये.
सिपायळान लारे येसुन अपमान
(मरकुस 15:16-20; योहान 19:2-3)
27ती सुभेदारोन सिपायळा येसु काजे किल्लामा लीजायीन आखी पोलटोन हेरे चारू धोळे एखठा कोऱ्या, 28एने तेरा छिंदरा निकावीन तीनाक लाल रोंगोन झोगु पेहेराव्या, 29एने झाडक्यान मुकुट गुथीन हेरा मुंडका पोर मेक्या, एने तेरा जेवळे हातोमा लाकळो आप्या एने हेरे ओगोव मांडा टेकिन हेरी मोजाक उळावने बाज गोया एने कोया, “हे यहुदिन राजा, नमस्कार” 30एने हेरे पोर थूक्या, एने चो लाकळो लीन हेरा मुंडका पोर देने बाज गोया. 31जेतार चे हेरी मोजाक उळाव लेदला होता, ती हेरु झोगु हेर पोर गोथो निकावीन पोछा हिनाक हेरा छिंदरा हिनाक पेहेराव्या, एने ख्रुस पोर चोळावने कोरीन लीगोया.
येसुक ख्रुस पोर चोळावनो
(मरकुस 15:21-32; लुका 23:26-39; योहान 19:17-19)
32बारथे जाता जायीन हिनुक शिमोन नावोन कुरेनी माणूस भेटायु चे हिनाक बिना कामोन धोऱ्या कि हेरु ख्रुस हाकलीन ली चाले. 33तिना ठीकानापोर जो गुलगुता मतलब खोपडीन ठीकान कोवायतो होतो, 34चे पित्त भेसकलो आंगुरोन रोस हिनाक पिणे कोरीन आप्या, बाकीन चू चाखीन पिणे नी हिंड्यू. 35तेत्यार चे तीनाक ख्रुस पोर चोळाव्या एने चिठ्या नाखीन हेरे छिंदरा वाट लेदा, 36एने चे बोसीन हेरु पेहरू देणे बाज गोया. 37एने तेरो गुणान पोतरो तेरा मुनकान उपोर लागाळ्या कि “यु यहुदिन राजा येसु छे.” 38तेत्यार हेरे साते दुय डाखू एक जेवळे एने एक डाखरे, ख्रुस पोर चोळाय गोया. 39आवने-जाणे वावा मुंडको हालवीन-हालवीन हेरी बुराई कोरता होता, 40एने जे कोयता होता, “हे मंदीर काजे ढावने वावू एने तीन दाहळामा बोनावने वावू, आपना खुदो काजे ते वाचाड! ओगर तू परमेश्वरोन पुऱ्यु छे, ती ख्रुस पोर गोथू उतोर जा.” 41इना रितीसी प्रधान पुजारू भी शास्त्री एने डाह-डाहा साते मोजाक कोर कोरीन कोयता होता, 42“यु दिसरा काजे वाचाडयु, एने आपना खुदो काजे नी वाचाड सोकतू यु ते इस्राईलोन राजा छे हिमी ख्रुस पोर गोथू उतरी जाय ती आमु हिनापोर भुरसू कोरजे. 43चू परमेश्वर पोर भुरसू मेकलु छे; ओगर चू इनाक जुवे, ती हिमी छुळाव लेये काहाकि यु कोयलु होतु, ‘मे परमेश्वरोन पुऱ्यु छे.’” 44इना रितीसी डाखू बी जू हेरे साते ख्रुस पोर चोळावला होता, येरी बुराई कोरता होता.
येसुन जीव निकोवनो
(मरकुस 15:33-41; लुका 23:44-49; योहान 19:28-30)
45दिसू गोथा लीन तिसरे टेम तोक आखा देसोमा आंदारो छावायला रोयो. 46तिसरे प्रोहोरोन साते येसु मोटला बुलोसी आयळीन कोयू, “एली, एली, लमाशबक्तनी”? मतलब “हे मारा परमेश्वर, हे मारा परमेश्वर, तू मेसेक काहा छुळ देदु?” 47जे चा उबरोयला होता, हिनामा गोथा कोतरा जोना यो सोमवीन कोया, “यु ते एलिया काजे आयळी रोयू.” 48तीनामा गोथू एक तेतारुत दोवळीन आव्यु एने स्पंच लीन आंबोमा डूबाडयु, एने लाकळापोर मेकीन हिनाक चूसाड्यू. 49दिसरा कोया, “रोय जावू, देखसु एलिया हिनाक वाचाडने आवे कि नी.” 50ती येसु पोछु मोटला बुलोसी आयळीन जीव छुळ देदु. 51एने देखू, मंदीरोन पोडदु उपोर गोथो नेचू तोक फाटीन दुय तूकडा होय गोया एने धोरती हाल गोयी बोयळा तोडकि गोया, 52एने मोळवाट्या उगळी गोया एने मोरला चुखला माणसोन जादा धोळे जीव उठ्या, 53एने हेरा जीव उठनेन ओवतेन चे मोळवाट्यामा गोथा निकवीन चुखला नोगोरमा गोया एने जादा जोना काजे देखाय पोळ्या. 54तेत्यार सुभेदार एने जे हिंदरे साते येसुन पेहरु दि रोया होता, भूकंप एने जो काय होयलो होतो तीनाक देखीन जादा बिह गोया एने कोया, “छाचलीन यु परमेश्वरोन पुऱ्यु होतु” 55चा घोणा सोवटा बायरा जे गलीलसी येसुन सेवा कोरता जायीन हेरे साते आवला होता, नांबे गोथा यो देख रोया होता. 56तीनामा मरीयम मगदलीनी, एने याकुब एने योसेफोन आया मरीयम, एने जब्दिन पुऱ्यान आया होती.
येसुक गाळनो
(मरकुस 15:42-47; लुका 23:50-56; योहान 19:38-42)
57जेतार सांतो होयो ती युसूफ नावोन अरिमतियाह एक मालदार माणूस जू खुदुत येसुन चेलु होतु, आयु. 58चू पिलातुसोनचा जायीन येसुन धोळे मांग्यू इनापोरसी पिलात आपनेन आग्या आप्यो. 59युसूफ धोळ लेदू, एने धोव्वा चादरामा गुंडाव्यू, 60एने तीनाक हेरा नोवला मोळवाट्यामा मेक्यू जीनाक चू टेकळामा खुदाळलु होतु, एने मोळवाट्यान झोपला पोर मोटलु दोगळू धोकलीन जात रोयू. 61मरीयम मगदलीनी एने दिसरी मरीयम चा मोळवाट्यो सामने बोठ रोया होता.
कबरोन राखवाव
62दिसरे दाहळे तीयारीन दाहळेन दिसरू दाहळू होतु, प्रधान पुजारू एने फरुशी पिलातुसोनचा एखठा होयीन कोया, 63“हे माहाराज, आमुक फोम छे कि चू बुलावने वावू जीवतू होतु कोयलु होतु, मे तीन दाहळान ओवतेन जीव उठीस. 64आखरी आग्या आप कि तीन दाहळा तोक मोळवाट्यान राखवावी कोराय जाय, ओसो नी होयनो जुवे कि हेरा चेला आवीन हिनाक चूर लीजाय एने माणसो काजे कोयने बाज जाय, ‘चू मोरलोमा गोथू जीव उठलु छे’ ती पोछलु धोकु पेहेले गोथो बी बुरु होयसे.” 65पिलात तीनु काजे कोयू, “तुमरे जुव ते राखवाव्या ते छे जावू, आपना सोमोजोन अनसारे राखवावी कोरु.” 66आखरी चे राखवाव्या काजे साते लीजायीन, दोगळा पोर छापू लागाळीन मोळवाट्यान राखवावी कोऱ्या.
Currently Selected:
मत्ती 27: BFBNT
Highlight
Share
Copy
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.
मत्ती 27
27
पिलातोन सामने येसु
(मरकुस 15:1; लुका 23:1-2; योहान 18:28-32)
1हिमी जेतार सोंदारे होय गोयो ती प्रधान पुजारू एने माणसो मायला डाहला पुढारी माणसे जे येसु काजे मारनेण छोमचू कोऱ्या. 2जे तीना काजे बांद्या एने लीजायीन पिलात सुभेदारोन हातोमा सोप देदा.
यहुदा इस्कारीयोतन आत्महत्या
3जेतार सोंदारे धोरावने वावू यहुदा देख्यू कि चू गुणावू ठेराय गोयलु छे, चू पोस्तायु एने चे तीस चांदीन सिक्का प्रधान पुजारू एने पुढारी इंदरे सामने पोछु लाव्यू. 4एने कोयू, “मे बेगुना काजे बिगर गुणावावा काजे लुय वोयाळनेन कोरता धोरावीन पाप कोरलु छे,” चे कोया “आमुक काय? तू जाणे.” 5तेत्यार चू तीनु शिक्का काजे मंदीरमा नाखदिन जात रोयू एने जायीन आपसुत फासी लागाळीन मोर गोयू.
6प्रधान पुजारू तीना शिक्का काजे लीन कोयू, “इनाक भोंडारमा मेकने वारू नी होय काहाकि यो लुयोन किमोत छे.” 7आखरी चे छोमचू कोरीन तिना चांदीन सिक्कान परदेशा काजे गाळनेन कोरता कुमायडान खेत मुले ली लेदा. 8इनान वोजेसी चो खेत आज तोक लुयोन खेत कोवायतेलो छे. 9तेत्यार यो वचन यीर्मया भविष्य कोरतान लारे कोवाय गोयलो होतो चो पुरो होयो “चे तीस चांदीन सिक्का मतलब तिना ठेरावला किमोत काजे (जीनाक इस्राईलोन पुऱ्यामा गोथो कोतरा जोना ठेरावला होता) ली लेदा, 10एने जोसू प्रभू मेसेक आग्या आपलु होतु तोसुच तीनुक कुमायडान खेतोक पोयशापोर आप देदु.”
पिलातुसोन येसु काजे सवाल
(मरकुस 15:2-5; लुका 23:3-5; योहान 18:33-38)
11जेतार येसु सुभेदारोन सामने उभू होतु ती सुभेदार हिनाक पुछु, “काय तू यहुदिन राजा छे?” येसु तिना काजे कोयू, “तू खुदुत कोयने बाज रोयू.” 12जेतार प्रधान पुजारू एने डायला पोर गुणू लागाळ रोया होता, ती चू काय जोवाब नी आप्यू. 13तिना पोरसी पिलात तीना काजे कोयू, “काय तू नी सोमवतू कि ये तारा खिलापमा कोतरा गोवाया आपने बाज रोया?” 14बाकीन चू तीना काजे एक वातोन बी जोवाब नी आप्यू, न्या तोक कि सुभेदार काजे मोटी नोवलाय लागी.
येसु काजे छुळनेमा असफल
(मरकुस 15:6-15; लुका 23:13-25; योहान 18:39)
15सुभेदारोन जी नोवली रिती होती कि तिना वोलांडोनोन तीहीवारोमा माणसोन कोरता काहना एक बोंदी वावा काजे जीनाक जू जुवे तीनाक छुळ देतला. 16तिने टेमे तेरेनचा बरब्बा नावोन एक बोंदी होतु. 17आखरी जेतार चे एखठा होया, ती पिलात तीनु काजे कोयू, “तुमु काजे कून जुवे कि मे तूमरेन कोरीन छुळ दोम? बरब्बा काजे, नीती येसु काजे जू मसिह कोवायतलु छे?” 18काहाकि चू जानतू होतु कि चे हिनाक दोगासी धोरावला छे. 19जेतार चू नियावोन गादीपोर बोसलु होतु ती हेरी लाडी हिनाक कोय मुकली, “तू हीना धोरमीन मामलामा हात झुन घालतू, काहाकि मे आज सोपनामा हेरे लारे जादा दुख उठावली छे”?
20प्रधान पुजारू एने डाह-डाहा माणसो काजे जोताळ्या कि चे बरब्बा काजे मांग लेये, एने येसुन नास कोरावे. 21सुभेदार तीनु काजे पुछु, “इनू दुयुमा गोथू कून जुवे कि मे तुमरेन कोरता छुळ दोम?” चे कोया, “बरब्बा काजे.” 22पिलात तीनु काजे पुछु, “ती येसु काजे जू मसिह कोवायतलु छे, काय कोरो?” आखा तीना काजे कोया, “चू ख्रुस पोर चडवाय जाय” 23सुबेदार कोयू, “काहा, होयू काय बुराई कोर रोयू?” बाकीन चे एने बी आयळी आयळीन कोयने बाज गोया, “हिनाक ख्रुस पोर चढावू”. 24जेतार पिलात देख्यू कि काहीन होयतो नी बाकीन एरेन उलटोत भोडकनेपोर छे, ती चू पाणी लीन गोरदीन सामने खुद हात धुवीन कोयू, “मे इना धोरमीन लुयसी बिना गुणावावू छे; तुमुत जाणे.” 25आखा माणसे जोवाब आप्या, “एरू लुय आमरेपोर एने आमरा पुऱ्या पोर होये” 26इनापोरसी चू बरब्बा काजे छुळ देदु, एने येसु काजे चाबका दिन सोप देदू, कि ख्रुस पोर चोळाव देये.
सिपायळान लारे येसुन अपमान
(मरकुस 15:16-20; योहान 19:2-3)
27ती सुभेदारोन सिपायळा येसु काजे किल्लामा लीजायीन आखी पोलटोन हेरे चारू धोळे एखठा कोऱ्या, 28एने तेरा छिंदरा निकावीन तीनाक लाल रोंगोन झोगु पेहेराव्या, 29एने झाडक्यान मुकुट गुथीन हेरा मुंडका पोर मेक्या, एने तेरा जेवळे हातोमा लाकळो आप्या एने हेरे ओगोव मांडा टेकिन हेरी मोजाक उळावने बाज गोया एने कोया, “हे यहुदिन राजा, नमस्कार” 30एने हेरे पोर थूक्या, एने चो लाकळो लीन हेरा मुंडका पोर देने बाज गोया. 31जेतार चे हेरी मोजाक उळाव लेदला होता, ती हेरु झोगु हेर पोर गोथो निकावीन पोछा हिनाक हेरा छिंदरा हिनाक पेहेराव्या, एने ख्रुस पोर चोळावने कोरीन लीगोया.
येसुक ख्रुस पोर चोळावनो
(मरकुस 15:21-32; लुका 23:26-39; योहान 19:17-19)
32बारथे जाता जायीन हिनुक शिमोन नावोन कुरेनी माणूस भेटायु चे हिनाक बिना कामोन धोऱ्या कि हेरु ख्रुस हाकलीन ली चाले. 33तिना ठीकानापोर जो गुलगुता मतलब खोपडीन ठीकान कोवायतो होतो, 34चे पित्त भेसकलो आंगुरोन रोस हिनाक पिणे कोरीन आप्या, बाकीन चू चाखीन पिणे नी हिंड्यू. 35तेत्यार चे तीनाक ख्रुस पोर चोळाव्या एने चिठ्या नाखीन हेरे छिंदरा वाट लेदा, 36एने चे बोसीन हेरु पेहरू देणे बाज गोया. 37एने तेरो गुणान पोतरो तेरा मुनकान उपोर लागाळ्या कि “यु यहुदिन राजा येसु छे.” 38तेत्यार हेरे साते दुय डाखू एक जेवळे एने एक डाखरे, ख्रुस पोर चोळाय गोया. 39आवने-जाणे वावा मुंडको हालवीन-हालवीन हेरी बुराई कोरता होता, 40एने जे कोयता होता, “हे मंदीर काजे ढावने वावू एने तीन दाहळामा बोनावने वावू, आपना खुदो काजे ते वाचाड! ओगर तू परमेश्वरोन पुऱ्यु छे, ती ख्रुस पोर गोथू उतोर जा.” 41इना रितीसी प्रधान पुजारू भी शास्त्री एने डाह-डाहा साते मोजाक कोर कोरीन कोयता होता, 42“यु दिसरा काजे वाचाडयु, एने आपना खुदो काजे नी वाचाड सोकतू यु ते इस्राईलोन राजा छे हिमी ख्रुस पोर गोथू उतरी जाय ती आमु हिनापोर भुरसू कोरजे. 43चू परमेश्वर पोर भुरसू मेकलु छे; ओगर चू इनाक जुवे, ती हिमी छुळाव लेये काहाकि यु कोयलु होतु, ‘मे परमेश्वरोन पुऱ्यु छे.’” 44इना रितीसी डाखू बी जू हेरे साते ख्रुस पोर चोळावला होता, येरी बुराई कोरता होता.
येसुन जीव निकोवनो
(मरकुस 15:33-41; लुका 23:44-49; योहान 19:28-30)
45दिसू गोथा लीन तिसरे टेम तोक आखा देसोमा आंदारो छावायला रोयो. 46तिसरे प्रोहोरोन साते येसु मोटला बुलोसी आयळीन कोयू, “एली, एली, लमाशबक्तनी”? मतलब “हे मारा परमेश्वर, हे मारा परमेश्वर, तू मेसेक काहा छुळ देदु?” 47जे चा उबरोयला होता, हिनामा गोथा कोतरा जोना यो सोमवीन कोया, “यु ते एलिया काजे आयळी रोयू.” 48तीनामा गोथू एक तेतारुत दोवळीन आव्यु एने स्पंच लीन आंबोमा डूबाडयु, एने लाकळापोर मेकीन हिनाक चूसाड्यू. 49दिसरा कोया, “रोय जावू, देखसु एलिया हिनाक वाचाडने आवे कि नी.” 50ती येसु पोछु मोटला बुलोसी आयळीन जीव छुळ देदु. 51एने देखू, मंदीरोन पोडदु उपोर गोथो नेचू तोक फाटीन दुय तूकडा होय गोया एने धोरती हाल गोयी बोयळा तोडकि गोया, 52एने मोळवाट्या उगळी गोया एने मोरला चुखला माणसोन जादा धोळे जीव उठ्या, 53एने हेरा जीव उठनेन ओवतेन चे मोळवाट्यामा गोथा निकवीन चुखला नोगोरमा गोया एने जादा जोना काजे देखाय पोळ्या. 54तेत्यार सुभेदार एने जे हिंदरे साते येसुन पेहरु दि रोया होता, भूकंप एने जो काय होयलो होतो तीनाक देखीन जादा बिह गोया एने कोया, “छाचलीन यु परमेश्वरोन पुऱ्यु होतु” 55चा घोणा सोवटा बायरा जे गलीलसी येसुन सेवा कोरता जायीन हेरे साते आवला होता, नांबे गोथा यो देख रोया होता. 56तीनामा मरीयम मगदलीनी, एने याकुब एने योसेफोन आया मरीयम, एने जब्दिन पुऱ्यान आया होती.
येसुक गाळनो
(मरकुस 15:42-47; लुका 23:50-56; योहान 19:38-42)
57जेतार सांतो होयो ती युसूफ नावोन अरिमतियाह एक मालदार माणूस जू खुदुत येसुन चेलु होतु, आयु. 58चू पिलातुसोनचा जायीन येसुन धोळे मांग्यू इनापोरसी पिलात आपनेन आग्या आप्यो. 59युसूफ धोळ लेदू, एने धोव्वा चादरामा गुंडाव्यू, 60एने तीनाक हेरा नोवला मोळवाट्यामा मेक्यू जीनाक चू टेकळामा खुदाळलु होतु, एने मोळवाट्यान झोपला पोर मोटलु दोगळू धोकलीन जात रोयू. 61मरीयम मगदलीनी एने दिसरी मरीयम चा मोळवाट्यो सामने बोठ रोया होता.
कबरोन राखवाव
62दिसरे दाहळे तीयारीन दाहळेन दिसरू दाहळू होतु, प्रधान पुजारू एने फरुशी पिलातुसोनचा एखठा होयीन कोया, 63“हे माहाराज, आमुक फोम छे कि चू बुलावने वावू जीवतू होतु कोयलु होतु, मे तीन दाहळान ओवतेन जीव उठीस. 64आखरी आग्या आप कि तीन दाहळा तोक मोळवाट्यान राखवावी कोराय जाय, ओसो नी होयनो जुवे कि हेरा चेला आवीन हिनाक चूर लीजाय एने माणसो काजे कोयने बाज जाय, ‘चू मोरलोमा गोथू जीव उठलु छे’ ती पोछलु धोकु पेहेले गोथो बी बुरु होयसे.” 65पिलात तीनु काजे कोयू, “तुमरे जुव ते राखवाव्या ते छे जावू, आपना सोमोजोन अनसारे राखवावी कोरु.” 66आखरी चे राखवाव्या काजे साते लीजायीन, दोगळा पोर छापू लागाळीन मोळवाट्यान राखवावी कोऱ्या.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.